Vakalisani Ngokubanzi Iimbalasane ZikaYehova
1. Yintoni esenza sivakalise ngokubanzi iimbalasane zikaYehova?
1 “Bobakho, Yehova, ubukhulu namandla nobuhle nokubalasela nesidima; kuba yonk’ into esemazulwini nesemhlabeni yeyakho.” (1 Kron. 29:11) Lusichaphazela njani uthando noxabiso esinalo ngoYehova? Lusenza ‘sivakalise ngokubanzi iimbalasane zalowo wasibizayo ukuba siphume ebumnyameni singene ekukhanyeni kwakhe okungummangaliso.’ (1 Pet. 2:9) Asikwazi ukuyeka ukuxelela abantu ngoThixo wethu omkhulu! Siza kuba namathuba amahle okuvakalisa iimbalasane zikaYehova ngoMatshi, ngoAprili nangoMeyi.
2. Liliphi iphulo elikhethekileyo elicetyiweyo ukuze kubhengezwe iSikhumbuzo, yaye ngoobani abanokuba nenxaxheba?
2 Iphulo Elikhethekileyo Lokubhengeza ISikhumbuzo: NgoMvulo, ngoAprili 2, siza kuvakalisa iimbalasane zikaYehova ngokwenza iSidlo SeNkosi Sangokuhlwa. Kuza kuhanjiswa isimemo esikhethekileyo sesi siganeko emhlabeni wonke ukususela ngoMatshi 17 ukusa ngoAprili 2. Kukhuthazwa bonke ukuba babe nesabelo ngokuzeleyo. Eli iya kuba lithuba elihle lokuba abasebatsha baqalise ukuba ngabavakalisi ukuba bayafaneleka. Ukuba unesifundo seBhayibhile okanye abantwana abakufanelekelayo ukuba ngabavakalisi, thetha nabadala.
3. Sinokuthini xa simemela abantu kwiSikhumbuzo?
3 Eli phulo liza kufana nelo liye lenziwa xa bekubhengezwa iiNdibano Zesithili ‘Zokusondela Kwentlangulo!’ Amabandla aza kuthunyelelwa izimemo ezaneleyo ukuze mvakalisi ngamnye afumane izimemo ezingama-30, yaye ukuba zikho ezisalayo zinokongezelelwa kwisixa soovulindlela. Yenze ibe mfutshane intshumayelo yakho, mhlawumbi uthi: “Ngesi simemo, ndikumemela kwisiganeko esibalulekileyo esibakho nyaka ngamnye. Wamkelekile. Iinkcukacha zibhaliwe kwesi simemo.” Kakade ke, ukuba umninimzi unombuzo, ziphe ithuba lokumphendula. Inqaku elikwisihlomelo esingeSidlo Senkosi Sangokuhlwa kwincwadi ethi Okufundiswa YiBhayibhile eliqala kwiphepha 206 lisenokuba luncedo. Ngeempelaveki, siza kuhambisa amaphephancwadi ahanjiswayo kwakunye nesi simemo sikhethekileyo. Babhale phantsi bonke abaye babonakalisa umdla, uze ubuyele kwakhona.
4. Siza kuhanjiswa njani isimemo esikhethekileyo seSikhumbuzo?
4 Ukuba kunokwenzeka, esi simemo sifanele sisinike umninimzi esandleni. Ngoko, ukuba intsimi yenu incinane, zibhaleni phantsi izindlu ezingenabantu nize nibuyele kwakhona. Amabandla anezimemo ezininzi eziseleyo anokuzishiya kwizindlu ezingenabantu ngeveki yokugqibela ngaphambi kweSikhumbuzo, kungekhona ngaphambi koko. Ukuba ibandla lenu linentsimi enkulu, abadala banokugqiba kwelokuba ezi zimemo zishiywe ngohlobo lokuba kungabi lula ukuba zilahleke kwizindlu ezingenabantu. Qiniseka ukuba amabuyelo akho, izifundo zeBhayibhile, izalamane, abantu osebenza nabo, abamelwane nabanye baye basifumana esi simemo.
5. Kutheni sifanele siqalise kwangoku ukwenza amalungiselelo okuba ngoovulindlela abangabancedani?
5 Ukuba Nguvulindlela Ongumncedani: Ngaba akungevakalisi iimbalasane zikaYehova ngakumbi ngokuba nguvulindlela ongumncedani ngoMatshi, ngoAprili nangoMeyi? Kuza kufuneka uhlengahlengise ucwangciso lwakho lwemihla ngemihla ukuze ukwazi ukwenza oku. (Efe. 5:15-17) Unokuqiniseka ukuba xa uzimisela ekwenzeni okungakumbi kwinkonzo kaYehova uya kuvuya uze ufumane neentsikelelo zikaYehova. (IMize. 10:22) Ekubeni sele lisondele ixesha leSikhumbuzo, ufanele uwenze kwangoku amalungiselelo.—IMize. 21:5.
