Isifundo SeBhayibhile Sobuqu Nesentsapho Zibalulekile!
1. Yiyiphi inkxalabo ekhethekileyo elinayo iQumrhu Elilawulayo ngathi kule mihla, yaye ngoba?
1 Njengakwinkulungwane yokuqala, iQumrhu Elilawulayo liyixhalabele kakhulu impilontle yabantu bakaYehova. (IZe. 15:6, 28) Njengoko amafu amnyama embandezelo enkulu esiya esondela, kubalulekile ukuba umvakalisi ngamnye woBukumkani abe nobuhlobo obuqinileyo noYehova. Uza kwenza ntoni ngexesha obukade usiya ngalo kwiSifundo Sencwadi Sebandla? Sikhuthaza bonke ukuba balisebenzisele unqulo lwentsapho eli xesha. Ukulisebenzisa ngobulumko eli xesha kuya kusenza sikwazi ukungena nzulu kwiLizwi eliphefumlelweyo likaThixo size sizuze kumanzi alo obomi.—INdu. 1:1-3; Roma 11:33, 34.
2. Iingokuhlwa zonqulo lwentsapho zinokulungiselelwa njani?
2 Urhatya Lonqulo Lwentsapho: Iintloko-ntsapho zikhuthazwa ukuba ziyithwale kakuhle imbopheleleko yazo phambi koYehova ukuze ziqiniseke ukuba rhoqo kuqhutywa isifundo seBhayibhile sentsapho esiyingenelo. (Dut. 6:6, 7) Abazalwana noodade abangatshatanga abangenazimbopheleleko zentsapho baya kukwazi ukulisebenzisela isifundo seBhayibhile nophando eli xesha. Kubalulekile ukuba sonke ‘sizongele ixesha’ lokufunda nokucamngca ukuze somelele ngokomoya, nto leyo efunekayo kule mihla ingendawo.—Efe. 5:15, 16.
3, 4. Ngawaphi amacebiso anikelwayo ngombandela esinokuwusebenzisa, kwaye nifanele ninikele ingqalelo entwenini?
3 Izinto Ekunokufundwa Ngazo: IWatch Tower Publications Index okanye iWatchtower Library ekwiCD-ROM inganinceda nifumane inkcazelo eya kwenza kube mnandi ngamaxesha esifundo seBhayibhile. Iintsapho zinokuxubusha amanqaku akwiMboniselo, njengabakho rhoqo afana nelithi “Isikhokelo Solonwabo Lwentsapho,” “Fundisa Abantwana Bakho,” nelithi “Inqaku Labaselula.” Kanti uVukani! unongcelele lwamanqaku athi “Imibuzo Yabantu Abaselula” namanye abangela umdla athetha ngendalo emangalisayo.
4 Ukuyifunda ngocoselelo iBhayibhile kunokubethelela imigaqo yobuthixo nezifundo ezifumaneka kuyo ezingqondweni nasezintliziyweni zawo onke amalungu entsapho. (Heb. 4:12) Ngamanye amaxesha ninokubukela yaye nixubushe enye yeevidiyo ezenziwe yintlangano. Kuza kuvela amathuba okuyikhetha ngobuchule into eniza kuyifunda nendlela eniza kuyifunda ngayo. Kutheni ungabuzi amalungu entsapho yakho ukuba yintoni angathanda ukufunda ngayo, nendlela athanda ifundwe ngayo?
5. Kutheni isifundo sobuqu nesentsapho zibaluleke kangaka kubomi bethu namhlanje?
5 Isizathu Sokuba Kubalulekile Kweli Xesha: Ukuqinisa ubumoya bethu kuya kusilungiselela ‘ukuma ngokuqinileyo silubone usindiso lukaYehova.’ (Eks. 14:13) Abazali bafuna ukhokelo lukaThixo ukuze bakwazi ukukhulisa abantwana babo “phakathi kwesi sizukulwana esigwenxa nesijijekileyo.” (Fil. 2:15) Abantwana bafuna ukuncedwa ukuze bamelane nokuwohloka kwemilinganiselo yokuziphatha ezikolweni namhlanje. (IMize. 22:3, 6) Izibini ezitshatileyo ziya kuba zenza kakuhle xa ziqinisa ‘intambo yazo entlu-ntathu’ kunye noYehova. (INtshu. 4:12) Ngoko ke masilisebenzise ngobulumko ixesha eliseleyo ukuze sizakhe kolwethu “ukholo olulolona lungcwele”!—Yude 20.