Isingxobo Semibuzo

◼ Kutheni sifanele sinikele ingqalelo ekhethekileyo kwindlela esinxiba nesizilungisa ngayo xa sityelela izakhiwo zoMbutho eziseNew York nakwiiofisi zesebe ezisehlabathini?

Kulindeleke ukuba amaKristu abe nentlonelo efanelekileyo. Ngamaxesha onke indlela esinxiba nesizilungisa ngayo ifanele ibonakalise isidima nesithozela esifanele abakhonzi bakaYehova uThixo. Oku kuyinyaniso ngokukodwa xa sityelela izakhiwo zoMbutho eNew York nakumasebe asehlabathini lonke.

Ebudeni bowe-1998, kuya kubakho iindibano zesithili nezezizwe ngezizwe. Amawaka abazalwana bethu abasuka kumazwe amaninzi baza kutyelela ikomkhulu loMbutho eNew York kwakunye namasebe akwamanye amazwe. Sifuna ‘ukuzincomela njengabalungiseleli bakaThixo ngandlela zonke,’ kuquka ukunxiba nokuzilungisa kwethu ngendlela efanelekileyo xa sityelela ezi zakhiwo, kungekuphela nje ebudeni bezihlandlo ezilolo hlobo, kwanangamanye amaxesha.—2 Kor. 6:3, 4.

Ixubusha ukubaluleka kokunxiba nokuzilungisa ngendlela efanelekileyo, incwadi ethi Ukulungelelaniselwa Ukufeza Ubulungiseleli Bethu igqabaza ngemfuneko yokucoceka emzimbeni neyokunxiba nokuzilungisa ngendlela endilisekileyo xa sisiya kwinkonzo yasentsimini nakwiintlanganiso zamaKristu. Yandule ke, kwiphepha 131, isiqendu 2 ithi: “Bekuya kuba yinto efanayo xa sityelele ikhaya laseBheteli eBrooklyn okanye nayiphi na enye yeeofisi zamasebe zoMbutho. Khumbula, igama elithi Bheteli lithetha ‘Indlu kaThixo,’ ngoko isinxibo sethu, ukuzilungisa nehambo zimele zifane noko kulindelwe kuthi xa sikwiintlanganiso zokunqula kwiHolo yoBukumkani.” Lo mlinganiselo uphakamileyo ufanele ugcinwe ngabavakalisi boBukumkani basekuhlaleni kwakunye nabo basuka kwimimandla ethe qelele abeze kubona baze banxulumane namalungu entsapho yaseBheteli nabaze kutyelela kwizakhiwo zesebe.

Indlela esinxiba ngayo ifanele ibe nempembelelo entle kwabanye ngendlela abafanele balujonge ngayo unqulo lokwenyaniso lukaYehova. Noko ke, kuye kwaphawulwa ukuba abanye abazalwana noodade batyekele ekunxibeni iimpahla zokuphola xa betyelela izakhiwo zoMbutho. Isinxibo esinjalo asifanelekanga xa kutyelelwa amakhaya aseBheteli. Kulo mbandela, njengakwezinye iinkalo zobomi bethu bamaKristu, sifuna ukulondoloza umlinganiselo ophakamileyo owenza abantu bakaThixo bahluke ehlabathini ngokuzenzela uzuko lukaThixo zonke izinto. (Roma 12:2; 1 Kor. 10:31) Kwakhona kufanelekile ukuthetha nabo sibafundela iBhayibhile nabanye abasenokuba bayaqala ukutyelela eBheteli size sibakhumbuze ngendlela ekubaluleke ngayo ukunikela ingqalelo kwindlela abanxiba nabazilungisa ngayo.

Ngoko xa utyelela kwizakhiwo zoMbutho, zibuze: ‘Ngaba indlela endinxibe nendizilungise ngayo indilisekile?’ (Thelekisa uMika 6:8.) ‘Ngaba immela kakuhle uThixo endimnqulayo? Ngaba abanye baya kuphazanyiswa okanye bakhutyekiswe yinkangeleko yam? Ngaba ndimisela umzekelo omhle kwabanye abasenokuba bayaqala ukutyelela?’ Ngamana, ngendlela esinxiba nesizilungisa ngayo, singasoloko ‘siyihombisa imfundiso yoMsindisi wethu, uThixo, ezintweni zonke.’—Tito 2:10.