IUkraine

UYesu wenza umzekeliso ngembewu etyalwe kumhlaba omhle, echaza abo baba noxabiso olunzulu ngeLizwi likaThixo. ‘Bathwala isiqhamo ngonyamezelo’ ngokuqhubeka bevakalisa isigidimi sikaThixo ngokuthembeka phezu kwabo nje ubunzima nokubandezeleka. (Luka 8:11, 13, 15) Zimbalwa kulo mhlaba iindawo okuye kwangqineka kuyinyaniso ngayo oku njengaseUkraine, apho kuthe phezu kwayo nje iminyaka engaphezu kwama-50 yokuvalw’ umlomo nentshutshiso eqatha, amaNgqina kaYehova aqhubeka ekho yaye esanda.

Ebudeni bonyaka wenkonzo wama-2001, kweli lizwe kuye kwakho incopho yabavakalisi abangama-120 028. Abangaphezu kwama-56 000 kwaba baye bafunda inyaniso yeBhayibhile kule minyaka mihlanu idluleyo. Kule minyaka mibini idluleyo, abazalwana baye bahambisa amaphephancwadi angaphezu kwezigidi ezingama-50, nani elo elilingana nabemi belo lizwe. Ngokomlinganiselo, nyanga nganye iofisi yesebe lalapho ifumana iileta eziliwaka ezivela kubantu abanomdla abafuna inkcazelo engakumbi. Ngaphambili konke oku bekuya kuba nzima ukuba kwenzeke. Olunjani uloyiso lonqulo olunyulu!

Ngaphambi kokuba sinikel’ ingqalelo kwimbali yaseUkraine, makhe siqwalasele elo lizwe ngokwalo. Ngaphandle komhlaba wokomfuziselo awabhekisela kuwo uYesu, iUkraine inomhlaba wokoqobo obalaseleyo. Phantse isiqingatha selo lizwe sigutyungelwe ngumhlaba otyebileyo, omnyama, ogqunywe yingca, obizwa ngokuba yichornozem ngabemi baseUkraine, gama elo elithetha “umhlaba omnyama.” Lo mhlaba, kunye nemozulu yalapho epholileyo, zenza iUkraine ibe lelinye lawona mazwe aneemveliso zolimo aphambili ehlabathini, avelisa isugar beets, ingqolowa, irhasi, umbona, nezinye izilimo. Kwamandulo iUkraine ibisaziwa njengeyona ngingqi ivelisa ukutya okuziinkozo kwaseYurophu.

Ekubeni inomlinganiselo weekhilomitha ezili-1 300 ukusuka empuma ukusa entshona neekhilomitha ezingama-900 ukusuka emantla ukusa emazantsi, iUkraine inkulu kancinane kuneFransi. Njengoko unokubona kwimaphu ekwiphepha 123, eli lizwe limi kwiMpuma Yurophu, kumantla oLwandle Olumnyama. UMntla Ukraine uthe rhwelele ngamahlathi. Emazantsi kuthe thande amathafa achumileyo ahamba aye kuthi xhaxhe phantsi kweeNtaba zeCrimea ezintle. Ngasentshona, kukho iinduli ezidwelileyo ukuya kutsho kwithambeka leeNtaba zeCarpathia, apho kuhlala amabhere ekuthiwa ziilynx, neebison.

EUkraine kuhlala abantu abamalunga nezigidi ezingama-50. Bathobekile, babuk’ iindwendwe, ibe basebenza nzima. Abaninzi bathetha isiUkraine nesiRashiya. Xa umenywe kumakhaya abo, ngokuqhelekileyo uphiwa iborscht (isuphu eyenziwe ngebeet) kunye nevarenyky (isonka samanzi). Emva kweso sidlo simnandi, usenokonwatyiswa ngomculo walapho, ekubeni inkoliso yabantu baseUkraine ikuthanda ukucula nokudlala izixhobo zomculo.

Abantu baseUkraine baqhelene neenkolelo zonqulo ezahlukahlukeneyo. Kwinkulungwane yeshumi, kwafika unqulo lobuOrthodoki baseMpuma apho. Kamva uBukhosi bukaOttoman beza nobuSilamsi kumzantsi Ukraine. Kwakhona, izidwangube zasePoland zasasaza ubuKatolika ebudeni bamaXesha Aphakathi. Kwinkulungwane yama-20, abaninzi bayeka ukubukholelwa ubukho bukaThixo ngaphantsi kolawulo lobuKomanisi.

AmaNgqina kaYehova afumaneka kulo lonke elo lizwe. Noko ke, ngaphambi kweMfazwe Yehlabathi II, inkoliso yawo yayihlala kwintshona Ukraine, eyayahlulahlulwe yaziingingqi ezine: iVolyn’, iHalychyna, iTranscarpathia neBukovina.

Ukuhlwayelwa Kwembewu Yenyaniso EUkraine

ABafundi beBhayibhile, njengoko amaNgqina kaYehova ayesaziwa njalo ngaphambili, bebesoloko bekho eUkraine ngaphezu kwenkulungwane. Ngowe-1891, kutyelelo lwakhe lokuqala lwamazwe amaninzi, uC. T. Russell, owayenguMfundi weBhayibhile ophambili, watyelela amazwe amaninzi aseYurophu nakuMbindi Mpuma. Xa wayesiya kuloo ndawo kwakusithiwa ngoko yiConstantinople, iTurkey, watyelela eOdessa kumazantsi eUkraine. Kamva, ngowe-1911, wanikela ungcelele lweentetho zeBhayibhile kwizixeko ezikhulu zaseYurophu, kuquka isixeko saseLvov kwintshona Ukraine.

Ehamba ngololiwe, uMzalwan’ uRussell wafika eLvov, apho kwakuqeshwe iholo enkulu eyaziwa njengePeople’s House eza kunikela intetho yakhe eyayilungiselelwe umhla kaMatshi 24. Kwenziwa izibhengezo ezisithoba kumaphephandaba alapho asixhenxe kwabhalwa namaxwebhu amakhulu emema bonke abantu ukuba beze kuphulaphula intetho eyayisithi, “Zionism in Prophecy” eyayiza kunikelwa sisithethi “esaziwayo nesibekekileyo saseNew York”—uPastor Russell. Kwakucetywe ukuba uMzalwan’ uRussell anikele loo ntetho izihlandlo ezibini ngaloo mini. Noko ke, urabhi othile wamaYuda waseUnited States owayewuchasa ngokukrakra umsebenzi kaRussell wathumela isigidimi ngocingo kwizinxulumani zakhe eziseLvov, ebabeka amabala aBafundi beBhayibhile. Oko kwenza abanye bazama ukuthintela uRussell angathethi.

Nangona yayiphuphuma ngabantu emva kwemini nangokuhlwa loo holo, babekho abachasi. Iphephandaba lalapho iWiek Nowy, lanikela le ngxelo: “Kwanele nje ukuba itoliki [kaRussell] ivule umlomo, amaZiyon aqalisa ukungxola waza loo mvangeli wasemazweni akakwazi ukuthetha ngenxa yokunkqangaza nokuntyontyela amakhwelo. UPastor Russell kuye kwafuneka alishiye iqonga. . . . Olo qhankqalazo luye lwaba nochatha kwintetho yentsimbi yesibhozo ngaloo ngokuhlwa.”

Noko ke, abaninzi babefuna ukuva oko kwakuza kuthethwa nguMzalwan’ uRussell. Babenomdla kwisigidimi sakhe baza bacela uncwadi lweBhayibhile. Kamva, uMzalwan’ uRussell wagqabaza ngolo tyelelo lwakhe lwaseLvov. Wathi: “NguThixo kuphela owaziyo ukuba kuyintoni ukuthanda kwakhe ngokuphathelele ezi ziganeko. . . . Ukuxokozela [kwamaYuda] ngenxa yoku kunokwenza abanye baphande nzulu kunokuba bebeya kwenza xa bebephulaphule nje kwimeko ezolileyo nelungeleleneyo.” Nakuba kungazange kubekho ntsabelo kwangoko kweso sigidimi, imbewu yenyaniso yayihlwayelwe, ibe kamva kwasekwa amaqela amaninzi aBafundi beBhayibhile, kungekuphela nje eLvov kodwa nakweminye imimandla yaseUkraine.

Ngowe-1912 iofisi yaBafundi beBhayibhile yaseJamani yapapasha isibhengezo esikhulu kwikhalenda eyayipapashwa eUkraine. Eso sibhengezo sasikhuthaza ukufundwa kwemiqulu yesiJamani yeStudies in the Scriptures. Ngenxa yoko, iofisi yaseJamani yafumana iileta ezimalunga nama-50 zabantu baseUkraine becela iStudies in the Scriptures nemirhumo yeMboniselo. Loo ofisi yagcina unxibelelwano nabo babenomdla de kwavela imfazwe ngowe-1914.

Emva kweMfazwe Yehlabathi I, iUkraine yohlulwa yaphantsi kwamazwe amane angabamelwane. Imimandla ekumbindi nakwimpuma Ukraine yathatyathwa yiRashiya yamaKomanisi yaba kwiSoviet Union. Intshona Ukraine yohlulwa yaphantsi kwamanye amazwe amathathu. Imimandla yaseHalychyna neyaseVolyn’ yawela kwiPoland, iBukovina yawela kwiRomania, yaza iTranscarpathia yawela eCzechoslovakia. La mazwe mathathu avumela umlinganiselo othile wenkululeko yonqulo yaye abavumela aBafundi beBhayibhile baqhubeka nokushumayela. Ngaloo ndlela, imbewu eninzi yenyaniso eyayiza kuthwala isiqhamo kamva, yaqala yahlwayelwa kwintshona Ukraine.

Ukuntshula Kweyokuqala

Ebutsheni benkulungwane yama-20, iintsapho ezininzi zaseUkraine zaya eUnited States zikhangela iindlela ezibhetele zokuphila. Ezinye zafunda iimpapasho zethu ezisekelwe eBhayibhileni zaza zazithumela kwizihlobo zazo eUkraine. Ezinye zaqhelana neemfundiso zaBafundi beBhayibhile, zabuyela emakhaya, zaza zaqalisa ukushumayela kwiindawo zazo zokuzalwa. Kwavuka amaqela amaninzi aBafundi beBhayibhile aza kamva akhula aba ngamabandla. Ekuqaleni kweyee-1920, imbewu yenyaniso yahlwayelwa eHalychyna naseVolyn’ ngaBafundi beBhayibhile basePoland. Ngelo xesha, abazalwana baseRomania nabaseMoldavia (ngoku eyiMoldova) beza nenyaniso kwingingqi yaseBukovina.

Oku kwabeka isiseko esihle sokukhula okungakumbi. IMboniselo kaDisemba 15, 1921, yanikela le ngxelo: “Kutshanje abazalwana bethu baye batyelela [eBukovina] . . . Ngenxa yolo tyelelo lwabo lweeveki ezimbalwa apho kuye kwasekwa iiklasi ezisixhenxe ibe ngoku kufundwa imiqulu ‘neTabernacle Shadows’. Enye yezi klasi inamalungu amalunga nama-70.” Ngowe-1922 kwidolophana yaseKolinkivtsi, eBukovina, uStepan Koltsa wamkela inyaniso, wabhaptizwa waza waqalisa ukushumayela. Ngokolwazi lwethu, waba ngumzalwana wokuqala ukubhaptizwa eUkraine. Kamva wathelelwa ziintsapho ezilishumi. Kwabakho ulwando olufanayo nakummandla waseTranscarpathia. Ngowe-1925 kwakukho aBafundi beBhayibhile abamalunga ne-100 kwidolophana yaseVelyki Luchky nakwezinye ezimelene nayo. Emva koko, izicaka zokuqala zexesha elizeleyo zaqalisa ukushumayela eTranscarpathia, ziqhuba iintlanganiso kumakhaya aBafundi beBhayibhile. Kwabhaptizwa abantu abaninzi.

UAlexei Davidjuk, obeliNgqina ixesha elide, uchaza indlela abantu abaqhelana ngayo nenyaniso ngelo xesha. Uthi: “Ngowe-1927 ummi wenye idolophana wathabatha enye yeempapasho zethu waya nayo kwidolophana yaseLankove, kummandla waseVolyn’. Emva kokuyifunda, iqela labantu balapho lafuna ukwazi ngeemfundiso zesihogo nomphefumlo. Ekubeni loo ncwadi yayinedilesi yeofisi yaBafundi beBhayibhile yaseLodz, ePoland, babhala ileta becela kuthunyelwe umntu oza kutyelela loo dolophana yabo. Emva kwenyanga kwaya umzalwana apho waza waseka iqela lesifundo seBhayibhile. Ziintsapho ezili-15 ezazibandakanya kwelo qela.”

Ihlombe elinjalo ngenyaniso laliqhelekile kuloo minyaka yokuqala. Khawuqwalasele la mazwi ombulelo enye ileta eyayivela kummandla waseHalychyna isiya kwikomkhulu laBafundi beBhayibhile eBrooklyn: “Iincwadi zenu ziphilisa amanxeba amaninzi abantu bethu yaye zibabonisa ukukhanya. Kodwa ndicela nisithumelele ezinye zezi ncwadi.” Omnye umntu onomdla wabhala wathi: “Ndicela nisithumelele uncwadi kuba alufumaneki apha. Enye indoda kule dolophana yethu iye yafumana iincwadi zenu ezithile, kodwa abamelwane bazohlutha. Ayizange ikwazi nokuzifunda. Ngoku ityelele abo bantu, ifuna ukuba bazibuyisele.”

Loo mdla wokwenene wabangela ukuba kusekwe iofisi yaBafundi beBhayibhile, ePekarska Street eLvov. Loo ofisi yayifumana izicelo ezininzi zoncwadi zaseHalychyna naseVolyn’ ize izithumele rhoqo eBrooklyn ukuze kuphunyezwe oko.

