IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • km 3/15 iphe. 3-6
  • Iintlanganiso Zentsimi Ezifeza Injongo Yazo

No video available for this selection.

Sorry, there was an error loading the video.

  • Iintlanganiso Zentsimi Ezifeza Injongo Yazo
  • Ubulungiseleli Bethu BoBukumkani—2015
  • Amanqaku Afanayo
  • Zuza Ngokupheleleyo Kwiintlanganiso Zenkonzo Yasentsimini
    Ubulungiseleli Bethu BoBukumkani—2006
  • Isingxobo Semibuzo
    Ubulungiseleli Bethu BoBukumkani—2001
  • Icandelo 3: Isazulu Sobulungiseleli Basentsimini
    Ubulungiseleli Bethu BoBukumkani—1991
  • Amacebiso Okwenza Ingxubusho Yentsimi Ikwazi Ukunceda
    Ubomi BamaKristu Nomsebenzi Wokushumayela—Incwadi Yentlanganiso—2021
Khangela Okunye
Ubulungiseleli Bethu BoBukumkani—2015
km 3/15 iphe. 3-6

Iintlanganiso Zentsimi Ezifeza Injongo Yazo

1. Yintoni injongo yeentlanganiso zentsimi?

1 UYesu wakha waqhuba intlanganiso kunye nabafundi bakhe abayi-70 ngaphambi kokuba baye entsimini. (Luka 10:1-11) Wabakhuthaza ngokubakhumbuza ukuba babengebodwa ibe babesalathiswa ‘yiNkosi yesivuno,’ uYehova. Wabachazela nezinto ezaziya kubanceda kumsebenzi wabo, waza wabalungelelanisa ukuze bahambe “ngababini.” Zinjalo ke neentlanganiso esiziqhubayo kule mihla ngaphambi kokuba siye entsimini—zenzelwe ukusikhuthaza nokusinceda silungelelane.

2. Ifanele ithathe ixesha elingakanani intlanganiso yentsimi?

2 Intlanganiso yentsimi ithatha imizuzu eyi-10 ukuya kweyi-15, kwaye iquka ukwabiwa kwamaqela, ukwabelwa intsimi kunye nomthandazo. Ngoku siza kuyitshintsha. Ukususela ngoAprili, intlanganiso yentsimi iza kuthatha imizuzu emihlanu ukuya kwesixhenxe. Kodwa ke, ukuba iqhutywa emva kwentlanganiso yebandla, ifanele ibe mfutshane nangakumbi, kuba kaloku abazalwana sele belufumene ukhuthazo lweZibhalo. Xa iintlanganiso zentsimi zimfutshane, wonke umntu uya kutsho akwazi ukuchitha ixesha elingakumbi entsimini. Ukongezelela koko, ukuba kukho oovulindlela okanye abavakalisi abasele beqalile ukushumayela ngaphambi kwentlanganiso yentsimi, abayi kuphazamiseka kakhulu kumsebenzi wabo.

3. Iintlanganiso zentsimi zifanele ziqhutywe njani ukuze zibancede abavakalisi?

3 Iintlanganiso zentsimi zifanele ziqhutywe ngendlela eza kubanceda abavakalisi. Kumabandla amaninzi kuba bhetele xa amaqela entsimi esahlulwa kunokuba adibane ndawonye. Loo nto inokwenza kube lula ukuba abavakalisi baye kwintlanganiso yentsimi nakuloo ntsimi isetyenzwayo. Abavakalisi banokwabiwa msinya, yaye kube lula ukuba abaveleli bamaqela balathise abo bakumaqela abo. Iqumrhu labadala linokuhlola iimeko zasekuhlaleni lize lenze isigqibo esiya kulungela abaninzi. Ngaphambi kokuba intlanganiso iqukunjelwe ngomthandazo omfutshane, bonke bafanele bayazi indawo abaza kushumayela kuyo nomntu abaza kuhamba naye.

4. Kutheni iintlanganiso zentsimi zingafanele zijongwe njengezingabalulekanga kunezinye iintlanganiso?

4 Azikho Ngaphantsi Kwezinye Iintlanganiso Ngokubaluleka: Ekubeni iintlanganiso zentsimi zisenzelwa abo baya entsimini, lisenokungabikho lonke ibandla. Noko ke, loo nto ayithethi ukuba azibalulekanga okanye zifanele zijongelwe phantsi kunezinye iintlanganiso. Njengazo zonke ezinye iintlanganiso zethu, iintlanganiso zentsimi lilungiselelo elivela kuYehova elisenza sikwazi ukukhuthazana eluthandweni nasemisebenzini emihle. (Heb. 10:24, 25) Ngoko ke, umqhubi ufanele ayilungiselele kakuhle ukuze izukise uYehova ize incede nabo bakhoyo. Ukuba banokukwazi, abavakalisi abaya entsimini bafanele bazame ukubakho.

