Ubulungiseleli BamaKristu—Owona Msebenzi Wethu Ubalulekileyo
1 Sonke sinemisebenzi eyahlukahlukeneyo esimele siyenze. UThixo ufuna ukuba umntu ngamnye alungiselele abendlu yakhe. (1 Tim. 5:8) Sekunjalo, umsebenzi obandakanyekileyo koko uThixo akufunayo awufanele ubalasele ngaphezu komsebenzi wokushumayela ngoBukumkani nowokwenza abafundi.—Mat. 24:14; 28:19, 20.
2 UYesu wasimisela umzekelo esimele siwulandele ‘wokufuna kuqala ubukumkani.’ (Mat. 6:33; 1 Pet. 2:21) Nangona wayeziswele izinto eziphathekayo, wayezimisele ngokupheleleyo ekwenzeni ukuthanda kukaYise. (Luka 4:43; 9:58; Yoh. 4:34) Ngawo onke amathuba, wayezibhokoxa ekunikeleni ubungqina. (Luka 23:43; 1 Tim. 6:13) Wabongoza abafundi bakhe ukuba nabo ngokunjalo babe nomdla onzulu kumsebenzi wokuvuna.—Mat. 9:37, 38.
3 Ukuxelisa UYesu Namhlanje: Sinokuxelisa umzekelo kaYesu ngokuzabalazela ukuphila ubomi obulula nobusekelwe kubulungiseleli bamaKristu. Ukuba sinazo izinto ezifunekayo ebomini, masithobele isiluleko seBhayibhile sokuba singaqhubeki sifuna izinto zeli hlabathi ezingakumbi. (Mat. 6:19, 20; 1 Tim. 6:8) Hayi indlela ekulunge ngayo ukuba sifune ukwandisa umsebenzi wethu wokushumayela! Ukuba sijamelana neengxaki, ngamana singazibhokoxa njengoYesu, singavumeli amaxhala obu bomi abalasele ngaphezu kowona msebenzi wethu ubalulekileyo wokuvakalisa iindaba ezilungileyo zoBukumkani.—Luka 8:14; 9:59-62.
4 Kwanabo baneembopheleleko ezininzi bawujonga umsebenzi wokushumayela njengowona ubalulekileyo. Omnye umzalwana onentsapho enkulu, oneembopheleleko ezinkulu emsebenzini, nongumdala kwibandla lamaKristu uthi: “Ubulungiseleli ndibujonga njengowona msebenzi wam ubalulekileyo.” Omnye udade onguvulindlela yena uthi: “Ukuba nguvulindlela kubaluleke ngaphezu kowona msebenzi wempangelo ovuzayo.”
5 Phezu kwazo nje iimeko esiphila phakathi kwazo, ngamana singalandela umzekelo kaYesu. Singakwenza njani oko? Ngokwenza ubulungiseleli bamaKristu bube ngowona msebenzi wethu ubalulekileyo.