Phakathi kweyee-1920, imbewu yenyaniso yayintshule ngokwenene entshona Ukraine. Kwamiselwa amaqela amaninzi aBafundi beBhayibhile, ibe amanye awo aba ngamabandla kamva. Nangona zimbalwa gqitha iingxelo ezagcinwayo zaloo msebenzi wokuqala, iingxelo ezikhoyo zibonisa ukuba ngowe-1922 babeli-12 abantu ababhiyozela iSikhumbuzo eHalychyna. Ngowe-1924, IMboniselo yanikela ingxelo yokuba ngabantu abangama-49 ababekho eSikhumbuzweni kwidolophu yaseSarata kumazantsi eUkraine. Ngowe-1927, baba ngaphezu kwama-370 ababekho eSikhumbuzweni eTranscarpathia.

Ichaza umsebenzi wamazwe ahlukeneyo ehlabathi, IMboniselo kaDisemba 1, 1925, yapapasha oku: “Kulo nyaka kuye kwathunyelwa umzalwana waseMerika kubemi baseUkraine eYurophu; . . . mninzi umsebenzi omhle owenziwa kubantu baseUkraine abakuloo nxalenye ilawulwa yiPoland. Kuye kwakho imfuneko enkulu neyandayo yoncwadi apho.” Kwiinyanga eziliqela kamva iphephancwadi iGolden Age (ngoku elinguVukani!) lanikela le ngxelo: “EGalicia [Halychyna] kuphela kukho iiklasi [amabandla] ezingamashumi amabini . . . Ezinye zazo . . . ziqhuba iintlanganiso zaphakathi evekini; ezinye zihlanganisana ngeCawa kuphela, ibe ezinye zisalungelelaniswa. Kukho ithemba lokuvelisa iiklasi ezingakumbi; kufuneka nje umntu oza kuthabatha ukhokelo.” Konke oku kwabonisa ukuba ngokwengqiqo yokomoya, umhlaba waseUkraine uchume gqitha.

Ubulungiseleli Basentsimini Bokuqala

UVojtech Chehy, waseTranscarpathia, wabhaptizwa ngowe-1923 waza kamva wangenelela umsebenzi wokushumayela ixesha elizeleyo kummandla waseBerehove. Xa esiya kubulungiseleli wayedla ngokuphatha ibhegi yoncwadi ngesandla, enye ayibophelele ebhayisekileni, aphinde axwaye ingxowa ezele luncwadi emqolo. Ubalisa athi: “Sasabelwe kwintsimi yeedolophana ezingama-24. Sasingabavakalisi abali-15, ibe kwakufuneka sizibhokoxe ukuze sihambise uncwadi kwezo dolophana kabini ngonyaka. Rhoqo ngeCawa ngentsimbi yesine kusasa, sasihlanganisana kwenye yezo dolophana. Ukusuka apho sasihamba ngeenyawo okanye ngebhasi iikhilomitha ezili-15 ukusa kwezingama-20 siye kwiindawo ezingqonge apho. Sasidla ngokuqalisa ubulungiseleli bethu bendlu ngendlu ngeye-8 kusasa sisebenze de kube yeye-2 emva kwemini. Izihlandlo ezininzi sasigoduka ngeenyawo, siye kwiintlanganiso zangokuhlwa kwangolo suku, sonke sivuya sibalisa amava. Sasihamba ngeendlela ezimfutshane sinqumla ematyholweni nasemilanjeni kwimozulu entle nembi, kodwa akukho namnye owakha wakhalaza. Sasivuyiswa kukukhonza nokuzukisa uMdali wethu. Abantu babebona ukuba ngokwenene abazalwana baphila ngokwamaKristu okwenyaniso, bakulungele ukuhamba ngeenyawo iikhilomitha ezingama-40 ukuze baye kwiintlanganiso okanye baye kushumayela.

“Kubulungiseleli bethu sasidibana nabantu abahlukeneyo. Ndakha ndahambisa incwadana ethi UBukumkani, Ekuphela Kwethemba Lehlabathi kwelinye ibhinqa elathi lingathanda ukuyifumana kodwa alinamali yokunikela. Ndandilambile, ngoko ndathi ndinokulinika loo ncwadana ukuba lingandinika iqanda eliphekiweyo. Layifumana loo ncwadana, nam ndatya elo qanda.”

Ngexesha leKrismesi, abantu baseTranscarpathia babengena kwindlu ngendlu, becula ngokuzalwa kukaYesu Kristu. Abazalwana balisebenzisa kakuhle elo siko. Babedla ngokufaka uncwadi ezibhegini zabo baye kumakhaya abantu baze bavume iingoma bevakalisa ukholo lwabo! Abaninzi babezinandipha ezo ngoma. Abazalwana babesoloko bemenywa ezindlwini bacelwe ukuba bacule iingoma ezingakumbi. Maxa wambi babenikwa imali ngoko kucula, baze bona banikele ngoncwadi lweBhayibhile endaweni yayo. Ngoko ke, kumaxesha eKrismesi, iincwadi zaziphela kwiindawo zokothula uncwadi. Loo maphulo okucula ayedla ngokuthabatha iiveki ezimbini, ekubeni amaRoma Katolika namaGrike Katolika ayesiba nemibhiyozo yawo yeKrismesi kwiiveki ezahlukeneyo. Noko ke, ngasekupheleni kweyee-1920 njengoko kwaye kwacaca kuBafundi beBhayibhile ukuba iKrismesi inemvelaphi yobuhedeni, apheliswa loo maphulo okucula. Abazalwana bafumana uvuyo olukhulu kumsebenzi wabo wokushumayela, ibe kwaqhubeka kuvuka amaqela amatsha abavakalisi eTranscarpathia.

Iindibano Zesithili Zokuqala

NgoMeyi 1926 kwaqhutywa indibano yesithili yokuqala yaBafundi beBhayibhile kwidolophana yaseVelyki Luchky kummandla waseTranscarpathia. Baba li-150 ababekho, kwaza kwabhaptizwa abangama-20. Kunyaka olandelayo kwabakho abantu abangama-200 kwindibano yesithili eyayiqhutyelwa kwibala laseUzhgorod, isixeko esilapho kuloo ngingqi. Kungekudala kwalungiselelwa ezinye iindibano zesithili kwiidolophu eziliqela zaseTranscarpathia. Ngowe-1928, kwabakho indibano yesithili yokuqala eLvov. Kamva, kwaqhutywa ezinye iindibano zesithili eHalychyna naseVolyn’.

Ekuqaleni kowe-1932, kwaqhutywa indibano yesithili kwidolophana yaseSolotvyno, eTranscarpathia, kwiyadi yaloo mzi aBafundi beBhayibhile babeqhubela kuwo iintlanganiso zabo ezibakho rhoqo. Phantse babengama-500 ababekho, kuquka abazalwana abathile abaneembopheleleko baseJamani. UMykhailo Tilniak, umdala kwibandla lalapho, ubalisa oku: “Sazinandipha gqitha iintetho ezazilungiselelwe kakuhle zabazalwana ababeze kwindibano yesithili yethu bevela eJamani naseHungary. Ngeenyembezi, basikhuthaza ukuba sihlale sithembekile phantsi kweemvavanyo ezizayo.” Ibe ezo mvavanyo ziqatha zafika xa kwaqalisa iMfazwe Yehlabathi II.

Ngowe-1937 kwaqeshwa uloliwe wonke owayeza kuhamba abo babesiya kwindibano yesithili enkulu yasePrague, eCzechoslovakia. Yaqala kwidolophana yaseSolotvyno yatyhutyha iTranscarpathia, ihamba imisa kwisikhululo ngasinye sikaloliwe ukuze ithabathe ezinye iindwendwe ezazisiya apho. Kwikhareji ngalinye, kwakukho umbhalo ofundeka ngolu hlobo “INdibano YeSithili YamaNgqina KaYehova—EPrague.” Oko kwanikela ubungqina obubalaseleyo kubantu baloo mmandla, ibe abo sele bekhulile basasikhumbula kakuhle eso siganeko nanamhlanje.

Ukwakha Iindawo Zokunqula

Njengoko kwakusekwa amaqela okuqala aBafundi beBhayibhile, kwabakho intswelo yokwakha iindawo zabo zokunqula. Indawo yokuqala yokuhlanganisana yakhiwa kwidolophana yaseDibrova, eTranscarpathia, ngowe-1932. Kamva, kwakhiwa ezinye iiholo ezimbini kwiidolophana ezingabamelwane zaseSolotvyno naseBila Tserkva.

Phezu kwako nje ukudilizwa nokuthinjwa kwezinye zezo holo ebudeni bemfazwe, abazalwana bahlala benomnqweno wokuba neeHolo zoBukumkani ezizezabo. Ngoku, kukho iiHolo zoBukumkani ezisi-8 kwidolophana yaseDibrova yaye kukho ezili-18 kwiidolophana ezintandathu eziselumelwaneni.

Inkqubo Yokuguqulela

Ngasekupheleni kwenkulungwane ye-19 nasekuqaleni kweyama-20, iintsapho ezininzi zafuduka eUkraine zaya eUnited States naseKhanada. Ezinye zazo zayamkela inyaniso kuloo mazwe matsha, ibe kwasekwa amaqela amaninzi athetha isiUkraine. Kwasekuqaleni kowe-1918, kwapapashwa incwadana ethi The Divine Plan of the Ages ngesiUkraine. Sekunjalo, kwakusekuninzi okufanele kwenziwe ukuze kulungiselelwe abantu abathetha isiUkraine abaseUkraine nakulo lonke ngokutya kokomoya. Ekuqaleni kweyee-1920, kwacaca ukuba kufuneka umzalwana ofanelekayo oza kuguqulela iimpapasho zeBhayibhile rhoqo. Ngowe-1923, uEmil Zarysky, owayehlala eKhanada, wasamkela isicelo sokungenelela inkonzo yexesha elizeleyo. Kuye oko kwakuthetha ukuguqulela iimpapasho zeBhayibhile ngesiUkraine. Watyelela namaqela esiUkraine, esiPolish neSlovakia aseKhanada, naseUnited States.

UEmil Zarysky wazalelwa kufuphi nedolophu yaseSokal kwintshona Ukraine waza kamva wafudukela eKhanada nabazali bakhe. Apho watshata nentombazana yaseUkraine uMariya. Bakhulisa abantwana abahlanu. Nangona babeneembopheleleko ezinzima zentsapho, uEmil noMariya baqhubeka nezabelo zabo zobuthixo. Ngowe-1928 iWatch Tower Society yathenga indlu eWinnipeg, eKhanada, eyaba likomkhulu lomsebenzi wokuguqulela isiUkraine.

Kuloo mihla, abazalwana babesebenzisa iintetho ezishicilelweyo zeBhayibhile kubulungiseleli babo bendlu ngendlu. UMzalwan’ uZarysky wabizelwa eBrooklyn ukuze kushicilelwe iintetho zesiUkraine. Kweyee-1930 izihlandlo eziliqela isikhululo sikanomathotholo saseWinnipeg sasisasaza iintetho zesiUkraine ezithabatha isiqingatha seyure. Kolo sasazo lukanomathotholo, uEmil Zarysky nabanye abazalwana abanamava babenikela iintetho zesidlangalala ezibangel’ umdla. Ezo ntetho zaziphelekwa ngumculo wekwayari okwincwadi yamaculo eyapapashwa ngowe-1928. Abaphulaphuli abanombulelo babesabela ngokuthumela amakhulukhulu eeleta neminxeba apho.

Kangangeminyaka engama-40 uEmil Zarysky nomfazi wakhe, uMariya, basiphumeza ngokuthembeka isabelo sabo njengabaguquleli. Ngelo xesha, nkupho nganye yeMboniselo yayiguqulelwa ngesiUkraine. Ngowe-1964, uMaurice Saranchuk, nomfazi wakhe uAnne ababencedisa uMzalwan’ uZarysky iminyaka eliqela, wabelwa ukuba avelele umsebenzi wokuguqulela.

Ukufika Koncedo Lokomoya

Nangona abavakalisi abathile abanenzondelelo baye bahlwayela baza bankcenkceshela loo mbewu yenyaniso eUkraine, umsebenzi wokushumayela awuzange usekwe de kwangowe-1927, waqalisa eTranscarpathia, waza kamva, wasekwa eHalychyna. Ngaphambi koko kwakusele kusasazwe intaphane yeencwadi neencwadana ngesiRomania, isiHungary, isiPolish, nesiUkraine, nangona kwakungekafakwa ngxelo yomsebenzi wokushumayela. Amaqela akwanti aqalisa ukuseka amabandla, baza abavakalisi baqalisa ukushumayela rhoqo kwindlu ngendlu. Kwahanjiswa uncwadi lweBhayibhile oluninzi kuloo minyaka. Ngowe-1927, kwavulwa indawo yokothula uncwadi yokuqala eUkraine kwisixeko saseUzhgorod, eTranscarpathia. Ngowe-1928 iofisi yaseMagdeburg, eJamani, yabelwa ukunyamekela amabandla neecolporteurs ezikwintsimi yaseTranscarpathia, ngelo xesha eyayiyinxalenye yeCzechoslovakia.

Ngowe-1930 kwamiselwa iofisi kwidolophu yaseBerehove, kufuphi naseUzhgorod ukuze yalathise umsebenzi waBafundi beBhayibhile eTranscarpathia. UVojtech Chehy waba ngumveleli kuloo ofisi. Elo lungiselelo litsha laba yingenelo enkulu kumsebenzi wokushumayela.

Abazalwana abaninzi ababevela kwiiofisi zasePrague nezaseMagdeburg babonisa umoya wokuzincama, babesoloko behamba imigama emide baye kwiiNtaba zeCarpathia besiya kushumayela iindaba ezilungileyo zoBukumkani bukaThixo kwiindawo ezikude zaloo ngingqi intle kunene. Omnye wabo bazalwana banenzondelelo yayinguAdolf Fitzke owayevela kwiofisi yesebe laseMagdeburg. Wathunyelwa ukuze aye kushumayela kummandla waseRakhiv kwiiNtaba zeCarpathia. De kube namhlanje amaNgqina amaninzi alapho asamkhumbula kakuhle loo mzalwana uthembekileyo, uthozamileyo, nonganyanzelisiyo. Ngowama-2001, bekukho amabandla amane kuloo mmandla.

