ICuraçao
Iziqithi iAruba, iBonaire, neCuraçao zaziwa ngokuba ziziqithi iABC. Ekubeni zithe qelele kunxweme lwaseVenezuela, zinobuhle bazo obahlukileyo. Zinobuhle obahlukileyo kobo bezinye iziqithi ezenileyo zeCaribbean, zona ubuhle bazo bobentlango, ebusuku kuthi rhwelele amathunzi amangalisayo, nentlaninge yemibala eyahlukahlukeneyo emini.
Ngenxa yokunqaba kwemvula, kukhula icactus (utyani basentlango)—eyona ichumayo yikadushi ethe rhwelele kumathafa alapho. Kukwakho nemithi eyenileyo yedivi-divi, ebalasele ngezithsaba zayo ezikekelele bucala. Njengabalindi abathe cwaka, kukho izindlu ezithe gqa zema emasimini oku kwemifanekiso kweso sibhakabhaka siqaqambileyo, izikhumbuzo zolawulo lwamathanga lwamandulo. Kumaphandle alapho iibhokhwe ziyinyambalala nje yaye ziqathula kwiindlela zelo.
IAruba neBonaire zibalasele ngoshishino oluphambili lwezokhenketho, ngoxa iCuraçao ixhomekeke kwingeniso yeoli noshishino lwaselunxwemeni. Siqithi ngasinye sibalasele ngomzi-mveliso ohluza ityuwa, uguqule amanzi olwandle, alungele ukuselwa kwanomphunga ophehla umbane.
Ezo ziqithi, ngoku esele zinabemi abangaphantsi nje kwama-250 000, zafunyanwa kwinkulungwane ye-15 ngabemi baseSpeyin. Kamva, amaDatshi azithabathela kuwo ezo ziqithi, yaye nangona zaba phantsi kwamaFrentshi namaNgesi kangangethutyana elithile, zaphinda zabuyela kumaDatshi ngowe-1815. Ukususela kowe-1954, umanyano lweziQithi zaseNetherlands, ekuqaleni olwalubunjwa ziziqithi iABC nezinye ezithathu ezikwiLeeward, bezisoloko ziyilawula ngokwazo imicimbi yazo. Noko ke, ngowe-1986, iAruba yanikwa istatus aparte, okanye uphawu olwahlukileyo.
Isithethe Nolwimi
Ngaphantsi korhulumente wamaDatshi, ezi ziqithi zazinandipha inkululeko yokunyamezelana konqulo. Ubukhulu becala abemi balapho ngamaRoma Katolika, nangona kukho amaqela amakhulu amaProtestanti. ECuraçao kukwakho neqela noko elibonakalayo lamaYuda. Kukho abantu abaphuma kwizizwe ezingama-40 ukusa kuma-50 zehlabathi ezihlala kunye ngoxolo kwibutho leentlanga ezimanyeneyo. Nangona aba bantu bethetha ulwimi olunye, siqithi ngasinye sinezinto zaso esahluke ngazo. Kukweli butho labantu abahlukahlukeneyo apho yantshula khona inyaniso yeBhayibhile yaza yaqhubeka ichuma.
Abantu balapho bathetha iilwimi ezininzi yaye kubonakala ngathi bayalibala ukuba bathetha luphi ulwimi, ekubeni ukuguquguqula ulwimi kuyinto eqhelekileyo. Nangona isisiDatshi ulwimi olusemthethweni apho yaye ubukhulu becala kwicandelo loshishino kusetyenziswa isiNgesi neSpanish, kodwa sona isiPapiamento lulwimi lomthonyama lwalapho. Kukho ingcamango yokuba isiPapiamento savela kwiziQithi zaseCape Verde eNtshona Afrika ngaphambi kwenkulungwane ye-17. AmaPhuthukezi asebenzisa ezo ziqithi njengeendawo zokungena eAfrika, nokunceda abemi baseAfrika namaPhuthukezi bakwazi ukunxibelelana, kwatsho kwavela ulwimi olutsha isiCreole—umxube weelwimi zaseAfrika nesiPhuthukezi. Ulwimi anxibelelana ngalo amaqela eelwimi ezahlukeneyo kuthiwa yingxubevange yolwimi. Kamva loo makhoboka aziswa kwezi ziqithi baza nabanye baqalisa ukusebenzisa olu lwimi. Kangangeminyaka, olo lwimi lwaphenjelelwa sisiDatshi, iSpanish, isiNgesi nesiFrentshi. Kwatsho kwavela isiPapiamento esingumxube wazo zonke.
Loo ngxubevange yolwimi yaveliswa ngaloo makhoboka aza eza nayo kwezo ziqithi yahlahl’ indlela yokunxibelelana yaza yazimanya. Noko ke, kwavela enye ingxubevange yolwimi. Yona yileyo kuthethwa ngayo kuZefaniya 3:9, kuthiwa: “Ngoko izizwana ndiya kuzinika ukuba zitshintshele kulwimi olusulungekileyo, ukuze zonke zibize egameni likaYehova, ukuze zimkhonze ngaxhatha linye.” Lolo “lwimi olusulungekileyo” olungapheleli ekumanyaniseni abathile kwezo ziqithi—lubenze boyise iiyantlukwano zobomi, ezobuhlanga maxa wambi nezobuzwe—kodwa lubamanyanisa kumanyano lwehlabathi lonke lwamaNgqina kaYehova. Ngoko, nakuba kukho amabandla ahlukeneyo esiPapiamento, esiNgesi, iSpanish nesiDatshi, ingxubevange yolwimi lwenyaniso yeBhayibhile itsalela abazalwana kumxokelelwane owomeleleyo wothando.
Ukuvela Kwenyaniso
Akwaziwa kakuhle ukuba imbewu yokuqala yenyaniso yahlwayelwa njani na kwezo ziqithi. Phantse ngendlela engaqondakaliyo, ukukhanya kwenyaniso kwavela, kwaphelisa ubumnyama kwezo ziqithi, kwakugquba kuzo ubuRoma Katolika kangangexesha elide. Ngasekupheleni kweyee-1920 neyee-1930, ngabantu abaliqela abaya kushumayela apho. Kwakhona, engaqondi umthengisi weencwadi zonqulo othile wahlwayela imbewu yenyaniso, kuba phakathi kwezo ncwadi zakhe kwakukho iimpapasho eziveliswa yintlangano kaThixo. Iintombi ezimbini zaloo mthengisi, uPearl noRuby, babesebenza naye baza baba ngamaNgqina kaYehova emva kweminyaka ethile. Bobabini bahlala bethembekile de kube namhla.
Ngowe-1940, uMzalwan’ uBrown, ummi waseTrinidad owayesebenza kumzi-mveliso ohluza ioli waqhuba ubhaptizo lokuqala eCuraçao—olwabantu abahlanu awayefunda nabo. Phakathi kwabo kwakukho uMartin noWilhelmina Naarendorp noEduard van Marl, bonke ababevela eSuriname.
UAnita Libretto, intombi yabakwaNaarendorp, ukhumbula oku: “Ngowe-1940 ndandineminyaka emithandathu ubudala. Ndisakhumbula ukuba abazali bam babefunda nomzalwana othetha isiNgesi. Bona babethetha isiDatshi kuphela yaye kunzima ukuva isiNgesi, kodwa baxomoloza besiya yaye kwiinyanga ezintandathu babhaptizwa. Iintlanganiso zaziqhutyelwa ekhaya, kodwa zingalungelelaniswanga njengokuba zinjalo ngoku. Zaziqhutywa ngamarhatya de kube sezinzulwini zobusuku, njengoko kwakunzima kubazali bam ukuba baziqonde ezo ncwadi zibhalwe ngesiNgesi.” Ubukhulu becala kwakushunyayelwa ngesiNgesi, ekubeni elo qela lincinane lalingasazi kakuhle isiPapiamento yaye lungekho noncwadi lolo lwimi.
Xa bebonke, abantu balapho babengaqhelananga nokufunda iBhayibhile kuba kwakusalelwa oko yiCawa yamaKatolika. Kwakuqhelekile ukuba abefundisi bathimbe nayiphi na iBhayibhile abayifumanayo. Ekuqaleni, omnye wabo wayedla ngokulandela abazalwana, angqishe aze ankqangaze esithi: “Yahlukanani nezimvu zam!”
Ukuhlwayelwa Kwembewu EAruba NaseBonaire
Ngowe-1943, uJohn Hypolite, owayekade engumSabatha, noMartin Naarendorp batyelela eAruba baza bachitha iholide yabo besasaza iindaba ezilungileyo. Ngokolwazi olukhoyo, baba ngabokuqala ukushumayela iindaba ezilungileyo apho. Emva kokuba bebuyele eCuraçao, uMzalwan’ uHypolite wabhalela kwikomkhulu eBrooklyn ecela ukuncedwa entsimini. Kwiminyaka emithathu kamva kwathunyelwa abavangeli basemazweni apho, kodwa okubuhlungu kukuba yena wafa ngaphambi kokuba bafike. Noko ke, abazalwana abanesibindi baseCuraçao, abafana noJohn Hypolite, balandela isibongozo esikwiNtshumayeli 11:6 baza bahlwayela imbewu ngesandla esivulekileyo, eyathi kamva yantshula yaza yahluma.
Ngowe-1944, uEdmund Cummings waseGrenada noWoodworth Mills waseTrinidad bafika eAruba. Babeye kusebenza kumzi-mveliso ohluza ioli eSan Nicolas. Ekubeni imi kwicala elisempuma ekupheleni kweso siqithi, idolophu yaseSan Nicolas yayizaliswe ngabemi basemzini abavela kulo lonke elo laseWest Indies beze kusebenza kumzi-mveliso ohluza ioli. UMzalwan’ uMills, isithethi esivusa ihlombe sasesidlangalaleni, waba negalelo elingathethekiyo ekushunyayelweni kweendaba ezilungileyo. NgoMatshi 8, 1946, uMzalwan’ uMills noCummings bamisa ibandla lokuqala lesiNgesi eSan Nicolas. Elo bandla lalinabavakalisi abali-11, yaye uMzalwan’ uMills wayesisicaka sebandla.
Abantu bokuqala apho babhaptizwa ngoJuni 9, 1946. Phakathi kwabo bane babhaptizwayo kwakukho uTimothy J. Campbell noWilfred Rogers, yaye ngasekupheleni kowe-1946, inani labavakalisi laphindeka kabini. Kamva, amaNgqina awayephambukele apho—intsapho yakwaBuitenman, eyakwaDe Freitas, eyakwaCampbell, eyakwaScott, eyakwaPotter, eyakwaMyer, eyakwaTitre, eyakwaFaustin, nabanye—bazibandakanya nelo bandla.
UMzalwan’ uMills wafumana imiphumo emihle kakhulu ngobungqina obungacwangciswanga, yaye omnye kwabo wayesebenza nabo, owayengumchwethezi ogama linguOris, wasabela kakuhle. Wabhaptizwa ngoJanuwari 1947. UMzalwan’ uMills akazange afumane udade wokomoya nje kuphela, kodwa wafumana nomfazi kuba kamva yena no-Oris batshata. Ngowe-1956 bamenyelwa kwiklasi yama-27 yaseGiliyadi yaye emva koko banikwa isabelo eNigeria.
De kwaba ngowe-1950, ubukhulu becala eAruba kwakushunyayelwa eSan Nicolas, ekubeni uninzi lwabantu apho lwaluthetha isiNgesi yaye abazalwana bengasazi kakuhle isiPapiamento. De kwangoko, wayengekabikho ummi waseAruba owamkele inyaniso. Inkcaso engathethekiyo yeCawa yamaKatolika, yabangela ukuba abemi baseAruba, ngokuqhelekileyo abanobuhlobo bawachase amaNgqina yaza ke yacotha inkqubela. Ngaphambili, yayiqhelekile into yokusukelwa kweNgqina ngesabile ngumninimzi ovath’ iqaqa. Maxa wambi abazalwana babephoswa ngamanzi ashushu okanye bafunzwe ngezinja. Kwezinye izihlandlo abazalwana babengeniswa endlwini ngabaninimzi baze babashiye behleli apho. Kwezo ziqithi, kusisithuko ukuzishiya zodwa iindwendwe.