6. Sinokufunda ntoni kumava omnye udade oneminyaka engama-90 ubudala obenguvulindlela ongumncedani kunyaka ophelileyo?
6 Omnye udade oneminyaka engama-90 ubudala ebenguvulindlela ongumncedani kunyaka ophelileyo. Uthi: “Ndikuthanda kakhulu ukusebenza esitiyeni yaye bendifuna ukuqalisa ukulima, kodwa ndiye ndaqonda ukuba ndifanele ndizazi izinto eziza kuqala. Ekubeni bendifuna ukubeka kuqala izilangazelelo zoBukumkani, ndiye ndagqiba kwelokuba ndibe nguvulindlela ongumncedani ngoMatshi.” Ngaba uye wasikelelwa ngalo mgudu? Uthi, “Ndiziva ndisondelelene gqitha nebandla, yaye oku kundenze ndasondelelana noYehova.” Ngaba sinokuzihlolisisa izinto eziza kuqala kuthi size senze uhlangahlengiso xa kuyimfuneko?
7. Ngaba kunzima ukuba nguvulindlela ongumncedani?
7 Ukusebenza iiyure ezingama-50 ezilindeleke koovulindlela abangabancedani kusenokungabi nzima njengoko ucinga. Kuthandazele oku uze uqwalasele izinto ozenza imihla ngemihla, uzenzele ucwangciso, wandule ke uyibhale kwikhalenda indlela oza kusebenza ngayo. Nguwe ozaziyo iimeko zakho. Ukuba impilo yakho inkenenkene yaye akunamandla kangako, mhlawumbi unokuya entsimini iiyure ezimbalwa suku ngalunye. Ukuba uphangela ngokusisigxina okanye usahamba isikolo, unokuba nguvulindlela ongumncedani ngokuya kwintsimi yangorhatya okanye ngeempela-veki.
8. Yintoni eyanceda esinye isibini esitshatileyo ukuba sikwazi ukuba ngoovulindlela abangabancedani?
8 Baninzi abaye bakwazi ukuba ngoovulindlela abangabancedani njengentsapho. Kwiminyaka edluleyo esinye isibini esitshatileyo sasimadolw’ anzima ukubhalisela ukuba ngoovulindlela abangabancedani ekubeni sasivakalelwa kukuba iimeko zaso azinakusivumela ukwenjenjalo. Senza ntoni? “Sathandaza kuYehova ukuba asincede sikufeze oko kudala sifuna ukukwenza kunye.” Ngokuceba kakuhle sakwazi ukufikelela usukelo lwaso. Sithi: “Kwakumnandi gqitha. Sanandipha iintsikelelo ezininzi kunye. Sicebisa ukuba nawe uzame. Ukuba thina sakwazi, nawe usenokukwazi.”
9. Ninokwenza ntoni xa ninesifundo sentsapho ukuze nilungiselele iinyanga ezizayo ezikhethekileyo?
9 Kutheni ningazibekeli ixesha xa ninesifundo sentsapho ukuze nibone indlela nonke eninokwandisa ngayo inkonzo yenu kwiinyanga ezizayo? Nokuba ayikwazi yonke intsapho ukuba ngoovulindlela abangabancedani, mhlawumbi elinye ilungu linokukwazi xa amanye amalungu elincedisa yaye esebenzisana nalo. Ukuba oko akunakwenzeka, mhlawumbi intsapho inokuzenzela usukelo lokuchitha ixesha elingakumbi entsimini ebudeni bezi nyanga zikhethekileyo.
10. Kutheni sifanele sithethe nabanye ngomnqweno wethu wokuba nguvulindlela ongumncedani ngexesha leSikhumbuzo?
10 Ncedanani: Ihlombe liyosulela. Thethani ngomnqweno wenu wokuba ngoovulindlela abangabancedani. Oku kusenokukhuthaza nabanye ukuba babe ngabo. Ngaphezu koko, abo bakhe baba ngoovulindlela ngaphambili basenokukucebisa ngendlela onokuhlengahlengisa ngayo iimeko zakho ukuze ukwazi ukulufikelela olu sukelo. (IMize. 15:22) Ukuba uyakwazi ukuba nguvulindlela, kutheni ungaceli omnye umvakalisi, mhlawumbi okwimeko efana neyakho, ukuba asebenze nawe?
