“Hambani . . . Niye Kubenza Abafundi”

1-2. (a) Ngokutsho kukaMateyu 28:18-20, yintoni eyona nto iphambili emabandleni? (b) Yeyiphi imibuzo esiza kuyiphendula kweli nqaku?

EMVA kokuvuswa kwakhe, uYesu walungiselela ukuba abafundi bakhe badibane naye kwintaba eseGalili. Inoba bavuya nyhani abafundi bakhe xa badibana naye apho. (Mat. 28:16) Kusenokwenzeka ukuba kungale mini apho “wabonakala kubazalwana abangaphezu kwamakhulu amahlanu ngexesha elinye.” (1 Kor. 15:6) Kwakutheni ukuze uYesu athi abafundi bakhe mabadibane naye kule ntaba? Ukuze abaxelele le nto: “Hambani ke ngoko niye kubenza abafundi abantu beentlanga zonke.”​—Funda uMateyu 28:18-20.

² Abafundi abawevayo amazwi kaYesu baba kwibandla lamaKristu lokuqala. Eyona nto yayiphambili kulo yayikukwenza abafundi bakaKristu abangakumbi.b Namhlanje, maninzi kakhulu amabandla amaKristu ehlabathini lonke ibe ukwenza abafundi kuseyeyona nto iphambili kuwo. Kweli nqaku, siza kuphendula imibuzo emine: Kutheni kubaluleke kangaka ukwenza abafundi? Ziintoni esimele sizenze ukuze senze abafundi? Ngaba onke amaKristu angakwazi ukwenza abafundi? Kutheni kufuneka sibe nomonde xa sisenza abafundi?

KUTHENI KUBALULEKE KANGAKA UKWENZA ABAFUNDI?

3. Ngokutsho kukaYohane 14:6 no-17:3, kutheni kubaluleke kangaka ukwenza abafundi?

³ Kutheni kubaluleke kangaka ukwenza abafundi? Kuba ngabafundi bakaKristu kuphela abanokuba ngabahlobo bakaThixo. Enye into, abafundi bakaKristu baphila ubomi obubhetele ngoku ibe banethemba lokuphila ngonaphakade kwixesha elizayo. (Funda uYohane 14:6; 17:3.) Nyhani, uYesu usinike umsebenzi obalulekileyo, kodwa ke asiwenzi sodwa. Umpostile uPawulos wathi yena nabanye abantu awayeshumayela nabo ‘bangabasebenzi abangamadlelane kaThixo.’ (1 Kor. 3:9) Ngoko, yinto enkulu kakhulu into yokuba uYehova noKristu basinike lo msebenzi singafezekanga sinjalo.

4. Yintoni esinokuyifunda kwibali likaIvan noMatilde?

⁴ Ukwenza abafundi kunokusonwabisa kakhulu. Khawucinge ngomzekelo kaIvan nenkosikazi yakhe uMatilde baseColombia. Bashumayela komnye umfana ekuthiwa nguDavier, ibe wathi kubo: “Ndiyafuna kona ukutshintsha, qha andikwazi.” UDavier wayedlala amanqindi, esebenzisa iziyobisi, esela kakhulu ibe ehlalisana nentombi yakhe uErika. UIvan uthi: “Saqalisa ukufunda iBhayibhile kunye naye. Wayehlala kude kakhulu ibe kwakufuneka sikhwele iibhayisekile kangangeeyure ezininzi kwiindlela ezinodaka. UErika wabona indlela awatshintsha ngayo uDavier waza naye waba khona xa sifunda iBhayibhile.” Ekuhambeni kwexesha, uDavier wayeka ukusebenzisa iziyobisi, ukusela nokudlala amanqindi. Wade wamtshata noErika. UMatilde uthi: “Xa uDavier noErika babhaptizwayo ngo-2016, sakhumbula amazwi ayedla ngokuthethwa nguDavier athi, ‘Ndiyafuna kona ukutshintsha, qha andikwazi.’ Sasivuya kakhulu ibe zange sikwazi nokuzibamba, savele salila.” Nyhani, siza konwaba kakhulu xa sinceda abantu babe ngabafundi bakaKristu.

