Masiyeke Ukucinga Izinto Angazifuniyo UThixo!

1. Wathini umpostile uPawulos kumaKristu awayethanjisiwe?

UMPOSTILE uPawulos wathi kumaKristu awayephila ngexesha lakhe: “Musani ukumilisa okwale nkqubo yezinto.” (Roma 12:2) Kwakutheni ukuze awalumkise ngolo hlobo amadoda namabhinqa awayezinikele kuThixo nawayethanjiswe ngomoya oyingcwele?—Roma 1:7.

2-3. USathana uzama njani ukusenza sibhekele kuYehova? Sinokwenza njani ukuze siyeke ukucinga ngendlela engafanelekanga?

² UPawulos wayenexhala kuba wayebona ukuba amanye amaKristu ayeqalisa ukwenza izinto ngendlela ihlabathi likaSathana elizenza ngayo. (Efe. 4:17-19) Inokwenzeka nakuthi loo nto. USathana ngumlawuli weli hlabathi ibe unokusebenzisa iindlela ezahlukahlukeneyo ukuze asenze sibhekele kuYehova. Ngokomzekelo, ukuba sifuna ukubaluleka okanye ukuduma, uza kusebenzisa loo nto ukuze asibhekelise kuYehova. Usenokusebenzisa izinto esizifunde emakhayeni ethu, esikolweni nasekuhlaleni ukuze asenze sicinge ngendlela ayifunayo.

³ Ngaba inokwenzeka into yokuba siziyeke “izinto ezinqatyisiweyo [okanye ezendeleyo]” ezingqondweni zethu? (2 Kor. 10:4) Yiva ukuba uthini uPawulos xa ephendula: “Sibhukuqa iingcinga nayo yonke into ephakamileyo ephakanyiswa nxamnye nolwazi lukaThixo; yaye sithimba zonke iingcamango, sizenze zithobele uKristu.” (2 Kor. 10:5) Ngoko, kuyacaca ukuba xa sincedwa nguYehova sinokuyeka ukucinga ngendlela engafanelekanga. Njengokuba iyeza linokusiphilisa xa sigula, neLizwi LikaThixo linokusinceda siyeke ukucinga njengehlabathi likaSathana.

‘TSHINTSHANI IINGQONDO ZENU’

4. Abaninzi kuthi kwafuneka bayeke ntoni emva kokufunda iBhayibhile?

⁴ Khawucinge ngezinto ekwafuneka uziyeke emva kokufunda iBhayibhile waza wazixelela ukuba uza kukhonza uYehova. Abaninzi kuthi kwafuneka bayeke izinto ezimbi ababezenza. (1 Kor. 6:9-11) Simbulela nyhani uYehova ngokusinceda sohlukane nezo zinto zimbi.

5. Zeziphi izinto ezimbini ekuthiwa masizenze kwabaseRoma 12:2?

⁵ Asimele sicinge ukuba akusekho zinto simele sizitshintshe. Nangona singasazenzi izinto ezimbi esasikade sizenza ngaphambi kokuba sibhaptizwe, simele siqhubeke sisebenza nzima ukuze kungabikho nto iza kusenza siphinde sizenze. Sinokuyenza njani loo nto? UPawulos wathi: “Musani ukumilisa okwale nkqubo yezinto, kodwa guqukani ngokutshintsha ingqondo yenu.” (Roma 12:2) Ngoko zimbini izinto esimele sizenze. Okokuqala, simele siyeke “ukumilisa” okanye ukucinga njengeli hlabathi. Okwesibini, simele ‘sitshintshe’ indlela esicinga ngayo.

