Masilusebenzise Ngobulumko Uncwadi Lwethu Olusekelwe EBhayibhileni
1, 2. Abantu abaninzi bavakalelwa njani ngoncwadi lwethu, yaye oku kuphakamisa wuphi umbuzo?
1 “Bendisoloko ndifunda iincwadi zenu ukususela ngowe-1965. Ndiye ndibhekisele eBhayibhileni xa ndizifunda, yaye yonke into endiyifumana kuzo iyavisisana neBhayibhile. Kudala ndifuna ukwazi inyaniso ngoThixo noYesu, yaye enyanisweni ndingatsho ukuba ndifumana iimpendulo ezichanileyo kwiincwadi zenu nakwiBhayibhile.” Yatsho njalo enye indoda eyabhalela ikomkhulu lamaNgqina kaYehova. Kwakuloo leta, yacela ukuqhutyelwa isifundo seBhayibhile.
2 Njengaloo ndoda inombulelo, izigidi zabantu ehlabathini zinombulelo ngoncwadi lokufundisisa iBhayibhile olulungiselelwe “likhoboka elithembekileyo neliyingqondi.” (Mat. 24:45) Nyaka ngamnye, kuveliswa uncwadi oluninzi ukuze kuncedwe abantu abantliziyo zinyanisekileyo ukuba ‘bafikelele elwazini oluchanileyo lwenyaniso.’ (1 Tim. 2:4) Sinokulusebenzisa njani ngobulumko uncwadi lwethu olusekelwe eBhayibhileni?
3. Sinokukuphepha njani ukuba nenkcitho?
3 Yiphephe Inkcitho: Njengoko ixesha lihamba, sinokuba nemfumba yoncwadi esingayi kulusebenzisa. Sinokwenza ntoni ukuze sikuphephe ukuba nenkcitho ngeempapasho zethu ezixabisekileyo? Kufuneka sisebenzise ingqiqo xa sithabatha uncwadi esiza kulusebenzisa entsimini. Kunokuba sizifumanele imibhalo emininzi yaloo mpapasho ihanjiswayo, kusenokufuneka sithabathe umbhalo ube mnye okanye ibe mibini size sibuye kwakhona xa sele siyihambisile leyo. Oku kuya kuthintela ukuba sibe nemfumba yoncwadi emakhaya. Ngokufanayo, ukuba sinamaphephancwadi amaninzi esingawahambisanga, kunokuba kuhle ukuba sinciphise inani lamaphephancwadi esiwaodolayo.
4. Linokwenza ntoni ibandla xa linoncwadi olufumbileyo?
4 Uncwadi Olufumbileyo: Ukuba ibandla lineempapasho ezithile ezifumbileyo, umveleli woncwadi usenokubuza amanye amabandla asekuhlaleni enoba anokulusebenzisa kusini na olo ncwadi. Abavakalisi banokuhambisa uncwadi oludala kumalungu entsapho angakholwayo, kwizifundo zeBhayibhile nakwabanye abantu. Abo basandul’ ukunxulumana nebandla basenokukuvuyela ukuba nolu ncwadi ludala ukuze bongeze kwithala lwabo.
5. Sinokulubonakalisa njani uxabiso ngoncwadi lwethu?
5 Sifuna uncwadi lwethu lufeze injongo yalo, ukunceda abantu abanyanisekileyo bafunde ngakumbi ngeenjongo zikaYehova ezimangalisayo. Kanye njengokuba uYesu engazange akuchithe ukutya okwakusele emva kokondla isihlwele ngommangaliso, sifanele sizenzele usukelo lokuba silusebenzise ngobulumko uncwadi esilufumanayo olusekelwe eBhayibhileni noluxabisekileyo. (Yoh. 6:11-13) Isigidimi esisindisa ubomi esikuncwadi lwethu asinakukwazi ukuchukumisa iintliziyo zabantu abanotyekelo olulungileyo ukuba luhlala kumathala ethu okanye kwiingxowa zethu. Ngoko ke, simele sisebenzise ingqiqo xa siphaka uncwadi esiza kulusebenzisa entsimini size silusebenzise ngobulumko ukuze luncede abanye.—Fil. 4:5.