ZIINTONI ESIMELE SIZENZE UKUZE SENZE ABAFUNDI?

5. Yeyiphi into yokuqala esimele siyenze xa sisenza abafundi?

⁵ Into yokuqala esimele siyenze xa sisenza abafundi kukukhangela abantu abakufunayo ukufunda ngoYehova. (Mat. 10:11) Simele sizame kangangoko ukubakhangela size sishumayele kubo. Xa sixelela wonke umntu esidibana naye ngoYehova, sibonisa ukuba singamaNgqina KaYehova nyhani. Xa sithobela umyalelo kaKristu wokushumayela, sibonisa nokuba singamaKristu okwenene.

6. Yintoni enokusinceda siqhube kakuhle entsimini?

⁶ Abanye abantu bakufuna nyhani ukufunda iBhayibhile, kodwa xa siqala ukudibana nabo kusenokubonakala ngathi abanamdla. Kufuneka sizame ukubenza babe nomdla. Ukuze siqhube kakuhle entsimini, kufuneka silungiselele kakuhle. Thetha ngezinto abanokuba nomdla kuzo abantu odibana nabo. Emva koko, cinga ngendlela oza kuyiqala ngayo loo ncoko. 

7. Unokuyiqalisa njani incoko nomntu, ibe ucinga ukuba kutheni kubalulekile ukummamela nokuzihlonipha izinto azithethayo?

⁷ Ngokomzekelo, usenokuqalisa incoko ngokuthi: “Sonke sineengxaki. Ngaba ucinga ukuba ngurhulumente olapha emhlabeni onokuzilungisa iingxaki zethu?” Unokumphendula usebenzisa uDaniyeli 2:44. Enye indlela onokuyiqalisa ngayo kukuthi: “Ucinga ukuba bamele bakhuliswe njani abantwana ukuze babe nembeko?” Emva koko, unokumphendula usebenzisa iDuteronomi 6:6, 7. Nokuba ukhetha ukuthetha ngantoni, cinga ngabantu oza kuthetha nabo. Cinga ngendlela ekuza kubanceda ngayo ukuyazi eyona nto ifundiswa yiBhayibhile. Xa uncokola nabo, kubaluleke kakhulu ukubamamela nokuzihlonipha izinto abazithethayo. Loo nto iza kukunceda ubaqonde ibe basenokukumamela nawe xa uthetha.

8. Kutheni simele sibuyele qho ebantwini?

⁸ Ngaphambi kokuba umntu azixelele ukuba uza kufunda iBhayibhile, kusenokufuneka umane ubuyela kuye. Ngoba? Kuba abantu basenokungabikho ezindlini xa siphinda sibuyela. Enye into, kusenokufuneka umane usiya amaxesha amaninzi ukuze loo mntu uya kuye ade akhululeke aze avume ukufundelwa iBhayibhile. Ungayilibali into yokuba isityalo sidla ngokukhula xa sinkcenkceshelwa qho. Ngendlela efanayo, umntu usenokumthanda ngakumbi uYehova noYesu xa simane sincokola naye ngeLizwi LikaThixo.

NGABA ONKE AMAKRISTU ANGAKWAZI UKWENZA ABAFUNDI?

9-10. Kutheni sisithi wonke umKristu uyancedisa ekukhangeleni abantu abafuna ukuba ngabalandeli bakaKristu?

⁹ Onke amaKristu ayancedisa ekufuneni abantu abakufuna nyhani ukufunda ngoYehova. Lo msebenzi singawufanisa nokukhangela umntwana olahlekileyo. Njani? Ukuze siyiqonde le nto, makhe sithethe ngento eyenzekayo xa kwakulahleke umntwana oyinkwenkwe oneminyaka emithathu. Abantu ababemkhangela babemalunga ne-500. Ekugqibeleni, emva kweeyure ezimalunga ne-20 umntwana elahlekile, omnye umntu owayemkhangela wamfumana kwifama yombona. Lo mntu akazange afune ukunconywa kuba efumene lo mntwana. Wathi: “Lo mntwana ngengafunyenwanga ukuba ebengakhangelwanga ngabantu abaninzi.”

