Shumayela Iindaba Ezilungileyo Kuzo Zonke Iindawo
1 AmaKristu okuqala ayeshumayela iindaba ezilungileyo kuzo zonke iindawo. Ayenenzondelelo engummangaliso kangangokuba kwiminyaka nje engama-30 emva kovuko lukaYesu Kristu, isigidimi soBukumkani ‘sasishunyayelwe kuyo yonke indalo ephantsi kwezulu.’—Kol. 1:23.
2 Namhlanje abakhonzi bakaYehova abanenzondelelo bakwanaloo njongo—ukufikelela kuye wonk’ ubani onokufikeleleka ngeendaba ezilungileyo zoBukumkani. Yintoni enokusinceda siphumeze olu sukelo? Kwiindawo ezininzi zentsimi yethu, ngokukodwa kwiindawo ezisemaphandleni, sisafumana abantu emakhaya xa sisiya kwindlu ngendlu. Nangona oku kuchazwe kwesi sihlomelo kungabuthabatheli ndawo ubulungiseleli bethu bendlu ngendlu, uninzi lwabantu lusebenza ixesha elizeleyo yaye alusoloko lusemakhaya xa silutyelela. Xa lungekho msebenzini, lusenokuba luseluhambeni, ezivenkileni, okanye luye kuzonwabisa. Bafikelelwa njani abo bafanelekayo ngesigidimi soBukumkani?—Mat. 10:11.
3 Bambi bayafumaneka kwiindawo abasebenza kuzo. Kwaneedolophana zinecandelo elinamashishini apho uninzi lwabantu luchitha ixesha elininzi ngosuku. Kwizixeko ezikhulu, kunikelwa ubungqina kubantu abasebenza kwiindawo zemizi-mveliso okanye kwizakhiwo ezikhulu ezineeofisi nakwabo bahlala kwizakhiwo ezinqatyisiweyo ngenxa yezokhuseleko—abaninzi beqala nokubuva. Ngeempela-veki, abanye ekuye kwadityanwa nabo ngoxa beziphumlele ezipakini, kwiindawo zokuzonwabisa, kwiindawo ezineentente, okanye kwizindlwana okanye ngoxa belinde kwiindawo zokumisa iinqwelo-mafutha okanye kwiindawo ezineevenkile kuye kwafunyaniswa ukuba banesimo sengqondo esihle ngakwiindaba ezilungileyo.
4 Inani elandayo labavakalisi lenza umgudu okhethekileyo wokunikela ubungqina kwiindawo zikawonke wonke, naphi na apho banokufumaneka khona abantu. Ekuqaleni, la maNgqina ayemathidala yaye ayenoloyiko ngenxa yokuba eqhele ukushumayela ngokucwangcisiweyo, njengakwindlu ngendlu. Avakalelwa njani ngoku?
5 “Kuye kwabuhlaziya ubulungiseleli bam!” wadanduluka watsho omnye umzalwana onamava. Omnye walek’ umsundulo esithi: “Kundenza ndihlale ndiphaphamile.” Uvulindlela okhulileyo wathi: “Bekusomeleza engqondweni, emzimbeni nangokomoya, . . . yaye kuthe kanti ndisakhula.” Omnye umvakalisi uthi ngoku ufikelela kubantu abaninzi abangazange bathethe namaNgqina kaYehova ngaphambili. Nabantu abaselula bawenza ngehlombe lo msebenzi unandiphekayo. Omnye oselula uthi xa echaza oku: “Kumnandi kuba uye uthethe nabantu abaninzi gqitha.” Kanti omnye uthi: “Ndihambisa uncwadi oluninzi ngendlela endingazange ndenze ngayo ngaphambili!” Konke oku kwenziwa kwintsimi egutyungelwa ngokufuthi.
