Ukuqinisa Ekunikeleni Ubungqina Njengokuba Isiphelo Sisondela
1 Ixesha lokuvuna lixesha lemincili. Ikwalixesha lokusebenza nzima. Kukho ixesha elincinane lokuhlanganisa isivuno. Abasebenzi abamele barhuq’ iinyawo emsebenzini wabo.
2 Ethetha ngokufuziselayo, uYesu wathelekisa “ukuqosheliswa kwenkqubo yezinto” nexesha lokuvuna. (Mat. 13:39) Siphila ekuqoshelisweni kwale nkqubo yezinto, sinexesha elincinane lokunikela ubungqina “kuwo wonke umhlaba omiweyo.” (Mat. 24:14) Njengokuba isiphelo sisondela nangakumbi, kufuneka sandise isabelo sethu kubulungiseleli. Ngoba? UYesu wacacisa: “Isivuno sikhulu, kodwa abasebenzi bambalwa.”—Mat. 9:37, 38; Roma 12:11.
3 Yiba kulo Ngokungxamisekileyo: Xa uYesu waqalisa umsebenzi wakhe ozukileyo wokushumayela, wayeneminyaka emithathu enesiqingatha kuphela yokuphumeza oko wayekuthunywe ukuba akwenze. Washumayela ngemvo yongxamiseko, esithi: “Ndimele kukuzivakalisa iindaba ezilungileyo zobukumkani bukaThixo, ngenxa yokuba ndithunyelwe oku.”—Luka 4:43.
4 UYesu wabethelela imvo efanayo yongxamiseko kubafundi bakhe. (Marko 13:32-37) Kungenxa yoko le nto “imihla yonke etempileni nakwizindlu ngezindlu baqhubeka ngaphandle kokuyekelela befundisa kwaye bevakalisa iindaba ezilungileyo ezingoKristu, uYesu.” (IZe. 5:42) Imisebenzi engabalulekanga ayizange ize kuqala ebomini babo. Nangona babeliqaqobana nje, baphumelela ukushumayela iindaba ezilungileyo “kwindalo yonke ephantsi kwezulu.”—Kol. 1:23.
5 Kukho isizathu esikhulu ngakumbi kuthi sokuba sihlakulele imvo yongxamiseko efanayo ngoku, njengokuba “isiphelo sezinto zonke sisondele.” (1 Pet. 4:7) UYehova ubeke umhla neyure yokubhanga kwale nkqubo yezinto. (Mat. 24:36) Umsebenzi wokushumayela uya kugqitywa kweli xesha liseleyo. Kungenxa yoko le nto sisenza umgudu ongakumbi ukuze sifikelele abantu abangakumbi nangakumbi ngeendaba ezilungileyo.
6 Ngokwandisa isabelo sethu kumsebenzi wokunikela ubungqina njengokuba isiphelo sisondela, siya kuba nolwaneliseko lokuthi kuYehova, njengokuba wenzayo uYesu: ‘Siwugqibile umsebenzi obusinikile ukuba siwenze.’—Yoh. 17:4.