Isingxobo Semibuzo

◼ Ziziphi izinto esifanele sizilumkele xa sikunye nomntu wesini esahlukileyo kubulungiseleli bethu?

Sinesizathu sokulindela ukuba abazalwana noodade wethu babe nenjongo yokubambelela kwimilinganiselo ephakamileyo yokuziphatha kwihambo yabo. Noxa kunjalo, siphila kwihlabathi elingcolileyo nelinguvula-zibhuqe elinemilinganiselo yokuziphatha ephantsi gqitha. Ngoxa sisenokuba neenjongo ezintle, simele sihlale sikulumkele ukuba ngoonobangela bogculelo okanye ukubandakanyeka kwinto engafanelekanga. Oku kuquka ukulumka ngoxa sikubulungiseleli.

Kwinkonzo yasentsimini sidla ngokudibana nabantu besini esahlukileyo ababonakala ngathi banomdla wokwenene enyanisweni. Ukuba sihamba sedwa yaye akukho mntu wumbi kwelo khaya, kudla ngokuba kuhle ukunikela ubungqina emnyango kunokungena ngaphakathi. Ukuba loo mntu unomdla, sinokwenza amalungiselelo okubuyela xa siya kube sihamba nomnye umvakalisi okanye xa abanye abantu belo khaya bekho nabo. Ukuba oku akwenzeki, kuya kuba kuhle ukudlulisela loo mninimzi kumvakalisi wesini esifanayo nesakhe. Oku kuyasebenza nasekuqhubeleni umntu wesini esahlukileyo isifundo seBhayibhile.—Mat. 10:16.

Kufuneka silumke xa sikhetha umntu esiza kuhamba naye kubulungiseleli. Nangona abavakalisi besini esahlukileyo besenokuhamba kunye ngamathub’ athile, kuhle bakwenze oku xa bekunye neqela. Ngokuqhelekileyo, kwanaxa sikubulungiseleli, akubobulumko ukuba sichithe ixesha sisedwa nomntu wesini esahlukileyo ongeloqabane lethu lomtshato. Ngenxa yoko, umzalwana okhokela iqela lenkonzo ufanele asebenzise ingqiqo xa esaba abavakalisi, kuquka abakwishumi elivisayo, ukuba bahambe kunye.

Ngokuhlala sisebenzisa ingqiqo, siya kukuphepha ‘ukunikela nawuphi na unobangela wesikhubekiso’ kuthi okanye kwabanye.—2 Kor. 6:3.