Kweyee-1930, kwaboniswa i-“Photo-Drama of Creation” kwiidolophu needolophana ezininzi zaseTranscarpathia. I-“Photo-Drama” yayinemifanekiso eshukumayo yeslides, ehambisana neentetho zeBhayibhile ezikumacwecwe egramafoni, ethabatha iiyure ezisibhozo. UErich Frost waseJamani wathunyelwa waya kuncedisa abazalwana balapho kwi-“Photo-Drama.” Ngaphambi kolo cwangciso, abazalwana bahambisa amaphecana bebhala neebhodi bemema abantu beze kubukela. Kwakukho umdla omkhulu. Kwidolophu yaseBerehove, eso sihlwele saba sikhulu kangangokuba abantu abangaphezu kwewaka kwafuneka balinde esitratweni. Akubona eso sihlwele sikhulu amapolisa, oyika ecinga ngokuvuka kwesiphithiphithi esingalawulekiyo. Ngenxa yoko, ayecinga ukusirhoxisa eso siganeko, kodwa agqiba ekubeni asiyeke siqhubeke. Emva kwaloo mboniso, kwashiywa iidilesi ezininzi ngabo babefuna ukuphinda bayibone i-“Photo-Drama.” Loo mdla wabangela ukuba iinkokeli zonqulo zalapho zisebenzise nantoni na ukuthintela umsebenzi wokushunyayelwa kweendaba ezilungileyo. Sekunjalo, uYehova uThixo waqhubeka ewusikelela ngempumelelo loo msebenzi.

Kweyee-1920 neyee-1930, imimandla yaseVolyn’ naseHalychyna yayiphantsi kolwalathiso lwesebe lasePoland eLodz. Ngowe-1932 abazalwana basePoland banikela ingqalelo kuloo masimi, besenza amatyelelo okubuyela kubo bonke abo babenemirhumo yeMboniselo, abafumana iidilesi zabo eBrooklyn.

UWilhelm Scheider, owayengumveleli weofisi yasePoland ngoko, ukhumbula oku: “Abantu baseUkraine bayamkela ngehlombe elikhulu inyaniso. Njengamakhowa emva kwemvula, ngokukhawuleza kwavela amaqela abantu abanomdla kwizixeko nakwiidolophana zaseHalychyna. Maxa wambi loo maqela ayekhula abe makhulu de aquke bonke abantu bendawo.”

Nakuba abazalwana abaninzi babengamahlwempu, bancama izinto ezininzi ukuze bafumane uncwadi namacwecwe egramafoni okubanceda ekushumayeleni nasekukhuleni ngokomoya. UMykola Volochii waseHalychyna, owabhaptizwa ngowe-1936, wathengisa elinye lamahashe akhe amabini ukuze azithengele igramafoni. Cinga okwakuthethwa kukuba umlimi athengise ihashe! Nangona wayefanele ondle abantwana abane, wagqiba ekubeni unokukwenza oko ngehashe elinye. Abaninzi abatsha bamazi baze bamkhonza uYehova ngeentetho zeBhayibhile neengoma zoBukumkani zesiUkraine ezazidlalwa kuloo gramafoni.

Esenza umzekelo ngolwando olukhulu lwabavakalisi eHalychyna naseVolyn’ ngeyee-1930, uWilhelm Scheider wathi: “Ngowe-1928 safikelela kubavakalisi abangama-300 ePoland, kodwa ngowe-1939 sasinabavakalisi abangaphezu kwe-1 100, ibe isiqingatha sabo sasingabemi baseUkraine, nangona umsebenzi wawuqalise kamva gqitha kummandla wabo (eHalychyna naseVolyn’).”

Ukuze kunyanyekelwe olo lwando, uLudwik Kinicki wesebe lasePoland wathunyelwa eHalychyna naseVolyn’ njengomveleli ohambahambayo ukuze ancedise kumsebenzi wokushumayela. Intsapho yakhe eyayiseChortkiv, eHalychyna, yafudukela eUnited States ekuqaleni kwenkulungwane yama-20, apho uMzalwan’ uKinicki wafunda khona inyaniso. Kamva, wabuyela kwilizwe lakhe ukuze ancede abantu abanomdla balapho. Abazalwana noodade abaninzi abanakuze balulibale uncedo lokomoya abalufumana ngenxa yaloo mlungiseleli unenzondelelo. Ekwindla lowe-1936, xa kwavalwa inkupho yesiPolish yeGolden Age waza umhleli wayo wagwetywa unyaka entolongweni, uMzalwan’ uKinicki wamiselwa njengomhleli wephephancwadi iNew Day, elapapashwa endaweni yelo livaliweyo iGolden Age. Ngowe-1944 wabanjwa ngamaGestapo wasiwa kwinkampu yoxinaniso yaseMauthausen-Gusen, apho wafela khona ethembekile kuYehova.

UThixo Utsala Zonke Iintlobo Zabantu

Ekuqaleni kweyee-1920, uMfundi weBhayibhile ekuthiwa nguRola wabuyela kwidolophu yakowabo iZolotyi Potik, eHalychyna. Esebenzisa iBhayibhile yakhe, uRola waqalisa ukushumayela iindaba ezilungileyo. Abantu babesithi uphambene kuba wayitshabalalisa yonke imifanekiso yakhe yonqulo. Umfundisi walapho wazama ukumthintela uRola ekubeni ashumayele. Loo mfundisi waya kwelinye ipolisa wathi: “Ukuba nje unokwenza into ukuze uRola angakwazi ukuhamba, ndiya kukunika ilitha yewhiskey.” Elo polisa laphendula lathi asingomsebenzi walo ukubetha abantu. Kamva, uRola waqalisa ukufumana iipasile zoncwadi ezazivela kubazalwana baseUnited States. Kwakhona loo mfundisi waya kwelo polisa walixelela ukuba eposini kufike ipasile enoncwadi lwamaKomanisi. Kusuku olulandelayo elo polisa lalinda eposini ukuze libone lowo wayeza kulanda loo pasile. Kakade, yaba nguRola. Elo polisa lathabatha uRola lamsa kwisikhululo samapolisa labiza naloo mfundisi. Loo mfundisi walwa esithi olo ncwadi luvela kuMtyholi. Ukuze liqonde enoba olo ncwadi luneemfundiso zamaKomanisi na, elo polisa lathumela olunye kwinkundla yalapho. Olunye lazithabathela. Njengoko lifunda ezo mpapasho, laqonda ukuba ziqulethe inyaniso. Kungekudala lona nomfazi walo baqalisa ukuya kwiintlanganiso zaBafundi beBhayibhile. Kamva labhaptizwa laza langumvakalisi onenzondelelo. Ngoko, ngoxa loo mfundisi wayesenza konke ukuze athintele ukwenziwa kwabafundi, engaqondi wakhuthaza uLudwik Rodak ukuba amkele inyaniso.

Malunga nelo xesha, umfundisi wamaGrike Katolika waseLvov wafudukela eUnited States nomfazi wakhe. Kungekudala emva koko, umfazi wakhe wafa. Ebuhlungu, wafuna ukwazi apho ukhoyo umphefumlo womfazi wakhe. Wafumana idilesi yabanye abavumisi baseNew York. Ngoxa wayekhangela indawo abaza kudibana kuyo, ngempazamo waya komnye umgangatho weso sakhiwo wazifumana sele ekwintlanganiso yaBafundi beBhayibhile. Apho wafunda inyaniso ngemeko yabafi. Kamva wabhaptizwa waza wasebenza ithutyana kumzi-mveliso wokushicilela kwiBheteli yaseBrooklyn. Emva kwexesha elithile wabuyela eHalychyna waza ngenzondelelo waqhubeka eshumayela iindaba ezilungileyo.

Ilitha Lokukhanya Kwimpuma Ukraine

Njengoko sibonile, ekuqaleni umsebenzi omninzi wokushumayela wenziwa entshona Ukraine. Inyaniso yafikelela njani kulo lonke elo lizwe? Ngaba loo mhlaba wokomoya wawuza kuvelisa intabalala njengasentshona Ukraine?

Ekuqaleni kweyee-1900, uMzalwan’ uTrumpi, uMfundi weBhayibhile waseSwitzerland, waya kusebenza njengenjineli kwingingqi yomgodi wamalahle empuma Ukraine. Waziwa njengoMfundi weBhayibhile wokuqala kuloo mmandla. Umsebenzi wakhe wokushumayela ngeyee-1920 wabangela ukusekwa kweqela lesifundo seBhayibhile kwidolophana yaseLiubymivskyi Post, kufuphi nesixeko saseKharkov.

Ngowe-1927 kwafika omnye umzalwana wasentshona Yurophu eze kusebenza njengenjineli kumgodi wamalahle kwidolophana yaseKalynivka. Weza nesutikheyisi ezele luncwadi lweBhayibhile, awalusebenzisa ekushumayeleni kwelinye iqela elincinane lamaBhaptizi elabonisa umdla omkhulu kwithemba loBukumkani. Emva kwexesha lo mzalwana wabuyela kwilizwe lakhe, eshiya ngasemva iqela elincinane elaba ngaBafundi beBhayibhile. IMboniselo yowe-1927 yanikela ingxelo yokuba ngabantu abali-18 abahlanganisana eKalynivka ukuze babhiyozele iSikhumbuzo. Kwidolophana emelene naleyo iYepifanivka, kwabakho abali-11. Ukongezelela koko, ngabantu abangama-30 ababekho kwiSikhumbuzo saloo nyaka eLiubymivskyi Post.

Abazalwana bekomkhulu laseBrooklyn babesoloko benikele ingqalelo koko kwenzeka kwiSoviet Union, bezama ukumisela ngokusemthethweni umsebenzi wokushumayela ngoBukumkani. Ukuze kufezekiswe loo njongo, umzalwana waseKhanada, uGeorge Young, waya eU.S.S.R ngowe-1928. Ngoxa wayelapho, watyelela isixeko saseKharkov, kwimpuma Ukraine, apho walungiselela khona indibano yesithili encinane yeentsuku ezintathu neqela lalapho laBafundi beBhayibhile. Kamva, ngenxa yenkcaso yabasemagunyeni kwafuneka alishiye elo lizwe. Wachaza ukuba ngelo xesha ayesele ekho amaqela aBafundi beBhayibhile eKiev naseOdessa.

UMzalwan’ uYoung wathumela ingxelo eBrooklyn ngemeko yaseSoviet Union. Emva kolo ncomelo lukaMzalwan’ uYoung, uDanyil Starukhin waseUkraine wamiselwa ukuze amele aBafundi beBhayibhile kungekuphela nje eUkraine kodwa nakuyo yonke iU.S.S.R. Kwiminyaka eliqela ngaphambi kolo tyelelo lukaGeorge Young, uMzalwan’ uStarukhin wayesoloko ekwazi ukukhusela iBhayibhile kwiimpikiswano zakhe noAnatoly Lunacharsky, owayenguMphathiswa Wezemfundo eSoviet ngelo xesha. Kwileta eyayisiya kuJ. F. Rutherford waseBrooklyn kwikomkhulu lehlabathi, uMzalwan’ uYoung wabhala wathi: “UDanyil Starukhin unenzondelelo yaye ukhuthele. Xa wayeyinkwenkwana eneminyaka eli-15 ubudala, waxubusha nomfundisi ngeBhayibhile. Lo mfundisi waba nomsindo waza wayigqebha ngomnqamlezo wakhe entloko loo nkwenkwana, yawa yafa isiqaqa; nangoku lisabonakala elo duma entloko. UDanyil ngewaxhonywayo, kodwa ngenxa yokuba wayeselula wagwetywa iinyanga ezine kuphela entolongweni.” Nangona uMzalwan’ uStarukhin wazama ukubhalisa ngokusemthethweni ibandla lalapho aze afumane imvume yokushicilela uncwadi lweBhayibhile eUkraine, abasemagunyeni eSoviet bakwala oko.

Ekupheleni kweyee-1920 neyee-1930, abasemagunyeni eSoviet ngenzondelelo bakhuthaza ukungakholelwa kubukho bukaThixo. Unqulo lwalugculelwa, yaye abo bashumayeza abanye babegqalwa “njengeentshaba zelizwe labo.” Emva kwesivuno esikhulu ngowe-1932, amaKomanisi athimba konke ukutya kwabemi beedolophana zaseUkraine. Bangaphezu kwezigidi ezithandathu abantu abafa ngenxa yaloo ndlala yangabom.

Iingxelo zibonisa ukuba loo maqela mancinane abakhonzi bakaYehova agcina ingqibelelo yawo kuloo maxesha anzima, nangona ayengakwazi nangayiphi na indlela ukuqhagamshelana nabazalwana abangaphandle kwelo lizwe. Amanye kuwo achitha iminyaka emininzi entolongweni ngenxa yokholo lwawo. AbakwaTrumpi, abakwaHauser, uDanyil Starukhin, uAndrii Savenko, noDade Shapovalova ngabambalwa kwabo bagcini bengqibelelo. Siqinisekile ukuba uYehova ‘akayi kuwulibala umsebenzi wabo nothando abalubonisayo ngegama lakhe.’—Heb. 6:10.

Ixesha Lovavanyo Oluqatha

Ukuphela kweyee-1930 kweza neenguqu ezinkulu kwimida yamazwe amaninzi akwimpuma Yurophu. IJamani yamaNazi neU.S.S.R. zasukela phezulu zagagamela amazwe amancinane.

Ixhaswa yiJamani yamaNazi, ngoMatshi 1939, iHungary yathabathela kuyo iTranscarpathia. Umsebenzi wamaNgqina kaYehova wavalwa, zaza zonke iiHolo zoBukumkani zavalwa. Abasemagunyeni babaphatha gadalala abazalwana baza bavalela abaninzi entolongweni. Inkoliso yamaNgqina eedolophana zaseUkraine iVelykyi Bychkiv neKobyletska Poliana yabanjwa.

