“Lishumayele ILizwi . . . Ngokungxamisekileyo”
1 Ukuba ufumana into ebhalwe “NGOKUNGXAMISEKILEYO,” uyijonga njani? Igama elithi “ngokungxamisekileyo” lithetha ukuthi “nikela ingqalelo ngoko nangoko.” Ngesizathu esivakalayo, umpostile uPawulos wayalela amaKristu ukuba afanele ‘alishumayele ilizwi . . .ngokungxamisekileyo.’ (2 Tim. 4:2) Ngaba usabela ngokunikela ingqalelo ngoko nangoko kulo msebenzi?
2 Mhlawumbi waxelelwa uPawulos ukuba bambi babazalwana bakhe babenomkhwa ‘wokutshivela emsebenzini’ njengamaKristu. (Roma 12:11) Oku kwasinciphisa isiqhamo semisebenzi yawo novuyo ayenokulunandipha ngokunceda abanye.
3 Imbono KaYesu Ngobulungiseleli: Luluphi uvuyo awalufumanayo uYesu ngokuphumeza ubulungiseleli bakhe! Wathi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.” Umzekelo kaYesu wabakhuthaza abafundi bakhe, owabakhuthaza ngokubaxelela ukuba ‘amasimi amhlophe ukuze kuvunwe.’ (Yoh. 4:34, 35) Imvo yongxamiseko awayibonisayo kubo bonke ubulungiseleli bakhe yabonakala xa waxelela abafundi bakhe ukuba ‘babongoze iNkosi yesivuno ukuba ikhuphe abasebenzi baye esivunweni sayo.’ (Mat. 9:38) UYesu waluxabisa uthumo lwakhe lokushumayela, wayezimisele ukuba angavumeli nantoni na ukuba imthintele ukwenjenjalo.
4 Kuthekani Ngathi? Namhlanje, kukho ungxamiseko olungakumbi kunanini na ngaphambili lokuhambisela phambili umsebenzi wokushumayela. Kwiindawo ezininzi zehlabathi, amasimi avuthiwe ukuze avunwe. Kwanakumazwe apho kubonakala ngathi kunikelwe ubungqina obucokisekileyo, kusabhaptizwa amawaka nyaka ngamnye. Ekubeni isiphelo sale nkqubo ikhoyo yezinto sisondela ngokukhawuleza, kukho “okuninzi kokwenza emsebenzini weNkosi.” (1 Kor. 15:58) Kunangalo naliphi na elinye ixesha, kubalulekile ukuba sizibhokoxe ngamandla ekwabelaneni nabanye ngesigidimi soBukumkani.
5 Masizimisele ukufikelela abanye ngeeendaba ezilungileyo kwindlu ngendlu, naphi na apho banokufumaneka khona abantu kumhlaba wethu. Ngokuba nesabelo ngokuzele kangangoko kunokwenzeka kulo msebenzi wokushumayela, sibonisa ngokucacileyo ukuba sibeka uBukumkani kuqala ebomini bethu. (Mat. 6:33) Ukushumayela kwethu iindaba ezilungileyo ngokungxamisekileyo ngokuthembeka kuya kusizisela uvuyo olungakumbi.