Hlala Unokuninzi Omele Ukwenze
1 Abantu bakaYehova ngabantu abaxakekileyo. Sineembopheleleko ezininzi zentsapho, zomsebenzi wengqesho nezesikolo. Yaye ngaphezu kwako konke, kusoloko kukho ‘okuninzi esimele sikwenze emsebenzini weNkosi.’ (1 Kor. 15:58, NW) Simele silungiselele size siye kwiintlanganiso zebandla zeeveki ngeeveki. Sikhuthazwa ukuba kungadluli veki singabanga nesabelo kubulungiseleli basentsimini. Simele sibekele ecaleni rhoqo ixesha elaneleyo lofundisiso lobuqu nelesifundo sentsapho seBhayibhile. Abadala nezicaka zolungiselelo banezabelo ezininzi zebandla. Maxa wambi siye sicelwe ukuba sincede abafanelekayo abasweleyo.
2 Ngamathub’ athile, abanye bethu basenokuziva besoyiswa kuko konke esimele sikwenze. Ukanti, abantu abaxakeke gqitha basenokuba ngabona bonwabileyo ukuba balungelelene yaye bahlala bezijonga ngokufanelekileyo izinto.—INtshu. 3:12, 13.
3 Umpostile uPawulos wayengomnye owayenokuninzi awayemele akwenze. Nangona wayenyamekela iintswelo zakhe zobuqu ngokusebenza njengomenzi weentente, wayesebenza ngaphezu kwabanye abapostile. Engadinwa wayesebenza njengomhambisi wevangeli, eshumayela ekuhleni nakwizindlu ngezindlu, nangona wayekwanyamekela neembopheleleko zakhe zokwalusa umhlambi. (IZe. 20:20, 21, 31, 34, 35) Phezu kwako nje ukuxakeka okunjalo, uPawulos wayesoloko ekulangazelela ukwenza okungakumbi enkonzweni kaYehova.—Thelekisa amaRoma 1:13-15.
4 UPawulos wahlala elungelelene yaye evuya ngenxa yokuthembela kumandla avela kuYehova. Wabufumanisa ubulungiseleli bakhe bunomvuzo yaye busanelisa. (Fil. 4:13) Wayesazi ukuba uThixo wayengayi kuwulibala umsebenzi wakhe. (Heb. 6:10) Uvuyo lokunceda abanye bazi uYehova lwalumnika amandla. (1 Tes. 2:19, 20) Ukuqiniseka kwakhe ngelokuba ithemba lakhe elisekelwe eBhayibhileni liza kuzaliseka kwamshukumisela ukuba ahlale ekhuthele.—Heb. 6:11.
5 Kwakhona sifanele sicinge ngezinto ezintle esizifumana ngokubulaleka kwethu. Ukubakho nokuba nenxaxheba kwethu kwiintlanganiso zeeveki ngeeveki kwakha kuze kukhuthaze abanye. (Heb. 10:24, 25) Umzamo wethu onyanisekileyo wokufikelela bonke ngeendaba ezilungileyo ufak’ isandla ekuhambeleni phambili kwebandla njengokuba sihlakulela umdla yaye abasebatsha benxulumana nathi. (Yoh. 15:8) Ukunceda abanye abasweleyo kwakha umoya womanyano nofana nowentsapho ebandleni. (Yak. 1:27) Ukongezelela, njengoPawulos, asifanele silibale ukuba ukuxakeka kwimisebenzi enomvuzo kuyamkholisa uYehova uThixo. Sikujonga njengelungelo elizukileyo ukumkhonza. Asinayo enye indlela yobomi elunge ngakumbi!
6 Kukho ingenelo ethe chatha xa sinokuninzi esimele sikwenze. Xa sixakekile sinosukelo lokuba nocwangciso olwakhayo ngokomoya, ixesha liba ngathi liyakhawuleza. Kuba siqonda ukuba suku ngalunye oludlulayo lusisondeza ngakumbi kwihlabathi elitsha, siyabuvuyela obu bomi buxakekileyo sibuphilayo ngoku. Kwakhona siyaqonda ukuba ukuhlala sixakekile kububulumko, kuba asibi naxesha lingako lokubandakanyeka kusukelo lwehlabathi olulilize.—Efe. 5:15, 16.
7 Ngokuqinisekileyo, sinokuninzi esimele sikwenze emsebenzini weNkosi. Kodwa sinokuhlala sivuya ukuba siqhubeka sithembela kuYehova uThixo noYesu Kristu, abenza inkonzo yethu ihlaziye ize ibe nomvuzo.—Mat. 11:28-30; 1 Yoh. 5:3.