Xa kwafika ulawulo lweSoviet kummandla waseHalychyna naseVolyn’ ngowe-1939, imida esentshona Ukraine yavalwa. Ngoko, lwaphela unxibelelwano neofisi yasePoland. Emva kokuba iqalisile iMfazwe Yehlabathi II, intlangano yasebenza ngokufihlakeleyo. Abazalwana bahlanganisana ngokwamaqela amancinane awayebizwa ngokuba sisangqa ibe baqhubeka nobulungiseleli babo ngokulumka okungakumbi.

Kamva, imikhosi yamaNazi yangena eUkraine. Ebudeni bokulawula kweJamani elo, abefundisi baqalisa ukuphembelela amahlokondiba nxamnye nabantu bakaYehova. EHalychyna kwavuka intshutshiso embi gqitha. Iifestile zezindlu zamaNgqina kaYehova zophulwa, ibe abazalwana abaninzi babethwa kanobom. Ebusika, abanye abazalwana banyanzelwa ukuba beme emanzini abandayo kangangeeyure kuba bengavumi ukwenza uphawu lomnqamlezo. Abanye oodade babethwa imivumbo engama-50 ngoswazi. Iqela labazalwana laphulukana nobomi balo ngenxa yokugcina ingqibelelo. Ngokomzekelo, amaGestapo ambulala uIllia Hovuchak, umlungiseleli wexesha elizeleyo owayevela kwiiNtaba zeCarpathia. Umfundisi wamaKatolika wamnikela kumaGestapo ngenxa yokuba uMzalwan’ uHovuchak wayeshumayela ngenzondelelo ngoBukumkani bukaThixo. Elo yayilixesha lovavanyo oluqatha. Sekunjalo, abakhonzi bakaYehova baqhubeka bemi ngokuqinileyo.

AmaNgqina kaYehova ayencedana, nakuba ukwenjenjalo kwakusoloko kuyingozi. Kwisixeko saseStanislav (ngoku esiyi-Ivano-Frankovsk), elinye ibhinqa elingumYuda neentombi zalo ezimbini baba ngamaNgqina. Babehlala kwindawo yamaYuda. Abazalwana beva ukuba amaNazi aceba ukubulala onke amaYuda akweso sixeko, ngoko balungiselela ukuba abo dade bathathu basabe. Ebeka ubomi bawo emngciphekweni, amaNgqina abafihla abo dade bangamaYuda ebudeni bayo yonke loo mfazwe.

Kangangethutyana elithile, ebudeni beMfazwe Yehlabathi II, abazalwana basentshona Ukraine baphulukana nonxibelelwano nentlangano yaye babengaqinisekanga ngolwalathiso abamele balulandele. Abanye babecinga ukuba ukuqala kweMfazwe Yehlabathi II kuthetha ukuqala kweArmagedon. Loo mfundiso yabangela ukuba abazalwana bangaqondani kangangexesha elithile.

Imbewu Ihluma Edabini

IMfazwe Yehlabathi II yazisa intlungu nomonakalo eUkraine. Kangangeminyaka emithathu elo lizwe lajika laba lidabi lemfazwe elikhulu. Njengoko elo dabi laligqiba wonke loo mmandla weUkraine, liqala empuma laphinda labuyela entshona, iidolophu needolophana ezininzi zatshatyalaliswa zaphela. Malunga nezigidi ezilishumi zabemi baseUkraine zabulawa kuloo minyaka, kuquka izigidi ezihlanu ezinesiqingatha zabantu abangalwiyo. Phakathi kobo bubi bemfazwe, abaninzi baphelelwa lithemba baza bayityeshela imilinganiselo yokuziphatha. Sekunjalo, naphantsi kwezo meko, abanye bafunda inyaniso.

Ngonyaka we-1942, uMykhailo Dan, ityendyana laseTranscarpathia elalithanda ukuphulaphula amaNgqina kaYehova ngaphambi kweMfazwe Yehlabathi II, labizwa kwinkonzo yasemkhosini. Ebudeni boqeqesho lwasemkhosini, umfundisi wamaKatolika wanika loo majoni incwadana enemifanekiso yonqulo ethembisa ubomi basezulwini kuye nabani obulala ubuncinane iKomanisi elinye. Elo joni liselula lothuswa yiloo nkcazelo. Ebudeni bemfazwe, labona umfundisi ebulala abantu. Oko kwalinceda leyiseka ukuba amaNgqina kaYehova anenyaniso. Emva kwemfazwe, lagoduka lafumana amaNgqina kaYehova laza labhaptizwa ngasekupheleni kowe-1945.

Kamva uMzalwan’ uDan wanyamezela iintlungu zokuvalelwa kwiintolongo zeSoviet. Emva kokukhululwa kwakhe, wamiselwa njengomdala yaye ngoku ukhonza njengomveleli owongamelayo kwelinye lamabandla aseTranscarpathia. Ekhumbula incwadana enemifanekiso ekhankanywe ngaphambili, eyihleka uthi, “Andizange ndibulale neKomanisi elinye. Ngoko, andilindelanga kufumana ubomi basezulwini, kodwa ndikhangele phambili ekuphileni ngonaphakade kwiParadesi esemhlabeni.”

Umhlaba Ochumileyo Uthwala Isiqhamo Kwiinkampu Zoxinaniso

Njengoko kuchazwe ekuqaleni, umhlaba otyebileyo unamandla okuvelisa isilimo esikhulu ngokungaqhelekanga. Ngoko ke, ebudeni bokulawula kweJamani yamaNazi, loo mhlaba umnyama uchumileyo wafuduswa eUkraine. Amakhareji azaliswe nguloo mhlaba utyebileyo ukhiwa kumbindi weUkraine ayelandelelana esiwa eJamani.

Noko ke, amanye amakhareji ayephethe oko kwathi nako kamva kwaba ngumhlaba ochumileyo, ngandlel’ ithile. Malunga nezigidi ezibini ezinesiqingatha zabafana namabhinqa aselula zathatyathwa eUkraine zaya kusetyenziswa ngenkani eJamani. Inkoliso yabo yaphelela kwiinkampu zoxinaniso. Apho yaqhelana namaNgqina aseJamani, awayebanjelwe ubundilele bobuKristu. Nalapho kwiinkampu zoxinaniso, amaNgqina akazange ayeke ukwabelana nabanye ngeendaba ezilungileyo, ngentetho nokuziphatha kwawo. Elinye ibanjwa likhumbula oku: “AmaNgqina ayengafani nabo bonke abanye abantu ababekuloo nkampu yoxinaniso. Ayenobuhlobo, nesimo sengqondo esihle. Indlela aziphethe ngayo yayibonisa ukuba anento ebalulekileyo afuna ukuyithetha kwamanye amabanjwa.” Kuloo minyaka, abantu abaninzi baseUkraine bafunda inyaniso kumaNgqina aseJamani awayekwezo nkampu zoxinaniso.

UAnastasiya Kazak waqhelana nenyaniso kwinkampu yoxinaniso yaseStutthof eJamani. Ukuphela kwemfazwe, amabanjwa amaninzi kuquka uAnastasiya namanye amaNgqina ali-14 aya kulahlwa eDenmark, apho abazalwana baseDenmark bawakhangelayo bawafumana baza bawanyamekela ngokomoya nangokwenyama. Kwakuloo nyaka uAnastasiya wabhaptizwa eneminyaka eli-19 ubudala kwindibano yesithili yaseCopenhagen waza wabuyela kowabo empuma Ukraine, apho wasebenza khona ehlwayela ngenzondelelo imbewu yenyaniso. Kamva, ngenxa yomsebenzi wakhe wokushumayela, uDade Kazak waphinda wabanjwa wavalelwa iminyaka eli-11.

Nali icebiso alinika abantu abaselula: “Nokuba kwenzeka ntoni na kubomi bakho—imbandezelo, inkcaso, okanye ezinye iinkathazo—ungaze unikezele. Qhubeka ucela uncedo lukaYehova. Njengoko ndafundayo, akaze abashiye abo bamkhonzayo.”—INdu. 94:14.

Iimvavanyo Zemfazwe

Imfazwe ibuhlungu yaye inenkohlakalo, ibangela ubunzima, ukubandezeleka nokufa kumajoni nakwabo bangalwiyo. AmaNgqina kaYehova akasindi kwimiphumo ebuhlungu yemfazwe. Ukanti, nangona esehlabathini, akayonxalenye yalo. (Yoh. 17:15, 16) Exelisa iNkokeli yawo, uYesu Kristu, azigcina engoondilele ngokungqongqo kwimibandela yezobupolitika. Njengakwezinye iindawo, kumaNgqina aseUkraine oku kuma kuye kwawohlula njengamaKristu okwenyaniso. Yaye ngoxa ihlabathi lizukisa amaqhawe alo emfazwe, lawo aphilayo nalawo afileyo, uYehova uzukisa abo baye ngenkalipho bazingqina benyanisekile kuye.—1 Sam. 2:30.

Ekupheleni kowe-1944, imikhosi yaseSoviet yaphinda yayithimba intshona Ukraine yaza yanyanzelisa ukuba wonk’ umntu aye emkhosini. Kwangelo xesha, amaqela abavukeli baseUkraine ayesilwa nemikhosi yaseJamani neyaseSoviet. Abemi basentshona Ukraine babenyanzelwa ukuba bazibandakanye nabo bavukeli. Konke oko kweza novavanyo olutsha kubakhonzi bakaYehova ekulondolozeni ubundilele babo. Ngenxa yokwala ukulwa, abazalwana abaninzi babulawa.

UIvan Maksymiuk nonyana wakhe uMykhailo bafunda inyaniso kuIllia Hovuchak. Ebudeni baloo mfazwe, bala ukuthabatha izixhobo, ngoko babanjwa bavalelwa ngabo bavukeli. Kwithuba elithile ngaphambi koko, abo bavukeli babamba elinye ijoni laseSoviet. Abo bavukeli banyanzelisa uIvan Maksymiuk ukuba abulale elo joni lithinjiweyo, besithi ukuba unokwenjenjalo babeza kumkhulula. Wathi akwala uMzalwan’ uMaksymiuk, bambulela ngenkohlakalo. Unyana wakhe uMykhailo wabulawa ngendlela efanayo, kwanoYurii Freyuk nonyana wakhe oneminyaka eli-17 ubudala, uMykola.

Abanye abazalwana babulawa ngenxa yokwala ukuzibandakanya kumkhosi weSoviet. (Isa. 2:4) Ukanti abanye bagwetywa iminyaka elishumi entolongweni. Ayemancinane amathuba okusinda kwabo bazalwana basentolongweni, kuba emva kwemfazwe eUkraine kwa-abo babengabanjwanga babesifa yindlala. Ngowe-1944, uMichael Dasevich wabanjelwa ubundilele. Ngaphambi kokuba avalelwe iminyaka elishumi, wancinwa iinyanga ezintandathu, nto leyo eyenza waphelelwa ngamandla. Umphathi wezonyango kuloo ntolongo wacebisa ukuba anikwe “ukutya okunentswane eninzi.” Ngoko, abapheki bentolongo baqala ukugalela itispuni leoli kwisidudu sakhe—ekuphela kokutya awayekunikwa. UMzalwan’ uDasevich wasinda waza wakhonza iminyaka engama-23 kwikomiti yelizwe laseU.S.S.R. ibe kamva wakhonza kwikomiti yelizwe laseUkraine.

Ngowe-1944, abazalwana abasixhenxe belinye ibandla laseBukovina bala ukuya emkhosini yaye ngamnye wagwetywa ukususela kwiminyaka emithathu ukusa kwemine entolongweni. Abane kubo babulawa yindlala apho entolongweni. Kwakuloo nyaka abazalwana abahlanu belinye ibandla elikufutshane ngamnye kubo wagwetywa iminyaka elishumi kwinkampu yentolongo yaseSiberia. Mnye kuphela kubo owabuyela ekhaya—abanye bafela apho.

INcwadi Yonyaka yowe-1947 yagqabaza yathi ngezo ziganeko: “Ngowe-1944, yathi yakududulelwa ngasentshona imikhosi enamandla yamaNazi, . . . kwafunzwa wonk’ umntu eNtshona Ukraine ukuze koyise iRashiya. Kwakhona abazalwana bethu baye bawugcina ungadyobhekanga umnqophiso kanaphakade nobundilele babo. Abaninzi baye bancama ubomi babo ngenxa yokuthembeka kwabo eNkosini, yaye abanye—ngoko ababengaphezu kwe-1 000—baphinde basiwa empuma kumathafa akumbindi welo lizwekazi.”

Phezu koko kusiwa ngapha nangapha, amaNgqina kaYehova aqhubeka esanda. Ngonyaka we-1946, ngabantu abangama-5 218, kuquka abathanjiswa abane, ababekho kwiSikhumbuzo entshona Ukraine.

Umtyhi Wethutyana

Emva kokuba iphelile iMfazwe Yehlabathi II, abazalwana—abo banyamezela ezo nzingo kodwa bahlala benyanisekile kuThixo—bashumayela isigidimi esiphambili sethemba nokhuthazo kwabo babebuya edabini. Amajoni namabanjwa emfazwe abuyela emakhaya enxunguphele yaye efuna ukwazi injongo yobomi. Ngenxa yoko, abaninzi bayamkela ngovuyo inyaniso yeBhayibhile. Ngokomzekelo, amva ngowe-1945 kwidolophana yaseBila Tserkva, eTranscarpathia, kwabhaptizwa abantu abangama-51 kuMlambo iTisza. Ekupheleni kwaloo nyaka, kwakukho abavakalisi abali-150 kwelo bandla.

Ngelo xesha, kwakukho intiyo phakathi kwabantu baseUkraine nabasePoland abasentshona Ukraine nasempuma Poland. Kwasekwa amaqela alwayo abemi baseUkraine nabasePoland. Maxa wambi loo maqela ayebulala bonke abemi bedolophana enabantu bolunye uhlanga. Okubuhlungu kukuba, abanye abazalwana bafela apho kwezo ndyikitya.

