Isingxobo Semibuzo

◼ Yiyiphi indlela efanelekileyo yokusebenzisa igama elithi “mzalwana” nelithi “dade”?

Xa lisetyenziswa ngokoqobo, igama elithi “mzalwana” nelithi “dade” libhekisela kubantu abazalwa ngumntu omnye. Olu lwalamano lwegazi ludla ngokudala ubuhlobo obufudumeleyo, yaye umanyano olufunyanwa ngaba bantu lukhuliswa ngamaqhina entsebenziswano, emekobume neemvakalelo.

UYesu wafundisa abafundi bakhe ukuba xa bethandaza bambize uYehova ngokuthi “Bawo Wethu.” Ukusetyenziswa kwelo gama kubonisa ukuba njengamaKristu, sonke siyinxalenye yesangqa sentsapho emanyeneyo esinandipha ulwalamano lokomoya olukhulu kuyo. Oku kwagxininiswa ngokubhekele phaya nguYesu xa wayexelela abafundi bakhe esithi “nonke nina ningabazalwana.”—Mat. 6:9; 23:8.

Ngoxa abanye besenokuba nesiko lokusebenzisa igama elithi “Tata” nelithi “Mama” xa bebiza abantu abakhulileyo kwiintlanganiso zamaKristu, sinikhuthaza nonke ukuba nisebenzise amagama obuthixo, athi “Mzalwana” nelithi “Dade.” Ebudeni bala mathuba okomoya, lowo wongamele intlanganiso ethile wahlula abantu ababhaptiziweyo ngokubabiza ngokuthi “mzalwana” okanye “dade” atsho elandelisa ngefani yalowo ambizayo.

Kuthekani ukuba umntu ongabhaptizwanga unqwenela ukuba nenxaxheba kwiintlanganiso? Xa umntu ebenxulumana nabantu bakaYehova kangangexesha elithile yaye sekumbovu ukuba azahlulele, ezigqala njengomnye wamaNgqina kaYehova, akukho nto imbi ngokumbiza ngokuthi “Mzalwana” okanye “Dade” ngaphambi kwefani yakhe. Oku kuya kuba njalo ngokukodwa ukuba loo mntu uye waba ngumvakalisi ongabhaptizwanga.

Kwelinye icala, abantu abanomdla abaqalise kutshanje ukuza kwiintlanganiso zethu abakathabathi manyathelo okubahlula njengabentsapho kaThixo. Abantu abanjalo abanakubizwa ngokuthi “Mzalwana” okanye “Dade,” ekubeni bengekho kulwalamano lwentsapho kaThixo. Ngoko ke ebudeni beentlanganiso, siya kubabiza ngokusesikweni ngokuthi “Mnumzana” nefani yabo.

Ukubizana ngokuthi “mzalwana” nangokuthi “dade” kwiintlanganiso zethu zebandla kubonisa umanyano olusondele noluxabiseke ngakumbi kunokubizana nje ngamagama. Kusikhumbuza ngolwalamano olusikelelekileyo esilunandipha njengentsapho yokomoya enoBawo omnye, uYehova uThixo. Kwakhona kukwasikhumbuza nangothando nomsa ongazenzisiyo esinawo phakathi kwethu.—Efe. 2:19; 1 Pet. 3:8.