UEdwina Stroop, onguvulindlela eAruba, ukhumbula oku: “Abefundisi babedla ngokoyikisa abantu besithi babeya kuqalekiswa ukuba bashiya icawa.” Sekunjalo, oku akuzange kuyiphelise inzondelelo yabazalwana, abo ukuthanda kwabo uYehova nommelwane kwabaphembelela ukuba banyamezele.
Imbewu yezinye izityalo zasentlango iwela emhlabeni ize ihlale amashumi eminyaka de kufike imvula eyaneleyo iyihlumise ize ekugqibeleni itsho ngeentyatyambo ezintle. Kwenzeka into efana naleyo kuJacobo Reina, igosa lokuhlola izinto ezithengwa ngaphandle kwelo laseBonaire. Wafumana umbhalo wencwadi ethi Creation ngowe-1928. Nangona wazalwa yintsapho yamaRoma Katolika, wahlolisisa unqulo lwamaProtestanti kodwa akazange aneliseke. Xa wafunda incwadi ethi Creation, wawuqonda umongo wenyaniso. Kuyo kwakukho uludwe lwemixholo yezinye iincwadi ezisasazwa ngabakhonzi bakaYehova, kodwa uJacobo akazange akwazi ukuzifumana. Akazange azifumane de kwadlula iminyaka eli-19, xa wayetyelele udade wabo eCuraçao ngowe-1947, apho wadibana nomvangeli wasemazweni owayeqhuba isifundo nodade wabo. Wabuza loo mvangeli wasemazweni enoba wayenazo na ezo ncwadi zikolo ludwe wayelugcine esipajini yonke loo minyaka. Wathabatha zonke iincwadi ezazikuloo bhegi yakhe, ubuncinane yaba ziincwadi ezisi-7 neencwadana ezili-13, waza warhumela amaphephancwadi IMboniselo noVukani! Elo phango lokomoya lamthwaxa ithuba elide ngaphambi koko lada laneliswa ekugqibeleni. Ewe, imbewu yenyaniso eyawela emhlabeni yaza yahlala iminyaka emininzi ngoku yayiza kunkcenkceshelwa ukuze ikhule.
Abavangeli Basemazweni Bokuqala Bafika ECuraçao
NgoMeyi 16, 1946 uThomas Russell Yeatts nomfazi wakhe, uHazel, abaphumelela kwiklasi yesithandathu yaseGiliyadi, bafika eCuraçao, intsimi eyayingafane ichukunyiswe. UMzalwan’ uYeatts waba negalelo elikhulu kumsebenzi owenziwa kwezo ziqithi, waba kwisabelo sakhe ngaphezu kweminyaka engama-50 de kwasa ekufeni kwakhe ngowe-1999. Ngaphandle kokuphazamiseka okuthile kwethutyana, wongamela elo sebe ukususela kowe-1950 de kwangowe-1994. Wayeyindoda esoloko inoburharha, ithemba elingapheliyo nokholo olungagungqiyo, yaye waba nelungelo lokubona ukwanda okungathethekiyo komsebenzi wokushumayela ngoBukumkani.
UHazel, umxhasi othembekileyo womyeni wakhe, usekwisabelo sakhe de kube namhlanje yaye ungumthombo wokhuthazo kubo bonke. Ukhumbula xa babefika kwisikhululo seenqwelo-moya besamkelwa ngobubele nguMzalwan’ uNaarendorp noVan Marl kunye noClement Fleming, umntu owayenomdla.
Kwenzeka ukuba uClement afumane incwadi ethi Children, wayifunda, yaye weyiseka ukuba uyifumene inyaniso. Xa wayesemncinane, wayishiya iCawa yamaRoma Katolika kuba wayengavumelani nenkoliso yeemfundiso zayo. Kamva, waqalisa ukunxulumana namaNgqina, ngoko, wayekho ukuya kwamkela abavangeli basemazweni bokuqala. NgoJulayi 1946, loo mvangeli wasemazweni mtsha, uRussell Yeatts, wambhaptiza. UMzalwan’ uFleming usengumvakalisi woBukumkani yaye uthi: “Ndineminyaka engama-93 ubudala, yaye andikanikezeli kwithemba lam lokuba phakathi kwabo batyhubela iArmagedon besiya kwinkqubo entsha bengazange bafe.” Onjani wona umzekelo wokholo nokunyamezela!
UDade Yeatts uthi: “Ukusuka kwisikhululo seenqwelo-moya sasiwa kwindlu enamagumbi amabini kumgangatho wesibini ngaphezu kwevenkile ethengisa imisila yehagu neentlanzi eziqwayitwe ngetyuwa. Kuloo ndlu kwakungekho fanitshala, kungekho negumbi lokuhlambela, ngoko kangangeenyanga ezintandathu kwakufuneka siye kuhlambela kumgangatho osezantsi de safumana indawo yokuhlala ebhetele.” Nangona uHazel wayesoloko ehlaselwa sisisu segazi, benoRussell abazange badimazeke. Kwiminyaka ethile kamva, uMzalwan’ uYeatts wabhala wathi: “Into eyenza ubomi bube mnandi, ngokukodwa kubalungiseleli bakaYehova, ayizomeko, ingeyiyo nembonakalo yendawo, nkqu nolwimi, kodwa ngabantu. Yaye uhlala unabo kuso nasiphi na isabelo.”
Ngoxa babefunda ulwimi lomthonyama, isiPapiamento, aba bavangeli banenkalipho kwakufuneka bafundise ulwimi olusulungekileyo, ingxube-vange yolwimi lwenyaniso, kubantu baseCuraçao. Omnye wabo bantu yaba nguCamilio Girigoria, owokuqala kubantu balapho ukubhaptizwa, ngowe-1950. Ekubeni wayesebenza kumzi-mveliso ohluza ioli, wadibana nenyaniso ngokuthetha nabazalwana abahlukeneyo, kuquka uHenricus Hassell, umvakalisi onenzondelelo weendaba ezilungileyo. UCamilio, oneminyaka engama-78 ubudala ngoku, ngumdala yaye uye wanceda abantu abangama-24 de bazahlulela. Ngowe-1946 abavangeli basemazweni balungelelanisa ibandla lokuqala lesiNgesi eCuraçao, kodwa ibandla lokuqala lesiPapiamento alizange limiselwe de kwangowe-1954.
IAruba Iqhubeka Ibona Ukukhanya Kwenyaniso
NgoJulayi 1949, uHenry noAlice Tweed, baseKhanada abaphumelela kwiklasi ye-12 yaseGiliyadi, baya eAruba apho baba nendima ebonakalayo ekufundiseni ulwimi olusulungekileyo. UHenry wayesukile egadeni, elicekecekana yaye wayesaziwa ngobubele bakhe nesimilo; yena uAlice esaziwa ngokukhawuleza ukucinga nangokukhuthala enkonzweni. Ngabo kuphela abavangeli basemazweni abahlala baza basebenza kuzo zozithathu ezo ziqithi yaye basakhunjulwa kakuhle nasemva kwamashumi eminyaka ngomoya wabo wokuzincama nenzondelelo.
Ngowe-1950, uWilliam Yeatts (umntakwabo Russell ngooyise) nomfazi wakhe, uMary, baphumelela kwiklasi ye-14 yaseGiliyadi baza bathunyelwa eCuraçao. Ngowe-1953 baya eAruba. Phantse iminyaka engama-50 kamva, basekwisabelo sabo—imizekelo ebalaseleyo yokholo nokunyamezela. Ekuhambeni kwexesha, uMary waziwa ngenzondelelo yakhe ebalaseleyo kubulungiseleli. Wayesoloko ephambili kumsebenzi wokunikela ubungqina, ngoxa uBill wayexakeke ekuguqulelweni kweempapasho zeBhayibhile. De kwafika uBill noMary, yayincinane inkqubela eyenziwa ngaloo mabandla mabini esiNgesi kubantu balapho. Ngomonde yaye bethe gqolo, uBill noMary baqalisa ukuhlwayela imbewu yenyaniso kubemi baseAruba abathetha isiPapiamento. Kancinane imigudu yabo yavuzwa. UBill ukhumbula oku: “Saqalisa ukuqhuba iZifundo zeMboniselo ngaphantsi komthi omkhulu womkwihi okwiyadi yekhaya labavangeli basemazweni. Maxa wambi kwakubakho abaninzi kangange-100. Sasihlala kwizitulo ezazilahlwe yicawa yamaKatolika.” Ngowe-1954 kwaqhutywa iSikhumbuzo sokufa kukaKristu, yaye emva koko, kwalungiselelwa iSifundo Sencwadi Sebandla ngesiPapiamento.
Abemi BaseAruba Bokuqala Bafunda Inyaniso YeBhayibhile
Eseligatyana lomfana, uGabriel Henriquez wayedla ngokuzintyintya ngentombi kaLudiza ngeempela-veki de angakwazi nokuphangela ngeentsasa zangoMvulo kuloo mzi-mveliso uhluza ioli. Umphathi wakhe wayefuna aphucule ubomi bakhe yaye nakuba yena wayengakholelwa kuThixo, wanika uGabriel isipho somrhumo kaVukani!, eqinisekile ukuba oko kwakuza kumnceda. Kamva, uGabriel wadibana nabakwaTweed, ababefunda iBhayibhile nomkhwe wakhe. Ekubeni babefunda incwadi yeSpanish, uGabriel waba ngumguquleli wakhe. Kungekudala, wakhula umdla kaGabriel, ngoko ngowe-1953, uBill noMary Yeatts baqalisa ukufunda naye. UGabriel uthi: “Ekugqibeleni, ndakwazi ukufumana iimpendulo zayo yonke imibuzo yam.” Ngowe-1954, wahlulela ubomi bakhe kuYehova waza waba ngummi wokuqala waseAruba ukubhaptizwa.
Ibandla lokuqala lesiPapiamento laqalisa ngowe-1956, linabavakalisi abali-16, yaye ekupheleni konyaka wenkonzo we-1957, babengama-26 abavakalisi abafaka ingxelo. Athi esakuvuleka amehlo abantu baseAruba, babubona ubuxoki beemfundiso ‘zeBhabhiloni Enkulu’ baze bayeka ukoyika umntu, baba ngabathandi benyaniso nabavakalisi abanenzondelelo beendaba ezilungileyo. (ISityhi. 17:5) Omnye wabo yaba nguDaniel Webb. Yena nomfazi wakhe, uNinita, owayechasa ekuqaleni, bayamkela inyaniso, yaye bobabini baba ngabavakalisi abanenzondelelo boBukumkani. Ngaba bakho ababeza kulandela umzekelo wabo?
NjengoDaniel, abanye abaninzi bafunda inyaniso baza bayivumela ukuba ilungelelanise ubomi babo nobeentsapho zabo. Omnye onjalo owaqalisa ukufunda nguPedro Rasmijn. Xa wayegoduka ngenye imini, uPedro wafumanisa ukuba unina, uMaria, umKatolika ozinikeleyo, uzitshabalalisile iincwadi zakhe. Ekubeni wayengekabambathi ubuntu obutsha, waziphindezela ngokwaphula imifanekiso kanina. Ecatshukiswe koko kwenziwe nguPedro, uMaria wakhalaza kumfundisi, owathi uPedro wayechanile ngokucinga ukuba imifanekiso ayibalulekanga! Enomsindo, wamgxotha loo mfundisi emzini kwakhe waza wagqiba ekubeni ahlolisise iBhayibhile. Ngenxa yoko, uMaria nomyeni wakhe, uGenaro, bahlulela ubomi babo kuYehova. Bona nabantwana babo abali-11, abazukulwana abangama-26, nomnye umntwana womzukulwana wabo—isimbuku sabantu abangama-40—bonke bakhonza uYehova!
