Ingxelo Yentlanganiso Yonyaka
Intlanganiso Ebibalasele Ngomanyano Nezicwangciso Ezichulumancisayo
IINTLANGANISO zonyaka zeWatch Tower Bible and Tract Society of Pennsylvania zisoloko zibangel’ imincili. Loo nto ibizicacele kwintlanganiso yonyaka ye-127, ebiqhutywa ngoMgqibelo, Oktobha 1, 2011! Iindwendwe ezimenywe zisuka ehlabathini lonke zahlanganisana kwiHolo Yendibano yaseJersey City, eNew Jersey, eUnited States.
UGerrit Lösch weQumrhu Elilawulayo wamkela izihlwele ezazizele luchulumanco. Waxelela iindwendwe ezivela kumazwe ezimalunga nama-85 ukuba umanyano ezilunandipha ehlabathini lonke lukhethekile. Olo manyano lunikela ubungqina obuhle yaye luzukisa uYehova. Enyanisweni, umanyano lwalungumxholo owawuvela rhoqo ebudeni bale ntlanganiso.
INGXELO ENTLE EVELA EMEXICO
Inxalenye yokuqala kucwangciso yaluchaza kakuhle umanyano lwabantu bakaYehova. UBaltasar Perla wadlan’ indlebe nabazalwana abathathu akhonza kunye nabo kwiBheteli yaseMexico ngokuphathelele ukudityaniswa kweeofisi zamasebe ezintandathu ezikuMbindi Merika nesebe laseMexico. Oku kudityaniswa kubangele ukuba intsapho yaseBheteli eMexico ibe nabazalwana beentlanga ezahlukahlukeneyo nabavela ehlabathini lonke. Ukuthontelana kwamaKristu esuka kumazwe awahlukeneyo kuye kwabangela ukukhuthazana. Kube ngathi uThixo uthathe ilaphu elikhulu lokosula waza wacima yonke imida yobuhlanga.
Olunye ucelomngeni loku kudityaniswa kwamasebe lube kukunceda abavakalisi baqonde ukuba abalahlwanga yintlangano kaYehova nangona iiofisi zamasebe zingasekho kumazwe abo. Ngenxa yoko, bandla ngalinye linonxibelelwano olukhuselekileyo lwe-e-mail ukuze nalawo akwimimandla ekwanti anxibelelane ngokuthe ngqo neofisi yesebe.
INGXELO EVELA EJAPAN
UJames Linton wesebe laseJapan uchaze indlela abazalwana bethu abachatshazelwa ngayo ziinyikima neetsunami ezahlasela eli lizwe ngoMatshi 2011. AmaNgqina amaninzi aswelekelwa ngabantu abathandayo aza aphulukana nezinto zawo. AmaNgqina ahlala komnye ummandla avula izindlu ezingaphezu kwama-3 100 kwakunye namakhulukhulu eemoto. Amatsha-ntliziyo eeKomiti Zokwakha Zenqila asebenza ngokuzimisela elungisa izindlu zabazalwana. Kanti amanye angaphezu kwe-1 700 ayesebenza naphi na apho kuyimfuneko. Iqela lamatsha-ntliziyo elisuka eUnited States lancedisa ekwakhiweni ngokutsha kweeHolo zoBukumkani, yaye angama-575 asebenza ngokuzithandela kweli phulo.
Kuye kwaqinisekiswa ukuba abo bachaphazelekileyo bayondliwa ngokomoya yaye bayathuthuzelwa. Abadala abangaphezu kwama-400 baye benza amatyelelo okwalusa kwiindawo ebezifuna oko. Inkxalabo yeQumrhu Elilawulayo iye yabonakala ngokuthi lithumele abaveleli abatyelela amasebe abasuka kwikomkhulu lehlabathi kummandla wentlekele ukuze bakhuthaze abazalwana. Amazwi avakalisa inkxalabo yamaNgqina asehlabathini lonke aye alukhuthazo gqitha.
