Hlala Uthetha Ngezinto Ozibonileyo Nozivileyo
1 Kwanaxa babesongelwa ngokubethwa nangokuvalelwa, abapostile bathetha oku kwabo babebachasa: “[Asinako] thina ukuthi singazithethi izinto esazibonayo, esazivayo.” (IZe. 4:20) Babekuqonda ukubaluleka kwemisebenzi neemfundiso zikaYesu.
2 Namhlanje iindaba ezilungileyo ezingoYesu noBukumkani bakhe zibalulekile ebantwini ngendlela ezazibaluleke ngayo ngelo xesha. Ngoko ke, sifanele sixhakamfule naliphi na ithuba ukuze sithethe ngezinto esizibonileyo nesizivileyo eLizwini likaThixo. Ngokuqhelekileyo abantu bakulungele kakuhle ukuthetha ngemibandela yonqulo ebudeni beholide, yaye oku kuvulela amathuba awongezelelekileyo okunikela ubungqina.
3 Lutsha, Thethani Ebudeni Bexesha Lekhefu Lesikolo: AmaNgqina amaninzi aselula awasebenzisa ngokunengenelo amathuba awongezelelekileyo okunikela ubungqina ebudeni bexesha lekhefu lesikolo. Abo babhaptiziweyo basenokufuna ukubhalisa njengoovulindlela abangabancedani ebudeni bukaDisemba. Kumabandla amaninzi abadala baye balungiselela iintlanganiso zenkonzo yasentsimini ezongezelelekileyo ukwenzela abavakalisi abahamba isikolo. Asibakhuthazi abantu abaselula ukuba bahambe bodwa kodwa kunoko sibakhuthaza ukuba basebenze nabazali babo okanye nabanye abavakalisi abakhulileyo. Ebudeni bukaDisemba kukho amathuba amahle okuba nesabelo kumsebenzi wasesitratweni ekubeni abantu abaninzi beya kuba bethengela iKrisimesi. Amaphephancwadi ethu aya kuba namanqaku aya kwazisa abantu indlela uYesu njengoKumkani olawulayo anokuzicombulula ngayo iingxaki zehlabathi. (Thelekisa uLuka 2:14.) Ekubeni ngeli xesha lonyaka abantu abaninzi becinga ngoYesu Kristu yaye belangazelela uxolo, ngaba asiloxesha lihle lokunikela incwadi ethi Umntu Obalaseleyo kubantu abaninzi kangangoko kunokwenzeka?
4 Ukuba kuvela imbambano kuba ungenasabelo kwizithethe zonqulo ezinxulumene neKrisimesi, usenokuthi:
◼ “Anditheleli kwimibhiyozo yeKrisimesi kuba imibhoyozo enjalo ayimbeki uYesu njengokuphela kwendlela esinokusindiswa ngayo nanjengokuphela komntu oya kuphelisa imfazwe neengxaki zobuhlanga. [Caphula okanye ufunde IZenzo 4:12.] UYesu akaselulo usana kodwa unguKumkani olawulayo. Le ncwadi, Oyena Mntu Ubalaseleyo Wakha Waphila, ixubusha ngazo zonke iimfundiso nemimangaliso eyenziwa nguYesu yaye ibonisa indlela aza kuphelisa ngayo ukubandezeleka koluntu.” Yandula ke umbonise umfanekiso okwisahluko 133 uze ufunde isiqendu sesibini kwiphepha elilandelayo. Mbonise ezinye iingongoma ovakalelwa kukuba usenokuba nomdla kuzo.
5 Thetha Nabantu Osebenza Nabo: Omnye umzalwana wahambisa iincwadi ezingama-63 ngokusuka nje abeke umbhalo wencwadi ethi Umntu Obalaseleyo phezu kwedesika yakhe. Imbonakalo yayo enomtsalane kwanomxholo wayo zenza ukuba kubuzwe imibuzo. Usenokumbuza oku umntu osebenza naye: “Ngubani obusenokuthi ngoyena mntu ubalaseleyo wakha waphila?” Yandula ke wongezelele oku: “Le ncwadi igubungela ngokweenkcukacha bonke ubomi bukaYesu, ixubusha ngazo zonke iintetho awazinikelayo, iphendula imibuzo abaninzi abayibuzayo ngemimangaliso yakhe, yaye inikela nezinye iinkcukacha ezibangel’ umdla. Iyimpinda ecokisekileyo yoko iBhayibhile ikufundisayo ngoYesu yaye ingqina ngokungathandabuzekiyo ukuba uYesu Kristu wayengoyena mntu ubalaseleyo wakha waphila.” Yandula ke umbonise oko uNapoléon wakuthethayo ngoYesu njengoko kucatshulwe kwisiqendu sesithathu sentshayelelo yale ncwadi.
6 Kusenokuvela amathuba afanayo okunikela ubungqina kubamelwane okanye kwizalamane ezingakholwayo. Thandazela ukuba uYehova akunike inkalipho nobuchule bokuthetha ngexesha elifanelekileyo. (IZe. 4:29, 31) Oko sikuthethayo ngoYesu kuya kuchukumisa iintliziyo zabantu abacingayo abatyekele ebulungiseni. Ngawaphi amava alunge ngakumbi esinokuba nawo kunalawo okunceda umntu esifunda naye, esisebenza naye, ummelwane, okanye isalamane ukuba size endleleni esa ebomini obungunaphakade?—Yoh. 14:6.