6. Yintoni esiyifundayo kwinto eyathethwa nguYesu kuMateyu 12:43-45?

⁶ UPawulos wayengathethi nje ngokutshintsha indlela esibonakala ngayo ebantwini, kodwa wayethetha ngokutshintsha yonke into. (Jonga ibhokisi ethi “Ngaba Utshintshile Okanye Wenza Ngathi Utshintshile?”) Simele sitshintshe yonke into, indlela esizenza ngayo izinto, indlela esicinga ngayo nezinto esizinqwenelayo. Ngoko sonke simele sizibuze lo mbuzo: ‘Ngaba izinto endizitshintshayo ukuze ndifane noKristu zezo zibonakala nje ebantwini okanye nditshintsha ingqondo nentliziyo yam?’ Kubalulekile ukuwuqonda umahluko phakathi kwezi ndlela zimbini zokutshintsha. KuMateyu 12:43-45, uYesu wasixelela into esimele siyenze. (Yifunde.) Loo mazwi asifundisa into ebalulekileyo: Akwanelanga nje ukuyeka ukucinga izinto ezimbi, kodwa simele sicinge izinto ezifunwa nguThixo.

“MAWAHLAZIYEKE AMANDLA ENGQONDO YENU”

7. Sinokuzitshintsha njani izinto ezisezingqondweni nezisezintliziyweni zethu?

⁷ Ngaba inokwenzeka into yokuba sitshintshe izinto ezisezingqondweni nezisezintliziyweni zethu? ILizwi LikaThixo lithi: “Mawahlaziyeke amandla engqondo yenu, nambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.” (Efe. 4:23, 24) Ngoko, sinokuzitshintsha izinto ezisezingqondweni nezisezintliziyweni zethu, kodwa akululanga ukuyenza loo nto. Asimele siphelele nje ekuyekeni izinto ezimbi, kodwa simele ‘sihlaziye amandla eengqondo zethu.’ Loo nto ithetha ukutshintsha izinto esizinqwenelayo, indlela esizenza ngayo izinto nezinto ezisibangela senze ezo zinto. Ngoko simele siqhubeke sisebenza nzima ukuze sitshintshe.

8-9. Ibali lomnye umzalwana libonisa njani ukuba kubalulekile ukutshintsha izinto ezisezingqondweni nasezintliziyweni zethu?

⁸ Makhe sithethe ngomzalwana owayekade esela kakhulu ibe ethanda nokulwa. Waziyeka ezi zinto waza wabhaptizwa. Le nto yabangela ukuba kuthethwe kakuhle ngamaNgqina kwidolophu awayehlala kuyo. Kodwa ngenye imini, emva nje kokuba ebhaptiziwe, kwenzeka into awayengayilindelanga. Enye indoda eyayisele yaya kwikhaya lakhe yaza yafuna ukulwa naye. Ekuqaleni, lo mzalwana wazibamba. Kodwa xa le ndoda yathetha kakubi ngegama likaYehova, lo mzalwana wacaphuka waza akakwazi ukuzibamba, wayibetha. Yayiphi ingxaki? Nangona ukufunda iBhayibhile kwamnceda wakwazi ukuzibamba, kuyabonakala ukuba yayingekatshintshi ncam ingqondo nentliziyo yakhe.

⁹ Lo mzalwana waqhubeka esebenza nzima ukuze atshintshe. (IMize. 24:16) Waqhubeka ephucula, encedwa ngabadala. Ekuhambeni kwexesha waba ngumdala. Ngenye imini, ngaphandle kweHolo YoBukumkani, kwaphinda kwenzeka laa nto yayenzekile. Enye indoda eyayisele, yayifuna ukubetha omnye umdala. Wenza ntoni lo mzalwana? Ezolile, wathetha kakuhle nale ndoda. Wayinceda yehlisa umsindo wade wayikhapha naxa igoduka. Kwakutheni ukuze lo mzalwana angalwi ngoku? Kuba wayezitshintshile izinto ezazisengqondweni nasentliziyweni yakhe. Waba ngumntu othanda kubekho uxolo nothobekileyo, ibe le nto yamzukisa uYehova.