6 Abaveleli Abahambahambayo Bayakhokela: Ekubeni uqonda ukuba “imeko yeli hlabathi iyatshintsha,” kutshanje uMbutho uye wacebisa abaveleli abahambahambayo ukuba bahlengahlengise ucwangciso lwabo lwenkonzo yasentsimini lweeveki ngeeveki ukuze kufikelelwe abantu abaninzi kangangoko kunokwenzeka ngeendaba ezilungileyo. (1 Kor. 7:31) Kangangeminyaka emininzi, abaveleli besiphaluka bebebekela bucala iintsasa zaphakathi evekini ukuze baye kwindlu ngendlu, ngoxa bebesiya kumabuyelo nakwizifundo zeBhayibhile zamakhaya ngeenjikalanga. Kwezinye iindawo, olo cwangciso lusenokuba luseluhle. Kanti kwezinye, kuncinane kakhulu okunokufezwa ngokusebenza kwindlu ngendlu ngeentsasa ezithile phakathi evekini. Xa kunjalo, umveleli ohambahambayo usenokugqiba kwelokuba ekuseni kuya kuba kuhle ukunikela ubungqina ezivenkileni okanye ezitratweni. Okanye usenokulungiselela amaqela amancinane ukuba anikele ubungqina kwizakhiwo ezikhulu ezineeofisi, kwiindawo ezineevenkile, kwiindawo zokumisa iinqwelo-mafutha, okanye kwezinye iindawo zikawonke wonke. Ukuba abavakalisi banokulisebenzisa kakuhle ixesha abanalo kwinkonzo yasentsimini, kuya kufunyanwa abantu abaninzi ngakumbi.
7 Iingxelo zibonisa ukuba olu hlengahlengiso luye lwamkelwa ngezandla ezishushu ngabaveleli abahambahambayo kunye nabavakalisi. Iqela lamaqumrhu abadala liye lacela umveleli wesiphaluka ukuba aqeqeshe iqaqobana labavakalisi kwiinkalo zomsebenzi ezifuna ukunikelwa ingqalelo ekuhlaleni. Bekuluncedo kwaba bavakalisi ukuhamba nomveleli ohambahambayo njengoko enenxaxheba kweminye yale misebenzi. Nabo baye bakwazi ukuqeqesha abanye. (2 Tim. 2:2) Ngenxa yoko, sithetha nje kufikelelwa abantu abangakumbi ngeendaba ezilungileyo.
8 Kambe ke, akuyomfuneko ukude ulindele utyelelo lomveleli wesiphaluka ukuze ulinge ezinye zezi ndlela zokushumayela. Nanga amanye amacebiso awahlukahlukeneyo osenokuwafumanisa eluncedo kwintsimi yakho:
9 Ukunikela Ubungqina Esitratweni: ‘Bayephi na abantu?’ maxa wambi siye sizibuze oko xa sityelela kwizindlu ezingenabantu ngeentsasa zaphakathi evekini. Bambi basenokuba baqhawulise apha naphaya okanye baye ezivenkileni. Ngaba ukhe walinga ukubafikelela ngokunikela ubungqina esitratweni? Xa isenziwa ngokufanelekileyo, le nkalo yobulungiseleli inokuba nemveliso kakhulu. Kunokuba ume kwindawo enye uphethe amaphephancwadi, kuhle ukuya ebantwini uze uqalise incoko yobuhlobo. Akuyomfuneko ukunikela ubungqina kumntu ngamnye odlulayo. Thetha nabo bangangxamanga kakhulu, njengabo babuka iimpahla, kwabo bakwiindawo zokumisa iinqwelo-mafutha, okanye kubantu abalindele isithuthi sikawonke wonke. Ekuqaleni, usenokubulisa nje ngobuhlobo uze ulindele impendulo. Ukuba loo mntu ukulungele ukuthetha, cela uluvo lwakhe ngombandela osenokuvakalelwa kukuba unomdla kuwo.