Iintlanganiso zentsimi azikho ngaphantsi kwezinye iintlanganiso ngokubaluleka

5. (a) Yintoni indima yomveleli wenkonzo ekulungiseleleni iintlanganiso zentsimi? (b) Ufanele ayiqhube njani udade intlanganiso yentsimi?

5 Umqhubi Makalungiselele: Ukuze ubani ayilungiselele kakuhle intlanganiso, kufuneka asifumane kwangaphambili isabelo. Oku kubalulekile nakwintlanganiso yasentsimini. Kakade ke, xa amaqela entsimi engadibani kunye, umveleli weqela okanye lowo umncedisayo uya kuyiqhuba le ntlanganiso. Kodwa ke, ukuba intlanganiso yentsimi iqhutywa ndawonye, umveleli wenkonzo uya kwabela umzalwana oza kuyiqhuba. Abanye abaveleli benkonzo babanika ucwangciso bonke abaqhubi baze olunye baluxhome ebhodini yezaziso. Umveleli wenkonzo ufanele asebenzise ingqiqo xa esabela abaqhubi, akhumbule ukuba umgangatho wezi ntlanganiso uya kuxhomekeka ekufundiseni nakubuchule bokulungelelanisa kwabo baziqhubayo. Ukuba akakho umdala, isicaka solungiselelo okanye omnye umzalwana obhaptiziweyo ofanelekayo ukuze abelwe ngeentsuku ezithile, umveleli wenkonzo ufanele abele udade obhaptiziweyo ofanelekayo ukuba ayiqhube.—Funda inqaku elithi “Xa Udade Emele Aqhube Intlanganiso Yentsimi”.

6. Kutheni kubalulekile ukuba lowo uza kuqhuba intlanganiso alungiselele kakuhle?

6 Xa sifumana isabelo kwiSikolo Sobulungiseleli Sobuthixo okanye kwiNtlanganiso yeNkonzo, sisamkela ngezandla ezingenamikhinkqi size sisilungiselele kakuhle. Bambalwa kuthi ebebeya kulinda bade baye ezintlanganisweni ngaphambi kokuba basilungiselele. Isabelo sokuqhuba intlanganiso yenkonzo yasentsimini sifanele sijongwe ngendlela efanayo. Ekubeni ngoku intlanganiso yentsimi iza kuba mfutshane, kubalulekile ukulungiselela kakuhle ukuze ikhuthaze ize iphele ngexesha. Ukulungiselela kakuhle kuquka ukwazi intsimi ekuza kusetyenzwa kuyo kwangaphambili.

7. Ziziphi ezinye zezinto ezinokuxutyushwa ngumqhubi?

7 Oko Kumele Kuxutyushwe: Ekubeni amasimi engafani, ikhoboka elithembekileyo alisiniki ulwandlalo lwezinto esimele sithethe ngazo kwezi ntlanganiso. Ibhokisi ethi “Kwintlanganiso Yasentsimini, Nisenokuxubusha,” ikhankanya izinto ezinokuxutyushwa. Ngokuqhelekileyo, le ntlanganiso iya kuqhutywa njengengxubusho. Maxa wambi, isenokuquka umboniso olungiselelwe kakuhle okanye ividiyo efanelekileyo kwiwebhsayithi yethu ethi jw.org/xh. Xa elungiselela intlanganiso, umqhubi ufanele acinge ngento eza kukhuthaza ize incede abo baya entsimini ngaloo mini.

Xa elungiselela intlanganiso, umqhubi ufanele acinge ngento eza kukhuthaza ize incede abo baya entsimini ngaloo mini

8. Ziziphi izinto ezinokuxutyushwa kwiintlanganiso zentsimi ngeMigqibelo nangeeCawa?

8 Ngokomzekelo, ngeMigqibelo, inkoliso yabavakalisi ihambisa IMboniselo noVukani! Uninzi lwabo baya entsimini ngeMigqibelo abayi phakathi evekini, ngenxa yoko, kusenokubanzima ukuba bakhumbule iintshayelelo ebebeziqhelisela ngengokuhlwa yoNqulo Lwentsapho. Ngenxa yoko, kunokuba kuhle ukuba umqhubi ahlole enye yeentshayelelo ezingasemva kuBulungiseleli Bethu BoBukumkani. Kunokuxutyushwa indlela iindaba ezisematheni, isiganeko, okanye indlela enokusetyenziswa ngayo iholide ethile ukuze kutshayelelwe imagazini okanye umchankcatho wotyelelo olulandelayo ukuba imagazini yamkelwe. Ukuba abanye kule ntlanganiso sele bezihambisa iimagazini zalo nyanga, umqhubi ufanele abacele bagqabaze okanye babalise amava akhuthazayo. NgeeCawa, umqhubi usenokukhetha ukwenza ngendlela efanayo kwincwadi ehanjiswa kuloo nyanga. Iincwadi ekuqhutywa ngazo izifundo, njengencwadana ethi Iindaba Ezilungileyo, Phulaphula uThixo nethi Okufundiswa YiBhayibhile zinokuhanjiswa ngalo naluphi na usuku, ngoko umqhubi unokuxubusha ngokufutshane indlela enokuhanjiswa ngayo enye yazo.

