Ngubani Ofanelekela Ukushumayela?
1 Ngokuphathelele ubulungiseleli, ngaba wakha wavakalelwa njengoMoses? Yena wathi: “Camagu, Nkosi yam! Andindoda imazwi maninzi nanini na, oko wathethayo kumkhonzi wakho lo.” (Eks. 4:10) Ukuba uvakalelwa ngolo hlobo, usenokufuna ukurhoxobisa. Ukanti, uYesu “wasiyalela ukuba sishumayele ebantwini nokuba sinikele ubungqina obucokisekileyo.” (IZe. 10:42) Ngoko sikufanelekela njani ukuba ngabashumayeli beendaba ezilungileyo?
2 Asibobuninzi bemfundo yethu yehlabathi obusenza sifanelekele ubulungiseleli. UPawulos wathi “ababaninzi abazizilumko ngendlela yenyama ababizwayo” yaye “ubulumko beli hlabathi bubudenge kuThixo.” (1 Kor. 1:26; 3:19) UYesu wabanyula abapostile bakhe phakathi kwabantu ababengabasebenzi nje abaqhelekileyo—ubuncinane ingababambisi beentlanzi abane kubo ngokomsebenzi. Iinkokeli zonqulo ezazinekratshi zazibajonga ngendelelo ‘njengabantu nje abangenamfundo nabaqhelekileyo.’ Xa babejongwa ngokwemilinganiselo yehlabathi, aba bapostile babengakufanelekeli ukushumayela. Ukanti, intetho kaPetros awayinikela ngobuchule ngomhla wePentekoste yashukumisa ama-3000 ukuba abhaptizwe!—IZe. 2:14, 37-41; 4:13.
3 UYehova Usenza Sifanelekele Ukushumayela: UPawulos wathi: “Ukufaneleka ngokwaneleyo kwethu kuphuma kuThixo.” (2 Kor. 3:5) UYehova, uMthombo wobulumko, uye wafundisa izigidi zabantu ukuba zishumayele inyaniso yoBukumkani kwabanye. (Isa. 54:13) Ukuba nempumelelo nokuba nemveliso kwalo msebenzi kunokubonwa kuma-338 491 aye abhaptizwa kunyaka ophelileyo ‘njengeeleta zoncomelo’ eziphilayo. (2 Kor. 3:1-3) Sinezizathu ezininzi zokushumayela ngenkalipho nangolweyiseko ngezinto esiye sazifunda kuYehova.
4 Intlangano kaThixo iye yaseka inkqubo yokuqeqesha abalungiseleli ehlabathini lonke. NgeZibhalo nangezixhobo zokufundisisa iBhayibhile ezahlukeneyo, sifundiswa size siqeqeshelwe ukuba ‘sifaneleke ngokuzeleyo, yaye sikuxhobele ngokupheleleyo’ ukushumayela. (2 Tim. 3:16, 17) Abaninzi baye bachukunyiswa yimfundiso efumaneka kwiimpapasho zoMbutho. Ngokomzekelo, ulindixesha waseSweden wathi: “Ngaphandle nje kokholo olushunyayelwa ngamaNgqina kaYehova kukho imfundo yeBhayibhile yehlabathi lonke ephakame ngendlela emangalisayo.”
5 Ngenxa yolwalathiso olunikelwa kwiintlanganiso zethu ezintlanu zeeveki ngeeveki, kucwangciso lwethu lofundo lweBhayibhile nofundisiso, kwisiluleko seSikolo Sobulungiseleli Sobuthixo, kukuncedwa ngokobuqu ngabanye nangabalungiseleli abangamagqala, yaye ngaphezu kwako konke, kukuxhaswa ngumoya oyingcwele kaYehova, sinokuba nentembelo yokuba uYehova usigqala njengabalungiseleli abakufanelekele ngokupheleleyo ukushumayela. ‘Ewe, sithetha njengabathunywe nguThixo, sibonwa nguThixo, sikunye noKristu.’—2 Kor. 2:17.
6 Ukuba siluxhamla ngokuzeleyo uqeqesho olulungiselelwa nguThixo ngentlangano yakhe, asinasizathu sakurhoxobisa okanye soyike. Sinokushumayela kwabanye sinovuyo, siqinisekile ukuba uYehova uya kuyisikelela imigudu yethu.—1 Kor. 3:6.