Kamva, ngesivumelwano seSoviet Union nePoland, abantu abamalunga nama-800 000 basePoland ababekwintshona Ukraine babuyiselwa ePoland nabamalunga nama-500 000 baseUkraine ababekwimpuma Poland basiwa eUkraine. Phakathi kwabo bafuduki kwakukho amaNgqina amaninzi. Kwaphinda kwamiselwa amabandla, baza abazalwana bafumana izabelo ezitsha zobuthixo, bekugqala oko kubuyiselwa ezweni labo njengethuba lokushumayela kuloo masimi matsha. INcwadi Yonyaka yowe-1947 yagqabaza yathi: “Konke oku kuhla kunyukwa kwabantu kuye kwanegalelo ekusasazekeni kwenyaniso ngokukhawuleza kwiindawo ebekuya kuba nzima ukuba ifikelele kuzo ngaphantsi kweemeko eziqhelekileyo. Ngoko nezo meko zibuhlungu zaphumeza indima yazo ekuzukiseni igama likaYehova.”

Xa kwavalwa imida yasentshona Ukraine, abazalwana bathabatha amanyathelo balungelelanisa umsebenzi wamaNgqina kaYehova eUkraine nakuyo yonke iU.S.S.R. UPavlo Ziatek ngaphambili wamiselwa ukuba akhonze njengesicaka selizwe laseUkraine nakwelo laseSoviet Union. Kamva, abanye abazalwana ababini abanenzondelelo, uStanislav Burak noPetro Tokar, babelwa ukuba bamncedise. Behlala ngokufihlakeleyo kwindlu yomnye udade ongumKristu eLvov, bashicilela uncwadi ukuze ukutya kokomoya kufumaneke kuyo yonke iU.S.S.R. Yayikukuzibeka emngciphekweni ukulanda ePoland uncwadi oluza kuguqulelwa luze lushicilelwe eLvov. Ngokuphindaphindiweyo, abazalwana noodade abaninzi babefumana imvume baye kubona izalamane zabo ePoland ibe xa bebuya babedla ngokufihla uncwadi lwethu beze nalo. Kangangexesha elithile enye injineli kaloliwe yayithutha uncwadi ngebhokisi yesinyithi efihlwe ngaphakathi kwindawo yokubilisa amanzi!

Ekupheleni kowe-1945, uMzalwan’ uZiatek wabanjwa waza wagwetywa iminyaka elishumi. Endaweni yakhe kwangena uMzalwan’ uBurak waba sisicaka selizwe.

Intshutshiso Kwakhona

NgoJuni 1947, omnye umzalwana owayephethe uncwadi elusa kubazalwana wamiswa kwisitrato saseLvov waza wabanjwa. Amagosa ezokhuselo athembisa ukubhalisa intlangano yethu ngokusemthethweni ukuba uwanika iidilesi zaloo maNgqina asoloko ewaphathela uncwadi. Ngokuwathemba loo mzalwana wawanika iidilesi zabazalwana abamalunga nama-30, kuquka uMzalwan’ uBurak, owayesisicaka selizwe ngelo xesha. Kamva, bonke babanjwa. Ngokunyaniseka kwaloo mzalwana waguquka evuma ukuba ngokungeyomfuneko uye wawathemba loo magosa ezokhuselo.

Abo bazalwana babanjiweyo basiwa eKiev bancinwa ngakumbi baza basiwa enkundleni. Kamsinya emva koko, uMzalwan’ uBurak wafela apho entolongweni. Ngaphambi kokubanjwa kwakhe, uMzalwan’ uBurak wakwazi ukunxibelelana noMykola Tsyba isicaka sesithili kummandla waseVolyn’ waza wadlulisela kuye umsebenzi wokongamela iUkraine neSoviet Union.

Yayisisihlandlo sokuqala ukuba amagosa ezokhuselo aseSoviet ngaxeshanye abambe abazalwana abaneembopheleleko abaninzi kangako kwakunye nabo bashicilela uncwadi ngokufihlakeleyo. Abasemagunyeni eU.S.S.R. babelugqala uncwadi lwethu njengolunxamnye neSoviet. Ngobuxoki amaNgqina ayetyholwa ngokwenza umsebenzi olwa nocwangco lwelo lizwe, ibe amaninzi agwetyelwa ukufa. Noko ke, izigwebo zokufa zaziguqulwa zibe yiminyaka engama-25 kwiinkampu zentolongo.

Abo bazalwana bagwetywa ukuba baye kusebenza eSiberia. Xa babuza igqwetha ngesizathu sokuba bathunyelwe kude kangako, liqhula laphendula lathi: “Mhlawumbi, nifanele niye kushumayela ngoThixo wenu apho.” Hayi indlela angqineka echane ngayo loo mazwi kamva!

Ebudeni bowe-1947 ukusa kowe-1951, abazalwana abaninzi abanembopheleleko babanjwa. AmaNgqina abanjwa kungekuphela nje ngenxa yokuba eshicilela uncwadi kodwa nangenxa yokuba engazibandakanyi emkhosini, engavoti, okanye ase abantwana bawo kwiintlangano zeePioneer League okanye iKomsomol (Umanyano Lolutsha LwamaKomanisi). Ukuba ngomnye nje wamaNgqina kaYehova kwakusisizathu esaneleyo sokubanjwa. Ngokufuthi, amangqina obuxoki ayenikela ubungqina kumatyala asenkundleni. Ngokuqhelekileyo, yayiba ngabamelwane okanye abo asebenza nawo abaye bagrogriswa okanye banyotywa ngabezokhuselo.

Maxa wambi abasemagunyeni babesiba novelwano, nakuba babengathethi phandle. UIvan Symchuk wabanjwa wavalelwa yedwa kangangeenyanga ezintandathu. Kuloo ntolongo yakhe yedwa, kwakuthe cwaka; engeva nengxolo esesitratweni. Emva koko, kwavavanywa ityala lakhe. Noko ke, lowo wayesenza uphando wamnceda ngokumxelela indlela yokuphendula esithi: “Ungathethi nantoni na ngokuba ubafumana phi yaye kubani oomatshini bokuchwetheza noncwadi! Ungayiphenduli loo mibuzo!” Yaye xa esiya kuncinwa, loo mphandi wayedla ngokuthi: “Ivan, unganikezeli. Unganikezeli, Ivan.”

Kwezinye iidolophana amaNgqina kaYehova ayengavunyelwa ukuba axhome iikhethini ezifestileni zawo. Oku kwakusenzelwa ukuze abamelwane namapolisa akwazi ukubona xa amaNgqina efunda uncwadi lwawo naxa eqhuba iintlanganiso. Sekunjalo, abazalwana bafumana iindlela zokuzondla ngokomoya. Maxa wambi “iqonga” lomqhubi weSifundo seMboniselo laliba yinto eyahlukileyo. Xa eqhuba naxa efunda IMboniselo, umzalwana wayehlala ngaphantsi kwetafile egqunywe ngelaphu elirhuqayo. “Abaphulaphuli” babehlala bangqonge itafile, bephulaphule ngenyameko yaye benikela amagqabaza abo. Akukho namnye owayenokukrokrela ukuba abo bangqonge itafile banandipha intlanganiso yonqulo!

Ukunikela Ubungqina Ezinkundleni

UMykhailo Dan, okhankanywe ngaphambilana, wabanjwa ekupheleni kowe-1948. Ngelo xesha wayetshatile ibe wayenonyana ononyaka omnye ubudala, yaye umfazi wakhe wayekhulelwe. Xa kwathethwa elo tyala, umtshutshisi karhulumente wanyanzelisa isigwebo seminyaka engama-25 entolongweni. Kumazwi akhe okugqibela awawabhekisa kwezo jaji, uMzalwan’ uDan wasebenzisa amazwi akuYeremiya 26:14, 15 athi: “Yabonani, ndisesandleni senu. Yenzani kum ngoko kulungileyo nangoko kufanelekileyo emehlweni enu. Kuphela nje nifanele nazi ngandlela zonke ukuba, ukuba niyandibulala, nibeka igazi elimsulwa phezu kwenu naphezu kwesi sixeko naphezu kwabemi baso, kuba ngokwenyaniso uYehova undithumile ukuba ndithethe ezindlebeni zenu onke la mazwi.” Eso silumkiso satsho zavakalelwa ezo jaji. Zaxubusha zaza zenza isigqibo: iminyaka elishumi entolongweni yaye emihlanu uza kuyichithela kwimimandla ekude yaseRashiya.

UMzalwan’ uDan wabanjelwa ukuba ngumngcatshi welizwe lakhe. Xa weva oko, wathi kwezo jaji: “Ndazalelwa eUkraine ngaphantsi korhulumente waseCzechoslovakia ibe kamva ndaphila phantsi kolawulo lweHungary; ngoku endaweni yethu kungene iSoviet Union, ibe mna ngokobuhlanga ndingumRomania. Liliphi ke eli lizwe lam ndilingcatshayo?” Kambe ke, loo mbuzo washiywa ungaphendulwanga. Emva kwelo tyala, uMzalwan’ uDan weva iindaba ezimnandi zokuba ufumene umntwana oyintombazana. Oko kwamnceda wanyamezela yonk’ impatho ethob’ isidima yeentolongo neenkampu zasempuma Rashiya. Ngasekupheleni kweye-1940, abazalwana abaninzi baseUkraine, eMoldavia, naseBelarus babulawa yindlala kwiintolongo zaseSoviet. Naye uMzalwan’ uDan waphulukana neekhilogram ezingama-25.

Ukutshutshiswa Koodade EUkraine

Asingobazalwana kuphela ababetshutshiswa baze bafumane izigwebo ezide kulawulo lweSoviet; noodade babephathwa kabuhlungu ngaloo ndlela. Ngokomzekelo, uMariya Tomilko wafumana inyaniso kwinkampu yoxinaniso eRavensbrück ebudeni beMfazwe Yehlabathi II. Kamva, wabuyela eUkraine waza washumayela kwisixeko saseDnepropetrovsk. Ngenxa yomsebenzi wakhe wokushumayela, ngowe-1948 wagwetywa iminyaka engama-25 kwinkampu yentolongo.

Omnye udade, owagwetywa iminyaka engama-20 kwinkampu yentolongo, ukhumbula oku: “Ebudeni bokuncinwa kwam ndafakwa kwisisele esinye nezaphuli-mthetho ezininzi. Noko ke, ndandingazoyiki ibe ndashumayela kuloo mabhinqa. Okwandothusayo kukuba, andiphulaphula ngenyameko. Eso sisele sasizele ngabantu. Sonke sasilala emgangathweni, sinyakathiswe okwebubu leenyosi. Xa silele, ekuphela kwendlela yokuguquka yayikukuthetha ukuze siguquke ngaxeshanye.”

Ngowe-1949 enye inkokeli yamaBhaptizi kwisixeko saseZaporozh’ye yanikela ingxelo kumagosa okhuseleko nxamnye nabanye oodade abahlanu, abaye babanjwa emva koko. Babetyholwa ngokuphembelela uluntu nxamnye neSoviet ibe ngamnye wagwetywa iminyaka engama-25 kwiinkampu zentolongo. Zonke izinto zabo zathinjwa. Kangangeminyaka esixhenxe bathothoza izigwebo zabo kude kumantla eRashiya de baxolelwa. ULydia Kurdas, omnye kwabo dade, ukhumbula oku: “Sasivunyelwa ukubhalela emakhaya iileta ezimbini kuphela ngonyaka, ibe ezo leta zazihlolisiswa. Kulo lonke elo xesha, sasingenalo uncwadi.” Sekunjalo, bahlala bethembekile kuYehova yaye baqhubeka beshumayela iindaba ezilungileyo zoBukumkani.

Ukuncedwa Kwabazalwana BaseMoldavia

Nkqu nakuloo maxesha anzima, amaNgqina ayebonisa uthando omnye komnye. Ngowe-1947 ilizwe elisebumelwaneni laseMoldavia (ngoku eyiMoldova) lathwaxwa yindlala eqatha. Phezu kwabo nje ubuhlwempu babo, abazalwana baseUkraine basabela ngokukhawuleza kwiintswelo zabo bakholwa nabo eMoldavia babathumelela umgubo. AmaNgqina asentshona Ukraine amema iqela lamaNgqina aseMoldavia ukuba lize kuhlala kumakhaya awo.

Omnye umzalwana owayehlala eMoldavia ngelo xesha ukhumbula oku: “Njengenkedama ndandifanele ndifumane kurhulumente iigram ezingama-200 zesonka yonk’ imihla. Kodwa ndandingasifumani kuba ndandingelolungu lePioneer League. Savuya gqitha xa abazalwana basentshona Ukraine basithumelela umgubo, mvakalisi ngamnye efumana iikhilogram ezine.”

Iinzame Zokubhalisa Ngokusemthethweni EU.S.S.R.

Ngowe-1949, abadala abathathu kummandla waseVolyn’ (uMykola Pyatokha, uIlya Babijchuk, noMykhailo Chumak) bafaka isicelo sokubhalisa umsebenzi wethu ngokusemthethweni. Kungekudala emva koko, uMzalwan’ uChumak wabanjwa. UMykola Pyatokha, omnye wabo bazalwana babini babesele, ukhumbula ukuba xa bafaka isicelo sokuqala, akuzange kubekho mpendulo. Ngoko, isicelo sesibini sathunyelwa eMoscow. Loo maxwebhu agqithiselwa eKiev. Apho abasemagunyeni bavuma ukuthethathethana nabazalwana babaxelela ukuba amaNgqina kaYehova anokubhaliswa kuphela ukuba aza kusebenzisana nabo. Kakade ke, abazalwana abazange bavume ukulalanisa kubundilele babo. Kungekudala nabo abo bazalwana babini babanjwa, waza ngamnye wagwetywa iminyaka engama-25 kwiinkampu zentolongo.