UKUPHUMELELA AMADABI ASEZINKUNDLENI
Abaphulaphuli babebaz’ iindlebe njengoko uStephen Hardy wesebe laseBritani wayethetha ngamadabi akutshanje aye aphunyelelwa ezinkundleni. Ngokomzekelo, urhulumente waseFransi wayenyanzelisa ukuba umbutho esiwusebenzisayo eFransi uhlawule irhafu ezii-R626 zezigidi. Lo mba wasonjululwa xa iNkundla YaseYurophu Yamalungelo Abantu yema ngakwicala lethu, ibonisa ukuba urhulumente waseFransi uye watyeshela iGatya 9 leSindululo SaseYurophu, elikhusela inkululeko yonqulo. Amagama asetyenziswe kwesi sigwebo abonisa ukuba, lo mba ubungenanto yakwenza nemali, kuba sifundeka ngolu hlobo: “Ukwala ukugqala umbutho wonqulo, ukuwuvala, ukuthuka intlangano yonqulo, zonke ezo ziindlela zokuphazamisana nelungelo eliqinisekiswa liGatya 9 lesi Sindululo.”
Kanti iNkundla YaseYurophu Yamalungelo Abantu yema ngakwicala lethu kwityala elibandakanya iArmenia. Ukususela ngowe-1965, iNkundla YaseYurophu Yamalungelo Abantu ibisoloko isithi iSindululo SaseYurophu asibakhuseli abantu kwinkonzo yomkhosi esisinyanzelo. IsiGqeba Esiphezulu—icandelo eliphezulu leNkundla yaseYurophu—sakhupha umlomo wokuba “ukungavunywa kwenkonzo yasemkhosini, xa ikhatshwa zizizathu ezivakalayo nezinamandla,” kumele kungene ngaphantsi kweSindululo saseYurophu. Esi sigqibo sinyazela iArmenia namazwe anjengeAzerbaijan neTurkey ukuba ahlonele eli lungelo lifanayo.
IMISEBENZI YOKWAKHA
Kwalandela uGuy Pierce weQumrhu Elilawulayo, esitsho ukuba bonke abakhoyo bangathanda ukwazi ngomsebenzi wokwakha oza kwenziwa kwiSixeko saseNew York. Watshayelela ividiyo ebonisa utshintsho olwenzeka eWallkill, ePatterson, neziza ezisandul’ ukuthengwa eWarwick naseTuxedo, eNew York. EWallkill, indawo yokuhlala entsha iza kugqitywa ukwakhiwa ngowama-2014 yaye inamagumbi awongezelelekileyo angama-300.
Kukho izicwangciso zokwakha umhlaba oziihektare ezili-100 eWarwick. UMzalwan’ uPierce wathi: “Nangona singekaqiniseki ngokuthanda kukaYehova ngeWarwick, siza kuqhubeka nokwakha kweso siza ngenjongo yokufudusela ikomkhulu lehlabathi lamaNgqina kaYehova apho.” Kukho izicwangciso zokusebenzisa umhlaba oziihektare ezingama-20 okwisithuba seekhilomitha ezilishumi kumntla weWarwick ukuze kubekwe oomatshini nezinto zokwakha. UMzalwan’ uPierce wathi: “Xa sele sifumene imvume yokwakha, sinethemba lokuwugqiba wonke lo msebenzi ngeminyaka emine. Emva koko kuza kuthengiswa umhlaba wethu oseBrooklyn.”
UMzalwan’ uPierce wabuza: “Ngaba iQumrhu Elilawulayo liyitshintshile imbono yalo ngokusondela kwembandezelo enkulu?” Waphendula ngelithi: “Akunjalo konke konke. Ukuba imbandezelo enkulu iphazamisa izicwangciso zethu, kuya kuba kuhle kakhulu!”
YILUMKELE INGONYAMA EGQUMAYO
UStephen Lett, okwalilungu leQumrhu Elilawulayo, walandelisa ngokuxubusha eyoku-1 kaPetros 5:8 ethi: “Hlalani nithe qwa, nilindile. Utshaba lwenu, uMtyholi, luhambahamba njengengonyama egqumayo, efuna ubani engamqwengayo.” UMzalwan’ uLett wabonisa ukuba iimpawu eziliqela zeengonyama zenza umzekelo kaPetros ungene gingci kuMtyholi.