10 Omnye umveleli ohambahambayo wacela abavakalisi abathandathu ukuba bamthelele nomfazi wakhe ekunikeleni ubungqina esitratweni. Waba yintoni umphumo? “Saba nentsasa emnandi!” utsho xa echaza. “Asizange singafumani mntu. Sahambisa amaphephancwadi angama-80 kunye nentaphane yamaphecana. Saba nencoko ekhuthazayo kunye nabantu abaliqela. Omnye waba bavakalisi, owayeqala ngqa ukunikela ubungqina esitratweni, wadanduluka wathi: ‘Yonke le minyaka ndisenyanisweni bendingayiqondi eyona nto indiphosayo!’ Ekupheleni kwaloo veki, amaphephancwadi athe chatha ebandla aphela athi tu.”
11 Ngoxa wayekhonza ibandla elilandelayo, kwalo mveleli uhambahambayo weva ukuba iqela labavakalisi laye lanikela ubungqina esitratweni ekuseni ngenye intsasa kodwa alizange libe nempumelelo kangako. Omnye udade wathetha nje nabantu ababini kuphela kulo lonke elo xesha babenikela ubungqina ngalo, ekubeni wonk’ ubani awayedibana naye wayexhabashele emsebenzini. Lo mveleli uhambahambayo wabacebisa ukuba babuyele kwakweso sitrato bonke intsasa sele ihambile. Benjenjalo, kwaye bahlala de kwaba semin’ emaqanda. Lo dade wayencokole nabantu ababini kuphela ekuseni waqhuba kakuhle gqitha ekubuyeni kwakhe. Wahambisa amaphephancwadi angama-31 neencwadana ezili-15, wafumana amagama neekhelingi zabantu abasixhenxe, waza waqalisa izifundo zeBhayibhile zamakhaya ezibini! Nabanye kweli qela baba nemiphumo ekhuthazayo.
12 Xa ufumana umntu onomdla, zama ukufumana igama, ikhelingi nenombolo yemfonomfono yakhe. Kunokusuka ucele nje le nkcazelo kwangoko, usenokuthi: “Ndiyithandile le ncoko. Ngaba ikho indlela yokuba siqhubeke nayo ngelinye ixesha?” Okanye buza oku: “Ngaba ikho indlela endinokukufumana ngayo ekhaya?” Abaninzi abafunyanwa ngale ndlela bayavuma ukutyelelwa kwakhona. Qiniseka ukuba unesixa esaneleyo sezimemo ukuze umeme abo bangathanda ukuza kwiintlanganiso zethu.
13 Ukuba uthetha nomntu onomdla ohlala kwintsimi yelinye ibandla, ufanele uyidlulisele loo nkcazelo ukuze abazalwana balapho benze amalungiselelo okukhangela loo mntu unomdla. Ngaba ukunikela ubungqina esitratweni kunokuba yindlela ephumelelayo yokusasaza iindaba ezilungileyo kummandla wakho? Ukuba kunjalo, phinda uhlolisise inqaku elithi “Ukufumana Abanomdla Ngobungqina Basesitratweni Obuphumelelayo” kuBulungiseleli Bethu BoBukumkani bukaJulayi 1994. Yandula ke wenze amalungiselelo okunikela ubungqina esitratweni ngexesha elifanelekileyo lemini eliya kwenza ufikelele abantu abaninzi kangangoko kunokwenzeka.
14 Ukunikela Ubungqina Kwizithuthi Zikawonke Wonke: Ngenye intsasa iqela loovulindlela lagqiba ekubeni linikele ubungqina kubantu ababelindele uduladula kufuphi nekholeji yasekuhlaleni. Ngoxa babesazincokolela kamnandi, kwavela ingxaki. Ngeli xesha kanye ingxubusho yayisiba shushu, wagaleleka uduladula, uyiphelisa yonke loo ncoko. Aba vulindlela bayicombulula le ngxaki ngokukhwela kulo duladula baza baqhubeka benikela ubungqina kubantu abakhweleyo njengoko babetyhutyha idolophu. Ekupheleni kolo hambo, aba vulindlela bathabatha uduladula ophindela ekhaya, benikela ubungqina kuloo duladula. Emva kokuquqa bebuyelela izihlandlo eziliqela, babala isimbuku esasiyimiphumo yemigudu yabo: Bahambisa amaphephancwadi angaphezu kwama-200 baza baqalisa izifundo zeBhayibhile ezithandathu. Abanye abantu abakhweleyo banikela ngeekhelingi neenombolo zeemfonomfono zabo ngokukhululekileyo ukuze batyelelwe emakhaya. Kwiveki elandelayo, aba vulindlela babuyela kwakwindawo ekulindwa kuyo uduladula baza benza njengakuqala. Bahambisa amaphephancwadi ali-164 baza baqalisa esinye isifundo seBhayibhile. Kwenye indawo yokulindela uduladula kwakhwela omnye umntu waza wahlala kwekuphela kwesihlalo esasikho—ecaleni komnye uvulindlela. Wajonga kulo mzalwana waza ngoncumo wathi: “Ndiyazi ukuba, ikho IMboniselo ondiphathele yona.”
