Xelisa UKristu Xa Ushumayela
1 UYesu wamisela umzekelo esimele siwulandele xa sishumayela. Uthando lwakhe lokwenene ngoThixo nangabantu lwabonakaliswa izihlandlo ezininzi kwanangeendlela eziliqela. Wabafundisa inyaniso abalulamileyo waza wabenzela izenzo zobubele abo babexhwalekile.—Mat. 9:35.
2 Umzekelo Neemfundiso ZikaYesu: UYesu akazange aziphazamise ngokubandakanyeka kwiipolitiki okanye kwiinkqubo zabantu zokuzama ukuphucula iimeko zokuhlala. Yaye akazange avumele ezinye izinto, enoba zenzelwe iinjongo ezintle kangakanani na ukuba zimphazamise okanye zisithe umsebenzi wakhe obalulekileyo. (Luka 8:1) Wanikela ingqalelo ekushumayeleni iindaba ezilungileyo zoBukumkani bukaThixo njengobukuphela kwesicombululo kwiingxaki zoluntu. UYesu wayenomsebenzi omkhulu kodwa enexesha elilinganiselweyo. Bathi abantu baseKapernahum bakungafuni ukuba uYesu ahambe, wathi kubafundi bakhe: “Masiye kwenye indawo . . . ukuze ndishumayele kwanalapho, kuba ndiphumele oko.”—Mar. 1:38.
3 Emva kokuba eqeqeshe abafundi bakhe, uYesu wabathuma waza wabanika lo myalelo: “Shumayelani, nithi, ‘Ubukumkani bamazulu busondele.’” (Mat. 10:7) Wafundisa abalandeli bakhe ukuba uBukumkani bufanele buze kuqala kubomi babo. (Mat. 6:33) Amazwi kaYesu okugqibela ngaphambi kokuba anyukele ezulwini abenza bacacelwa abafundi bakhe ngoko babefanele bakwenze. Wathi: “Hambani ke ngoko niye kubenza abafundi abantu beentlanga zonke.”—Mat. 28:19.
4 Ukubaluleka KoBukumkani: Eyona ngxubusho yayiphambili kuYesu buBukumkani bukaThixo yaye wabongoza abafundi bakhe ukuba balandele umzekelo wakhe. Imigudu yabantu yokucombulula iingxaki zabantu ayinakuphumelela. (Yer. 10:23) BuBukumkani bukaThixo kuphela obuya kungcwalisa igama likaThixo buze benze abantu bonwabe. (Mat. 6:9, 10) Ukusa inyaniso yoBukumkani kubantu ‘abancwinayo nabagcumayo ngenxa yezinto ezicekisekayo ezenziwa phakathi kwabo,’ kuyabanceda baphile ngokonwaba baze baphumelele ngoku baze babambelele nkqi kwithemba lekamva.—Hez. 9:4.
5 UYesu usenegalelo ekushunyayelweni kweendaba ezilungileyo zoBukumkani bukaThixo yaye uthembisa ukusixhasa. (Mat. 28:20) Umsebenzi wethu wokushumayela ufana ukusa kuwuphi umkhamo nalowo wawusenziwa nguYesu? (1 Pet. 2:21) Kula maxesha anzima okugqibela, ngamana singenza konke esinokukwenza ukuze siwulandele ngokusondeleyo umzekelo kaYesu xa sishumayela!