Funa Abo Banotyekelo Olufanelekileyo
1 Enye injongo yomsebenzi wokushumayela kukufuna abo ‘banotyekelo olufanelekileyo ngobomi obungunaphakade.’ (IZe. 13:48) Ukusasaza amaphephancwadi IMboniselo noVukani! kuye kwangqineka kuyeyona ndlela ibalaseleyo ekwenzeni oku, ekubeni aba lindixesha bethu besenza abantu ukuba baliqonde ithemba loBukumkani. NgoAprili siza kube sibalaselisa la maphephancwadi. Sinethemba lokuba, apho sifumene umdla, sinokuqalisa izifundo ezitsha zeBhayibhile kwincwadi ethi Ulwazi Olukhokelela Kubomi Obungunaphakade. Nanga amanye amacebiso anokukunceda:
2 Xa uhambisa “IMboniselo” ka-Aprili 1, usenokubalaselisa inqaku elithi “Dumisani UKumkani Kanaphakade!,” uze uthi:
◼ “Uninzi lwabantu esithethe nabo luyakholelwa kuThixo. Abanye bakufumanisa kunzima ukumkholelwa. Wena uthini? [Vumela impendulo.] Singqongwe bubungqina obuyinene obubonisa ukuba umele abe ukho uThixo. [Funda INdumiso 104:24.] Xa sibona ikhamera okanye ikhompyutha, siye sivume lula ukuba imele ukuba yenziwa ngumyili okrelekrele. Ngaba ibiya kuba yinto esengqiqweni ukuthi izinto ezintsonkothe ngakumbi, ezinjengomhlaba nathi bantu, zavela ngamabona-ndenzile?” Sebenzisa isiqendu esithile kweli nqaku ukubonisa isizathu esiphilileyo sokukholelwa kuThixo. Hambisa amaphephancwadi ngomnikelo oqhelekileyo.
3 “IMboniselo” ka-Aprili 15 ibalaselisa inqaku elithi “Isizathu Sokuba UThixo Alusikelele Unqulo Lokwenyaniso.” Ngaphambi kokuyihambisa, usenokubuza uthi:
◼ “Ekubeni kukho amakhulukhulu eenkonzo ehlabathini, ucinga ukuba zonke zamkelekile kuThixo? [Vumela amagqabaza.] UYesu waxela kwangaphambili ukuba phezu kwalo nje ibango labantu abaninzi bonqulo, abo bangakwenziyo ukuthanda kukaThixo abayi kwamkelwa. [Funda uMateyu 7:21-23.] Kubalulekile ukufanisa unqulo oluyinyaniso uYesu awafundisa ngalo.” Tyhila kumxholwana othi “Sisiphi Isiqhamo Esimele Siveliswe Lunqulo Lokwenyaniso?,” kwiphepha 16, uze uxubushe ngomnye umzekelo ukucacisa loo ngongoma.
4 Xa ubalaselisa umxholo oyintloko ku-“Vukani!” kaMeyi 8, othi “Xa Iimfazwe Ziya Kuba Zingasekho,” usenokuthi:
◼ “Kule nkulungwane bekukho amakhulukhulu eemfazwe, kuquka iimfazwe zehlabathi ezimbini. Ukanti phantse zonke iinkokeli zehlabathi zithi zifuna uxolo. Nabantu endibaziyo bathetha kwaloo nto. Ukuba wonk’ umntu ufuna uxolo, kutheni bengenakulufumana? [Vumela impendulo.] Ucinga ukuba yintoni ekufuneka siyenze ukuze sifumane uxolo lokwenene kulo mhlaba?” Emva kwempendulo yomninimzi, tyhila kwiphepha 8 nelesi-9 ufunde izibhalo ezinjengeNdumiso 46:8, 9. Ngoxa usebenzisa imifanekiso nezibhalo ezicatshuliweyo, bonisa indlela uBukumkani bukaThixo obuya kuluzisa ngayo uxolo oluya kuhlala ngonaphakade kwihlabathi lonke. Yandula ke uhambise amaphephancwadi ngomnikelo oqhelekileyo uze ulungiselele ukubuyela.
5 Ukuba ufumana abaninzi abathi basaxakekile, usenokuzama le:
◼ “Sinomdla ekuncedeni abantu abaphila ubomi obuxakekileyo nabafumana ixesha elincinane lokucinga ngezinto zokomoya ebomini. Oolindixesha bethu, IMboniselo noVukani!, benzelwe ukunikela inkcazelo echanileyo engemibandela ebalulekileyo ebomini nekuchaphazelayo wena nentsapho yakho. Ndingathanda ukukushiyela ezi mpapasho ukuba uzifunde.”
6 Qiniseka ukuba abo bawamkelayo amaphephancwadi ubanika ithuba lokurhumela elinye lawo okanye omabini. Ngokuqinisekileyo baya kungenelwa ekufundeni IMboniselo noVukani!, ozisa “iindaba ezilungileyo.”—Isa. 52:7.