15 Abavakalisi abaninzi banikela ubungqina ngokunempumelelo ngoxa behamba ngoduladula, ngololiwe, okanye ngenqwelo-moya. Unokuyiqalisa njani incoko nomntu ohleli ecaleni kwakho? Omnye umvakalisi ominyaka ili-12 ubudala waqalisa ukufunda uVukani! kuduladula, ejonge ukuvusa umdla kwintwazana ekwishumi elivisayo eyayihleli ecaleni kwakhe. Oku kwasebenza. Le ntwazana yambuza oko wayekufunda, waza lo uselula waphendula ngelithi wayefunda ngesicombululo kwiingxaki abamele bajamelane nazo abantu abaselula. Walek’ umsundulo ngelithi uye wangenelwa kakhulu kweli nqaku yaye linokuyinceda nayo. Yawamkela ngovuyo la maphephancwadi. Le ncoko yabo yeviwa nangabanye abaselula ababini abathi nabo bacela imibhalo yala maphephancwadi. Ngenxa yoko, umqhubi wamkhuphela ecaleni uduladula waza wabuza le nto ibangela umdla kangaka kula maphephancwadi. Xa wayifumanisayo, naye wawamkela. Kakade ke, bekungayi kwenzeka nanye kwezi zinto ukuba lo mvakalisi uselula wayengenasixa saneleyo samaphephancwadi okwabelana naye wonk’ ubani obonisa umdla!
16 Ukunikela Ubungqina Ezipakini Nakwiindawo Zokumisa Iinqwelo-mafutha: Ukunikela ubungqina ezipakini nakwiindawo zokumisa iinqwelo-mafutha kuyeyona ndlela isemagqabini yokufikelela abantu. Ngaba ukhe wakulinga ukunikela ubungqina kwindawo yokumisa iinqwelo-mafutha ekwindawo eneevenkile? Ngamaxesha onke sebenzisa nje imizuzu embalwa ukuze uyijonge kakuhle loo ndawo. Khangela umntu ongangxamanga okanye ohleli kwinqwelo-mafutha uze uzame ukuqalisa incoko yobuhlobo. Ukuba incoko iyaqhubeka, thetha ngesigidimi soBukumkani. Zama ukusebenza wedwa kodwa kubekho nomnye umvakalisi kwakuloo ndawo. Kuphephe ukuphatha ingxowa enkulu, okanye uthi ngandlel’ ithile utsalele ingqalelo kumsebenzi wakho. Yiba nobulumko. Kusenokuba kuhle ukuchitha nje ixesha elincinane kwindawo yokumisa iinqwelo-mafutha uze uye kwenye. Ukuba ubani akanamdla wakuncokola nawe, mshiye ngobubele uze ukhangele omnye umntu onokuya kuye. Esebenzisa ezi ndlela, omnye umzalwana wahambisa amaphephancwadi angama-90 ngenyanga nje enye ngoxa wayenikela ubungqina kwindawo yokumisa iinqwelo-mafutha.
