Yenza Amathuba Okushumayela
1 Ibandla lamaKristu libunjwe ngabantu abakwiimeko ezahlukahlukeneyo. Kodwa, sonke sizimisele ukudumisa uYehova. (INdu. 79:13) Xa impilo enkenenkene nezinye iingxaki ziphazamisana nokuvakalisa kwethu iindaba ezilungileyo, sinokuwenza njani amathuba okushumayela?
2 Ngoxa Sisenza Imisebenzi Yemihla Ngemihla: UYesu wayesoloko esebenzisa amathuba axa edibana nabantu mihla le ukuze ashumayele. Wathetha noMateyu ngoxa wayedlula kwiofisi yokuhlawula irhafu, wathetha noZakeyu ngoxa wayeseluhambeni, waza wathetha nebhinqa elingumSamariya ngoxa wayephumle. (Mat. 9:9; Luka 19:1-5; Yoh. 4:6-10) Kwimisebenzi esiyenza mihla le, nathi sinokushumayela ngoxa sincokola nabantu. Ukuba neBhayibhile, kwakunye namaphecana okanye iincwadana ezinemifanekiso kunokusinceda silungele ukuthetha ngethemba esinalo.—1 Pet. 3:15.
3 Ngaba ukungakwazi ukuhamba kukwenza ungakwazi ukushumayela kwindlu ngendlu? Unokushumayela ngoxa utyelele ugqirha okanye abanye abantu odibana nabo. (IZe. 28:30, 31) Xa iimeko zikunyanzela ukuba ube sekhaya, ngaba ukhe wazama ukushumayela ngomnxeba okanye ngokubhala ileta? Omnye udade udla ngokubhalela enye intsapho engengomaNgqina. Kwiileta zakhe uye aquke nokhuthazo olusuka eBhayibhileni namava awafumene ngoxa eshumayela.
4 Emsebenzini Okanye Esikolweni: Ukunqwenela kwethu ukuzukisa uYehova kuya kusishukumisela ukuba senze amathuba okutyala imbewu yenyaniso emsebenzini okanye esikolweni. Omnye umvakalisi oneminyaka esibhozo ubudala wabalisela iklasi yakhe ngoko akufunde kuVukani! ngokuphathelele inyanga. Emva kokuva ngomthombo wale nkcazelo, utitshala wakhe wayamkela rhoqo IMboniselo noVukani! Ukubeka enye yeempapasho zethu kwindawo enokubonwa ngabanye, ngoxa sisemsebenzini kunokubangela ukuba babuze imibuzo nto leyo enokukhokelela ekushumayeleni.
5 Ngaba zikho ezinye iindlela ocinga ngazo zokwenza amathuba okushumayela ngoxa usenza imisebenzi yakho yemihla ngemihla? Ngokusebenzisa iimeko zethu, sinokuzabalazela ‘ukunikela kuThixo umbingelelo wendumiso,’ suku ngalunye.—Heb. 13:15.