UDaniel van der Linde, umkhwenyana kaMaria, wabhaptizwa phezu kwako nje ukulahlwa ngabazali bakhe. Egxothiwe kowabo waza wabethwa ngumfundisi wamaKatolika, uDaniel wanyamezela, eqinisekile ukuba wayeyifumene inyaniso. Phezu kwayo nje loo nkcaso, uDaniel uzigqala engosikelelweyo, kuba uye wasetyenziswa nguYehova ukuze ancede abaninzi bafunde inyaniso yeBhayibhile. Intombi yakhe uPrisquela nomyeni wayo uManuel, ngamalungu aseBheteli ahlala ngaphandle ekhonza kwiSebe Lokuguqulela kwiofisi yesebe laseCuraçao. Omnye umkhwenyana wakhe, uTony, naye wabonisa ukholo olukhulu kuYehova nakwizithembiso zakhe zokuba uya kusixhasa, kuba wagula kwaza kwafuneka atyandwe izihlandlo ezihlanu. UTony uthi: “Oogqirha baphelelwe lithemba ngam, kodwa ndihlala ndithandaza kuYehova ukuze andomeleze. Abantakwethu bokwenyama, abandilahlileyo ngandlel’ ithile, bayabona ukuba ndinamawaka abazalwana bokomoya ehlabathini lonke.”—Marko 10:29, 30.
Inkqubela Kwezo Ziqithi
Ngowe-1965, uAlbert Suhr owaphumelela kwiklasi yama-20 yaseGiliyadi, kwafuneka ayishiye iCuraçao ngenxa yokugula, kodwa eshiya ngasemva “iincwadi zoncomelo” ezibalaseleyo. (2 Kor. 3:1, 2) Omnye wazo, uOlive Rogers, waba nguvulindlela othe ngxi ngoSeptemba 1951. Kangangeminyaka eli-17, uOlive wayehlala nendoda bengatshatanga. Noko ke, xa wafunda ngemilinganiselo ephakamileyo kaYehova, wayishiya loo ndoda, neyashiywa lixesha xa yayicela ukumtshata. Wasikhaba eso sicelo, waza wabhaptizwa, yaye wangenelela izintlu zoovulindlela, awaba kuzo phantse iminyaka engama-40 de wagula. UDade Rogers wayebonwa kuyo yonk’ indawo njengoko wayechwayitile esebenza loo ntsimi. Namhlanje, abantu babalisa amabali achukumisayo ngalo dade. Ukungatyhafi nokungayekeleli kwakhe kwamnceda wakwazi ukunceda abantu abaninzi, kuquka iintsapho ezinkulu, ukuba zahlulele ubomi bazo kuYehova.
Namhlanje kukho iintsapho ezininzi ezisebenza nzima zikhonza uYehova kolo Manyano LweziQithi naseAruba. Iintsapho ezinkulu ezifana neyakwaMartha, eyakwaCroes, eyakwaDijkhoff, eyakwaRasmijn, eyakwaLiket, eyakwaFaustin, eyakwaOstiana, neyakwaRoemer, ezisisiseko samabandla zaza zaba negalelo elikhulu ekumeni kwawo.
UEugene Richardson onobuhlobo waqala ukufundiswa inyaniso ngoYehova xa wayeneminyaka eli-15 ubudala. Nakuba engazange aqhutyelwe isifundo seBhayibhile ngendlela eqhelekileyo, wenza inkqubela ngokuthe ngcembe ngokuya kuzo zonke iintlanganiso yaye wabhaptizwa xa wayeneminyaka eli-17 ubudala. Ngowe-1956 wamiselwa njengovulindlela othe ngxi yaye wajamelana noko akugqala njengeyona ngxaki inkulu—ukungabi nanto yokuhamba. Uthi: “Isabelo sam sasikumgama weekhilomitha ezingama-20 ukusuka ekhaya, ngoko ke, ukucombulula loo ngxaki, ndatshintshisa ngepiyano yam ukuze ndifumane ibhayisekile. Intsapho yam yothuswa seso senzo, yaye nasemva kweminyaka engama-40 isathetha ngaso. Noko ke, kum oko kwaba luncedo kakhulu. Ngokukodwa ekubeni kwiinyanga ezine emva koko, ndamiselwa ukukhonza njengovulindlela okhethekileyo kwintsimi engabelwanga bani yaseBanda Abao.”
Ukuvula Intsimi Entsha
Iphandle laseBanda Abao, elaziwa ngokuba yikunuku apho, limi kwicala elisentshona leCuraçao yaye ligubungela phantse isiqingatha seso siqithi. Umhlaba wakhona ubuthambeka yaye liphantse libe luhlaza kunaso sonke eso siqithi. Kukho izindlu ezigqagqeneyo, ngoko ukusebenza kuloo ntsimi kufuna ixesha elininzi. Omnye uvulindlela oselula, nonenzondelelo, uClinton Williams, wathelela uEugene, yaye bekunye baqalisa ukuvula loo mida mitsha. UEugene ukhumbula oku: “Loo ntsimi yayingelula, xa ithelekiswa nayo yonke enye kweso siqithi. Abantu balapho babenobubele ngeyona ndlela yaye kumnandi ukuthetha nabo, kodwa kwakudla ngokuphelela apho. Noko ke, sasebenza apho kangangeminyaka emibini yaye sazuza amava amangalisayo. Kwinyanga yokuqala, ndadibana nendoda eyathi ukuba sinokunikela ubungqina bokuba uBukumkani bukaThixo bamiselwa ngowe-1914, yayiza kuba liNgqina. Yaye ngokwenene yaba liNgqina kunye nomfazi wayo nabantwana. Kamva, ndathetha nebhinqa elathi umtshana walo unomdla kakhulu eBhayibhileni. Kwangolo rhatya ndabuyela ndanikela ubungqina kuye. Igama lakhe lalinguCiro Heide.”
Umfo onobuhlobo, uCiro, ubalisa ngokwakhe athi: “NdandingumKatolika ozinikeleyo ndiyazi kakuhle incwadi efundisa ngokholo kangangokuba ndandinokuyifundisa esikolweni. Kodwa kukho into eyayisoloko indimangalisa. Ndandingasiqondi isizathu sokuba xa uphoswe kukuya ecaweni, ube netyala lokufa ube uza kuya esihogweni ukuba akukhange ukhawuleze ukuxele oko. Ngenye imini ekhaya kwafika igatyana lomfana lihamba ngebhayisekile laza lathetha nomakazi ngeBhayibhile. Esazi umdla wam elunqulweni, wathi lize libuye xa ndisekhaya. Ndakulangazelela ukudibana nalo, kuba ndandicinga ukuba ndazi ngakumbi kunalo ngonqulo. Kwakuloo ngokuhlwa, uEugene wafika. Ndaba yinkukh’ esikw’ umlomo xa wakhankanya ukuba iMfundiso yabaPostile, endandiyicaphula rhoqo yonk’ imihla, ichaza ukuba uYesu waya esihogweni. Ekubeni ndandisenza nje ingoma, ndingacingi nto, andizange ndikuqonde oko ikuthethayo. Eyona nto yandimangalisa gqitha kukuba uEugene wayesebenzisa iBhayibhile ukucacisa yonk’ into, ngoxa ndandingenakutyhila nesibhalo nje esinye. Ukususela ngoko, ubomi bam batshintsha ngokuphawulekayo, kuba ndaqalisa ukufunda kwangoko.” Phezu kwayo nje inkcaso yomfazi wakhe, uCiro wabhaptizwa. Ngenxa yokuba ngumzekelo omhle kwakhe, naye wahlulela ubomi bakhe kuYehova ekugqibeleni. Baye bakhonza uYehova ngokuthembeka kangangeminyaka engama-30, yaye uCiro uye wakhonza njengomdala iminyaka engama-25.
UEugene waya kwiSikolo saseGiliyadi ngowe-1958 yaye waphinda wabelwa eBanda Abao, apho kwakusekho ingxaki yezinto zokuhamba. Ubalisa athi: “Maxa wambi xa sisiya kwinkonzo yasentsimini, sasidla ngokuba neqela labazalwana abali-13 kwinqwelo-mafutha enye—leyo yam. Oku kwakuthetha ukuwuphinda izihlandlo ezibini loo mgama weekhilomitha ezingama-30. Ndandisothula iqela lokuqala entsimini ndize ndikhawuleze ndiye kulanda elinye. Nasemva kwemini, yayiba yiloo ngoma yasekuseni ukuze ndibuyise abazalwana. Kodwa sasichitha imini yonke kubulungiseleli. Sasidinwa gqitha, kodwa olunjani uvuyo esasiba nalo!” UEugene wafumana nelungelo lokukhonza kumsebenzi wokuhambahamba kangangeminyaka ethile.
Ekunuku Kwenzeka Iinguqu
Ngowe-1959, uClinton Williams, ngelo xesha, naye owayesele ephumelele kwiSikolo saseGiliyadi waqhubeka esebenza ekunuku. Kamva watshata noEugenie, uvulindlela onenzondelelo owayethandwa ngabantu abaninzi ngenxa yobubele bakhe. Ngowe-1970 kwasekwa ibandla elinabavakalisi abali-17 kwidolophana yaseZorgvliet bij Jan Kok, yaye iintlanganiso zaziqhutyelwa kwikhaya lentsapho yakwaPieters-Kwiers. Oovulindlela abakhethekileyo uJuana Pieters-Kwiers nentombi yakhe uEsther, kunye nentsapho yakwaMinguel neyakwaKoeiman bazibhokoxa ukuze bakhuthaze elo bandla. Ngowe-1985 elo bandla lalisele likhule lanabavakalisi abangama-76 besiba li-125 ababakho kwiintlanganiso. Kwakuloo nyaka, uthando lwashukumisela abazalwana baseUnited States baya kwakha ngokuzithandela iHolo yoBukumkani ePannekoek, yaye iHolo yoBukumkani endala yalapho yaguqulwa yaba likhaya labavangeli basemazweni. Kwisithuba seminyaka emibini, inani labavakalisi lenyuka laya kutsho kwi-142, kangangokuba ngowe-1987 kwasekwa iBandla iTera Corá.
Ukufumana indawo yokuhlala oovulindlela kwakusoloko kuyingxaki, yaye uEugene ukhumbula xa kwafuneka ahlaziye indlu engasetyenziswayo eyayihlala iibhokhwe. Wachitha iiveki esilwa nelo “vumba” lazo. Inyama yebhokhwe yeyona ithandwayo apho. Kangangeminyaka, xa kulungiselelwa ukutya ezindibanweni, ibhokhwe yayikokona kutya kuqhelekileyo, yaye abazalwana babeyoliswa kukuchitha ixesha lesidlo sasemini benandipha inyama yebhokhwe eqholiweyo. Noko ke, ngasihlandlo sithile kwabakho undonakele kuloo nyama, hayi ke babethontelana ukuquqa kwizindlu zangasese.
URussell Yeatts uthanda ukubalisa ibali ngebhokhwe ekwakusithiwa nguMimi. Ngasihlandlo sithile wadla iiBhayibhile ezintathu, amaculo aliqela, nezinye iincwadi, kwaneqela lamaphephancwadi. Umniniyo, uRita Matthews, wathi: “Wadla uncwadi lwethu oluninzi kangangokuba sambiza ngokuba yibhokhwe engcwele.” UMimi wathengiswa.
Iindibano Zivelisa Umoya Wothando Nobunye
Ukutyhubela iminyaka, ukufumana iindawo ezifanelekileyo zokuhlanganisana—ngokukodwa ezeendibano—bekusoloko kuyingxaki. UMax Garey, owaphumelela kwiklasi yesihlanu yaseGiliyadi, walungiselela ukwakhiwa kweHolo yoBukumkani yokuqala ukuba yeyabazalwana, eBuena Vista, eCuraçao. Ngeentliziyo zabo zonke abazalwana bazibhokoxa ekwakheni loo holo yaye baba nemincili gqitha ukugqitywa kwayo. Ngowe-1961 kwasekwa ibandla lesibini lesiPapiamento eCuraçao yaye lasebenzisa iholo entle entsha, uVictor Manuel ngoku ongumvakalisi weendaba ezilungileyo phantse kangangeminyaka engama-50, wayekhonza njengesicaka sebandla. UNathan H. Knorr waseBheteli eBrooklyn wayinikezela loo holo ngoMatshi 28, 1962.