9. Yintoni enokuxutyushwa ngempela-veki xa kukho iphulo elikhethekileyo?

9 Ukuba ibandla likwiphulo elikhethekileyo ngempela-veki, umqhubi unokuxubusha indlela yokuhambisa iimagazini ezihanjiswa kuloo nyanga kunye nesimemo nephecana okanye usenokuxubusha into efanele yenziwe ukuba kuboniswa umdla. Enye indlela ibiya kuba kukubalisa amava abalaselisa ukubaluleka kwaloo maphulo.

10, 11. Kutheni kubalulekile ukuba abavakalisi bayilungiselele intlanganiso yasentsimini ukuze iphumelele?

10 Abavakalisi Mabalungiselele: Nabo abavakalisi banegalelo ekuyenzeni iphumelele intlanganiso yentsimi. Ngokuyilungiselela kwangaphambili intsimi, mhlawumbi ngexesha lonqulo lwentsapho, baya kuba nento abanokwabelana ngayo nabanye abavakalisi. Ukulungiselela kakuhle kuquka ukufumana iimagazini neencwadi ngaphambi kokuba kufikwe kuloo ndawo iza kuqhutyelwa kuyo intlanganiso ukuze bonke bakwazi ukuya entsimini ngaphandle kokulibaziseka.

11 Kubalulekile ukufika kwindawo eza kuqhutyelwa kuyo intlanganiso ngaphambi kokuba iqalise. Kakade ke, siye sizame ukufika ngexesha kuzo zonke iintlanganiso zebandla. Noko ke, kunokuphazamisa gqitha ukufika emva kwexesha kwintlanganiso yasentsimini. Njani? Umzalwana oza kwalathisa iqela uye aqwalasele izinto eziliqela ngaphambi kokuba alilungelelanise. Ukuba abavakalisi abakhoyo bambalwa, usenokukhetha ukubasa kwintsimi ebikhe yasetyenzwa. Ukuba abanye bahambe ngeenyawo ukuya kwintlanganiso yentsimi ibe nentsimi ekushunyayelwa kuyo ikude, abo bavakalisi usenokubahambisa nabo baye ngeemoto. Ukuba intsimi ikwindawo enobundlobongela, usenokwabela abazalwana abaza kusebenza kunye noodade okanye kufutshane nabo. Abavakalisi abangaphilanga basenokunikwa intsimi engenamaqhina okanye enamakhaya aneziteps ezimbalwa. Abavakalisi abasebatsha banokwabelwa ukusebenza nabavakalisi abanamava. Kodwa, ukuba abavakalisi bafika emva kwexesha, kuza kufuneka kutshintshwe amalungiselelo asele enziwe ngenxa yabo. Kakade ke, maxa wambi sisenokuba nesizathu esivakalayo sokuba sifike emva kwexesha. Noko ke, ukuba sisoloko sifika emva kwexesha, sisenokuzibuza ukuba akungebi asiyixabisi intlanganiso yentsimi okanye mhlawumbi asilungelelananga.

12. Ukuba uzenzela awakho amalungiselelo asentsimini, zintoni onokucinga ngazo?

12 Abavakalisi abaza kuya entsimini basenokuzikhethela umntu abaza kuhamba naye ngaphambi kokuba iqalise intlanganiso yasentsimini okanye basenokwabelwa umntu abaza kuhamba naye. Ukuba udla ngokuzikhethela umntu oza kuhamba naye, ngaba ‘unokuphangalala’ ngokusebenza nabavakalisi abahlukeneyo kunokuba usoloko usebenza nabahlobo bakho? (2 Kor. 6:11-13) Ngaba ungalungiselela ukuba usebenze nomvakalisi osemtsha ngamaxesha athile, ukuze umncede aphucule ubuchule bakhe bokufundisa? (1 Kor. 10:24; 1 Tim. 4:13, 15) Yiphulaphule ngenyameko yonke imiyalelo oyinikwayo, kuquka eyendawo ofanele usebenze kuyo. Xa intlanganiso iphela, kuphephe ukutshintsha amalungiselelo uze ukhawuleze uye kwintsimi ekuza kushunyayelwa kuyo.

