Ukuqhuba Isifundo SeBhayibhile Sekhaya
1 Siqhutywa njani isifundo seBhayibhile sekhaya esinempumelelo? Nguwuphi umzekelo osisiseko esinawo? Zinokuhlolisiswa njani izibhalo ezikumbandela ofundisiswayo? Ngubani ofanele afunde iziqendu? Ukongezelela kwinkqubo esisiseko yokuqhuba isifundo, yintoni enye efunekayo ukunceda umntu oqhutyelwa isifundo ayenze inyaniso ibe yeyakhe? Ziziphi iimpazamo ezimele ziphetshwe?
2 Indlela Yokuqhuba Isifundo: Ngokuqhelekileyo, isifundo seBhayibhile sekhaya sifana neSifundo seMboniselo. Okokuqala, kufundwa isiqendu esiza kuhlolisiswa. Andule lowo uqhuba isifundo abuze umbuzo obhaliweyo kweso siqendu aze avumele umntu amqhubela isifundo aphendule. Ukuba uyathandabuza, umqhubi ufanele akulungele ukubuza imibuzo ekhokelayo eya kumenza aqiqe ngaloo mbandela aze afikelele kwisigqibo esifanelekileyo.
3 Hlolisisa indlela izibhalo ezisebenza ngayo kumbandela osesiqendwini. Bonisa umntu omqhubela isifundo indlela yokubona izibhalo ezicatshuliweyo, uze uqiqe naye ngendlela ezisebenza ngayo kuloo mbandela. Ukuba izibhalo ziboniswe nje kodwa azacatshulwa, kuhle ukuzihlola eBhayibhileni, ukuba azikho zide kakhulu. Yandula ke umvumele azifunde aze agqabaze ngendlela ezikuxhasa nezikucacisa ngayo oko kuchazwe esiqendwini.
4 Nceda Lowo Uqhutyelwa Isifundo Ayenze Inyaniso Ibe Yeyakhe: Khuthaza abo ubaqhubela isifundo basilungiselele kakuhle isifundo. Gxininisa ukuba ukufunda kubalulekile ukuze babe nolwazi. Okukhona lowo umqhubela isifundo efunda umbandela ofundisiswayo aze acamngce ngawo, kokukhona esiya ephucula. Bambi abaqhubi bezifundo bamfundisa zonke iziqendu umntu abamqhubela isifundo ebudeni besifundo seBhayibhile. Abanye bayatshintshana naye ngokufunda iziqendu. Kufanele kusetyenziswe ingqiqo, kucingwa ngenkqubela yokomoya yomntu oqhutyelwa isifundo.
5 Ukufundisisa umbandela ngenjongo yokuwugubungela kusenokumnceda umntu oqhutyelwa isifundo azuze ulwazi, kodwa ngaba uyakukholelwa oko akufundayo? Ukuze ayenze inyaniso ibe yeyakhe, umele abone indlela umbandela omchaphazela ngayo. Uvakalelwa njani ngoko akufundayo? Unokukusebenzisa njani oko akufundileyo? Sebenzisa imibuzo ehlokoz’ imbono ukuze ufikelele intliziyo yomntu omqhubela isifundo.
6 Phepha Iimpazamo: Kukho iimpazamo ezimele ziphetshwe xa kuqhutywa isifundo seBhayibhile. Xa kuvela imibandela engadibananga noko nikuhlolisisayo, ngokuqhelekileyo okona kulungileyo kukuyixubusha xa uqukumbela isifundo okanye ngelinye ixesha. Kwakhona, kubalulekile ukuba umntu omqhubela isifundo aphendule ngamazwi akhe kunokuba afunde iimpendulo encwadini. Oku kuya kukunceda njengomqhubi ubone enoba uyawuqonda loo mbandela kusini na.
7 Kutheni ungazenzeli usukelo lokuba ubuncinane uqhube isifundo seBhayibhile esinye? Oku akunzima ukuba uthembela ngoYehova uze ulandele inkqubo esisiseko yeSifundo seMboniselo. Eyona ndlela iphumelelayo yokufundisa abanye inyaniso nokwenza abafundi kukuqhuba isifundo seBhayibhile sekhaya. Ngokwenza oku, nawe unokufumana uvuyo olufumaneka ngokuba nesabelo ngokuzeleyo ekuzalisekiseni umyalelo kaYesu okuMateyu 28:19, 20.