Kweyee-1970, umhlaba omelene neholo yaseBuena Vista walungiswa, kwenziwa umgangatho wekhonkile, kwenziwa ibala. Elo bala lasetyenziselwa iindibano ezinkulu nezincinane kangangeminyaka emininzi, yaye ekubeni kungekho mvula ingako eCuraçao, ezo ntlanganiso zaziqhutyelwa phandle, kungekho zingxaki zingako. Noko ke, maxa wambi abazalwana babekhe bothuswe kukusuka ngequbuliso kutsho amathontsi eshiya impahla neencwadi zabo zimanzi kodwa bengadimazekanga bona. Babesuka nje bavule iiambrela zabo baqhubeke benikela ingqalelo kucwangciso. Ngaphambili, ezi ndibano zaziqhutywa ngeelwimi ezimbini, ezinye iintetho zazinikelwa ngesiNgesi zize zitolikwe ngoxa ezinye zazishwankathelwa ngesiPapiamento. Iindibano zesithili zazitshintshwa ziqhutywa eAruba naseCuraçao, yaye ezinye zeendwendwe zazihamba ngeenqwelo-moya eziqeshiweyo ukuya kwisiqithi esinendibano, ngoxa ezinye zihamba ngesikhephe. Ngasihlandlo sithile, elinye iqela elikhulu leendwendwe ezazisiya kwindibano zihamba ngesikhephe iNiagara zagula ngenxa yolwandle. Phezu kwako nje oko kuphazamiseka, ihlombe ababenalo ngentabalala yezinto zokomoya ababeza kuzifumana alizange licime.
UIngrid Selassa, owayeneminyaka eli-16 ngoko, ukhumbula ukuba uninakhulu wathengisa ihagu ukuze abe nemali yolo hambo. Iindwendwe zazihlala kwimizi yabazalwana zide zilale naphantsi. Kwasekwa ubuhlobo obungapheliyo, yaye kugquba uvuyo ngenxa yomoya wothando nobunye. Ngowe-1959, kwaqhutywa indibano yesithili yokuqala yolwimi lwesiPapiamento kwindlu yezityalo yaseSanta Cruz eBanda Abao. UIngrid ukhumbula oku: “Sakhwela ezibhasini nokutya, izinto zokwandlala, nezixhobo saza sanduluka ukuya endibanweni. Olo cwangciso lwalusisidlo sokomoya, yaye ngokuhlwa sasidlala imidlalo yeBhayibhile sivuma iingoma zoBukumkani kuloo mpengezi yesibhakabhaka sasebusuku. Andinakuze ndizilibale ezo ntsuku zintathu sazichitha apho, apho sasivakalelwa ngokwenene kukuba siyinxalenye yobuzalwana.” Iindibano zezizwe ngezizwe ezomeleza ukholo, ezifana neNdibano Yezizwe Ngezizwe ‘Yoxolo Lomhlaba’ yowe-1969, nazo zaba negalelo ekukhuthazeni umoya wothando nobunye phakathi kwabazalwana.
IiHolo ZeNdibano Ezintsha
Njengoko yayiqengqeleka iminyaka, loo ndawo yeendibano yaseBuena Vista yaba ncinane kakhulu, kodwa ngenxa yeminikelo yesisa evela emabandleni, abazalwana bakwazi ukuthenga isakhiwo kumzi-mveliso ohluza ioli. Ekubeni simi kwisithili saseSchelpwijk, eso sakhiwo sahlaziywa sema ngenye indlela, yaye kangangeminyaka emininzi iindibano zesiphaluka nezesithili zaziqhutyelwa kuso. Kutshanje, iofisi yesebe iye yafumana imvume yokuchitha eso sakhiwo kuze kwakhiwe isakhiwo esineeHolo zoBukumkani ezimbini ezinokuguqulwa zibe yiHolo yeNdibano ehlala abantu abangama-720—ilungiselelo elivuyisa abazalwana.
Ngaphambi kowe-1968, iindibano zaseAruba zaziqhutyelwa kwiiholo eziqeshiweyo, kodwa njengoko kwakuvela ulwando, kwabakho imfuneko yokuba neHolo yeNdibano esisigxina. Ngoko, kwagqitywa ekubeni kwakhiwe iHolo yoBukumkani enkulu ngokwaneleyo ukuba isetyenziselwe iindibano. Ngowe-1968 ngenxa yokuzibhokoxa nokuzincama, abazalwana balapho bakha iholo entle yokudumisa uYehova. Ngoxa yayisakhiwa loo holo, yayingabonakali kubantu abadlulayo isithwe lukhula icactuses. Kwiveki engaphambi kwendibano yokuqala, urhulumente wayalela ukuba igecwe loo cactuses. Ngommangaliso, kwathi gqi iholo ngosuku olunye—okanye kwaba ngathi kunjalo! Abantu balapho babecinga ukuba ngummangaliso, abaninzi babekholelwa ukuba ngokwenene loo holo yakhiwe ngosuku olunye. Kodwa loo mmangaliso wawuseza kwenzeka kamva xa kusakhiwa iiholo zesiquphe.
Umsebenzi Uyakhula EBonaire
Ngowe-1949, uJoshua Steelman, ummeli okhethekileyo wekomkhulu eliseBrooklyn, watyelela eBonaire, ngelo xesha uJacobo Reina noMatthijs Bernabela, umfama, babexakeke beshumayela apho. Akakho owayesele ebhaptiziwe kubo. Kwenziwa amalungiselelo okunikela intetho yesidlangalala yokuqala eBonaire. Kweza abantu abamalunga ne-100, kodwa babengama-30 kuphela abangenayo eholweni. Abanye abangama-70 babethunyelwe ngumfundisi wamaKatolika walapho ukuba baye kuphazamisa loo ntlanganiso. URussell Yeatts usibalisela oku: “Phezu kolo phahla lwamacangci kwatsho imvula yamatye ngathi sisichotho saseYiputa. Kwaqhushumba iifirecracker, yaye abantu bebetha iinkonkxa.” Loo migudu yawa phantsi, kuba imbewu yenyaniso yasasazwa yaza yantshula. Kunyaka olandelayo, uJacobo noMatthijs, amaNgqina okuqala eBonaire, babhaptizwa eCuraçao.
Ngowe-1951, uRussell noBill Yeatts balungiselela ukuqhutywa kweentlanganiso kwikhaya likaMzalwan’ uBernabela, yaye ngowe-1952, uClinton Williams wathunyelwa eBonaire ukuze amisele ibandla elitsha kwiholo eqeshwayo eKralendijk. Ngokwenjenjalo, wagagana nengqumbo yomfundisi wamaKatolika, owazama ukuba akhutshelwe ngaphandle kwelo. Loo mfundisi wazama ukuphembelela omnye wezifundo zeBhayibhile zikaMzalwan’ uWilliams ukuba amtyhole ngokuzama ukuba neentlobano zesini naye, kodwa wala. Etshonelwe lilanga emini, wabiza uMzalwan’ uWilliams ngokuba liwara-wara, intaka ezingela izinto izidle kwezo ziqithi, emtyhola ngokuxhwila izimvu zakhe. Kodwa ngomoya kaYehova, uMzalwan’ uWilliams waqhubeka esomeleza elo bandla litsha de waphinda wasiwa eCuraçao. Ngowe-1954 kwaqhutywa indibano yesiphaluka yokuqala, yaye ukususela ngoko iindibano ezinkulu nezincinane ziye zadlala indima enkulu kubomi bokomoya babazalwana baseBonaire. Kwakhona abantu bathontelana ukuza kubona imiboniso eyayiveliswe ngamaNgqina kaYehova, eyavuselela umdla, kodwa akuzange kubekho nkqubela ingako de kwathunyelwa oovulindlela abakhethekileyo ababini, uPetra Selassa nentombi yakhe, uIngrid, ngowe-1969.
Xa uPetra noIngrid babefika, babengenayo inqwelo-mafutha; ukanti bagubungela phantse sonke eso siqithi ngeenyawo. Kamva inkoliso yezifundo zabo yabhaptizwa. Behleli phantsi yaye bethwele entloko, abo dade babini babeqhuba zonke iintlanganiso. Kanye ngenyanga kwakudla ngokufika umzalwana ngenqwelo-moya evela eCuraçao asebenze nabo aze anikele nentetho yesidlangalala. Kamva, xa uPetra kwafuneka emke, kwafika omnye uvulindlela okhethekileyo, uClaudette Tezoida, eze kusebenza noIngrid, yaye baqhubeka benceda abantu bafunda inyaniso yeBhayibhile.
Umfazi Welungu Lezobupolitika Ufumana Urhulumente Ofezekileyo
Phakathi kwabo bafunda ulwimi olusulungekileyo kwabakho nomfazi welungu lezobupolitika elaziwayo. UCaridad Abraham, oteketiswa ngokuthi Da ngabantu, wayengumfazi womphathiswa kurhulumente waseBonaire. Oonyana bakhe ababini nomkhwenyana wakhe nabo babekhuthele kwezobupolitika. Nkqu noDa wayezibhokoxa egayela indoda yakhe ibe wayesaziwa kulo lonke yaye ehlonelwa. Umfundisi othile wamaProtestanti owabhaptiza omnye wabantwana bakhe wamxelela ukuba amaNgqina kaYehova akakholelwa kuYesu Kristu. Ekubeni wayengumhlobo nomfundisi wakhe, wabukholelwa obo buxoki.
Emva kokufa komyeni wakhe, uDa wafudukela eNetherlands, yaye elapho wothuswa kukubona kumabonwakude abefundisi ababini bamaProtestanti bevuma ekuhleni ukuba bangamafanasini. Evulekile amehlo ngonqulo, wayeka ukuya ecaweni. Kamva wasamkela isifundo seBhayibhile, waba liNgqina waza wabuyela eBonaire. UDa wathi: “Inyaniso yayimangalisa gqitha kangangokuba kwafuneka ndibuyele emva ukuze ndabelane ngayo nabantu bakuthi.” Ngoku endaweni yokubalaselisa urhulumente wabantu njengesicombululo kwiingxaki zaseBonaire, waqalisa ukushumayela ngesicombululo sokwenene nesihlala sihleli—uBukumkani bukaThixo phantsi kukaYesu Kristu. Becinga ukuba uze kugayela unyana wakhe, abantu babemamkela emizini yabo yaye babemangaliswa sisigidimi sakhe. Sekunjalo, ngenxa yokuba uDa wayesaziwa kakuhle, abantu abaninzi ababengayi kuwaphulaphula amanye amaNgqina baqalisa ukusamkela isigidimi soBukumkani.
