Ubomi Ngamaxesha Okubhalwa KweBhayibhile—Umfama
“[UYesu] wathi kubafundi bakhe: ‘Ewe, isivuno sikhulu, kodwa abasebenzi bambalwa. Ngoko ke, bongozani iNkosi yesivuno ukuba ikhuphe abasebenzi baye esivunweni sayo.’”—MATEYU 9:37, 38.
UYESU wayedla ngokwenza imizekeliso ngokulima nangezixhobo zokulima xa ekufuna ukuphuhlisa iimfundiso ezibalulekileyo. (Mateyu 11:28-30; Marko 4:3-9; Luka 13:6-9) Kwakutheni? Kaloku wayephila nabantu abangabalimi. Abantu awayethetha nabo babekwazi ukulima kuba akuzange kutshintshe kangangeenkulungwane. Babeziqonda izinto awayebhekisela kuzo kuba babezenza mihla le. Wayebazi kakuhle yaye babechukumiseka zizinto awayebafundisa zona.—Mateyu 7:28.
Sinokulwenza nzulu uxabiso lwethu ngemizekeliso kaYesu nangezinye iingxelo zeBhayibhile ukuba sinolwazi oluthile ngomfama wenkulungwane yokuqala—izityalo awayezilima, izixhobo awayezisebenzisa neengxaki awayejamelana nazo.
Khawumbone umfama njengoko esenza umsebenzi wakhe. Funda izibhalo ezibonisiweyo, uze ubone ukuba ufunda ntoni kuzo.
Ixesha Lokuhlwayela
Ekhusele amehlo akhe kwimitha yelanga, umfama umi emnyango enukisa umoya ofumileyo. Iimvula ziye zawuthambisa umhlaba obugqatswe lilanga. Lifikile ixesha lokulima. Uxway’ egxen’ ikhuba elenziwe ngomthi esenjenjeya ukuya emasimini.
Ubopha iinkabi, aze aqalise ukulima. Isikali sivula ifolo kumhlaba olurhexe, kodwa azinzulwanga (1). Ekubeni umfama engafuni ukuphuma endimeni lize ikhuba libhanke—akafuni kukhangela ngasemva. (Luka 9:62) Akafanele aphume kumlimandlela wakhe yaye usebenzela ekubeni isiqwenga somhlaba wakhe uvelise kangangoko.
Ngoku amasimi alinyiwe yaye alungele ukuhlwayelwa. Ephethe ingxowa yerhasi ngesinye isandla, umfama uhlwayela ngempama le mbewu ibalulekileyo. (2). Kukho iindledlana zeenyawo ezinqumla kule ntsimi yakhe, ngenxa yoko ufuna ukuqinisekisa ukuba imbewu iwela “emhlabeni olungileyo.”—Luka 8:5, 8.
Emva kokuhlwayela kuya-erhwa. Umfama uerha intsimi yakhe esebenzisa isihlahla esinameva esirhuqwa ziinkabi. Iintaka ziyafika zize zicholachole le mbewu ngaphambi kokuba igqunyelelwe ngumhlaba. Ethubeni, umfama uyahlakula (3) ukuze avunguze umhlaba abulale nokhula olunokuminxa izithole ngaphambi kokuba zikhule.—Mateyu 13:7.
Ixesha Lokuvuna
Ziyaqengqeleka iinyanga. Imvula ziyana. Irhasi emasimini ibonakala imhlophe.—Yohane 4:35.
Ixesha lokuvuna lixesha elixakekileyo kumfama nakwintsapho yakhe. Umvuni ubamba isipha ngesandla sakhe sasekhohlo aze asirhele ngerhengqe. (4). Abanye bacholachola ezo zipha, baze bazibuthele ndawonye (5), bazilayishe kwiimbongolo okanye kwiinqwelo (6) zize zisiwe kwisanda eziza kubhulelwa kuso.
Ilanga ligqats’ ubhobhoyi. Intsapho iphumle ngaphantsi komthi womkhiwane. Iyancokola, ihleka njengoko isitya isonka, ugcado, iziqhamo ezomisiweyo neemifuno, ioli yomnquma neerasentyisi. Bathoba ngamanzi amnandi omthombo.—Duteronomi 8:7.
Kumasimi akude kufuphi, kukho abantu ababhikicayo (7). Abanye kubo abathath’ ntweni yaye abanamasimi.—Duteronomi 24:19-21.
Kamva, umfama uzandlala esandeni ezo zithungu. Iinkabi zirhuqa isileyi ukuze zibhule (8). (Duteronomi 25:4) Zize zisikwe ngamatye abukhali neentsinjana ezincinane ezingaphantsi kwesileyi.
Umfama ulinda impepho yasemva kwemini. (Rute 3:2) Marhatya, wela ezo nkozo esebenzisa ifolokhwe ende eyenziwe ngomthi okanye ‘umhlakulo wokwela’ (9). (Mateyu 3:12) Iinkozo ziwela emhlabeni uze umququ umke nomoya. Uyazela ade azigqibe zonke ezo nkozo.
Ekuphumeni kwelanga, umfazi womfama neentombi zakhe baqalisa ukusefa iinkozo kumahlalutye (10). Irhasi iwela ebhaskithini ngoxa wona amahlalutye ephoselwa ecaleni. Baye bafumana isivuno esihle kulo nyaka. Abasebenzi bagcina ukutya okuzinkozo okuseleyo ezingqayini (11). Size esinye sigcinwe koovimba.
Umfama wolula umzimba wakhe odiniweyo aze ahlole amasimi angqonge ilali. Kuthe ngco ngaphakathi njengoko ebona iindiza zezityalo ezahlukahlukeneyo kwezo akire—ezibonisa ukuba bekusetyenzwa. Ubukele abasebenzi besebenza ezidiliyeni nakumagcume eminquma, kwimithi yerharnati nakweyamakhiwane. Kude kufuphi, ummelwane olima egadini uphakamisa isandla ebulisa. Umhlaba uza kuvelisa iikomkomere, iintlumayo, iimbotyi, iilike, iiertyisi namatswele. Umfama uthi xha kancinane aze ondele esibhakabhakeni,aze enze umthandazo omfutshane ebulela uThixo ngendyebo amphe yona.—INdumiso 65:9-11.
[Imifanekiso ekwiphepha 28-30]
(Yiya kwimpapasho)