13. Ukuba wonke umntu wenza indima yakhe, ziya kusinceda njani iintlanganiso zentsimi?

13 Emva kokuba abayi-70 ababelungelelaniswe nguYesu beshumayele, “babuya benovuyo” entsimini. (Luka 10:17) Ngaphandle kwamathandabuzo, intlanganiso ababenayo noYesu ngaphambi kokuba baye kushumayela yabanceda baphumelela. Nanamhlanje, intlanganiso yentsimi inokwenza into efanayo. Ukuba wonke umntu wenza indima yakhe, iintlanganiso zentsimi ziya kusikhuthaza, zisincede zize zisilungelelanisele ukufeza uthumo lwethu lokunikela ‘ubungqina kuzo zonke iintlanga.’—Mat. 24:14.

Xa Udade Emele Aqhube Intlanganiso Yentsimi

Udade ufanele athwale entloko aze ahlale phantsi xa eqhuba intlanganiso yentsimi. Into akhetha ukuthetha ngayo iya kufana naleyo ibiza kuxutyushwa ngumzalwana. Ngoxa efanele akuphephe ukuba ngathi uyabayalela abo bakule ntlanganiso, unokuyenza ibe yingxubusho yeqela. Ukuba ucela omnye udade ukuba enze umthandazo, loo dade naye ufanele athwale entloko. Ukuba kufika umzalwana obhaptiziweyo emva kokuba iqalile, loo dade uya kumcela ukuba ayigqibezele. Umveleli wenkonzo ufanele alungiselele iimeko ezingalindelekanga aze akhuphe imiyalelo ukuze kuncitshiswe iingxaki. Ngokomzekelo, umzalwana oselula obhaptiziweyo, ongekafiki kwishumi elivisayo, abadala abavakalelwa ukuba akakakufanelekeli ukuqhuba le ntlanganiso, unokubakho ngoxa iqhutywa ngudade. Okanye mhlawumbi kukho umzalwana osele ekhulile ongavumelekanga ukuba ayiqhube okanye athandazele ibandla ngezizathu ezaziwa ngabadala. Bengadanga bachaza isizathu, abadala bafanele bachazele loo dade wabelweyo ukuba angayiqhuba intlanganiso aze athandaze nokuba ukho lo mzalwana. Abadala banokwazisa lo mzalwana ukuba ziziphi iintsuku oodade abaqhuba ngazo intlanganiso yentsimi.

Kwintlanganiso Yasentsimini, Nisenokuxubusha:

  • Intshayelelo ekuBulungiseleli Bethu BoBukumkani.

  • Ividiyo efanelekileyo kwiwebhsayithi yethu ethi jw.org/xh.

  • Inkalo ethile yentshumayelo efanelekileyo, njengentshayelelo, ukubeka umchankcatho wokubuyela okanye ukukhankanya umnikelo xa kuhanjiswa iincwadi.

  • Isibhalo esikhuthazayo okanye esifundisayo esiphathelele ubulungiseleli.

  • Amava eninawo okanye abhaliweyo athetha ngentsimi.

  • Inkcazelo ekwinqaku loBulungiseleli Bethu BoBukumkani.

  • Inkcazelo ebikwintetho yeNtlanganiso Yenkonzo yakutshanje.

  • Inkcazelo ekwiMboniselo ethetha ngentsimi.

  • Inkcazelo ethetha ngentsimi kwincwadi enjengethi ISikolo Sobulungiseleli nethi “Yiba Ngumlandeli Wam.”

  • Inkalo ye-jw.org/xh enokusetyenziswa entsimini.

  • Inkcazelo ekwincwadana ethi Intshayelelo YeLizwi LikaThixo (igw) nethi Isikhokelo Sokufunda ILizwi LikaThixo (sgd) enokusetyenziswa entsimini.

  • Indlela yokuqalisa incoko nomntu onokudibana naye entsimini, njengomntu ongakholelwayo kubukho bukaThixo, umntu okholelwa ukuba indalo yazivelela, umHindu okanye umBhuda.

  • Indlela yokusingatha amazwi anokuthintela incoko.

  • Indlela yokunceda umntu ohamba naye entsimini abe nobuchule.

  • Indlela yokuthetha nomntu othetha olunye ulwimi.

  • Indlela yokuba nenxaxheba kwinkalo ethile entsimini abaza kube besebenza kuyo abanye, njengokukhangela abantu abathetha olunye ulwimi, ukushumayela ngefowuni, ukushumayela esidlangalaleni, amabuyelo okanye izifundo zeBhayibhile.

  • Ukukhumbuza ngokhuseleko, ukuba bhetyebhetye, ukuba nembeko, ukukhuthaza okanye into efanayo.

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share