Uncwadi Lufumaneka Ngolwimi Lwasekuhlaleni
Inyaniso ikhawuleza ngakumbi ukuchukumisa intliziyo ukuba abantu bafunda iimpapasho zeBhayibhile ngolwimi lwabo. Xa kwakufika abavangeli basemazweni bokuqala, lwalungekho uncwadi lweBhayibhile ngesiPapiamento. Xa kuqhutywa iintlanganiso kwakuxutywa isiNgesi nesiPapiamento, kusetyenziswa iimpapasho zesiNgesi, iSpanish, nesiDatshi, ngoko, kwakunzima ukuba abazalwana baqonde inyaniso. Ngoko, kwakufuneka ngokwenene ukuba kuguqulelwe iimpapasho. Noko ke, sasingekho kakuhle isigama sesiPapiamento, kungekho sichazi-magama, yaye abantu babengavumelani ngendlela esifanele sibhalwe ngayo isiPapiamento. Emva kweminyaka, uBill Yeatts, umakad’ enetha womguquleli, wabhala wathi: “Ukuze sisasaze isigidimi soBukumkani, kufuneka sithethe size sibhale izinto ezingazange zithethwe okanye zibhalwe ngaphambili ngesiPapiamento. Kwakunzima ukuhlahl’ indlela.” Ngokuqinisekileyo kwakungeyondlwan’ iyanetha oko! Ngowe-1948, abazalwana baguqulela incwadana yokuqala, ethi The Joy of All the People. Ngowe-1959 kwagqitywa ukuguqulelwa kwencwadi ethi “UThixo Makabe Nenyaniso.” Emva koko kwaguqulelwa ezinye iincwadi yaye kwaguqulelwa rhoqo iToren di Vigilancia, njengoko ibizwa njalo IMboniselo ngesiPapiamento, neSpierta, okanye uVukani! Ngokuthe ngcembe, yaya iphela impembelelo eyayinayo icawa kubantu balapho njengoko babeqalisa ukuqonda inyaniso yeLizwi likaThixo ngolwimi lwabo.
Ukuguqulela kwaba negalelo nasekuvumeni kwiintlanganiso. Xa bevuma abemi bezo ziqithi, bavuma ngehlombe yaye bayakhwaza. Noko ke, ngaphambili elo hlombe lalithintelwa kukuba amaculo abo yayingaweSpanish. Kodwa ngowe-1986, xa abazalwana bafumana amaculo esiPapiamento, iiholo zazihlokoma ngamazwi avakala kakuhle. Ekugqibeleni, ngoku xa bevuma babeza kukwazi ukuzivakalisa ngokupheleleyo iimvakalelo zabo ngoThixo wabo ozukileyo, uYehova. UMaria Britten wathi: “Eyona nto yandichukumisa kakhulu xa ndandifika okokuqala kwiHolo yoBukumkani ngumculo. Wawumnandi kangangokuba zehla iinyembezi.”—Isa. 42:10.
Njengoko wawusanda umsebenzi, kwafuneka abaguquleli abangakumbi, yaye oovulindlela ababini abaselula nabanenzondelelo—uRaymond Pietersz noJanine Conception—baqalisa ukuguqulela. Namhlanje kukho iqela labantu abasithoba abenza iSebe Lokuguqulela. Ngowe-1989, kwafika iikhompyutha nenkqubo yazo iMEPS, isixhobo esibalulekileyo sokunceda abaguquleli, ekugqibeleni esabangela ukuba IMboniselo yesiPapiamento ipapashwe ngaxeshanye nezinye iilwimi—intsikelelo emangalisayo kumsebenzi wokushumayela.
Uncedo Olungakumbi Lwabavangeli Basemazweni
Ngowe-1962, uJohn Fry, owaphumelela kwiklasi yama-37 yaseGiliyadi, wamiselwa njengomveleli wesebe endaweni kaRussell Yeatts, ekwakufuneka aye kwizifundo ezihlaziyiweyo kwiSikolo saseGiliyadi. Emva kweenyanga ezili-18, xa uDade Fry wakhulelwayo, abakwaFry babuyela eNgilani, yaye uMzalwan’ uYeatts waphinda waqala apho ebeyeke khona kumsebenzi welo sebe. NgoDisemba 31, 1964, uAge van Dalfsen waseNetherlands wagaleleka kwezo ziqithi emva kokuphumelela kwiklasi yama-39 yaseGiliyadi. Njengoko wayesithi cakatha umcondo eCuraçao wamkelwa ngezithatha nezithonga zeefirecracker ezazitshawuza esibhakabhakeni kobo busuku. Ungaphazami, abemi bezo ziqithi babengamkeli yena. Kunoko, yayisisithethe sabantu balapho sonyaka, indlela yabo yokugxotha imimoya emibi namashwa onyaka omdala besamkela unyaka omtsha. Eselityendyana yaye ekhaliphile, uMzalwan’ uvan Dalfsen wangena kumsebenzi wesiphaluka yaye ekugqibeleni waba kowesithili. Njengenkoliso yabavangeli basemazweni, walithanda elo khaya lakhe litsha yaye uthi: “Abantu balapha banobubele, babuka iindwendwe yaye banyanisekile. Kuluyolo nelungelo ukuziswa apha.”
Ngowe-1974 uAge watshata noJulie, udade waseTrinidad, yaye wamthelela kuloo msebenzi wokuhambahamba. UJulie ukhumbula oku: “Ndachukunyiswa bubuhlobo novelwano lwabantu balapho. Ndandingakwazi ukuthetha isiPapiamento, kodwa ukushumayela kwaba mnandi ngenxa yoncedo lwabo. Kwakulula ukubuza impilo usithi ‘Con ta bai?’ (Ninjani?) nokubuza ngempilo-ntle yelungu ngalinye lentsapho, nto leyo esisithethe apho. Kwakulula nokuhambisa uncwadi. Eyona nto yayinzima yayikukuhla unyuka eluthulini nasemoyeni usindwa ngumgodlo webhegi yoncwadi lweelwimi ezine! Noko ke, kum oko kwakuvuyisa ngokwenene.” Ngowe-1980, uAge noJulie baya eNetherlands besiya kunyamekela utata ka-Age, owayenesifo sika-Alzheimer, kodwa babuyela eCuraçao ngowe-1992.
URobertus Berkers nomfazi wakhe, uGail, abaphumelela kwiklasi yama-67 yaseGiliyadi, baqhubeka nomsebenzi wesiphaluka xa babengekho abakwaVan Dalfsen yaye bafaka ihlombe elingathethekiyo ngobulungiseleli bexesha elizeleyo. Ngowe-1986, uOtto Kloosterman nomfazi wakhe, uYvonne, bafika eCuraçao bevela eGiliyadi, yaye uMzalwan’ uKloosterman wamiselwa njengomveleli wesebe ngowe-1994. Babuyela eNetherlands ngowama-2000. NgoMatshi 2000, uMzalwan’ uvan Dalfsen wamiselwa kwiKomiti Yesebe, yaye yena nomfazi wakhe bamenyelwa eBheteli, apho bakhonza khona ngoku. Ngowe-1997, uGregory Duhon, ovela kwiSebe Lokufota eBrooklyn, nomfazi wakhe uSharon, bathunyelwa eCuraçao njengamalungu entsapho yaseBheteli akwiNkonzo Kumazwe Asemzini. USharon, umongikazi ovunyiweyo, nabanye baba luncedo ekunyamekeleni uMzalwan’ uRussell Yeatts, owahlaselwa ngumhlaza onganyangekiyo. NgoMatshi 2000, uMzalwan’ uDuhon wamiselwa waba ngumveleli wesebe, yaye bonke babuxabisa ngeyona ndlela ububele bakhe nokungeneka lula. Kungokunje, uGregory Duhon, uClinton Williams noAge van Dalfsen bakhonza kwiKomiti Yesebe.
Ubuvulindlela Buzisa Umvuzo Ongathethekiyo
Xa uMargaret Pieters waqalisa ukufunda iBhayibhile, wayanelisekile lunqulo lwakhe. Ukhumbula oku: “Ekuqaleni ndandingenanjongo zakutshintsha unqulo lwam. Ndandililungu elikhutheleyo leCawa yamaKatolika, ilungu kwiqela iLegion of Mary, nekwayala yecawa. Kodwa emva kokufundisisa iBhayibhile, ndaqonda ukuba oko ndakufundiswayo kwakuphosakele. Andizange ndilindele ukumenywa ukuya kubulungiseleli basentsimini ndacela ukuya. Ndandifuna abanye baphume kunqulo lobuxoki baze bamele inyaniso.” Wabhaptizwa ngowe-1974, yaye ebenguvulindlela othe ngxi kule minyaka ingama-25 idluleyo.
UYehova uye wamsikelela uMargaret, njengoko oko kungqinwa ngamanye kumava akhe amaninzi. Kwathunyelwa enye intombazana eselula uMelva Coombs ukuba ibuze kuye, yena uMargaret wacebisa ukuba icele imvume yokufunda kuyise. Echukunyiswe yintlonelo kaMargaret, uMnu. Coombs wathi asiyontombi yakhe nje kuphela eza kufunda kodwa yonke intsapho—basixhenxe bebonke! UMargaret wavuyiswa kukubabona bonke bebhaptizwa, yaye kamva omnye woonyana balapho waba ngumdala.
Omnye uvulindlela oye wakuva ukulunga kukaYehova nguBlanche van Heydoorn. Yena wabhaptizwa ngowe-1961, kwalandela umyeni wakhe uHans ngowe-1965. Ebenguvulindlela kule minyaka ingama-35 idluleyo. Ngelo xesha, uBlanche ebekhulisa abantwana abathandathu, ababini kubo ngoku bangoovulindlela abathe ngxi. Oku kwakungenakwenzeka ngaphandle kokuxhaswa ngokwasemzimbeni nangokweemvakalelo nguHans. Bekunye baye banceda abantu abangama-65 ukusa kwinqanaba lokwahlulela ubomi babo kuYehova.
Amanye kumava amaninzi kaBlanche abandakanya ummelwane wakhe, uSerafina. UBlanche waqalisa ukufunda noSerafina, kodwa umyeni wakhe uTheo wakukhaba ngawo omane oko. Wazitshisa iincwadi zikaSerafina yaye wamalela uBlanche ukuba eze emzini wabo, exelela wonk’ ubani ukuba umlolele isabile. UHans wasiva isizathu sokuba uTheo achase ngaloo ndlela. Kucaca ukuba wayenomhlobo owayenomfazi owafunda nomfundisi wonqulo oluthile lwalapho. Kamva, wagcagca naloo mfundisi. Ngoko, uTheo wayesoyika ukuba umfazi wakhe enze okufanayo. Esebenzisa amaHebhere 13:4, uHans wacacisa imbono yethu ngomtshato. Kwatsho kwee qabu, uTheo wavuma ukuba aqhubeke efunda. USerafina wabhaptizwa, yaye emva kwexesha noTheo wenjenjalo. Bobabini ngoku bakhonza uYehova ngokuthembeka.
UBlanche usibalisela ngokuqhuba kwakhe isifundo seBhayibhile ngentsimbi ye-11:00 kusasa, wagoduka eye kwisidlo sasemini, waza wazala unyana wakhe uLucien kwiiyure ezimbini kamva! Usalixabisa ilungelo lakhe lobuvulindlela. UBlanche uthi: “Ubuvulindlela bukwenza ulungiselele uze ufundisise ngokuqhubekayo yaye bukunika ulwaneliseko olungenakufunyanwa naphi na.”
Amandla Angaphaya Koko Kuqhelekileyo
UMarion Kleefstra naye ufumane ulwaneliseko olukhulu ekukhonzeni uYehova ixesha elizeleyo. Esekwishumi elivisayo, waba nomdla kwinyaniso ngokufundela uninakhulu ongaboniyo amaphephancwadi. Wahlulela ubomi bakhe kuYehova ngowe-1955 yaye ngowe-1970 waba nguvulindlela othe ngxi. Unyana wakhe uAlbert walandela emanyathelweni akhe yaye ebenguvulindlela kule minyaka ili-18 idluleyo.
UMarion wayefunda noJohanna Martina, owayenabantwana abasithoba. Umyeni kaJohanna uAntonio, wayechasa ngeyona ndlela, ngoko uMarion wayengakwazi ukufunda naye xa ekho. Xa umyeni wakhe esekhaya uJohanna wayebophelela isiziba esangweni, ngoko, xa uMarion esibona, wayephinda abuyele kamva. Ngenxa yomonde kaMarion nonyamezelo lukaJohanna, bobabini uJohanna noAntonio bayamkela inyaniso yaye babhaptizwa ngaxeshanye. Banceda abantwana babo abasibhozo kwabasithoba bahlulela ubomi babo kuYehova.