10. Yintoni esimele siyenze ukuze sitshintshe izinto ezisezingqondweni nasezintliziyweni zethu?

¹⁰ Kufuneka sisebenzile ukuze sitshintshe, ibe loo nto ayizukwenzeka ngokukhawuleza. Kusenokufuneka sisebenze nzima kangangeminyaka emininzi. (2 Pet. 1:5) Le nto ayisuki nje yenzeke kuba umntu eneminyaka emininzi ekhonza uYehova. Kufuneka sizame kangangoko ukutshintsha izinto ezisezingqondweni nasezintliziyweni zethu. Kukho izinto eziliqela ekufuneka sizenze. Uyafuna ukuzazi? Nazi.

IZINTO ESINOKUZENZA UKUZE SITSHINTSHE INDLELA ESICINGA NGAYO

11. Umthandazo uza kusinceda njani ukuze sitshintshe?

¹¹ Into yokuqala esimele siyenze kukuthandaza. Simele sithandaze njengomdumisi owathi: “Dala ngaphakathi kum intliziyo esulungekileyo, Thixo, uze ufake ngaphakathi kum umoya omtsha, oqinileyo.” (INdu. 51:10) Kufuneka siyivume into yokuba kufuneka sitshintshile, size simcele uYehova ukuba asincede. Yintoni esenza siqiniseke ukuba uYehova uza kusinceda sitshintshe? Sikhuthazwa yinto uYehova awayithetha kumaSirayeli awayenenkani ngemihla kaHezekile. Wathi: “Ndiza kubanika intliziyo enye, ndibeke umoya omtsha ngaphakathi kwabo . . . ndize ndibanike intliziyo yenyama.” (Hez. 11:19) UYehova wayefuna ukuwanceda amaSirayeli ukuze atshintshe ibe uyafuna ukusinceda nathi.

12-13. (a) Ngokutsho kweNdumiso 119:59, yintoni esimele sicinge ngayo? (b) Yeyiphi imibuzo omele uzibuze yona?

¹² Into yesibini ebalulekileyo esimele siyenze kukucinga ngezinto esizifundayo. Xa sifunda iLizwi LikaThixo yonke imihla, simele sicinge ngalo size sibone ukuba zeziphi izinto esizicingayo esimele sizitshintshe. (Funda iNdumiso 119:59; Heb. 4:12; Yak. 1:25) Simele siziqaphele naziphi na izinto esizicingayo ezikhuthazwa leli hlabathi. Simele siyivume nento yokuba sineengxaki esinazo ibe simele sizame kangangoko sinako ukuzilungisa.

¹³ Ngokomzekelo, khawuzibuze: ‘Ngaba andinayo nentwana le yomona entliziyweni yam?’ (1 Pet. 2:1) ‘Ngaba ndizibona ndibhetele kunabanye abantu ngenxa yekhaya endisuka kulo, imfundo okanye imali endinayo?’ (IMize. 16:5) ‘Ngaba ndizibona ndibhetele kunabantu abangenazo izinto endinazo okanye abolunye uhlanga?’ (Yak. 2:2-4) ‘Ngaba ndiyazithanda izinto ezikweli hlabathi likaSathana?’ (1 Yoh. 2:15-17) ‘Ngaba ndiyakuthanda ukuzonwabisa ngezinto ezinento yokwenza nokuziphatha kakubi okanye ezinomlo?’ (INdu. 97:10; 101:3; Amosi 5:15) Xa uphendula le mibuzo, uza kuyazi ukuba umele uphucule phi. Xa sikwazi ukuzitshintsha ezi zinto zendeleyo ezintliziyweni zethu, siza kumvuyisa uTata wethu osezulwini.​—INdu. 19:14.

