Amacebiso Ngendlela Yokuhambisa Incwadi Ethi Iyintoni Injongo Yobomi—Unokuyifumana Njani?
Emva kokuba ubulisile, usenokuthi:
“Namhlanje ubomi buzaliswe ziingxaki ezingaphephekiyo nokuphoxeka. Ucinga ukuba le yayiyinjongo yobomi? [Mlinde aphendule.] Le ncwadana inemifanekiso ibonisa ukuba injongo kaThixo yantlandlolo ngoluntu nomhlaba iseza kuzaliseka. [Xubusha umfanekiso okwiphepha 20-1. Emva koko funda isiqendu 9, ubalaselise uIsaya 14:24 nesama-46:11.] Kwixa elizayo, ndingathanda ukukubonisa apho iBhayibhile ithetha ngokubuyisela kukaThixo iParadesi emhlabeni.” Hambisa incwadana enemifanekiso, uze ucele ukuphinda ubuye.
Xa ubuyela usenokuthi:
“Kwixa elidluleyo ndithe injongo kaThixo kukuba uluntu luphile ngonaphakade kumhlaba oyiparadesi. [Phinda umbonise umfanekiso okwiphepha 20-1.] Phawula ukuba uYesu, uPetros noDavide bathetha ngeParadesi.” Mcele aze neyakhe incwadana. Emva koko tyhilani kwiphepha 21-2, nize nihlolisise isiqendu 10-13. Cela ukumqhubela isifundo seBhayibhile, okanye umchazele ukuba kwixa elizayo niza kuhlolisisa omnye wemixholwana ekwiphepha 29-30.
Umvakalisi okwishumi elivisayo usenokuthi:
“Abaninzi koontanga bam abaqinisekanga ngekamva. Ucinga ukuba isizukulwana esilandelayo siya kuphila ubomi obubhetele? [Mlinde aphendule.] IBhayibhile ithetha ngekamva eliqaqambileyo loluntu. [Tyhila umfanekiso okwiphepha 31 kwincwadana enemifanekiso, uze ufunde umbhalo okuwo. Emva koko funda eyesi-2 kaPetros 3:13.] Le ncwadana ichaza ngeentsikelelo uThixo azibekele uluntu. [Balaselisa imixholwana ebhalwe ngqindilili ekwiphepha 29-30, wandule ke uhambise incwadana enemifanekiso.] Ndingathanda ukuphinda ndibuye ukuze sixubushe ngenjongo kaThixo yokuphelisa iimfazwe.” Lungiselela ukuba uphinde ubuye.
Xa ubuyela usenokuthi:
“Kutyelelo oludluleyo ndathi gqabagqaba ngenjongo kaThixo yokubuyisela umhlaba kwimo yeparadesi. [Phinda utyhile umfanekiso okwiphepha 31.] Khawundixelele, wena ucinga ntoni ngenjongo kaThixo yokuphelisa zonke iimfazwe.” Mcele eze neyakhe incwadana enemifanekiso. Emva koko fundani nize nixubushe isiqendu 3-6 kwiphepha 29. Mchazele ukuba kwixa elizayo niza kuxubusha isiqendu 7-8.
Xa umntu omdala esebenza nomntwana, emva kokuba ezichazile waza wachaza nomntwana lowo usenokuthi:
“Ukuba uyavuma, u_____________ ebengathanda ukukubonisa umfanekiso othile kule ncwadana aze akufundele indinyana nje enye yeBhayibhile. [Umntwana ubonisa umninimzi umfanekiso okwiphepha 31 aze afunde umbhalo okuwo, emva koko umfundela ISityhilelo 21:4.] Le ncwadana inemifanekiso ichaza oko kuya kwenziwa nguThixo kwiingxaki esinazo namhlanje. [Yithi gqabagqaba ngomxholwana obhalwe ngamagama angqindilili okwiphepha 29-30, uze uhambise incwadana enemifanekiso.] Xa siphinda sibuya, ndingathanda ukukubonisa ukuba iBhayibhile ithini ngokuphela kwazo zonke iingxaki zempilo.”
Kwibuyelo, umntu omdala unokuthi:
“Ukugqibelana kwethu, ndathi ndifuna ukukubonisa ukuba ithini iBhayibhile ngokuphela kwazo zonke iingxaki zempilo. Khawuve ukuba kuthiwani apha.” Mcele eze neyakhe incwadana. Emva koko hlolisisani isiqendu 9-14, kwiphepha 29. Cela ukumqhubela isifundo seBhayibhile, okanye ucele ukuba uphinde ubuye ukuze nixubushe isiqendu 15-17.