Okubuhlungu kukuba, kamva uAntonio wafa kwingozi yeenqwelo-mafutha. Kwiminyaka ethile kamva, abantwana ababini bakaJohanna bafa ngendlela efanayo, yaye owesithathu wafela kwenye yeemeko ezimanyumnyezi. Kodwa phezu kwako konke oko, uJohanna wema eqinile, enethemba lokuba uYehova uya kumnika “amandla angaphaya koko kuqhelekileyo.” (2 Kor. 4:7) Olo kholo lomeleleyo luye lwamomeleza kungekuphela nje ukuze anyamezele amaxesha eenzingo kodwa nokuze aqhubeke nenkonzo yakhe yobuvulindlela kule minyaka ingama-25 idluleyo. UJohanna ngoku uneminyaka engama-81 ubudala yaye uthi: “UYehova mkhulu, yaye nguye ondomelezayo. Ndihlala ndimbongoza, yaye akaze asilele.”
Le yimizekelo nje embalwa yoovulindlela abathembekileyo, abasebenza nzima nabasisiseko samabandla amaninzi yaye bathetha lukhulu kuwo. Xa kwahlengahlengiswa isisikelo seeyure zoovulindlela ngowe-1998, oko kwavulela abaninzi ithuba lokungenelela le nkonzo. Oovulindlela baye bavakalisa uxabiso olunzulu ngeSikolo Senkonzo Yobuvulindlela, esiye sabanceda kakhulu ekubaqeqesheni baba ngabalungiseleli abanobuchule ngakumbi. Abavakalisi abanenzondelelo nabo bongezelela eyabo intlokoma ekudumiseni uYehova, yaye abanye babo baphumelela kakhulu ekunikeleni ubungqina obungacwangciswanga, njengoko kunokubonwa kula mava alandelayo.
Ebutsheni beyee-1950, uAlbert Heath, ugqirha oselula waseGuyana, wayehlohla kwiyunivesithi yaseDjakarta, eIndonesia. Apho wafunda ngendlela eyahlukileyo yokunyanga. Njengengcali yamehlo, wayiqonda ‘intambiso yamehlo’ uYesu awathetha ngayo kubemi baseLawodike, njengoko kubhalwe kwiSityhilelo 3:18. UAlbert waqonda ukuba yiloo “ntambiso yamehlo” le wayefuna ukuyalela ngayo. Ngowe-1964 yena nentsapho yakhe bafudukela eCuraçao yaye waqhubeka efunda ngenkqubo yokomoya yokunyanga uYesu awayiphathisa udidi lwekhoboka lakhe lasemhlabeni. (Mat. 24:45) Ngowe-1969, uAlbert nonyana wakhe babhaptizwa kwindibano enye. Kwikliniki yakhe wanikela ubungqina obuninzi kwizigulana nabaqeshwa ngokufanayo. UAlbert walathisela abaninzi kumanzi enyaniso, abanye babo ngabadala namhlanje.
Ukuvuka Koqhushululu Olungalindelekanga
Ubomi baseCuraçao babusoloko buzolile. Kangangeminyaka emininzi akukho nto yakha yenzeka ukudubaduba uxolo. Kodwa iziganeko zazibonisa ukuba kwakuza kubakho iinguqu ngesiquphe. Ekuqaleni kukaMeyi 1969, umveleli wecandelo, uRobert Tracy, walumkisa ngokuhlala uphaphile nengozi yokulahlekiswa kukuziva unqabisekile ngenxa yokuba kubonakala ngathi kukho inzolo kweso siqithi. Loo nzolo yayiza kuthi shwaka. Kungaphelanga veki zingaphi, ngoMeyi 30, iingxwabangxwaba zabasebenzi zavusa udushe. Konakaliswa yaye kutshiswa yonk’ into, kwelo butho lizolileyo kwaguquka kwaba sisiphithiphithi sokungazinzi kwezobupolitika. UClinton Williams ukhumbula oku: “Enye indoda, eyayibetha ngogaga, yeza idubulekile kwinqwelo-mafutha yam yaye ivutha ngumsindo. Ngequbuliso, omnye owakha waba sisifundo sam seBhayibhile wandihlangula, wakhwaza esithi: ‘Myeke lowo! Uzilungele nje lowo.’ Loo ndoda yegqitha, iphosa kwisihlalo senqwelo-mafutha yam ukutya okunkonkxiweyo eyayikuthabathe kwenye ivenkile enkulu, yaza yemka. Zehla izibilini ndaza ndambulela uYehova ngokundikhusela kwakhe.”
Kweso siphithiphithi nokungaqiniseki kwaloo maxesha obunzima, abantu bakaYehova bahlala bezolile, bekhuselwa kukwazi ukuba kwikamva elikufuphi, uBukumkani bukaThixo buya kuzisa kuye wonk’ ubani urhulumente ogqibeleleyo. Uya kwandula ke uYehova anelise umnqweno “wayo yonke into ephilayo.” (INdu. 145:16) Namhlanje abantu bagqala umhla kaMeyi 30, 1969 njengexesha lokuguquka kwembali yeso siqithi.
Iiofisi Ezintsha Zesebe
UNathan H. Knorr, owakhonza njengelungu leQumrhu Elilawulayo lamaNgqina kaYehova de kwasekufeni kwakhe ngowe-1977, wayesoloko ebonisa umdla ongazenzisiyo kubavangeli basemazweni, esoloko ehambela kumazwe asemzini ukuze omeleze abazalwana. Ngowe-1956, abaveleli becandelo baqalisa ukutyelela abazalwana ehlabathini lonke, yaye ezi “zipho ezingabantu” bezisoloko ‘zisomeleza,’ zaba negalelo kumsebenzi wezo ziqithi iABC. (Efe. 4:8; Kol. 4:11) Ngowe-1950, uMzalwan’ uKnorr watyelela okokuqala kwezo ziqithi yaye ngoxa wayeseCuraçao walungiselela iofisi yesebe entsha, uRussell Yeatts waba sisicaka sesebe kuyo. Ebhekisela kwintetho kaMzalwan’ uKnorr eyayisithi “Inkululeko Kubathinjwa,” uMzalwan’ uYeatts wabhala wathi: “Kwaba ngathi uthethe nomntu ngamnye emnika icebiso lobuqu.” Ngowe-1955, uMzalwan’ uKnorr waphinda wafika yaye wanikela intetho kwiHolo yoBukumkani engagqitywanga yaseOranjestad, eAruba. Emva koko waya kwindibano eyayiseCuraçao, ephelekwe liqela labazalwana. Kutyelelo lwakhe lokugqibela ngowe-1962, wanikezela iHolo yoBukumkani yaseBuena Vista, eCuraçao, ibe wabakhuthaza kakhulu abazalwana ngentetho yakhe eyayisexesheni. Wancomela nokwakhiwa kweofisi yesebe entsha, ikhaya labavangeli basemazweni neHolo yoBukumkani, zonke kwindawo yaseOosterbeekstraat, ngaphandle nje kweWillemstad.
Utata walowo waqeshelwa ukuyila iplani yeso sakhiwo wayengumYuda owayekwinkampu yamaNazi namaNgqina kaYehova. Waxelela uHazel Yeatts oku: “Lunye kuphela unqulo lokwenyaniso—lolo lwamaNgqina kaYehova.” Loo ofisi yesebe yanikezelwa ngowe-1964 yaza yandiswa ngowe-1978, ngoncomelo luka-Albert D. Schroeder, umveleli wecandelo. Ngowe-1990 kwacaca ukuba kufuneka isakhiwo esikhulu, yaye kwenziwa imigudu yokufuna indawo entsha yokwakha, kodwa kubuywa nemband’ esikhova.
NgoNovemba 1998, kwagqitywa ekubeni kuthengwe isakhiwo size siguqulwe senziwe izakhiwo zesebe. Abazalwana bavumelana ngesakhiwo esikwindawo efanelekileyo kwisitrato ekuthiwa yiSeroe Loraweg, ngaphandle nje kweWillemstad. NgoDisemba 4, sathengwa. Indlela ezenzeka lula nangokukhawuleza ngayo zonke izinto yaqinisekisa abazalwana ukuba uYehova uyawusikelela loo mgudu, ngokuvisisana neNdumiso 127:1. Ezo zakhiwo zihlaziyiweyo zinomtsalane, zintle yaye zizisa isidima nozuko kwigama likaYehova.
NgoNovemba 20, 1999 kwanikezelwa elo sebe litsha kwiintendelezo zelo sebe, ibe babengama-273 abantu ababekho. UGerrit Lösch weQumrhu Elilawulayo wacaphula amazwi omprofeti uIsaya ukubonisa indlela ezaziza kusetyenziswa ngayo ezo zakhiwo zitsha ukuphumeza injongo kaYehova ebalulekileyo. Kusuku olulandelayo, baba ngama-2 588 ababekho kucwangciso olukhethekileyo kwibala lemidlalo, ibe kwabaninzi oko kwaba yeyona mbalasane yonyaka wenkonzo wama-2000.
Unomathotholo Ugubungela Umbandela Wegazi
AmaNgqina kaYehova ayabuxabisa ubomi yaye abugqala njengesipho esivela kuThixo. Ngokuvisisana neZenzo 15:29, ayakhwebuka egazini. Ukwala kwawo utofelo-gazi okusekelwe eBhayibhileni bekusoloko kungaqondwa kakuhle ngoogqirha nabasemagunyeni. Ngowe-1983 ijaji yaseCuraçao, yala ukuhlonela igunya labazali abalinikwe nguThixo uEsmond noVivian Gibbs yaza yayalela ukuba usana lwabo lutofelwe igazi. Loo mbandela wasasazwa ngokubanzi ezindabeni, yaye kwavuka inkcaso engakumbi ebantwini. Ukuze silungise oko esinye isikhululo sikanomathotholo salungiselela usasazo lweeyure ezintathu, ibe kolo cwangciso kwakukho abantu abasixhenxe—kuquka uHubert Margarita nomfazi wakhe, uLena, kunye noRobertus Berkers, umveleli wesiphaluka. Ngobuchule abazalwana bacacisa umthetho weBhayibhile ngokuphathelele igazi, yaye olo cwangciso lwaphumelela ekupheliseni inkcaso ekhoyo nasekuncedeni abantu baqonde imiyalelo kaYehova.
Bakho noogqirha abalihlonelayo ilungelo lomguli lokukhetha ukungatofelwa igazi. Ngokomzekelo, uGerda Verbist, omnye utitshala, wehlelwa yingozi yenqwelo-mafutha emanyumnyezi yaye kwafuneka atyandwe ngokukhawuleza. Wopha ngokugqithiseleyo kangangokuba igazi lakhe laya kutsho kwiqondo lesibini eliphantsi. Ugqirha wagqiba ekubeni enze utyando oluntlu-mbini ukuze uGerda angaphulukani negazi elingakumbi. Olo tyando lwaphumelela. AmaNgqina kaYehova anombulelo ngoogqirha abanobuchule nokuzinikela okunjalo, abathi maxa wambi kufuneka balwe nesazela sabo baphinde babe nesibindi nengqibelelo yokuhlonela amalungelo abaguli babo abakhetha ukungatofeli gazi.
UGuillermo Rama, usihlalo weKomiti Yokunxibelelana Nezibhedlele eCuraçao, uthi: “Sicelwa rhoqo ukuba sinikele uncedo kwiimeko ezinzima. Ngaphandle kwale komiti, bekuya kubakho iingxaki ezingakumbi.” UAlfredo Muller, usihlalo kweyaseAruba, uyavumelana noko. Uphawula ukuba nangona ekuqaleni abanye oogqirha baseAruba babesala, inkoliso yabo ngoku isebenzisana namaNgqina kaYehova.
