Siyintoni ‘Isizathu Sokugcoba’ Kwakho?
1. Sisiphi isizathu sokuvuya esinaso rhoqo xa kuphela inyanga?
1 Xa kuphela inyanga size sicelwe ukuba sifake iingxelo zethu zentsimi, yintoni ekwenza ‘ugcobe’? (Gal. 6:4) Enoba singoovulindlela abakhethekileyo abenza iiyure ezili-130 okanye singabavakalisi abavunyelweyo ukwenza imizuzu eli-15, sonke sifanele sivuye ngenxa yokuba sikhonza uYehova ngentliziyo epheleleyo.—INdu. 100:2.
2. Kutheni sifanele sisebenze ngokuzimisela enkonzweni kaYehova?
2 Ekubeni eyiNkosi enguMongami wendalo iphela, sifanele sinike uYehova okona kubhetele. (Mal. 1:6) Ngenxa yokuba simthanda, siye sanikela ubomi bethu kuye ukuze senze ukuthanda kwakhe. Ngenxa yoko, sinesizathu sokuvuya ukuba ekupheleni kosuku okanye kwenyanga, siye siqiniseke ukuba sisebenzise ixesha, iziphiwo namandla ethu sikhonza uYehova. (IMize. 3:9) Noko ke, ukuba sityiwa sisazela, sifanele sihlole oko sifanele sikwenze ukuze siphucule.—Roma 2:15.
3. Kutheni kungebobulumko nje ukuzithelekisa nabanye?
3 “Kungekona Ngokuzithelekisa Nomnye Umntu”: Akubobulumko ukuzithelekisa nabanye abantu okanye nathi xa sasisenamandla. Iimeko ziyatshintsha. Abantu banobuchule obungafaniyo. Ukuzithelekisa nabanye kudla ngokubangela ukhuphiswano okanye ukuziva ungento yanto. (Gal. 5:26; 6:4) UYesu akazange abathelekise abantu. Kunoko, wancoma mntu ngamnye ngokoko wayekwazi ukukwenza.—Marko 14:6-9.
4. Sisiphi isifundo esibalulekileyo esinokusifunda kumzekeliso kaYesu weetalente?
4 Kumzekeliso weetalente owenziwa nguYesu, msebenzi ngamnye wafumana iitalente ‘ngokwamandla akhe.’ (Mat. 25:15) Xa inkosi yabuyayo yaza yafuna ukuva ukuba babesebenze njani na, abo babesebenze ngokuzimisela ngokuvisisana neemeko zabo banconywa baza bangeniswa kuvuyo lwenkosi yabo. (Mat. 25:21, 23) Nathi, njengoko sisebenza nzima sishumayela ngoBukumkani, sifanele siqiniseke ukuba siyamkholisa uThixo yaye sinesizathu sokugcoba!