Kwingxelo ekhethekileyo ebhaliweyo yaseMoscow eyayisiya kwabasemagunyeni eVolyn’, kwachazwa ukuba “ihlelo” lonqulo lamaNgqina kaYehova “lichazwe njengelilwa nemisebenzi yeSoviet yaye alifanele libhaliswe ngokusemthethweni.” Umphathi weOfisi Yesebe Lezonqulo wayalelwa ukuba awabek’ esweni amaNgqina kaYehova aze anikele ingxelo kwabezokhuselo lukaRhulumente.

Inkokeli Zonqulo Zisebenzisana Nabasemagunyeni

Ngowe-1949 inkokeli yamaBhaptizi yaseTranscarpathia yabhenela kwabasemagunyeni, ikhalazela ukuba amaNgqina aguqula abantu bayo. Ngenxa yoko, uMykhailo Tilniak, umdala kwibandla lalapho, wabanjwa waza wagwetywa iminyaka elishumi entolongweni. Umfazi wakhe wasala ekhaya nabantwana ababini abancinane.

Ezo zenzo zeenkokeli zonqulo zanceda abantu abantliziyo zinyanisekileyo bawuqonda baza bawuxabisa umsebenzi wamaNgqina kaYehova. Ngowe-1950 enye intombazana eselula yaseTranscarpathia engumBhaptizi, uVasylyna Biben, yeva ukuba omnye umfundisi wecawa yakhe uchazele abasemagunyeni ngomsebenzi wamanye amaNgqina amabini kwindawo ahlala kuyo. Loo maNgqina abanjwa aza agwetywa iminyaka emithandathu entolongweni. Emva kokuba ekhululwe, agoduka, kodwa akabonisa nzondo kuloo mfundisi. UVasylyna waqonda ukuba loo maNgqina abathanda ngokwenene abamelwane bawo. Echukumisekile, wafunda iBhayibhile namaNgqina kaYehova ibe wabhaptizwa. Uthi: “Ndiyambulela uYehova ngokuba ndiyifumene indlela esa kubomi obungunaphakade.”

Ukugxothelwa ERashiya

Iinyaniso zeBhayibhile ezivakaliswa ngamaNgqina kaYehova zazingqubana neembono zokungakholelwa kuThixo zolawulo lwamaKomanisi. Ekubeni elungelelene kakuhle, amaNgqina ashicilela aza asasaza ngokufihlakeleyo uncwadi olwalukhuthaza uBukumkani bukaThixo. Ukongezelela, ayesasaza iimfundiso zeBhayibhile kubamelwane nezalamane. Ukususela kowe-1947 ukusa kowe-1950, abasemagunyeni babamba amaNgqina angaphezu kwe-1 000. Sekunjalo, abazalwana baqhubeka besanda. Ngoko ke, ngowe-1951 abasemagunyeni balungiselela ngokufihlakeleyo iqhinga ababecinga ukuba liya kubatshayela abantu bakaThixo. Loo maNgqina aseleyo babeza kuwathumela kwiikhilomitha ezingama-5 000 ngasempuma, kude kwiSiberia yaseRashiya.

NgoAprili 8, 1951, ngamaNgqina angaphezu kwama-6 100 awathatyathwa entshona Ukraine athunyelwa eSiberia. Kwasekuseni, kumzi weNgqina ngalinye kwagaleleka iilori zamajoni enika loo ntsapho iiyure ezimbini nje kuphela zokuba ipakishe zonke izinto zayo ize ingene endleleni. Zizinto ezibalulekileyo zobuqu kuphela ezazinokuthatyathwa. Wonk’ ubani ofunyenwe kuloo mizi wathatyathwa—amadoda, abafazi, nabantwana. Kwakungekho namnye uxolelwayo ngenxa yokwaluphala okanye impilo enkenenkene. Ngephanyazo, ngamininye bafakwa kumakhareji kaloliwe bangena endleleni.

Abo babengekho ekhaya ngelo xesha basala ngasemva, ibe abasemagunyeni abazange baye kubakhangela. Abanye kubo bafaka izicelo ezisemthethweni kwabasemagunyeni ukuze baye kudityaniswa nezo ntsapho zabo zigxothiweyo. Abasemagunyeni abazange baziphendule ezo zicelo, bengazange babaxelele nokuba zithunyelwe phi na izalamane zabo.

Ngaphandle kwalawo aseUkraine, amanye amaNgqina awagxothwayo ngawaseMoldavia, entshona Belarus, eLithuania, eLatvia, nase-Estonia. Edibene ngamaNgqina amalunga nama-9 500 awagxothwayo kuloo mazwana mathandathu. Athunyelwa ngamakhareji kaloliwe ephelekwa ngumkhosi, awayebizwa ngokuba zizindlu zamathole, kuba ngokuqhelekileyo loo makhareji ayesetyenziselwa ukuthutha iinkomo.

Akukho namnye kuloo maNgqina owayesazi ukuba basiwa phi. Kolo hambo lwawo lude, ayethandaza, evuma iingoma yaye encedana. Amanye axhoma amalaphu ngaphandle kuloo makhareji, ezazisa ngala mazwi: “SingamaNgqina kaYehova aseVolyn” okanye “SingamaNgqina kaYehova aseLvov.” Xa abo loliwe bemise kwizikhululo zabo apho endleleni, ayebona abanye oololiwe abanaloo mibhalo ifanayo bevela kwezinye iindawo zasentshona Ukraine. Oku kwanceda abazalwana baqonda ukuba namanye amaNgqina kwezinye iindawo ayagxothwa. Olo “nxibelelwano” lwabomeleza abazalwana kwezo veki zimbini ukusa kwezintathu behamba ngololiwe ukuya eSiberia.

Oko kwakugqalwa njengokuwagxotha ngokupheleleyo. Kwakucetywe ukuba amaNgqina kaYehova angaze avunyelwe ayishiye iSiberia. Kwafuneka aye kuvela rhoqo kwiiofisi zokubhalisa, nakuba ayengabanjwanga. Ukuba kukho nabani na ongakwenzanga oko, lowo wayegwetywa iminyaka eliqela entolongweni.

Ukufika kwawo apho, amanye othulwa nje ehlathini, anikwa amazembe ukuze agawule imithi azilungiselele iindawo zokuhlala aze azifunele nezinto zokuphila. Ukuze asinde kubusika beminyaka embalwa yokuqala, amaNgqina ayesoloko esomba emhlabeni azenzele amakhusi afulelwe ngeesoyi zomhlaba.

UHryhorii Melnyk, ngoku okhonza njengomdala eCrimea, ukhumbula oku: “Emva kokubanjwa kodade wethu ngowe-1947, ndandisoloko ndithatyathwa ndiye kuncinwa ngabasemagunyeni. Babendibetha ngeentonga. Izihlandlo ezininzi babendayamisa ngodonga iiyure ezili-16. Konke oku kwakusenzelwa ukundinyanzela ukuba ndinikele ubungqina bobuxoki nxamnye nodade wethu omdala owayeliNgqina. Ndandineminyaka eli-16 ubudala. Ngenxa yokuba ndalayo ukunikela ubungqina nxamnye naye, abasemagunyeni basekuhlaleni babengandithandi yaye babefuna ukundibulala.

“Ngoko, kwathi kwakufika unyaka we-1951, sathunyelwa eSiberia, nakuba mna nabaninawa bam ababini, nodade wethu omncinane sasiziinkedama. Abazali bethu babefile, ibe umkhuluwa wam nodade wethu omkhulu babetsala izigwebo zeminyaka elishumi entolongweni ngenxa yenyaniso. Xa ndandineminyaka engama-20 ubudala, ndandisele ndithwele imbopheleleko yokunyamekela abaninawa bam ababini nodade wethu.

“Ndihlala ndiyikhumbula iminyaka emibini yokuqala eSiberia, xa sasiphila ngeetapile neti. Sasiphungela iti kwiipleyiti zesuphu, ekubeni iikomityi yayizizinto zodidi ngelo xesha. Kodwa ngokomoya ndandanelisekile. Kwiintsuku zokuqala sifikile apho, ndaqalisa ukuqhuba iintlanganiso zesidlangalala. Kamva, saqalisa iSikolo Sobulungiseleli Sobuthixo. Kwakungelula kum ukuphumeza ezo mbopheleleko ngenxa yomsebenzi oqobayo ekwakufuneka ndiwenze ukuze ndinyamekele abaninawa bam nodade wethu.” Phezu kwabo nje obo bunzima, intsapho yakwaMelnyk yahlala ithembekile kuYehova nakwintlangano yakhe.

Befuna ukuthintela unxibelelwano phakathi kwamaNgqina, awayesandul’ ukufika nabantu balapho, abasemagunyeni eSiberia basasaza amarhe okuba eSiberia kuza izidla-bantu. Emva kokuba lifikile elinye iqela lamaNgqina, kwafuneka lilinde iintsuku eziliqela ukuze lifumane izindlu kwiidolophana zalapho. Ngoko, ngaphandle kwezindlu ahlala phantsi ngakunxweme olunomkhenkce loMlambo iChulym. Nangona kwakuphakathi kuAprili, kwakusekho ikhephu elininzi emhlabeni. Abazalwana babasa isithatha somlilo, botha, bevuma iingoma, bethandaza yaye bebaliselana amava olo hambo lwabo. Okwabamangalisayo kukuba, akukho namnye kubantu balapho oweza kubo. Kunoko, bavala zonk’ iingcango neefestile zezindlu zabo, bengawamemi amaNgqina. Exhobe ngamazembe, kusuku lwesithathu amakroti aya kumaNgqina aza athetha nawo. Ekuqaleni, ayecinga ukuba kufike izidla-bantu ngokwenene! Kodwa kungekudala aqonda ukuba akuyonyaniso oko.

Ngowe-1951 abasemagunyeni bazama ukugxotha amaNgqina aseTranscarpathia. Babesele beze namakhareji angenanto. Noko ke, eso sigqibo sokugxotha abazalwana sajikwa ngezizathu ezingaziwayo. ITranscarpathia yaba ngomnye wemimandla ephambili olwaluveliswa kuyo uncwadi lweSoviet Union yonke ebudeni bokuvalwa umlomo.

Umanyano Luhlala Lukho

Ngenxa yokuba abazalwana abaninzi babesiwe eSiberia, inkoliso yabo babesele yaphulukana nonxibelelwano nentlangano. Ngokomzekelo, uMariya Hrechyna waseChernovtsy wahlala iminyaka engaphezu kwemithandathu enganxibelelani nentlangano okanye amanye amakholwa. Sekunjalo, waqhubeka ethembele kuYehova waza wahlala ethembekile. Ekubeni abazalwana abaninzi babebanjiwe okanye begxothiwe, ukususela ngowe-1951 de kwaba phakathi kweyee-1960, kwafuneka oodade bakhokele kumabandla amaninzi.

Njengengqina lokuzibonela ezo ziganeko, uMichael Dasevich ukhumbula oku: “Ukuthunyelwa eSiberia akuzange kundichaphazele ngokungqalileyo kuba xa kwakusenziwa uludwe lwabo baza kugxothwa, ndandiseseRashiya, ndithothoza entolongweni. Kungekudala emva koko ndabuyela eUkraine, inkoliso yamaNgqina endawo yam yayithunyelwe eSiberia. Ngoko kwafuneka ndikhangele loo maNgqina ayephulukene nonxibelelwano nentlangano ndize ndiwahlanganise kumaqela ezifundo zencwadi nasemabandleni. Oko kwathetha ukuba ndiqalise iimbopheleleko zomveleli wesiphaluka, nangona kwakungekho mntu undabele ukwenza loo msebenzi. Nyanga nganye ndandityelela onke amabandla, ndiqokelele ingxelo yaye ndihambisa uncwadi esisenalo kwibandla ngalinye. Ngokufuthi, oodade wethu babesenza umsebenzi wezicaka zebandla, yaye kwezinye iindawo babephumeza iimbopheleleko zezicaka zesiphaluka, ekubeni babengekho abazalwana. Ukuze sikhuseleke, zonk’ iintlanganiso zezicaka zamabandla akwisiphaluka sethu sasiziqhubela emangcwabeni ebusuku. Sasisazi ukuba ngokuqhelekileyo abantu bayaboyika abafileyo, ngoko sasiqinisekile ukuba akukho bani unokuza asiphazamise. Ngokuqhelekileyo, sasisebeza xa sithetha kwezo ntlanganiso. Kwesinye isihlandlo, sasebezela phezulu, ibe amadoda amabini awayedlula apho emangcwabeni asimbela isinqe eqwela nawokugqibela. Inokuba ayecinga ukuba kuthetha abafileyo!”

Emva kokugxothwa kwakhe ngowe-1951, uMykola Tsyba owayesisicaka selizwe ngelo xesha, waqhubeka esebenza ngokufihlakeleyo kwinqaba ephantsi komhlaba eshicilela uncwadi lweBhayibhile. Ngowe-1952 abezokhuselo bayifumanisa loo ndawo wayekuyo baza bambamba, ibe wachitha iminyaka emininzi entolongweni. UMzalwan’ uTsyba wahlala ethembekile de kwasekufeni kwakhe ngowe-1978. Ngaphandle koMzalwan’ uTsyba, kukho iqela labazalwana ababemncedisa ababanjwayo.

Ngelo xesha abazalwana babengafumani lunxibelelwano luvela ngaphandle. Ngenxa yoko, babengakwazi ukufumana uncwadi kwangexesha. Ngaxa lithile, abazalwana abaliqela babekwazi ukufumana isixa samaphephancwadi IMboniselo ngesiRomania kwiminyaka yowe-1945 ukusa kowe-1949. Abazalwana basekuhlaleni babewaguqulela ngesiUkraine nesiRashiya.

