Yiya Rhoqo Kwinkonzo Yasentsimini
1 Ngaba sithabatha amanyathelo angqalileyo okuba nesabelo kwinkonzo yasentsimini rhoqo? Ngaba ngenkuthalo siyifaka ngoko nangoko ingxelo yethu yenkonzo yasentsimini kwiHolo yoBukumkani nyanga nganye? Le yinto sonke esifanele sizabalazele ukuyenza, singatsibi nyanga singakhange siluvakalise ekuhleni ukholo lwethu.—Roma 10:9, 10.
2 Inkoliso yamabandla isenengxaki yabavakalisi abangayifaki ngoko nangoko ingxelo yabo ekupheleni kwenyanga nganye. Kwileta yethu ka-Agasti 15, 1992, sanikela ulwalathiso kuwo onke amabandla ngokuphathelele indlela efanelekileyo yokunyamekela ingxelo yenkonzo yasentsimini. Ukwenzela ingenelo yenu sifuna ukuphinda ezimbalwa kwezi ngongoma. Mvakalisi ngamnye unelungelo nembopheleleko yokufaka ingxelo yakhe yenkonzo yasentsimini kwibhokisi ekhethekileyo ebhalwe oku “Iingxelo Zenkonzo Yasentsimini” efanele ibekho kwiHolo yoBukumkani nganye. Ngaba ubululandela olu lwalathiso ngokuthembekileyo ukususela ngoko? Ukuba ubusenjenjalo, siyakuncoma. Kuthekani ukuba uye walibala ukufaka ingxelo yakho ngexesha?
3 Ekuqaleni kwenyanga nganye, unobhala webandla ufanele anike umqhubi wesifundo sencwadi ngasinye uludwe olubonisa abavakalisi kwiqela lakhe abangayifakanga ingxelo. Umqhubi wesifundo sencwadi ufanele ngoko nangoko aye kwabo bavakalisi aze afumane ezo ngxelo ziseleyo aze azinike unobhala. Eli lungiselelo lifanele lilandelwe nyanga nganye ukuqinisekisa ukuba zonke iingxelo ezifakwe emva kwexesha ziyafunyanwa zize zithunyelwe kuMbutho. Ezi ngxelo zifakwe emva kwexesha ziya kuqukwa kwingxelo yenyanga elandelayo. Oku kuya kuthetha ukuba umvakalisi ngamnye ofaka ingxelo emva kwexesha uya kubalwa njengabavakalisi ababini kwinyanga elandelayo. Ngale ndlela loo mvakalisi akayi kuba ngoxhiphulisayo. Ungaze udibanise ingxelo yomsebenzi weenyanga ezimbini kwingxelo enye kodwa ngamaxesha onke faka ingxelo eyahlukileyo yenyanga nganye.
4 Sinokuba nentsebenziswano njani kweli lungiselelo ukuba asiyi kubakho ekupheleni kwenyanga? Sisenokufaka ingxelo yethu ebhokisini ngaphambi kokuba sihambe okanye siqinisekise ukuba sithumela iingxelo zethu zenkonzo yasentsimini kunobhala webandla. Oku kufanele kwenziwe kusengaphambili ukuze ibe nokuqukwa kwingxelo yebandla yenyanga ngenyanga, unobhala ayidibanisayo aze ayithumele kuMbutho ngomhla wesithandathu wenyanga nganye.
5 Ukongezelela ekuyeni rhoqo kubulungiseleli basentsimini, sifanele sikuphaphele ukunceda abanye babe nesabelo rhoqo kubulungiseleli basentsimini. (Fil. 2:4) Sinokukwenza njani oku? Sisenokumema abavakalisi abangabhaptizwanga abasandul’ ukuqalisa kubulungiseleli ukuba basebenze nathi. Ukwenza ucwangciso olusisigxina lokuya entsimini kuya kubanceda ukuba inyaniso ibetheleleke ngokupheleleyo ezintliziyweni zabo.
6 Yiya rhoqo kwinkonzo yasentsimini. Ngokuthembeka faka ingxelo yakho yenkonzo yasentsimini nyanga nganye. Nceda abanye babe nesabelo entsimini rhoqo. Bonisa ‘uthando ngesizalwana.’—1 Pet. 2:17.