17 Bambi abantu baya epakini ukuya kuphumla; abanye bayela ukudlala okanye ukubethwa ngumoya kunye nabantwana babo. Ngaphandle kokuba sisiphazamiso kwizinto zabo, khangela ithuba lokunikela ubungqina. Omnye umzalwana waqalisa incoko nomntu onyamekela ipaki waza wafumanisa ukuba wayexhalabele iziyobisi nekamva labantwana bakhe. Kwaqaliswa isifundo seBhayibhile sekhaya yaye sasiqhutywa ngokuthe rhoqo apho epakini.
18 Ukunikela Ubungqina Ngokungacwangciswanga Kwiindawo Ezineevenkile: Ngoxa kungasoloko kusenzeka ukushumayela ngokucwangcisiweyo ngokungena kwiivenkile ngeevenkile ngenxa yemiqathango yasekuhlaleni kwizinto ezinjalo, abanye abavakalisi bazivulela amathuba okunikela ubungqina apho ngokungacwangciswanga. Bahlala phantsi esitulweni baze baqalise incoko yobuhlobo nabanye abaze kuphumla. Xa kukho umdla, ngobulumko bahambisa iphecana okanye iphephancwadi baze bazame ukwenza amalungiselelo okubuyela. Emva kokuchitha imizuzwana nje embalwa benikela ubungqina kwenye indawo eneevenkile, baya kwenye baze nalapho bancokole nomntu othile. Kambe ke, sifanele silumke singazibizeli ingqalelo engafanelekanga ngoxa sinikela ubungqina ngokungacwangciswanga ngale ndlela.
19 Xa ubulisa umntu, qalisa incoko ngamazwi obuhlobo. Ukuba umphulaphuli wakho uyasabela, buza umbuzo, wandule ke uphulaphule ngenyameko xa ethetha. Yiba nomdla wobuqu koko akuthethayo. Mbonise ukuba uyaluxabisa uluvo lwakhe. Xa kunokwenzeka, vumelana naye.
20 Omnye udade waba nencoko emnandi kunye nebhinqa elikhulileyo ngokuthi akhankanye indlela anyuke ngayo amaxabiso ezinto zokuziphilisa. Eli bhinqa lavumela phezulu, kwaza emva koko kwalandela incoko eshushu. Lo dade wakwazi ukufumana igama nekhelingi yeli bhinqa, waza wabuyela kwangaloo veki.
21 Ukusebenza Kwiivenkile Ngeevenkile: Inxalenye yentsimi yamanye amabandla ngummandla onamashishini. Umzalwana onyamekela intsimi usenokulungiselela amaqweqwe akhethekileyo emaphu yale mimandla yamashishini axineneyo. Nawaphi na amaqweqwe emaphu yentsimi enezindlu anale mimandla afanele abonise ngokucacileyo ukuba amashishini akafanele asetyenzwe njengenxalenye yentsimi. Kwezinye iindawo, imimandla enamashishini inokusetyenzwa nezindlu. Abadala basenokucela abavakalisi abafanelekayo ukuba basebenze kwintsimi enamashishini rhoqo ukuze umsebenzi wokungena kwiivenkile ngeevenkile ungagatywa.
22 Ukuba ucelwa ukuba ube nesabelo kulo msebenzi yaye akuzange uwenze ngaphambili, indlela entle ‘yokuqweba inkalipho’ kukusebenza kwiivenkile nje ezincinane ezimbalwa kuqala; wandule ke, xa unentembelo engakumbi, usebenze kwezinkudlwana. (1 Tes. 2:2) Xa usebenza kwiivenkile ngeevenkile, nxiba njengaxa usiya kwiintlanganiso kwiHolo yoBukumkani. Ukuba kunokwenzeka, ngena evenkileni xa kungekho mntu uze kuthenga. Cela ukuthetha nomphathi okanye nengqonyela yalapho. Yiba nobuhlobo, yaye ngaphezu kwako konke, qupha. Akukho mfuneko yokucela uxolo ngokugqithiseleyo. Amashishini amaninzi anomdla kubathengi yaye asoloko ezilindele iziphazamiso.