14. Kutheni kubalulekile ukubakhetha kakuhle abahlobo?

¹⁴ Okwesithathu, kubalulekile nokuba sibakhethe kakuhle abahlobo. Sithanda singathandi, inkulu into abayenzayo kuthi abahlobo bethu. (IMize. 13:20) Inqabile into yokuba abantu esisebenza okanye esifunda nabo basincede sicinge ngendlela uThixo ayifunayo. Kodwa, abona bantu sinokuba ngabahlobo babo bakwiintlanganiso zamaKristu. Kulapho sinokukhuthazeka khona ukuba sithandane size senze imisebenzi emihle.​—Heb. 10:24, 25.

HLALANI NINOKHOLO

15-16. USathana uzama njani ukutshintsha indlela esicinga ngayo?

¹⁵ Ungayilibali into yokuba uSathana uzimisele ukuyitshintsha indlela esicinga ngayo. Akukho mfundiso angayisebenzisiyo ukuze asiyekise ukucinga izinto esizifunde kwiLizwi LikaThixo.

¹⁶ USathana usasibuza laa mbuzo wayewubuze uEva kumyezo wase-Eden, othi: “Utshilo ngokwenene na uThixo ukuba . . . ?” (Gen. 3:1) Kweli hlabathi lilawulwa nguSathana, sisoloko sibuzwa imibuzo esenza sizithandabuze izinto esizikholelwayo, enjengethi: ‘Ngaba nyhani uThixo akafuni amadoda atshate namanye amadoda okanye amabhinqa namanye amabhinqa? Ngaba nyhani uThixo akafuni uyibhiyozele iKrismesi okanye imihla yokuzalwa? Ngaba nyhani uThixo akafuni uthiwe igazi? Ngaba nyhani uThixo obathandayo abantu akafuni ube nento ekudibanisa nabantu bakokwenu okanye abahlobo bakho kuba bengasengawo amaNgqina?’

17. Yintoni esimele siyenze xa umntu esibuza imibuzo kuba efuna sithandabuze izinto esizikholelwayo? EyabaseKolose 2:6, 7 ithi kuza kwenzeka ntoni?

¹⁷ Kufuneka siqiniseke ngezinto esizikholelwayo. Ukuba asizikhangeli iimpendulo zemibuzo ebalulekileyo ngezinto esizikholelwayo, sisenokuqalisa ukuzithandabuza. Xa sithandabuza, iza kutshintsha indlela esicinga ngayo size siyeke nokuba nokholo. Yintoni ke esimele siyenze? ILizwi LikaThixo lithi masitshintshe iingqondo zethu, ukuze sikungqine ngokwethu “ukulunga nokwamkeleka nokugqibelela kokuthanda kukaThixo.” (Roma 12:2) Xa siyifunda qho iBhayibhile, sinokuzingqina ngokwethu izinto esizifunda eBhayibhileni. Siza kuqiniseka nokuba imigaqo kaYehova iyanceda. Xa kunjalo asizukuthandabuza, siza ‘kuzinziswa elukholweni’ njengomthi oneengcambu ezomeleleyo.​—Funda eyabaseKolose 2:6, 7.

18. Yintoni eza kusinceda sizikhusele kwizinto ezimbi zeli hlabathi likaSathana?

¹⁸ Nguwe kuphela onokwenza ukholo lwakho lomelele. Ngoko qhubeka utshintsha izinto ezisengqondweni nezisentliziyweni yakho. Qhubeka uthandaza, umcenga uYehova ukuba akuphe umoya wakhe oyingcwele. Cinga ngezinto ozifundayo, uze uqhubeke uzigada izinto ozicingayo nezizathu zokwenza izinto. Bakhethe kakuhle abahlobo ukuze uhlale uphakathi kwabantu abaza kukunceda utshintshe indlela ocinga ngayo. Xa uyenza le nto, uza kuzikhusela kwizinto ezimbi zeli hlabathi likaSathana uze uziyeke “iingcinga nayo yonke into ephakamileyo ephakanyiswa nxamnye nolwazi lukaThixo.”​—2 Kor. 10:5.