Loo maNgqina aseUkraine ayengagxothwanga okanye abanjwe abonisa inkxalabo enzulu ngabo akholwa nabo. Enza imigudu emikhulu eqokelela uludwe lwabo babesentolongweni, ukuze abathumelele impahla eshushu, ukutya, noncwadi. Ngokomzekelo, amaNgqina kaYehova aseTranscarpathia agcina unxibelelwano nabazalwana ababekwiinkampu zentolongo ezingama-54 kuyo yonke iSoviet Union. Amabandla amaninzi enza ibhokisi yeminikelo eyongezelelekileyo eyayilungiselelwe “IGood Hopes.” Imali eqokelelwe kule bhokisi yayisetyenziselwa ukulungiselela abo basentolongweni. Xa kufika iileta zoxabiso olufudumeleyo kunye nengxelo yenkonzo yasentsimini zivela kwiintolongo nakwiinkampu, babekhuthazeka kakhulu abo bazalwana bathembekileyo nabazincamayo bangavalelwanga.

Ukuphucuka Kweemeko

Emva kokufa kweNgqwayingqwayi yaseSoviet uJoseph Stalin, saphucuka isimo sengqondo ngakumaNgqina. Ukususela ngowe-1953 kwabhengezwa ukuxolelwa eU.S.S.R., nto leyo eyenza bakhululwa abanye abazalwana. Kamva kwasekwa iKomishoni kaRhulumente, ephonononga ngokutsha izigwebo. Ngenxa yoko, abazalwana abaninzi bakhululwa, ngoxa abanye bancitshiselwa izigwebo zabo.

Kwiminyaka elandelayo, inkoliso yamaNgqina yakhululwa. Noko ke oko kuxolelwa akuzange kusebenze kwabo babegxothwe ngowe-1951. Kwezinye iinkampu zentolongo, inani labo baye bangamaNgqina kaYehova laba likhulu kunelo lamaNgqina awavalelwayo. Olo lwando lwabakhuthaza abazalwana baqiniseka ukuba ngokwenene uYehova ubasikelele ngokuma kwabo beqinile ebudeni belo xesha.

Emva kokuba bekhululwe, abazalwana abaninzi babuyela emakhaya. Kwenziwa umgudu omkhulu wokufumana loo maNgqina ayephulukene nonxibelelwano nentlangano. UVolodymyr Volobuyev, owayehlala kummandla waseDonetsk, ukhumbula oku: “De kube sekubanjweni kwam kwakhona ngowe-1958, ndakwazi ukufumana ndaza ndanceda amaNgqina amalunga ne-160 awayahlukene nentlangano.”

Oko kuxolelwa kwakungathethi ukuba abazalwana bafumene inkululeko engakumbi yokushumayela. Abazalwana noodade abaninzi bakhululwa kodwa kungekudala baphinda bafumana izigwebo ezide zentolongo. Ngokomzekelo, uMariya Tomilko waseDnepropetrovsk wakhonza iminyaka esi-8 kuphela yesigwebo sakhe seminyaka engama-25 entolongweni ngenxa yoko kuxolelwa kwangoMatshi 1955. Noko ke, kwiminyaka emithathu kamva waphinda wagwetywa iminyaka elishumi entolongweni nemihlanu ngaphandle kwelo lizwe. Kwakutheni? Isigwebo sakhe senkundla sifundeka ngolu hlobo: “Ugcine waza wafunda uncwadi nemibhalo ekhutshelweyo yobuYehova” ibe “uqhubeka esenza ngokukhutheleyo umsebenzi, esasaza iinkolelo zobuYehova kubamelwane bakhe.” Kwiminyaka esixhenxe kamva wakhululwa ngenxa yesiphene. UDade Tomilko wanyamezela zonke iintlobo zovavanyo ibe uye wahlala ethembekile de kube namhlanje.

Uthando Aluze Lutshitshe

Abasemagunyeni batyhalela phambili nomgudu okhethekileyo ukuze baqhekeze iintsapho zamaNgqina kaYehova. Xa bethetha namaNgqina abezokhuselo babesoloko bewakhethisa oku: UThixo okanye intsapho. Noko ke, kwiimeko ezininzi abantu bakaYehova bangqina ukunyaniseka kwabo kuYehova naphantsi kwezona mvavanyo ziqatha.

UHanna Bokoch, waseTranscarpathia, omyeni wakhe uNutsu, wabanjwa ngenxa yokushumayela ngenzondelelo, ukhumbula oku: “Xa wayesentolongweni, umyeni wam wanyamezela ugculelo olukhulu. Wachitha iinyanga ezintandathu evalelwe yedwa, kungekho bhedi, isisitulo esinye nje kuphela. Wayengonjwa ngeyona ndlela evinjwa nokutya. Kwiinyanga nje ezimbalwa, wanqina walugodo ubunzima bakhe baziikhilogram ezingama-36, isiqingatha sobunzima bakhe obuqhelekileyo.”

Umfazi wakhe othembekileyo wasala yedwa nentombi yabo eselula. Abasemagunyeni bamphathel’ imbengwane uMzalwan’ uBokoch befuna alalanise kukholo lwakhe, asebenzisane nabo. Kwathiwa makakhethe phakathi kwentsapho yakhe nokufa. UMzalwan’ uBokoch akazange azingcatshe iinkolelo zakhe, wahlala ethembekile kuYehova nentlangano Yakhe. Wachitha iminyaka eli-11 entolongweni, ibe emva kokuba ekhululwe, waqhubeka nomsebenzi wakhe wobuKristu njengomdala waza kamva waba ngumveleli wesiphaluka de kwasa ekufeni kwakhe ngowe-1988. Wayesoloko efumana amandla kumazwi eNdumiso 91:2 athi: “Ndiza kuthi kuYehova: ‘Uyindawo yam yokusabela negwiba lam, Thixo wam, endiza kukholosa ngaye.’”

Cinga ngomnye umzekelo wokunyamezela okukhulu. UYurii Popsha wayengumveleli ohambahambayo eTranscarpathia. Kwiintsuku ezilishumi emva komtshato wakhe wabanjwa. Kunokuba aye kwiholide yabasandul’ ukutshata, wachitha iminyaka elishumi kwintolongo yaseMordvinia, eRashiya. Umfazi wakhe othembekileyo, uMariya, wamtyelela izihlandlo ezili-14, sihlandlo ngasinye ehamba iikhilomitha ezili-1 500 ukuya kuphela. Sithethanje, uMzalwan’ uPopsha ukhonza njengomdala kwelinye lamabandla aseTranscarpathia, ibe uxhaswa ngokuthembeka nangothando ngumfazi wakhe othandekayo uMariya.

Kanti omnye umzekelo wokunyamezela phantsi kobunzima ngowesinye isibini esitshatileyo, uOleksii noLydia Kurdas, ababehlala kwisixeko saseZaporozh’ye. NgoMatshi 1958 babanjwa, kwiintsuku ezili-17 emva kokuzalwa kwentombi yabo, uHalyna. Kwabanjwa nabanye abali-14 kuloo mmandla. UMzalwan’ uKurdas wagwetywa iminyaka engama-25 kwiinkampu zentolongo, ibe umfazi wakhe wagwetywa iminyaka eli-10. Bohlulwa—UOleksii wasiwa kwiinkampu zaseMordvinia, yena uLydia, nentombi yabo encinane, bathunyelwa eSiberia.

Le yindlela uDade Kurdas aluchaza ngayo olo hambo lweeveki ezintathu lusuka eUkraine ukuya eSiberia: “Lwalulubi gqitha. Apho yayindim nentombi yam; inguNadiya Vyshniak, nosana lwakhe olwazalelwa entolongweni kwiintsuku nje ezimbalwa ngaphambi koko ebudeni bokuncinwa kwethu; nabanye oodade ababini. Sobathandathu safakwa kwikhareji elilungiselelwe ukuthutha amabanjwa amabini nje kuphela. Salalisa abantwana bethu emazantsi aloo ndawo yokulala, saza thina sachopha kulo lonke olo hambo sixinene kumantla endawo yokulala. Sasiphila ngesonka, intlanzi eqwayitwe ngetyuwa, kunye namanzi. Ukutya kwakulungiselelwa loo mabanjwa mane madala kuphela. Asizange sinikwe nakuphi na ukutya kwabantwana bethu.

“Sakufika apho, ndafakwa kwisibhedlele sentolongo nosana lwam. Apho ndadibana noodade abaninzi ndabaxelela ukuba umcuphi uye wandoyikisa ngokuthabatha usana lwam aluse kumzi weenkedama. Ngandlel’ ithile, abo dade bakwazi ukwazisa abazalwana baseSiberia ngaloo ngxaki yam. Kamva, uTamara Buriak (ngoku ongowakwaRavliuk), owayeneminyaka eli-18 ubudala, wafika kwisibhedlele saloo nkampu eze kulanda intombi yam, uHalyna. Ndandiqala ukumbona uTamara. Kwakubuhlungu gqitha ukunikela ngentombazana yam endiyithandayo kumntu endingazange ndimbone, nakuba wayengudade wethu wokomoya. Noko ke, ndaxola xa abo dade babekuloo nkampu bandichazela ngokuthembeka kwentsapho yakwaBuriak. Olo sana lwam lwaluneenyanga ezintlanu neentsuku ezili-18 ubudala xa ndandilunikela ezandleni zikaTamara. Kwadlula iminyaka esixhenxe ngaphambi kokuba siphinde sidibane nentombi yam!

“Ngowe-1959 iU.S.S.R. yabhengeza ukuxolelwa kwamabanjwa. Kwakusenziwa kumabhinqa anabantwana abaneminyaka engaphantsi kwesixhenxe ubudala. Kodwa abaphathi baloo ntolongo bathi ndifanele ndiqale ndilahle ukholo lwam. Ndakukhaba oko, ngoko kwafuneka ndisale kuloo nkampu yentolongo.”

UMzalwan’ uKurdas wakhululwa ngowe-1968, eneminyaka engama-43 ubudala. Watsala iminyaka eli-15 entolongweni ngenxa yenyaniso, kuquka iminyaka esi-8 kwintolongo ekhethekileyo eluqilima. Ekugqibeleni, wabuyela eUkraine kumfazi nentombi yakhe. Intsapho yabo yamanyana ekugqibeleni. Akudibana noyise, uHalyna wasingatha phezu kwakhe wathi: “Tata! Andizange ndikwazi ukusingatha kuwe kangangeminyaka emininzi, ngoku ndiza kwenzela nela xesha landiphosayo.”

Emva koko, intsapho kaKurdas yayingcuchalaza, kuba yayisoloko igxothwa ngabasemagunyeni kwindawo ehlala kuyo. Kuqala yahlala kwimpuma Ukraine, emva koko yaya entshona Georgia, naseCiscaucasia. Ekugqibeleni, yafudukela eKharkov, apho isahleli khona ngokonwaba. UHalyna ngoku utshatile. Bonke baqhubeka bekhonza uThixo wabo, uYehova ngokuthembeka.

Umzekelo Obalaseleyo Wokholo

Maxa wambi, iimvavanyo eziqatha zokholo zazithabatha iinyanga, iminyaka nkqu namashumi eminyaka. Cinga ngomnye umzekelo. UYurii Kopos wazalwa waza wakhulela kufuphi nedolophu entle iKhust, eTranscarpathia. Eneminyaka engama-25 ubudala, ngowe-1938, waba ngomnye wamaNgqina kaYehova. Ngowe-1940, ebudeni beMfazwe Yehlabathi II, wagwetywa iinyanga ezisibhozo entolongweni ngenxa yokwala ukungenelela kumkhosi waseHungary owawuxhasa ulawulo lwamaNazi. ETranscarpathia, ngelo xesha umthetho walapho wawungakuvumeli ukubulawa kwamabanjwa ala ukuya emfazweni ngenxa yokholo. Ngoko, abazalwana babethunyelwa phambili edabini apho umthetho wamaNazi wawukuvumela oko kubulawa. Ephelekwa ngumkhosi, ngowe-1942, uMzalwan’ uKopos namanye amabanjwa kuquka amaNgqina angama-21 bathunyelwa ngaphambili edabini kufuphi naseStalingrad, eRashiya. Bathunyelwa apho ukuze babulawe. Noko ke, kungekudala befikile apho umkhosi weSoviet waqalisa ukuhlasela, waza wathimba imikhosi yaseJamani nabo bazalwana. Loo maNgqina asiwa kwinkampu yentolongo yaseSoviet, apho ahlala khona de kwangowe-1946 ukukhululwa kwawo.

UMzalwan’ uKopos wagoduka, waza waqhubeka nomsebenzi wokushumayela ngenkuthalo kwintsimi yakowabo. Ngenxa yaloo msebenzi, ngowe-1950 abaphathi baseSoviet bamgweba iminyaka engama-25 kwinkampu yentolongo. Noko ke, ngenxa yokuxolelwa kwamabanjwa wakhululwa emva kweminyaka emithandathu.

Emva kokukhululwa kwakhe, uMzalwan’ uKopos, ngoku owayesele eneminyaka engama-44 ubudala, waceba ukutshata noHanna Shyshko. Naye wayeliNgqina ibe wayesandul’ ukukhululwa entolongweni emva kokutsala isigwebo seminyaka elishumi. Bafaka isicelo sokubhalisa umtshato wabo. Kubusuku obungaphambi komtshato wabo, baphinda babanjwa baza bagwetywa iminyaka elishumi kwinkampu yentolongo. Noko ke, basinda kubo bonke obo bunzima, ibe uthando lwabo lwanyamezela zonke izinto, kuquka iminyaka elishumi yokubambezeleka kumtshato wabo. (1 Kor. 13:7) Ekugqibeleni, emva kokukhululwa kwabo ngowe-1967, bada batshata.