23 Emva kokubulisa unovenkile, usenokuthi: “Oosomashishini basoloko bexakekile kangangokuba kunqabile ukuba sibafumane emakhaya, ngoko sithe masikutyelele apha kweli shishini lakho ukuza kukushiyela nje inqaku elibangel’ umdla ukuba ulifunde.” Yandula ke ugqabaze ngephephancwadi elihanjiswayo.
24 Okanye usenokuzama oku xa uthetha nomphathi: “Siye saphawula ukuba oosomashishini bazabalazela ukuhlala bekwazi kakuhle okuqhubekayo. Inkupho yakutshanje yeMboniselo (okanye uVukani!) inenqaku elisichaphazela sonke ngokobuqu.” Cacisa ukuba lithini, uze uqukumbele ngokuthi: “Siqinisekile ukuba nawe uya kukuthanda ukulifunda.”
25 Ukuba kukho abasebenzi, yaye kubonakala kufanelekile, usenokongezelela uthi: “Ngaba ubuya kukhathazeka ukuba bendinokunikela kwale ntshumayelo imfutshane kubasebenzi bakho?” Ukuba uyavuma, khumbula ukuba uthembise ukuba uza kubetha koomofu, ibe umphathi uya kulindela ukuba wenze ngokwelizwi lakho. Ukuba nabaphi na abasebenzi bafuna ukuqalisa ingxubusho ende, kusenokuba kuhle ukubatyelela emakhayeni abo.
26 Kutshanje, ibathwana labavakalisi benye idolophana lathelela umveleli wesiphaluka kumsebenzi weevenkile ngeevenkile. Bambi kwaba bavakalisi babesoyika ekuqaleni, ekubeni bengazange bawenze lo msebenzi ngaphambili; kodwa kungekudala bakhululeka baza baqalisa ukuwunandipha. Kungekapheli nje neyure enye, babethethe nabantu abangama-37 yaye behambise amaphephancwadi angama-24 kunye neencwadana ezinemifanekiso ezi-4. Omnye umzalwana waphawula ukuba bebengadli ngakudibana nabantu abaninzi kwinyanga abasebenza ngayo kwindlu ngendlu njengokuba benzayo xa babengena kwiivenkile ngeevenkile ngexeshana elifutshane kangako.
27 Ukuvula Amathuba Okushumayela: UYesu akazange ashumayele nje ngokucwangcisiweyo kuphela. Wayesasaza iindaba ezilungileyo ngaso nasiphi na isihlandlo esifanelekileyo. (Mat. 9:9; Luka 19:1-10; Yoh. 4:6-15) Phawula indlela abanye abavakalisi abawavula ngayo amathuba okushumayela.
28 Abanye bazenzela umkhwa wokunikela ubungqina kubazali abalindele abantwana babo kumasango esikolo. Ekubeni uninzi lwabazali lufika malunga nemizuzu engama-20 kuselithuba, likho ixesha lokuncokola nalo ngendlela ekhuthazayo ngombandela oseZibhalweni.
29 Oovulindlela abaninzi bakuphaphele ukufikelela abantu abasenokuba nomdla okhethekileyo kumbandela othile oxutyushwa kumaphephancwadi ethu. Ngokomzekelo, omnye udade wafumana intsabelo entle etyelele kwizikolo ezithandathu ezikwintsimi yebandla lakhe ngamanqaku awayekuVukani! kaJanuwari 8, 1996 owawunamanqaku athathetha ngezikolo. Kwakhona watyelela nendawo esingatha imicimbi yentsapho ephethe amaphephancwadi angobomi bentsapho nokuxhatshazwa kwabantwana yaye kwathiwa makaphinde abuye neenkupho ezilandelayo ezixubusha kwangemibandela efanayo. Intsabelo awayifumana kwiofisi yezemisebenzi ngoVukani! kaMatshi 8, 1996, oxubusha ngengxaki yokungaqeshwa wayichaza ‘njengengenambaliso.’
30 Omnye umveleli wesithili unikela ingxelo yokuba yena nomkakhe basoloko benikela ubungqina ngokungacwangciswanga ngoxa beye kuthenga ukutya ezivenkileni. Baya evenkileni xa ingazalanga kakhulu, naxa abathengi bezithele chu evenkileni. Bathi baba nencoko emnandi.