¹⁰ Abantu abaninzi balahlekile njengalo mntwana. Abanathemba, kodwa bayakufuna kona ukuncedwa. (Efe. 2:12) AmaNgqina angaphezu kwe-8 miliyoni asebenza kunye ukuze akhangele aba bantu. Kusenokwenzeka ungamfumani umntu onokumfundela iBhayibhile. Kodwa, bona abanye abavakalisi abashumayela kwintsimi okuyo basenokumfumana umntu ofuna ukuyazi inyaniso ekwiLizwi LikaThixo. Xa umzalwana okanye udade efundela umntu ade abe ngumfundi kaKristu, wonke umntu obekhangela uyavuya.

11. Zeziphi ezinye iindlela onokuncedisa ngazo ekwenzeni abafundi nokuba akukho mntu umfundelayo ngoku?

¹¹ Nokuba akukho mntu umfundelayo ngoku, unako ukuncedisa ekwenzeni abafundi ngezinye iindlela. Ngokomzekelo, xa ubona umntu oqalayo ukufika kwiHolo YoBukumkani, unokumamkela uze umncede. Xa usenza loo nto, uza kutsho abone ukuba singamaKristu enene. (Yoh. 13:34, 35) Nokuba uphendula iimpendulo ezimfutshane, uyabafundisa abantu abafikayo ukuba baphendule ngokusuka entliziyweni nangembeko. Unako nokuhamba nomntu osandul’ ukuba ngumvakalisi entsimini uze umncede asebenzise iZibhalo xa efundisa abantu. Xa usenza loo nto, uza kumnceda afane noKristu.​—Luka 10:25-28.

12. Ngaba kufuneka sibe nobuchule obuthile ukuze senze abafundi? Cacisa.

¹² Asimele sicinge ukuba simele sibe nobuchule obuthile ukuze senze abafundi. Ngoba? Khawucinge ngomzekelo kaFaustina ohlala eBolivia. Wayengakwazi ukufunda xa wayeqala ukudibana namaNgqina KaYehova. Ngoku uyazama ukufunda, ubhaptiziwe ibe uyakuthanda nokufundisa abanye abantu. Udla ngokufundela abantu abahlanu qho ngeveki. Nangona uFaustina engekakwazi ncam ukufunda njengabantu abafundelayo, uncede abantu abathandathu bade babhaptizwa.—Luka 10:21.

13. Zeziphi ezinye iintsikelelo esinokuzifumana xa sisenza abafundi enoba sixakekile?

¹³ AmaKristu amaninzi axakekile kuba zininzi izinto ezibalulekileyo ekufuneka azenze. Sekunjalo, enza konke okusemandleni awo ukuze abe nexesha lokufundela abantu iBhayibhile ibe iyawavuyisa loo nto. Makhe sithethe ngomzekelo kaMelanie waseAlaska. Wayekhulisa intombi yakhe eneminyaka esibhozo yedwa. Wayephangela ibe kwakufuneka ahoye notata wakhe owayenomhlaza. Yayinguye yedwa iNgqina kwidolophu yakhe. Wayesoloko ethandazela ukuba namandla okuya kushumayela naxa kubanda kuba wayekufuna nyhani ukufumana isifundo. Ekugqibeleni, wadibana noSara owavuyiswa kukwazi ukuba uThixo unegama. Ekuhambeni kwexesha, uSara wavuma ukufundelwa iBhayibhile. UMelanie uthi: “Ngeengokuhlwa zangoLwesihlanu ndandidla ngokudinwa nyhani kodwa kwakusinceda nentombi yam ukuya kufundela uSara. Sasikuthanda ukukhangela iimpendulo zemibuzo yakhe, ibe kwasivuyisa kakhulu ukumbona esiba ngumhlobo kaYehova.” USara waba nesibindi kuba wanyamezela ukuchaswa, washiya icawa yakhe waza wabhaptizwa.

