Ukunyamekela Iintswelo Zokomoya Zabangevayo
1 Inani elandayo labantu abangevayo lisondezwa kuMalusi Olungileyo yaye liyazahlulela kuYehova uThixo. (Yoh. 10:3, 11) Abanye ebandleni, ngokukodwa abadala, bamele baziphaphele iintswelo zokomoya zabazalwana noodade wethu abangevayo.
2 Ukuhlangabezana Neentswelo Zabangevayo: Kwenziwa amalungiselelo okuba kutolikwe iintlanganiso zebandla ngentetho yezandla naphi na apho kukho iitoliki ezifanelekayo ezifumanekayo. Ukuba akakho ebandleni umntu oyaziyo intetho yezandla, kusenokuba kokufanelekileyo ukucebisa abantu abangevayo ukuba baye kwibandla elikufutshane elinokubanceda koku. Kakade ke, ukuba ilungiselelo elinjalo alikho kummandla wenu, kusenokwenzeka ukuba abavakalisi abamiselweyo batshintshisane ngokuhlala ecaleni kwabantu abangevayo baze babelane nabo ngamanqaku aziintloko axutyushwayo.
3 Amalungiselelo Endibano Yesiphaluka Nawebandla: Amalungiselelo okutolika ngentetho yezandla kwiindibano zesiphaluka nakwiindibano ezikhethekileyo zosuku olunye enziwa phantsi kolwalathiso lomveleli wesiphaluka. Umdala okanye isicaka solungiselelo esifanelekayo sisenokwabelwa ukuba sibe ngumalathisi. Kusenokwabelwa abazalwana noodade abafanelekayo nabangumzekelo ukuba batolike ucwangciso lwendibano. Nasebandleni kusenokulandelwa umgaqo ofanayo, kuqinisekiswa ukuba iintswelo zabangevayo zinyanyekelwa ngokufanelekileyo.
4 Kunconyelwa ukuba abangevayo bahlale apho banokuzibona kakuhle khona iitoliki lize neqonga libonakale kubo. Oku kusebenza ebandleni nakwiindibano zesiphaluka. Kwiintlanganiso zebandla kunconyelwa ukuba iitoliki zihlale phantsi ukuba abangevayo abakhoyo bambalwa. Abadala bakhuthazwa ukuba bathethe nomzalwana ongevayo oqolileyo, ukuba kunokwenzeka, befuna icebiso elingqalileyo ngamalungiselelo endlela yokuhlala.
5 Ukuba kukho umzalwana oyitoliki efanelekayo ongumdala okanye osisicaka solungiselelo ofumanekayo yaye inani labazalwana noodade abangevayo liyakuvumela oko, abadala basenokugqiba kwelokuba ezinye iintlanganiso zifanele ziqhutywe zonke ngentetho yezandla. ISifundo Sencwadi Sebandla sisenokuba yintlanganiso yokuqala eqhutywa veki nganye elungiselelwe ngolo hlobo. Ukuba ibandla linqwenela ukuqhuba nayiphi na enye yeentlanganiso ezintlanu ngentetho yezandla, okanye nangaluphi na olunye ulwimi (iilwimi) olusetyenziswa kakhulu ebandleni, abadala bafanele bazise uMbutho ngomnqweno wabo.
6 Nangona kusenokufuneka benze umgudu okhethekileyo abantu abangevayo nabevayo ukuze banxibelelane, onke amalungu ebandla afanele azabalazele ukuqhelana ukuze akhuthazane ngokwenene. (Heb. 10:24) Lo moya phakathi kwabazalwana uya kwenza bonke abasebatsha bazive bamkelekile.