31 Abavakalisi abaninzi bathi baba nemiphumo emihle ngoxa benikela ubungqina kubantu abakwindawo kawonke wonke yokuhlambela impahla. Abasuki nje bashiye amaphephancwadi xa kungekho mntu apho. Usukelo lwabo kukufikelela abantu ngeendaba ezilungileyo, ngoko bazabalazela ukuthetha ngokobuqu nabo basebenzisa le ndawo.
32 Kwezinye iindawo, abavakalisi abakhethiweyo banikwe igunya lokunikela ubungqina kwizikhululo zeenqwelo-moya. Ngamanye amathuba, baye baba novuyo lokunikela ubungqina kubahambi bamazwe ngamazwe abahlala kumazwe apho kukho abantu bakaYehova abambalwa. Apho bafumana abantu abanomdla, bahambisa iphecana okanye amaphephancwadi.
33 Ukuba abavunyelwa ukuba banikele ubungqina ngokobuqu kubantu abahlala kwizakhiwo ezinqatyisiweyo ngenxa yezokhuseleko ezikwintsimi yebandla, abanye baye baziqhelisa ukunikela ubungqina ngobuchule kubalindi abasebenzayo okanye kubaphathi abakwiiofisi zokurenta ezi zakhiwo. Kwenziwa ngolu hlobo nakwizindlu zabantu ezivalwe ngamasango. Umveleli wesiphaluka kunye nembinana yabavakalisi batyelela izakhiwo zokuhlala eziqeshisayo ezisixhenxe ngale ndlela. Kwimeko nganye, baxelela umphathi ukuba nangona bengavunyelwa ukuba batyelele zonke ezi ndawo ngendlela esiqhele ukwenza ngayo, babengafuni ukuba aphoswe yinkcazelo yoolindixesha bakutshanje. Abaphathi bazo zosixhenxe ezi zakhiwo bawamkela ngothakazelelo amaphephancwadi baza bacela iinkupho ezilandelayo! Kunxityelelwana nabantu abahlala kwezo ndawo ngomnxeba.
34 Zibhokoxe Ushumayele Kuzo Zonke Iindawo: Ukuphila ngokuvisisana nozahlulelo lwethu kuquka ukuba nemvo yongxamiseko ngesabelo sethu sokushumayela isigidimi soBukumkani. Ukuze sifikelele ebantwini ngexesha elibafaneleyo, kufuneka sibekele bucala izilangazelelo zethu ukuze sithi ‘ngandlela zonke sisindise abathile.’ Bonke abakhonzi bakaYehova abazahluleleyo kufuneka bakwazi ukuthi, njengoko watshoyo umpostile uPawulos: “Ndenza zonke izinto ngenxa yeendaba ezilungileyo, ukuze ndabelane nabanye ngazo.”—1 Kor. 9:22, 23.
35 Ngokubhekele phaya uPawulos wabhala wathi: “Ngokuchulumanca okukhulu, ke ngoko, kunoko ndiza kusuka ndiqhayise ngokuphathelele ubuthathaka bam, ukuze amandla kaKristu ahlale njengentente phezu kwam. . . . Kuba xa ndibuthathaka, ndithi ke ndibe namandla.” (2 Kor. 12:9, 10) Ngamany’ amazwi, akukho namnye kuthi onokuwenza ngamandla akhe lo msebenzi. Kufuneka sithandaze kuYehova sicele umoya wakhe oyingcwele onamandla. Ukuba sithandazela amandla kuThixo, sinokuba nentembelo yokuba uya kuyiphendula imithandazo yethu. Iya kwandula ke indlela esibathanda ngayo abantu isishukumisele ekubeni sijonge amathuba okushumayela iindaba ezilungileyo kubo, naphi na apho sinokubafumana khona. Kule veki izayo, kutheni ungazami elinye lala macebiso abalaseliswe kwesi sihlomelo?