KUTHENI KUFUNEKA SIBE NOMONDE XA SISENZA ABAFUNDI?

14. (a) Ukwenza abafundi kufana njani nokuloba? (b) Amazwi kaPawulos akweyesi-2 kuTimoti 4:1, 2 akukhuthaza ukuba wenze ntoni?

¹⁴ Nokuba awukabi naso isifundo, ungayeki ukukhangela. Khumbula ukuba uYesu wafanisa abantu abenza abafundi nabalobi. Kusenokudlula iiyure ezininzi abalobi bengabambisanga nenye intlanzi. Amaxesha amaninzi baloba ebusuku okanye ekuseni, ibe ngamanye amaxesha kufuneka baye kwiindawo ezikude. (Luka 5:5) Namanye amaKristu aba nomonde njengaba balobi. Ashumayela iiyure ezininzi ekhangela abantu ngamaxesha ahlukeneyo nakwiindawo ezahlukahlukeneyo. Kutheni esenza le nto? Ukuze adibane nabantu abangakumbi. La maKristu enza le nto adla ngokuvuyiswa kukufumana abantu abanomdla. Ngaba awunokushumayela ngexesha onokufumana ngalo abantu abangakumbi okanye ushumayele kwindawo onokubafumana kuyo?​—Funda eyesi-2 kuTimoti 4:1, 2.

15. Kutheni simele sibe nomonde xa sifundela abantu iBhayibhile?

¹⁵ Kutheni simele sibe nomonde xa sifundela abantu iBhayibhile? Esinye isizathu kukuba kufuneka sincede isifundo sizithande izinto ezifundiswa yiBhayibhile. Kufuneka sisincede simazi size simthande noMbhali weBhayibhile, uYehova. Asimele siphelele nje ekufundiseni izifundo zethu ukuba zenze izinto uYesu awayalela abafundi bakhe ukuba bazenze. Kunoko, simele sizifundise nendlela amaKristu enene amele aphile ngayo. Kufuneka sizincede xa zizama ukwenza izinto ezizifunda eBhayibhileni, size sibe nomonde xa sisenza loo nto. Abanye bayakwazi ukutshintsha indlela ababekade becinga nababezenza ngayo izinto kwiinyanga nje ezimbalwa. Kanti abanye bona batshintsha emva kwexesha elide.

16. Yintoni oyifundileyo kwibali likaRaúl?

¹⁶ Omnye umthunywa wevangeli wasePeru wakha waqhuba isifundo esamenza wabona ukubaluleka kokuba nomonde. Uthi: “Ndafunda iincwadi ezimbini noRaúl. Kodwa wayeseneengxaki. Izinto zazingahambi kakuhle tu emtshatweni wakhe, ethuka ibe nabantwana bakhe bengamazi nokuba sisiciko seyiphi imbiza ngenxa yendlela awayezenza ngayo izinto. Kuba wayengaziphosi iintlanganiso, ndaqhubeka ndisiya kuye ukuze ndimncede nentsapho yakhe. Wade wabhaptizwa emva kweminyaka engaphezu kwemithathu ndidibene naye.”

17. Siza kuthetha ngantoni kwinqaku elilandelayo?

¹⁷ UYesu wathi ‘masihambe . . . siye kubenza abafundi abantu beentlanga zonke.’ Loo nto ibangela ukuba sidibane nabantu abakholelwa izinto ezahlukileyo kwesizikholelwayo. Abanye abahambi cawa okanye abakholelwa kuThixo. Kwinqaku elilandelayo siza kuthetha ngendlela esinokubaxelela ngayo iindaba ezilungileyo abo bantu.