Isingxobo Semibuzo

◼ Ngaba kufanelekile ukuphinda kwenziwe eminye imibhalo yeempapasho zoMbutho ukuze zisasazwe kwabanye?

Kwiminyaka edluleyo, uMbutho uye wavelisa iimpapasho ezininzi eziphantse zibe zixubusha ngazo zonke iinkalo zolwazi oluseBhayibhileni. Abantu abafunde inyaniso kwiminyaka yakutshanje basenokuvakalelwa kukuba baphoswe ziingenelo zemibandela eyapapashwa ngaphambili nengasafumanekiyo kuMbutho. Bambi baye benza imigudu ephawulekayo yokufumana imibhalo yeempapasho ezindala, yaye abanye baye bayithabathela kubo imbopheleleko yokuphinda kwenziwe eminye imibhalo yeempapasho zoMbutho baza bazenza zafumaneka ngeendlela ezahlukeneyo. Oko kuye kwaquka ukuzibhala ezi mpapasho ngokutsha nokuzivelisa ngekhompyutha. Kwezinye iimeko, oku kuye kwenziwa ngenjongo yokufumana ingeniso yemali.

‘Umkhonzi’ othembekileyo uyazazi iintswelo zethu zokomoya yaye wenza amalungiselelo “ngexesha elifanelekileyo.” (Mat. 24:45) Xa bekukho imfuneko yokuphinda kupapashwe umbandela obupapashiwe kwixesha elidluleyo, uMbutho uye wawenza amalungiselelo alolo hlobo. Ngokomzekelo, imiqulu ye The Watchtower esusela kowe-1960 ukuya kowe-1985 iye yashicilelwa kwakhona yaza yenziwa yafumaneka kubo bonke. Noko ke, xa abathile bephinda bezenzela eminye imibhalo baze bayisasaze loo mibandela, kunokuvela iingxaki ezingeyomfuneko.

Kubakho iingxaki ezinzulu xa kuphindwa kusenziwa eminye imibhalo yale mibandela ize isasazwe ukuze kuzuzwe ingeniso yemali. Isingxobo Semibuzo kwiNkonzo Yethu YoBukumkani bukaJulayi 1977 sathi: “Ngoko ke kuhle ukungaxhaphazi unxululmano olungokobuthixo ngokukhuthaza okanye ukubhengeza ezentengiso yayo nayiphi na impahla okanye inkonzo ukwenzela ingenelo yorwebo eHolweni yoBukumkani, ezifundweni zencwadi zebandla nasemihlanganweni yabantu bakaYehova. Oku kusinceda sizinikele izilangazelelo zokomoya ingqalelo ezeleyo eziyifunayo nokuze siyigcine intsebenzo yorwebo isendaweni yayo efanelekileyo.” Ngoko ke, kubalulekile ukuba sikuphephe ukufuna ingeniso ngokukodwa ngokuthengisa iLizwi likaThixo ngenjongo yokuzuza ingeniso okanye ezinye izinto ezinxulumene nalo.