Ekubeni iingonyama zinamandla yaye zinamendu kunabantu, asifanele sizame ukulwa okanye ukushiya uSathana ngamandla ethu. Kufuneka sicele uncedo lukaYehova. (Isa. 40:31) Ingonyama iyachwechwa xa izingela, ngoko simele sibuphephe ubumnyama bokomoya, kuba kulapho azingela khona uSathana. Kanye njengokuba ingonyama ibulala inyamakazi engenabungozi, okanye ithole leqwarhashe elileleyo, ngoko uSathana akananceba yaye angathanda ukusibulala. Yaye xa sele ihluthi ingonyama, ishiya amaxhoba ayo engabonakali nokuba ayenjani na, kanye njengokuba “iimeko zokugqibela” zamaxhoba kaSathana okomoya ‘ziba mbi ngakumbi kunezokuqala.’ (2 Pet. 2:20) Ngoko sifanele simelane noSathana size sibambelele ngokuqinileyo kwimigaqo yeBhayibhile esiyifundileyo.—1 Pet. 5:9.
YIXABISE INDAWO YAKHO KWINDLU KAYEHOVA
USamuel Herd, isithethi esilandelayo esililungu leQumrhu Elilawulayo wathi: “Sonke sinendawo endlwini kaYehova.” Onke amaKristu anendawo “endlwini” kaThixo—itempile yakhe yokomoya—ilungiselelo lokumnqula ngokusekelwe kwidini lentlawulelo likaYesu. Yindawo emele igqalwe njengexabisekileyo. Kanye njengoDavide, sinqwenela ukuhlala ‘endlwini kaYehova yonke imihla yobomi bethu.’—INdu. 27:4.
Ebhekisela kwiNdumiso 92:12-14 uMzalwan’ uHerd wabuza, “UYehova usenza njani ukuba sichume?” Waphendula ngelithi: “Kwiparadesi yokomoya, uThixo usigcina sifudumele, uyasikhusela aze asinike amanzi enyaniso ahlaziyayo. Masimbulele ngenxa yoko.” UMzalwan’ uHerd waphinda wababongoza ngelithi abaphulaphuli: “Masaneliseke kukuhlala endlwini kaYehova—kungekhona okwethutyana kodwa ngonaphakade.”
AMAKRISTU AYALIHLONELA ILIZWI LIKATHIXO
UDavid Splane, okwalilungu leQumrhu Elilawulayo wayitsho kwintetho elandelayo into yokuba amaKristu okwenyaniso ebesoloko elihlonela iLizwi likaThixo. Ngenkulungwane yokuqala, athembela kulo ukuze azinzise imbambano yolwaluko. (IZe. 15:16, 17) Kodwa abanye ababezibiza ngokuba bangamaKristu ngenkulungwane yesibini ababefundiswe intanda-bulumko yamaGrike baqalisa ukubeka loo mfundiso ngaphambi kweZibhalo. Kamva, endaweni yeemfundiso zeBhayibhile abanye bafundisa iimbono zabo babebizwa ngokuba ngaBaseki beCawa nabalawuli baseRoma, besasaza iimfundiso ezininzi zobuxoki.
UMzalwan’ uSplane, wachaza ukuba kumzekeliso awawenzayo, uYesu wabonisa ukuba aya kuqhubeka ekho amaKristu athanjisiweyo emhlabeni aza kukhusela inyaniso. (Mat. 13:24-30) Asinakutsho siqiniseke ukuba ayengoobani. Noko ke, ukutyhubela iinkulungwane, amaninzi aye azigatya iinkolelo nezenzo ezingasekelwanga zibhalweni. Abanye kwaba yayinguBhishophu Omkhulu uAgobard waseLyons wenkulungwane yesithoba, uPeter of Bruys, uHenry waseLausanne, noValdès (okanye uWaldo) wenkulungwane ye-12, uJohn Wycliffe wenkulungwane ye-14, uWilliam Tyndale wenkulungwane ye-16, noHenry Grew noGeorge Storrs wenkulungwane ye-19. Namhlanje amaNgqina kaYehova ayaqhubeka ephakamisa imilinganiselo yeZibhalo aze agqale iBhayibhile njengesiseko senyaniso. Kungeso sizathu iQumrhu Elilawulayo liye kunyaka wama-2012 lakhetha umxholo osekelwe kuYohane 17:17 othi: “Ilizwi lakho liyinyaniso.”