Inkonzo Yothando Yabaveleli Besiphaluka
Nangona ulwando lwalucotha ekuqaleni kwezi ziqithi zithathu, kwakusoloko kukho ulwando oluqhubekayo, yaye kwakulula ukuhambisa uncwadi. Ngowe-1964 kwakukho amabandla amane anabavakalisi abangama-379, aza ngowe-1980 loo mabandla anda aya kutsho kwi-16 nabavakalisi abali-1 077. Phakathi kowe-1981 nowama-2000, abavakalisi banda baya kutsho kuma-2 154, yaye ngokongezelelwa kwamabandla amabini esiDatshi namabini eSpanish, inani lawo lakhula laya kutsho kuma-29, yaye ngabantu abangama-6 176 ababakho eSikhumbuzweni.
Ukuze kuncedwe amaqela eelwimi ezahlukeneyo, kwakufuneka abaveleli besiphaluka abaza kukwazi ukuthetha ubuncinane iilwimi ezintathu, yaye akusoloko kulula ukufumana abazalwana abanjalo. Noko ke, iziqithi iABC ziye zasikelelwa ngabaveleli abahambahambayo, njengoPawulos, abakholiswayo kukunikela imiphefumlo yabo. (1 Tes. 2:8) Abo babekulo msebenzi nguHumphrey noLudmila Hermanus, ngoku abangabavangeli basemazweni eSuriname, noEdsel noClaudette Margarita, oovulindlela balapho. Oovulindlela baseAruba uFrankie noMaria Herms nabo bakhonza kumsebenzi wesiphaluka de babizelwa eBheteli, apho bakhonza khona ngoku njengenxalenye yeqela labaguquleli.
Ngowe-1997, uMarc noEdith Millen, ababekade bekumsebenzi wesiphaluka eBelgium, bashiya ikhaya baya kude kangako ukuze bomeleze abazalwana. Njengabo bonke abavangeli basemazweni abatsha, abakwaMillen kwafuneka bafunde ulwimi, ucelomngeni oluthi maxa wambi lube nemiphumo ehlekisayo. UMzalwan’ uMillen ukhumbula ukuba wayezama ukuthi umKristu akafanele abe njengejoni elizimela emseleni (buracu) yaye endaweni yoko wathi, angabi njengejoni elizimela edonkini (buricu)! Phezu kwalo nje olo celomngeni, uMarc noEdith banyamezela. Ekubeni bada balwazi kakuhle olo lwimi, ngoku bakhonza ngovuyo kumabandla esiDatshi nesiPapiamento. Ngowama-2000, uPaul noMarsha Johnson baba sisibini sokuqala ukuba kwilungiselelo elitsha lokuba umveleli wesiphaluka wasePuerto Rico akhonze amabandla esiNgesi neSpanish akwezo ziqithi.
IiHolo ZoBukumkani Ezakhiwa Ngesiquphe
Ngowe-1985, kwafika abazalwana abangama-294 bevela eUnited States, besusela kwiindawo ezikude njengeAlaska, beze kwakha iHolo yoBukumkani ePannekoek, eCuraçao. Yakuba igqityiwe emva kweentsuku ezisithoba, loo holo intsha yaba ngundaba-mlonyeni yaye yanikela ubungqina obubalaseleyo kunye nobungqina bokuba nothando nobunye. Abantu babemangalisiwe kukubona amadoda, abafazi nabantwana bezimisele ekuncedeni loo matsha-ntliziyo aseUnited States. URamiro Muller uthi: “Njengesiqhelo, zazibakho iingxaki ezintsonkothileyo; kodwa sazoyisa, yaye umoya kaYehova wasebenza ngamandla ekwakhiweni kwaloo holo. Ngokuhlwa ngeCawa abazalwana banqula uYehova kwiholo entsha, nto leyo eyabashiya bethe khamnqa abo babengakholelwa besithi akunakwenzeka oko.”
Kubonakala ukuba ukuphunyezwa koko kwamangalisa nomfundisi walapho, kuba ngenye imini emva kwengxelo kamabonwakude, kwemisa inqwelo-mafutha phambi kwaloo holo. Ngubani owaphuma apho? Okothusayo kukuba yayingubhishophu waseCuraçao ephelekwe ngabefundisi abathathu, loo miwunduzo yabo imhlophe yayiphephezela emoyeni, behlunguzela iintloko kucaca ukuba bamangalisiwe yaye abakukholelwa oko.
Besiya kuphelelwa lixesha ukuba bekuya kufuneka sichaze zonke izenzo zokungazingci zabazalwana: zabavangeli basemazweni bokuqala abafana nabakwaVan Eyk, abakwaHoornveld, abakwaPhelps, noCor Teunissen, abashiya amakhaya abo baya kukhonza abazalwana apho; ooPedro Girigorie, owayengakwazi ukufunda nokubhala kodwa walathisela abaninzi enyanisweni; ooTheodore “Tall Boy” Richardson, ababelatyuza kwezo zitrato zaseCher Asile besenza amatyelelo okubuyela angapheliyo; oovulindlela abanenzondelelo uMaria Selassa, uEdna Arvasio, uIsenia “Chena” Manuel, noVeronica Wall; uSeferita Dolorita, ohlala echwayitile, owayengaboni yaye enezifo zezihlunu, ubuchopho nomnqonqo, kodwa abe enyamezele ekushumayeleni yaye ongazange ayeke ukukhuthaza abo baze kukhuthaza yena. Imifanekiso yaba bantu bathembekileyo neyabanye, abazinikela ngokupheleleyo, izotyiwe kwiingqondo neentliziyo zabazalwana abakwezo ziqithi iABC.
Intlango Iyatyatyamba
Kweyee-1980, ezoqoqosho zazihamba kakuhle eAruba. Iihotele zodidi zazithe rhwelele kuloo manxweme amhlophe okuzonwabisa, kuthe thaa iindawo zokungcakaza eziqaqambileyo ukurhwebesha izinhanha zehlabathi. Ngokuqinisekileyo, oku kuye kwanempembelelo kwiingqondo zabantu balapho, njengoko ukuthand’ izinto eziphathekayo kuye kwagabadela kuchaphazela abaninzi—nkqu nabathile emabandleni. Noko ke, kukho impumelelo engakumbi yokomoya, ngokukodwa kwintsimi yeSpanish, nentswelo engxamisekileyo yabazalwana abafanelekayo bokukhokela.
Kwelinye icala, eCuraçao zidodobala ngokugqithiseleyo ezoqoqosho, yaye abantu abaninzi bafudukela eNetherlands. Oku kufuduka kwabazalwana, kuye kwawachaphazela amabandla, ngoko eCuraçao naseBonaire, luye lwaba luncinane ulwando kule minyaka imbalwa idluleyo.
Noko ke, njengoko sityhalela phambili kule nkulungwane yama-21, sinesizathu sokuphakamisa iintloko zethu size sivuye. UBukumkani bukaThixo obuzukileyo sele busemnyango yaye abantu bakaThixo bayaqhubeka befundisa inyaniso kubo bonke abo ‘banotyekelo olufanelekileyo.’ (IZe. 13:48) Loo ndawo yayisakuba ngumqwebedu, intlango yokomoya iye yafumana amanzi enyaniso.
[Ibhokisi/Imifanekiso ekwiphepha 72]
Amakholwase (iiFlamingo) Needonki
KwiBonaire, engonakaliswanga nto, ityuwa eninzi ephuma elwandle yeyona mveliso ibalulekileyo eza nengeniso kubemi beso siqithi. Amakholwase adla ukutya okunetyuwa eninzi. Oku kutya kuhlala kukho kwiimfumba zetyuwa yeso siqithi, nto leyo eyenza iBonaire ibe yenye yeendawo ezimbalwa ehlabathini ezifanelekileyo ukuzalela ezi ntaka zinemibala eqaqambileyo. Iidonki ezazisakuba zezasekhaya, ezathunyelwa apho ukuze ziye kusebenza kuloo tyuwa ekuqaleni, zayekwa nje zazibonela ukufika koomatshini endaweni yazo. Ngoku zizula kumaphandle elo lizwe. Ukuze zilondolozwe, kuye kwakho indawo yokuzikhusela nenkqubo yokuzinyamekela kweso siqithi.
[Ibhokisi/Umfanekiso okwiphepha 87]
IBhulorho IPontoon Neegable ZaseCuraçao
Isixeko esilikomkhulu laseCuraçao iWillemstad, yidolophu entle enemifanekiso ethi ndijonge. Ezo zakhiwo zayo zinophahla oluyigable, zifana nezaseAmsterdam kodwa zipeyintwe ngemibala eqaqambileyo. UNxweme iSt. Anna lunqumla embindini waloo dolophu. Ezo nxalenye zaloo dolophu zombini zidityaniswa yiBhulorho iQueen Emma Pontoon yaye inokuvulwa ngethutyana nje elincinane ukuze kuvulelwe iinqanawa ezinkulu zingene kwizibuko elinzulu. Ekuqaleni, kwakuhlawuliswa imali ukuze unqumle kuloo bhulorho ngaphandle kokuba loo mntu ubetha ngezikaTshiwo, nto leyo eyayibonisa ubuhlwempu. Oko kwabangela amahlwempu aboleke izihlangu ukuze angagqalwa njengamahlwempu zaza zona izityebi zazifihla izihlangu zazo ukuze zingahlawuliswa xa zinqumla apho!
[Ibhokisi ekwiphepha 93]
Ngaba Ufanele Ubulise Umfundisi Kuqala?
“Umfundisi uxabiseke ngeyona ndlela kangangokuba ukuba sinokudibana nomfundisi ehamba nengelosi, besiya kubulisa umfundisi kuqala.”—Iguqulelwe ngokusuka kwiCatholic weekly La Union, August 10, 1951, epapashwe eCuraçao.
[Ibhokisi/Umfanekiso okwiphepha 95]
Ukubaluleka Kokuba Negama Elihle
NgoSeptemba 1986, uRussell Yeatts wathabatha ipasile eyayivela eJamaica, ithunyelwe kwidilesi yeWatch Tower Bible and Tract Society. Xa wayeyivula phambi kwamagosa ahlola impahla eza ngeposi, wothuswa kukufumanisa ukuba ngaphantsi kwamaphephancwadi kwakukho ipasile yeekhilogram ezine zomya! Amapolisa akazange aphozise maseko ukumbamba. Noko ke, wathethelelwa ngumphathi omkhulu weposi waseCuraçao, owathi kwakungenakwenzeka ukuba uMzalwan’ uYeatts abandakanyeke kwiziyobisi ezingekho semthethweni. Ukuba loo mphathi wayengazange abethe ngenqindi phantsi emthethelela, uMzalwan’ uYeatts ngewayevalelwe entolongweni. Ngenxa yoko, wakhululwa kwangoko. Eso siganeko sachazwa ngokubanzi kumaphephancwadi alapho, elinye lawo lambiza uMzalwan’ uYeatts ngokuthi “indoda enesidima nenyanisekileyo” yaye “enomdla ongathethekiyo ekushumayeleni iindaba ezilungileyo kubantu bonke.” La mava abalaselisa ukubaluleka kokuba negama elihle.
[Ibhokisi/Umfanekiso okwiphepha 96]
Imbalasane Engaqhelekanga Kumsebenzi WoBukumkani
Minyaka le kuhanjiswa imibhalo emininzi kakhulu yencwadana ethi Ukuhlolisisa IZibhalo Imihla Ngemihla. Kwiminyaka ethile, oovulindlela baye bakwazi ukuhambisa amakhulu ayo. UGiselle Heide wayelaliswe esibhedlele, ngoko wasebenzisa elo thuba ekunikeleni ubungqina obungacwangciswanga kwabanye abaguli. UNinoska, omnye wabo wasabela kakuhle, wabuza uGiselle enoba wayenayo na “incwadi encinane.” Ekuqaleni uGiselle wayengazi ukuba yiyiphi loo ncwadi wayethetha ngayo kodwa ekugqibeleni waqonda ukuba Kukuhlolisisa IZibhalo Imihla Ngemihla. Ukususela ngoko, rhoqo kusasa babexubusha itekisi yosuku. Emva kokuba bephumile esibhedlele, kwenziwa amalungiselelo okufundisisa naye iBhayibhile. Kwixesha elingaphantsi konyaka, uNinoska wabhaptizwa. Ngoku, umyeni nabantwana bakhe bafunda iBhayibhile namaNgqina.
