Yiba Ngumzekelo Kwimisebenzi Emihle
1. Kutheni sifanele siyibeke esweni ngokukhethekileyo ihambo yethu endibanweni?
1 Xa sihlanganisene sibaninzi kwiindibano zezizwe ngezizwe okanye kwezesithili, indlela esenza ngayo izinto nesibaphatha ngayo abanye ijongiwe ngabakhi-mkhanya. Ngoko ke, ngamnye wethu kufuneka anikele ingqalelo ekhethekileyo kwisibongozo seBhayibhile esithi: ‘Yiba ngophilileyo engqondweni, kwizinto zonke uzibonisa ungumzekelo wemisebenzi emihle.’ (Tito 2:6, 7) Kusenokufuneka umgudu okhethekileyo ukuze ‘sinyamekele, kungekuphela nje izilangazelelo zobuqu, kodwa kwanezilangazelelo zabanye.’ (Fil. 2:4) Makhe sixubushe ezinye zezinto esinokulisebenzisa kuzo eli cebiso kwiiNdibano ‘Zokuzukisa UThixo’ ezizayo.
2. Yintoni esifanele siyikhumbule ngamalungiselelo amagumbi?
2 Ilungiselelo Lamagumbi: ISebe Lamagumbi lichithe iinyanga eziliqela lifuna indawo yokuhlala eyaneleyo. Xa sisenza amalungiselelo amagumbi sinethuba elihle lokwenza imisebenzi emihle. Enoba uza kufikela ehotele, kwindlu eqeshisayo, kwindawo yeekharavani, okanye kwikhaya lomntu, nceda ulungiselele indawo oza kuyisebenzisa kuphela. Ukuba kuyimfuneko, qiniseka ukuba uthumela idipozithi efunekayo kusengaphambili. Ngexesha lokungena nelokuphuma kule ndawo ufikele kuyo, ekudla ngokuphithizela ngalo, kuyinto encomeka kakhulu ukuba nesiqhamo somoya kaThixo.—Gal. 5:22, 23.
3. ‘Sinokukwenza njani okulungileyo kubo bonke’ kwindawo esifikele kuyo?
3 Ukuba nomdla kwethu kwabanye kufanele kubonakale kwindlela esiwasebenzisa ngayo nawaphi na amalungiselelo asimahla esidlo sakusasa. Akuyonto intle ukuthatha ukutya okulungiselelwe iindwendwe siye nako endibanweni. Abasebenzi basehotele badla ngokuyixabisa into yokuba sithobele imithetho yaye sibe nolwazelelo ngokubashiyela imadlana esisipho. Ngale ndlela ‘senza okulungileyo kubo bonke’ yaye sinikela ubungqina kwabanye.—Gal. 6:10.
4, 5. Abantwana banokumdumisa njani uYehova, yaye yiyiphi imbopheleleko abanayo abazali?
4 Abazali Nabantwana: Kweli hlabathi lizaliswe ngabantwana abangenasimilo, abantwana bethu babonwa nanguthathatha ukuba bahlukile, ibe loo nto idumisa uYehova nentlangano yakhe. Noko ke, maxa wambi kubakho iingxaki xa abantwana bengalawulwa. (IMize. 29:15) Abazali abafanele bashiye abantwana babo bodwa kwindawo abafikele kuyo, kwiswimming pool, kwiindawo zokuzihlaziya okanye kwindawo ekuqhutyelwa indibano kuyo.
5 Abanye abazali baye bakufumanisa kuluncedo ukuxubusha nabantwana babo indlela ekulindeleke ukuba baziphathe ngayo ngaphambi kwendibano. (Efe. 6:4) Banceda abantwana babo baqonde ukuba uthando lokwenene lobuKristu “aluziphathi ngokungandilisekanga” okanye ‘lufune ezalo izilangazelelo.’ (1 Kor. 13:5) Indibano lixesha elibekelwe ukufundiswa nguYehova, ibe abantwana nabantu abakhulileyo banokulihlonela eli lungiselelo ngendlela abaziphatha ngayo kwindawo ekuqhutyelwa kuyo indibano nakwezinye iindawo.—Isa. 54:13.
6. Ihambo yethu inokubachaphazela njani abanye?
6 Ihambo yethu entle inokwenza lukhulu ekulungiseni iingcamango eziphosakeleyo abantu abanazo ngathi ize ibenze batsaleleke kunqulo lokwenyaniso. (Mat. 5:16; 1 Pet. 2:12) Ngamana bonke abo sidibana nabo kwindibano esiya kuyo bangafumana ubungqina obuhle kwindlela esenza izinto ngayo nakwindlela esibaphatha ngayo. Ngale ndlela siya ‘kuzibonisa singumzekelo wemisebenzi emihle’ size sizukise uYehova.—Tito 2:7.
[Ibhokisi ekwiphepha 4]
Bacingele Abanye
▪ Lungiselela indawo yokuhlala oza kuyisebenzisa kuphela
▪ Yiba nomonde ngamaxesha okungena nawokuphuma kuloo ndawo ufikele kuyo
▪ Musa ukulisebenzisa kakubi ilungiselelo lesidlo sakusasa
▪ Balawule abantwana bakho
▪ Shiya imadlana esisipho