UTSHINTSHO OLUVUYISAYO LOQEQESHO NENKONZO
Isaziso esenziwa nguAnthony Morris weQumrhu Elilawulayo sachaza utshintsho kubathunywa bevangeli noovulindlela abakhethekileyo. Ukususela ngoSeptemba 2012, kumazwe akhethiweyo kuza kuqhutywa iiklasi zeSikolo SeBhayibhile Sezibini EzingamaKristu. Itshintshiwe into ebesijoliswe kuyo iSikolo saseGiliyadi. Ukususela kuOktobha wonyaka odluleyo, bonke abo baqeqeshwe eGiliyadi ngabo bakuyo nayiphi na inkonzo yexesha elizeleyo ekhethekileyo—njengabathunywa bevangeli abangazange baye eGiliyadi, oovulindlela abakhethekileyo, abaveleli abahambahambayo, okanye abasebenzi baseBheteli. Abo baphumelele kwesi sikolo baya kusetyenziselwa ukomeleza abantu bakaThixo bekwiiofisi zamasebe, njengabaveleli abahambahambayo, okanye babe kwimimandla enabemi abaninzi apho baya kukhuthaza khona amabandla kumsebenzi wokushumayela.
Oovulindlela abakhethekileyo abongezelelekileyo baya kuqalisa ukushumayela kwimimandla ekwanti. Ukususela ngoJanuwari 1, 2012, abanye abaphumelele kwiSikolo SeBhayibhile Sabazalwana Abangatshatanga nakwiSikolo SeBhayibhile Sezibini EzingamaKristu baye bathunyelwa njengoovulindlela abakhethekileyo bokwexeshana ukuze baqalise baze bandise umsebenzi kwimihlaba ekwanti. Babeza kufumana izabelo njengoovulindlela abakhethekileyo kube kanye ngonyaka kangangeminyaka emithathu. Abo banemiphumo emihle banokunikwa izabelo ezisisigxina.
Ibimnandi kakhulu intlanganiso yonyaka yowama-2011. Silindele uYehova ukuba asikelele eli lungiselelo litsha lokomeleza umsebenzi wethu wokushumayela nokomeleza bonke abazalwana noodade—ukuze kuzukiswe igama lakhe.
[Ibhokisi/Imifanekiso ekwiphepha 18, 19]
UKWAZANA NGAKUMBI
Kwakolu cwangciso kwadliwan’ indlebe nabahlolokazi abahlanu kwabasithoba ababetshate namalungu eQumrhu Elilawulayo. UMarina Sydlik, uEdith Suiter, uMelita Jaracz, uMelba Barry, noSydney Barber babalisa ngendlela abayifumana ngayo inyaniso nangendlela abayiqala ngayo inkonzo yexesha elizeleyo. Ngamnye kubo wabalisela ababekho ngeenkumbulo ezimnandi, izinto ezazisenziwa ngabayeni babo neentsikelelo abazinandipha kunye nabo. Lwaqukunjelwa ngendlela echukumisayo olo dliwano-ndlebe, ngokuthi kucelwe ukuba bonke ababekho bacule ingoma 86 enomxholo othi “Amabhinqa Athembekileyo, Oodade AbangamaKristu.”
[Imifanekiso]
(Ngasentla) UDaniel noMarina Sydlik; uGrant noEdith Suiter; uTheodore noMelita Jaracz
(Ezantsi) ULloyd noMelba Barry; uCarey noSydney Barber
[Imaphu ekwiphepha 16]
(Ukuba ufuna inkcazelo ehlahlelwe kakuhle, yiya kwimpapasho)
Kwadityaniswa amasebe amathandathu ngaphantsi kolwalathiso lwesebe laseMexico
IMEXICO
IGUATEMALA
IHONDURAS
IEL SALVADOR
INICARAGUA
ICOSTA RICA
IPANAMA
[Umfanekiso okwiphepha 17]
Indlela esiza kuba yiyo isakhiwo sekomkhulu lehlabathi lamaNgqina kaYehova eWarwick, eNew York