[Umfanekiso]
“Ukuhlolisisa IZibhalo Imihla Ngemihla” ngesiDatshi, isiNgesi, nangesiPapiamento
[Ibhokisi ekwiphepha 104]
‘Ukuba Nenzondelelo KuThixo; Kodwa Kungekhona Ngokolwazi Oluchanileyo’
Ngenye intsasa ngoxa babekwinkonzo yasentsimini, uHubert Margarita noMorena van Heydoorn badibana noMorella, intombazana ehamba isikolo. Indlela awayethetha ngayo uMorella yabonisa ukuba ‘wayenenzondelelo kuThixo; kodwa kungekhona ngokolwazi oluchanileyo.’ (Roma 10:2) Wabacacisela ukuba ufumana imiyalelo yemihla ngemihla kwincwadi yokholo yamaRoma Katolika ibe wayeqinisekile ukuba leyo yindlela yokunqula uThixo. UHubert noMorena balungiselela ukufunda naye iBhayibhile. La ngamalungiselelo awayeza kwenziwa: Wayeza kuya kumhlohli wakhe, umfundisi, ukuze aqinisekise oko wayekufunda. Ukuba akavumelani naloo mfundiso, kwakufuneka achaze izizathu zeZibhalo zoko. Ukuba uvakalelwa kukuba oko amfundisa kona amaNgqina akuvisisani neBhayibhile, wayeza kuyeka ukufunda. Kungekudala uMorella wafumanisa ukuba iimfundiso zeCawa yamaKatolika azikho zibhalweni. Xa waqonda ukuba umfundisi iya imphatha kakubi loo mibuzo yakhe, wayeka ukuya kwiiklasi zakhe. UMorella waqhubeka efunda inyaniso, wabhaptizwa yaye ngoku ukhonza uYehova ngokuthembeka.
[Ibhokisi/Umfanekiso okwiphepha 107]
Isanti Nelitye LaseAruba
Iimfumba ezinkulu zamatye aseCasibari naseAjo zezona zinto zibalaseleyo xa ucinga ngokuma komhlaba waseAruba. Enye into entle ngokumangalisayo yimiqolomba ezalise loo matye ngemizobo, ekukholelwa ukuba yenziwa ngamaIndiya angamaDabajuro. Imozulu esoloko inelanga elifudumeleyo, amanxweme okuzonwabisa amade nesanti emhlophe atsala amawaka abakhenkethi ababuyela minyaka le kweso siqithi.
[Ibhokisi ekwiphepha 72]
“Emlonyeni Weentsana”
UYesu wathi: “Emlonyeni weentsana nabanyayo ulungiselele indumiso.” (Mat. 21:16) Oku kunjalo nangabantwana beziqithi iABC. UMaurice oneminyaka eli-15 ubudala uhlala eAruba. Xa uMaurice wayeneminyaka esixhenxe ubudala, walahlekana nomama wakhe kwindibano yesithili. Enexhala, unina wamfuna waza ekugqibeleni wamfumana kwigumbi elingasemva apho kwakukho intlanganiso yabo bafuna ukuya eBheteli. UMaurice wayefuna ukufaka isicelo saseBheteli. Engafuni kumdimaza, usihlalo waloo ntlanganiso wamvumela ukuba ahlale. Enyanisweni, umnqweno osuk’ entliziyweni kaMaurice wokukhonza uYehova eBheteli awukapheli. Wabhaptizwa xa wayeneminyaka eli-13 ubudala yaye uyazibhokoxa ebandleni, ezilungiselela kakuhle zonke izabelo zakhe. Uzimisele nangakumbi ukukhonza eBheteli.
EBonaire, eneminyaka emithandathu uRenzo wamenyelwa kwiHolo yoBukumkani yaye wakunandipha gqitha oko. Kwaqaliswa isifundo seBhayibhile naye, yaye ukususela ngoko wala ukuya kwicawa yamaKatolika. Wabuza abazali bakhe isizathu sokuba ecaweni bengafundiswa ngeParadesi, ibe oko kwavusa umdla wabo. Baqalisa ukufunda namaNgqina kaYehova. Ngenxa yoko, utata kaRenzo nonina babhaptizwa, kuquka esinye sezifundo zeBhayibhile zikaRenzo. URenzo, ngoku oneminyaka esibhozo ubudala, wabhaptizwa kwindibano yesiphaluka eBonaire.
[Ibhokisi/Umfanekiso okwiphepha 115]
Isityu SeIguana Ngaba Sesomntu Wonke?
Ii-iguana, ezifana nezi zikulo mfanekiso ungezantsi, zixhaphakile kuzo zonke ezo ziqithi iABC. Ezi zirhubuluzi zixatyiswa gqitha kodwa kungekhona ukufuywa. I-iguana sesona sinongo siphambili kwiisuphu nezityu. Omnye umpheki walapho uthi: “Inencasa efana neyenkuku. Inyama yayo ithambe gqitha yaye imnandi.”
[Iimaphu ezikwiphepha 71]
(Ukuba ufuna inkcazelo ehlahlelwe kakuhle, yiya kwimpapasho)
HAITI
CARIBBEAN SEA
VENEZUELA
ARUBA
ORANJESTAD
San Nicolas
CURAÇAO
WILLEMSTAD
Santa Cruz
Buena Vista
BONAIRE
Kralendijk
[Umfanekiso ozalise iphepha, kwiphepha 66]
[Umfanekiso okwiphepha 68]
Abantu beentlanga ezahlukeneyo basebenza kunye ngoxolo kwiBandla laseHooiberg, eAruba
[Umfanekiso okwiphepha 70]
UPearl Marlin wayethengisa uncwadi lonqulo noyise. Kamva waba liNgqina
[Umfanekiso okwiphepha 73]
Ibandla lokuqala lesiNgesi eSan Nicolas, eAruba
[Imifanekiso ekwiphepha 74]
Abanye abafudukela eAruba: (1) uMartha Faustin namhlanje, (2) umyeni wakhe, uHamilton, owafayo, (3) kwanoRobert noFaustina Titre
[Umfanekiso okwiphepha 75]
UWoodworth no-Oris Mills ngomhla womtshato wabo
[Umfanekiso okwiphepha 76]
UEdwina Stroop, uvulindlela waseAruba
[Umfanekiso okwiphepha 77]
UJacobo Reina wafumana umbhalo wencwadi ethi “Creation” ngowe-1928 waza wawuqonda owona mongo wenyaniso
[Umfanekiso okwiphepha 78]
Ukusuka ekhohlo ukusa ekunene: uRussell noHazel Yeatts abaphumelela kwiklasi yesi-6 yaseGiliyadi, noMary noWilliam Yeatts, abaphumelela kwiklasi ye-14
[Umfanekiso okwiphepha 79]
Kude ngasekhohlo uHenricus Hassell, wayengumvakalisi onenzondelelo weendaba ezilungileyo
[Umfanekiso okwiphepha 79]
UCamilio Girigoria waba ngowokuqala kubantu balapho ukubhaptizwa ngowe-1950
[Umfanekiso okwiphepha 80]
UAlice noHenry Tweed bakhunjulwa kakuhle ngomoya wabo wokungazingci nenzondelelo
[Umfanekiso okwiphepha 81]
UGabriel Henriquez wanikwa isipho somrhumo “kaVukani!” Waba ngummi wokuqala waseAruba ukubhaptizwa
[Imifanekiso ekwiphepha 82]
UNinita Webb ekuqaleni wayichasa inyaniso. Yena nomyeni wakhe, uDaniel baba ngabavakalisi abanenzondelelo boBukumkani
[Umfanekiso okwiphepha 82]
UMaria Rasmijn wayengumKatolika ozinikeleyo de waxelelwa ngumfundisi wakhe ukuba imifanekiso yonqulo ayibalulekanga
[Umfanekiso okwiphepha 83]
UAlbert Suhr washiya ngasemva “iincwadi zoncomelo” ezibalaseleyo
[Umfanekiso okwiphepha 84]
UOlive Rogers wanceda abaninzi bahlulela ubomi babo kuYehova
[Umfanekiso okwiphepha 85]
Phezulu: UEugene Richardson, wabhaptizwa eneminyaka eli-17, wakhonza njengovulindlela onenzondelelo
[Umfanekiso okwiphepha 85]
Ngezantsi: UClinton Williams oselula wamthelela ekuqaliseni umsebenzi “ekunuku”
[Umfanekiso okwiphepha 86]
Ikhaya labavangeli basemazweni eAruba malunga nowe-1956
[Umfanekiso okwiphepha 89]
Ngasentla: Ngowe-1962, uNathan H. Knorr ovela kwiBheteli yaseBrooklyn wanikezela le Holo yoBukumkani, eyokuqala yabazalwana eCuraçao
[Umfanekiso okwiphepha 89]
Ngasekunene: UVictor Manuel, obe ngumvakalisi weendaba ezilungileyo phantse iminyaka engama-50, ekhonza kwibandla lesibini lesiPapiamento
[Umfanekiso okwiphepha 90]
Ngasentla: INdibano Yezizwe Ngezizwe ‘Yoxolo Lomhlaba’ ngowe-1969, eAtlanta, eGeorgia, eUnited States
[Umfanekiso okwiphepha 90]
Ngasekunene: Indawo yendibano yaseCuraçao kucwangciso olufanayo
[Umfanekiso okwiphepha 94]
UPetra Selassa (ngasekunene) nentombi yakhe, uIngrid, oovulindlela abakhethekileyo abathunyelwa eBonaire ukuba baye kunceda ngowe-1969
[Umfanekiso okwiphepha 97]
“IMboniselo” ngesiPapiamento
[Umfanekiso okwiphepha 98]
Phezulu: UPauline noJohn Fry
[Umfanekiso okwiphepha 98]
Ngezantsi: UAge van Dalfsen wafika ngowe-1964 emva kokuphumelela kwiklasi yama-39 yaseGiliyadi
[Imifanekiso ekwiphepha 99]
Ngasentla: UJanine Conception noRaymond Pietersz bayinxalenye yeqela labaguquleli abasithoba
[Umfanekiso okwiphepha 99]
Ngasekunene: UEstrelita Liket usebenza ngekhompyutha neenkqubo zeMEPS, izixhobo ezixabisekileyo ekuncedeni abaguquleli
[Umfanekiso okwiphepha 100]
URobertus noGail Berkers, (ngasekhohlo), xa babekhonza kumsebenzi wesiphaluka, baphembelela ihlombe elikhulu ngobulungiseleli bexesha elizeleyo
[Umfanekiso okwiphepha 100]
UJulie noAge van Dalfsen, (ngezantsi), babuyela eCuraçao ngowe-1992 yaye bamenyelwa eBheteli ngowama-2000
[Umfanekiso okwiphepha 100]
UAge van Dalfsen, uClinton Williams noGregory Duhon bakhonza kwiKomiti yeSebe
[Umfanekiso okwiphepha 102]
UBlanche noHans van Heydoorn baye banceda abantu abangama-65 ukusa kwinqanaba lokwahlulela ubomi babo kuYehova
[Umfanekiso okwiphepha 108]
(1) Iofisi yesebe yanikezelwa ngowe-1964
[Imifanekiso ekwiphepha 108]
(2, 3) Isebe elikhoyo ngoku, lanikezelwa ngoNovemba 20, 1999
[Imifanekiso ekwiphepha 112]
Iziqithi iABC ziye zasikelelwa ngezibini kumsebenzi wokuhambahamba, njengezi, (ngasentla) uLudmila noHumphrey Hermanus, (ekhohlo ukusa ekunene) uPaul noMarsha Johnson kunye noEdith noMarc Millen
[Imifanekiso ekwiphepha 114]
Abavangeli basemazweni bokuqala: (1) abakwaVan Eyk, (2) abakwaHoornveld, (3) noCor Teunissen bashiya amakhaya abo baya kukhonza abazalwana apho