11. Abadala banokulivusa njani ihlombe lobuvulindlela bobuncedani kwezi nyanga zizayo?
11 Abadala abaninzi benza amalungiselelo ukuze babe nenxaxheba kweli phulo likhethekileyo. (Heb. 13:7) Oku kuyalikhuthaza ngokwenene ibandla! Kwakhona abadala bavusa ihlombe ngokuthetha nabanye. Kusenokufuneka nje amazwi akhuthazayo okanye amacebiso asebenzisekayo ukuze abantu bakwazi ukuba ngoovulindlela abangabancedani. Umveleli wenkonzo uya kulungiselela iintlanganiso zenkonzo ezongezelelekileyo ukuze bonke bakwazi ukushumayela njengamaqela, nasemva kokuba abantu bebuyile emisebenzini nasezikolweni. Kufanele kwenziwe isaziso ngala malungiselelo. Kwakhona ufanele aqiniseke ukuba intsimi noncwadi zanele.
12. Unokwenza ntoni ukuba akukwazi ukuba nguvulindlela ongumncedani?
12 Nokuba ezakho iimeko azikuvumeli ukuba ube nguvulindlela ongumncedani, unokubakhuthaza abo babubhaliseleyo, uze ubathandazele. (IMize. 25:11; Kol. 4:12) Mhlawumbi unokukwazi ukwenza amalungiselelo okuba ube nosuku olusebenza kunye nabo ebudeni beveki okanye usebenze ixesha elingakumbi kuneliqhelekileyo.
13. Luluphi usukelo esizibekele lona thina namanye amazwe aphantsi kwesebe laseMzantsi Afrika, yaye ibandla lenu linokwenza njani ukuze silufikelele olu sukelo?
13 Sinosukelo Lokuba Noovulindlela Abangabancedani Abali-14 000 NgoAprili: Incopho yoovulindlela abangabancedani kumazwe angaphantsi kwesebe loMzantsi Afrika ibili-11 214. (eBotswana 270, eLesotho 326, eNamibia 183, eMzantsi Afrika 10 126, eSt. Helena 18 yaye eSwazini 291) Ngoko ke, usukelo esinalo kulo Aprili uzayo ngoovulindlela abali-14 000. (eBotswana 275, eLesotho 550, eNamibia 250, eMzantsi Afrika 12 480, eSt. Helena 20 yaye eSwazini 425) Sinokulufikelela olo sukelo ukuba ngokomlinganiselo umvakalisi omnye kwaba-6 kwibandla ngalinye uba nguvulindlela. Kakade ke, amanye amabandla asenokuba nabavakalisi abangakumbi abaneemeko ezibavumelayo ukuba ngoovulindlela abangabancedani. Maninzi amabandla anokulufikelela usukelo olunjalo. Khawuthelekelele indlela oku okunokulivuyisa ngayo ibandla enikulo nendlela okuya kuba nemiphumo emihle ngayo kwintsimi yenu!
14. Kutheni inyanga ka-Aprili iyinyanga entle yokuba nguvulindlela ongumncedani?
14 Kutheni uAprili eyinyanga entle yokuba nguvulindlela ongumncedani? ISikhumbuzo siza kubakho ekuqaleni kwenyanga, nto leyo eza kusinika ithuba elihle lokubuyela kwabo bebezile kuso. Siya kube sihambisa amaphephancwadi, sinenjongo yokubashiyela incwadi ethi Okufundiswa YiBhayibhile xa sibuyela size siqalise nezifundo zeBhayibhile. NgoAprili 14 siza kuba noSuku Olukhethekileyo Lwamaphephancwadi eMzantsi Afrika nakumazwe angabamelwane. Ngoko ke, ukuba nguvulindlela ongumncedani ngoAprili kuya kunika abaninzi ithuba lokuqalisa izifundo zeBhayibhile. NgoAprili imozulu idla ngokuba ntle. Ngaphezu koko, inyanga ka-Aprili ineeCawa ezintlanu kwakunye neholide yehlabathi, nto leyo ekwenza kube lula ngabo basebenzayo nabo bahamba isikolo ukuba babe ngoovulindlela.
15. Kutheni sifanele sibe nemvo yongxamiseko njengoko lisondela ixesha leSikhumbuzo?
15 Sikhumbuzo ngasinye esidlulayo sisisondeza nangakumbi ekuphelisweni kwale nkqubo yezinto. Lincinane ixesha eliseleyo lokuba sixelele abanye ngoThixo wethu omkhulu. (1 Kor. 7:29) Xa sele lidlulile eli xesha leSikhumbuzo, amathuba ebesinawo okudumisa uBawo wethu osezulwini aya kube edlulile. Ngamana singazilungiselela ngoku ukwenza okusemandleni ethu ngoMatshi, ngoAprili nangoMeyi, sivakalise iimbalasane zikaYehova!
[Ibhokisi ekwiphepha 4]
Ngaba Sinokuba Noovulindlela Abali-14 000 NgoAprili?
◼ Hlolisisa izinto eziza kuqala kuwe
◼ Thethani ngosukelo lwenu njengentsapho
◼ Thetha nabanye ngamalungiselelo akho