Sonke Kufuneka Sifundisise
1 Babekho abafundi bakaYesu xa wathandaza kuYehova, esithi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” (Yoh. 17:3) Ewe, bonke abafundi bakaKristu, kwanabo basandul’ ukuba nomdla, bafanele bangenise olo lwazi. Sinokukwenza oko ngofundisiso lobuqu nolwentsapho, nangokuya kwiintlanganiso zebandla. Ngaba unamathele kucwangciso olusebenzisekayo lofundisiso lobuqu oluthe rhoqo?
2 Abantu abasandul’ ukuba nomdla bangenelwa kakhulu ngokuqhutyelwa isifundo sobuqu seBhayibhile sekhaya. Phofu ke, ukuze bakhule ngokomoya, bamele baqhubeke bengenisa ulwazi baze bakusebenzise oko bakufundayo. (Heb. 5:13, 14) Ngaba uyakwenza oko?
3 Abakhonzi abaselula bakaYehova bakwimeko entle yokungenisa ulwazi. Iingqondo zabo zisanxanelwe ulwazi, yaye ngokufuthi banomdla wokwazi izizathu zokuba izinto zilolo hlobo. UYehova usidale sanalo mnqweno. Lisebenzise ngobulumko ixesha lakho ekungeniseni ulwazi lwezinto zokomoya. Yenza njengokuba watshoyo umpostile uPawulos uze ‘uzongele ixesha’ lofundisiso olunjalo lobuqu olwakhayo nolomeleza ukholo.—Kol. 4:5.
ITHALA LEENCWADI LOBUQU
4 Ngaba unalo ithala leencwadi lobuqu okanye lentsapho? Ngaba linemiqulu yeAwake! neyeWatchtower okanye iinkupho zala maphephancwadi oye waziqokelela kumaqweqwe amakhulu alungiselelwe oko (binders), imiqulu yeInsight, neempapasho esizisebenzisa kwiSifundo Sencwadi Sebandla nakwiintlanganiso eziqhutyelwa kwiHolo yoBukumkani? Ngaba unayo iWatch Tower Publications Index 1930-1985 neempapasho ezifumanekayo ezindala zoMbutho?
5 Uya kufumana inkcazelo exabisekileyo kwiimpapasho ezindala. Ngaba uyifunde okanye uyifundisisile incwadana ethi Jehovah’s Witnesses and the Question of Blood? I-1975 Yearbook of Jehovah’s Witnesses ichaza imbali yabantu bakaYehova ukususela kwixesha likaMzalwan’ uRussell ukuza kuthi ga kwixesha lethu ize iphendule imibuzo emininzi eye yabuzwa ngokuphathelele amaNgqina kaYehova.
6 Kufuneka sibe nesifundo sobuqu nesentsapho ukuze siqine ngokomoya nokuze sibe ngabayixhobele kakuhle inkonzo yasentsimini. Uqhuba njani kule nkalo? Ngaba uyazilungiselela iintlanganiso zebandla? Ngaba uyayilungiselela inkonzo yasentsimini ngenjongo yokuba ngophumelelayo kangangoko kunokwenzeka? Ngaba uyifundile yonke incwadi yakho ethi Ukuqiqa NgeZibhalo? Ngaba uyayisebenzisa kwinkonzo yasentsimini?
7 Sebenzisa iWatch Tower Publications Index 1930-1985 ukuze ufumane iimpendulo kwimibuzo onayo nakuleyo uyibuzwa ngabantu odibana nabo kwinkonzo yasentsimini. Abadala baya kufumanisa ukuba i-Index isesona sixhobo sixabisekileyo abanokusisebenzisa ekufumaneni inkcazelo ekhuthazayo nefanelekileyo kwabo beza kubo ukuza kufuna uncedo lokomoya.
8 Ngaba ibandla lenu linethala leencwadi elifanelekileyo elinokusetyenziswa ngabavakalisi abanqwenela ukwenza uphando okanye ufundisiso? Ukuba alinalo, sikhuthaza abadala ukuba baqalise ukulenza ngokukhawuleza kangangoko kunokwenzeka kwigumbi lesikolo sesibini okanye kwenye indawo efanelekileyo eholweni. Ithala leencwadi liya kuba lukhuthazo olongezelelekileyo kubo bonke abanqwenela ukuphanda nzulu kwiimpapasho zoMbutho.
9 EyeSibini kuTimoti 2:15 iyaluleka: “Kukhuthalele ukuzimisa phambi koThixo ucikidekile, ungumsébenzi ongenazintloni, ulungisa ukulahlula ilizwi lenyaniso.” Ukuze sibe nokukwenza oku kufuneka sonke sifundisise size sikusebenzise oko sikufundayo.