Isingxobo Semibuzo

◼ Abalindi banokubanceda njani abazali ukuba bancede abantwana babo bazole ezintlanganisweni?

Ngokwemvelo abantwana badlamkile, abakuqhelanga ukuhlala phantsi ixesha elide. Emva kwentlanganiso, abantwana badlamka gqitha nto leyo ebenza babaleke baze baleqe abanye abantwana eHolweni yoBukumkani okanye kwezinye iindawo zokuhlanganisana, kwiindawo zokumisa iinqwelo-mafutha okanye endleleni. Noko ke, umzekeliso unyanisile xa usithi: “Inkwenkwe eyekelelwayo iya kumhlazisa unina.”—IMize. 29:15.

Kubuhlungu ukuthi, bambi babazalwana noodade bethu baye benzakala ngenxa yokuba abantwana badlalela kubo baze babagile bawe. Oku kunokubangela ukubandezeleka okungeyomfuneko neendleko ezingeyomfuneko kubazali nebandla. Ngenxa yokhuseleko lwabo nolwabanye, abantwana abafanele bavunyelwe babaleke nokuba badlale ngaphakathi okanye ngaphandle kweHolo yoBukumkani.

Abazali banembopheleleko engokweZibhalo yokuqeqesha abantwana babo ukuba baziphathe ngentlonelo iindawo zethu zonqulo. (INtshu. 5:1a) Kwiintlanganiso zethu zamaKristu nasezindibanweni abalindi babelwe ukuqinisekisa ukuba ‘zonke izinto zenzeka ngokundilisekileyo’ nokuba kukho ‘ulungelelwano.’ (1 Kor. 14:40; Kol. 2:5) Bafanele bahlale bephaphile ngaphambi, ebudeni nasemva kocwangciso ngaphandle nangaphakathi. Ukuba umntwana uyadlala okanye akalawuleki, umlindi unokummisa ngobuchule aze amchazele isizathu sokuba izenzo ezinjalo zingamkelekanga. Nabazali bomntwana bafanele baxelelwe ngobubele ngale ngxaki nemfuneko yokuba bambek’ esweni umntwana lowo. Umzali ufanele abe nentsebenziswano.

Kuyaqondakala ukuba maxa wambi iintsana nabantwana abasebancinane banokukhala okanye baphazamise ebudeni beentlanganiso. Abalindi, bafanele bafike kwimizuzu engama-20 ngaphambi kokuqalisa kocwangciso, izihlalo ezingasemva eholweni banokuzigcinela abazalikazi abanabantwana abebengathanda ukuhlala apho nabantwana babo. Sonke sifanele sibe nentsebenziswano ngokubashiyela ezo zihlalo.

Ukuba umntwana uyaphazamisa, umzali ufanele athabathe amanyathelo athile. Ukuba umzali akenzi nto yaye imeko iya isiba mbi, umlindi ufanele amcele ngobubele ukuba aphume eholweni nomntwana. Xa simemela kwiintlanganiso abantu abasebatsha abanabantwana, sifanele sihlale nabo size sinikele uncedo ukuba abantwana bayakhala okanye baphazamisa ngezinye iindlela.

Kuyasivuyisa ukubona abantwana abakubudala obahlukeneyo eHolweni yoBukumkani nokuphawula ihambo yabo entle endlwini kaThixo. (1 Tim. 3:15) Ngokuhlonela kwabo amalungiselelo kaYehova onqulo, bayamzukisa yaye bayathandwa ngabo bonke ebandleni.