Imbali yabo ayipheleli apho. Ngowe-1973, uMzalwan’ uKopos, ngoku owayesele eneminyaka engama-60 ubudala, waphinda wabanjwa wagwetywa iminyaka emihlanu kwinkampu yentolongo nemihlanu ngaphandle kwelo lizwe. Watsala eso sigwebo nomfazi wakhe, uHanna, eSiberia, kwiikhilomitha ezingama-5 000 ukusuka kwidolophu yakowabo iKhust. Zazingekho izinto eziya apho, iinqwelo-mafutha, uloliwe, kusiyiwa ngenqwelo-moya kuphela. Ngowe-1983, uMzalwan’ uKopos kunye nomfazi wakhe babuyela ekhaya eKhust. UHanna wafa ngowe-1989, waza yena waqhubeka ekhonza uYehova ngokuthembeka de kwasekufeni kwakhe ngowe-1997. Iyonke iminyaka eyathothozwa nguMzalwan’ uKopos ngama-27, kwiintolongo ezahlukeneyo nemi-5 ngaphandle kwelo lizwe—isimbuku seminyaka engama-32.

Loo ndoda ithozamileyo nelulamileyo yachitha phantse isahlulo sesithathu senkulungwane kwiintolongo neenkampu zomsebenzi zaseSoviet. Umzekelo wokholo onjalo ukubalasela ngokucacileyo ubonisa ukuba iintshaba azinakuyitshabalalisa ingqibelelo yabakhonzi abanyanisekileyo bakaThixo.

Iyantlukwano Yethutyana

Utshaba lwabantu uSathana uMtyholi, lusebenzisa iindlela ezininzi zokulwa nabo baqhelisela unqulo lokwenyaniso. Ngaphandle kokubangela ukuba baxhatshazwe emzimbeni, uzama ukukhuthaza amathandabuzo aze abangele iyantlukwano phakathi kwabazalwana. Ubungqina boku bucaca ngokukodwa kwimbali yamaNgqina kaYehova aseUkraine.

Kwiminyaka yee-1950, amaNgqina kaYehova ayethe gqolo ehlaselwa. Abasemagunyeni bathi gqolo begqogqa ezo ndawo kushicilelwa kuzo uncwadi. Abazalwana abanembopheleleko babebanjwa rhoqo. Ngenxa yoku, abazalwana ababekhokela ekongameleni umsebenzi babetshintshwa ngokuphindaphindiweyo, nkqu nokuba kusemva kweenyanga ezimbalwa.

Besakubona ukuba amaNgqina kaYehova akanakuvalwa umlomo kukugxothwa, ukubanjwa, ukuxhatshazwa emzimbeni nokuthuthunjiswa, abezokhuselo bazama maqhinga wambi. Bazama ukuyahlula phakathi intlangano ngokuhlwayela imbewu yokungathembani phakathi kwabazalwana.

Phakathi kweyee-1950, abezokhuselo bayeka ukubabamba kwangoko bonke abazalwana abakhutheleyo nabaneembopheleleko baza baqalisa ukubacupha. Aba bazalwana babesoloko bebizelwa kwiiofisi zabezokhuselo. Babexelelwa ukuba babeya kunikwa imali baze baxhamle umsebenzi ophambili ukuba basebenzisana nabo. Ukwala loo ntsebenziswano kwakuza kukhokelela ekuvalelweni nasekuhlazisweni. Bengenalukholo kuThixo, abambalwa balalanisa ngenxa yokoyika okanye ukubawa. Baqhubeka bekwintlangano, bedlulisela inkcazelo kwabezokhuselo ngemisebenzi yamaNgqina kaYehova. Kwakhona, bethobela baphumeza imiyalelo yabasemagunyeni, besenza abazalwana abamsulwa babonakale njengabangcatshi emehlweni abanye abazalwana abathembekileyo. Konke oku kwavusa umoya wokungathembani phakathi kwabazalwana abaninzi.

UPavlo Ziatek wabandezeleka kakhulu ngenxa yoko kungathembani nokurhanelwa ngaphandle kwezizathu. Lo mzalwana uthobekileyo nonenzondelelo wachitha iminyaka emininzi kwiinkampu zentolongo wanikela nobomi bakhe bonke kwinkonzo kaYehova.

Phakathi kweminyaka yee-1940, uMzalwan’ uZiatek wayekhonza njengesicaka selizwe. Wabanjwa, wachitha iminyaka elishumi kwintolongo yasentshona Ukraine. Ngowe-1956 wakhululwa waza ngowe-1957 waqala apho ebeyeke khona kumsebenzi wakhe njengesicaka selizwe. Ikomiti yelizwe yayiquka abazalwana abasibhozo ngaphandle koMzalwan’ uZiatek: abane yayingabaseSiberia nabane baseUkraine. Ngabo bazalwana ababesongamela umsebenzi wokushunyayelwa koBukumkani kuyo yonke iU.S.S.R.

Ngenxa yokuqelelana kwezo ndawo nentshutshiso ethe gqolo, aba bazalwana babengakwazi ukunxibelelana kakuhle okanye babe neentlanganiso rhoqo. Ethubeni, kwasasazeka amarhe nentlebendwane ngokuphathelele uMzalwan’ uZiatek namanye amalungu ekomiti. Kwathiwa uMzalwan’ uZiatek usebenzisana nabezokhuselo, kangangokuba uzakhele ipomakazi lendlu ngemali ebifanele isetyenziselwe ukuxhasa umsebenzi wokunikela ubungqina, yaye wabonwa egaxele ezomkhosi. Ezo ngxelo zaqokelelwa zabhalwa encwadini zaza zathunyelwa kubaveleli besithili nabesiphaluka eSiberia. Akukho nasinye esasiyinyaniso kwezo zityholo.

Ekugqibeleni, ngoMatshi 1959 abanye abaveleli besiphaluka baseSiberia bayeka ukuthumela ingxelo yabo yenkonzo yasentsimini kwikomiti yelizwe. Abo bazahlulayo benjenjalo bengakhange badibane nekomkhulu. Kwakhona, abazange balandele ulwalathiso lwabazalwana basekuhlaleni abamiselwe ukongamela. Oko kwabangela iyantlukwano phakathi kwamaNgqina kaYehova aseU.S.S.R. kangangeminyaka.

Abo bazalwana bazahluleyo bacenga abanye abaveleli besiphaluka ukuba nabo benjenjalo. Ngenxa yoko, iingxelo zenyanga zenkonzo yasentsimini zezinye iziphaluka zathunyelwa kwabo bazalwana bazahluleyo kunokuba zithunyelwe kwikomiti emiselweyo yelizwe. Abazalwana abaninzi emabandleni babengazi ukuba iingxelo zabo zenkonzo yasentsimini azifikeleli kwikomiti yelizwe, ngoko ke umsebenzi wamabandla awuzange uchaphazeleke. UMzalwan’ uZiatek waquqa eSiberia, emva koko iziphaluka ezininzi zaphinda zathumela iingxelo zazo zenkonzo yasentsimini kwikomiti yelizwe.

Ukubuyela Kwintlangano KaThixo

NgoJanuwari 1, 1961, ngoxa wayevela kuhambo lwenkonzo eSiberia, uMzalwan’ uZiatek wabanjwa kuloliwe. Waphinda wagwetywa iminyaka elishumi entolongweni, kwesi isihlandlo wavalelwa kwinkampu yentolongo “ekhethekileyo” eMordvinia, eRashiya. Kwakutheni ukuze leyo ibe yinkampu “ekhethekileyo”?

Ukuthothoza kwiinkampu zentolongo ezahlukeneyo kwanika abazalwana ithuba lokushumayela kwamanye amabanjwa, ibe amaninzi aba ngamaNgqina. Oku kwabacaphukisa abasemagunyeni. Ngenxa yoko, bagqiba ekubeni baqokelele loo maNgqina aphambili kwinkampu enye ukuze angakwazi ukushumayela kwabanye. Ngasekupheleni kweyee-1950, ngabazalwana abangaphezu kwama-400 noodade abamalunga ne-100 abaqokelelwa kwiinkampu zentolongo ezahlukeneyo zaseU.S.S.R. bafakwa kwiinkampu zentolongo ezimbini zaseMordvinia. Phakathi kwaloo mabanjwa kwakukho abazalwana abakwikomiti yelizwe kunye nabaveleli besiphaluka nabesithili ababezahlule kwijelo lonxibelelwano likaYehova. Xa abo bazalwana babona ukuba uMzalwan’ uZiatek naye wayebanjiwe, baqonda ukuba babengenazo izizathu ezivakalayo zokukholelwa ukuba wayesebenzisana nabezokhuselo.

Ngelo xesha, ngenxa yokubanjwa kukaMzalwan’ uZiatek kwakusele kwenziwe amalungiselelo okuba uIvan Pashkovskyi athabathe umsebenzi wokuba sisicaka selizwe. Phakathi ngowe-1961, uMzalwan’ uPashkovskyi wadibana nabazalwana abaneembopheleleko basePoland wabachazela ukuba kukho iyantlukwano phakathi kwabazalwana baseU.S.S.R. Wabuza enoba uNathan H. Knorr wekomkhulu laseBrooklyn wayengenakubhala ileta ebonisa ukumxhasa uMzalwan’ uZiatek. Kamva, ngowe-1962, uMzalwan’ uPashkovskyi wafumana umbhalo weleta eya kumaNgqina kaYehova aseU.S.S.R., yomhla kaMeyi 18, 1962. Yachaza oku: “Ndisoloko ndisiva iindaba ezibonisa ukuba nina bazalwana baseU.S.S.R. niqhubeka nilondoloze umnqweno onamandla wokuba ngabakhonzi abathembekileyo bakaYehova uThixo. Kodwa abanye kuni bayoyiswa kukulondoloza umanyano nabazalwana benu. Ndikholelwa ukuba oku kubangelwa kukungabi nalo unxibelelwano olufanelekileyo nokusasazwa ngabom kwamabali obuxoki ngabathile abachasene noYehova uThixo. Ngoko ndinibhalela ukuze nazi ukuba uMbutho ugqala uMzalwan’ uPavlo Ziatek nabo bazalwana basebenza naye njengabaveleli bamaKristu baseU.S.S.R. Ezo mbono zokulalanisa nokugabadela zifanele ziphetshwe. Sifanele sibe ngabaphilileyo engqondweni, sibe nengqiqo, sizivumelanise neemeko size sibambelele ngokuqinileyo kwimigaqo kaThixo.”

Loo leta kunye nesibakala sokuba uMzalwan’ uZiatek wagwetywa iminyaka elishumi zanceda zamanyanisa abantu bakaYehova eU.S.S.R. Abazalwana abaninzi ababezahlule ezintolongweni nakwiinkampu zentolongo baphinda bamanyana nentlangano. Baqonda ukuba uMzalwan’ uZiatek akazange angcatshe intlangano ibe ikomkhulu limxhasa ngokupheleleyo. Xa babebhalela iintsapho nabahlobo babo, abo bazalwana babanjiweyo bakhuthaza abadala bamabandla abo alapho ukuba baqhagamshelane nabazalwana abathembekileyo baze baqalise ukufaka ingxelo yomsebenzi wabo wenkonzo yasentsimini. Kwiminyaka elishumi elandelayo, inkoliso yabo bazalwana babezahlule yalandela elo cebiso, kodwa njengoko siza kubona, ukufikelela olo sukelo lomanyano kwaba ngumsebenzi onzima.

Ukuhlala Benyanisekile Kwiinkampu Zentolongo

Ubomi kwiinkampu zentolongo babunzima. Sekunjalo, amaNgqina abanjiweyo ayebonakala ebhetele ngakumbi kunamanye amabanjwa ngenxa yemeko yawo yokomoya. Ayenoncwadi yaye enxibelelana namanye amakholwa aqolileyo. Konke oku kwabangela umoya omhle nokukhula ngokomoya. Kwenye inkampu yentolongo, oodade bangcwaba olunye uncwadi emhlabeni ngobona buchule kangangokuba kwakungekho namnye owayenokulufumana. Omnye umhloli wakha wathi, ukuze lususwe lonke olo “ncwadi lunxamnye neSoviet” apho, kufuneka bembe wonke umhlaba ojikeleze intolongo yabo kangangeemitha ezimbini ubunzulu baze bawele! Abo dade babebanjiwe bawafundisisa kakuhle loo maphephancwadi kangangokuba nangoku, emva kweminyaka engama-50, abanye kubo basakwazi ukucaphula iinxalenye ezithile kwezo Mboniselo.

Abazalwana noodade bahlala benyanisekile kuYehova yaye abazange balalanise imigaqo yeBhayibhile, phezu kwawo nje loo maxesha anzima. UMariya Hrechyna, owachitha iminyaka emihlanu kwiinkampu zentolongo ngenxa yomsebenzi wokushumayela, ubalisa oku: “Xa safumana IMboniselo enenqaku elithi ‘Ubumsulwa NgeNtlonelo Yobungcwele Begazi,’ sagqiba ekubeni singayi kwisidlo sasemini kwigumbi lokutyela laloo nkampu yentolongo xa kutyiwa inyama. Ubukhulu becala, inyama eyayisetyenziswa kwezo nkampu yayingophiswa kakuhle. Wathi akuva isizathu sokuba amaNgqina engayi kwizidlo ezithile zasemini, umphathi waloo ntolongo yethu wagqiba ekubeni asinyanzele ukuze sishiye imigaqo yethu. Wagunyazisa ukuba suku ngalunye kuphekwe inyama kwisidlo sakusasa, kwesasemini, nakwesangokuhlwa. Kangangeeveki ezimbini asizange sitye kwanto ngaphandle kwesonka. Sathembela kuYehova ngokupheleleyo, sisazi ukuba ubona yonk’ into yaye uyazi ukuba sinokunyamezela ixesha elingakanani. Ngasekupheleni kweveki yesibini kutyiwa ‘olo hlobo lokutya,’ umphathi watshintsha walungiselela imifuno, ubisi, nkqu nebhotolo. Sabona ukuba uYehova usikhathelele ngokwenene.”

Ukuncedwa Ukuze Sinyamezele

Xa bethelekiswa namanye amabanjwa, abazalwana bahlala benesimo sengqondo esihle yaye bekhangele phambili ngethemba ebomini. Oko kwabanceda banyamezela iinkxwaleko zeentolongo zaseSoviet.

UMzalwan’ uOleksii Kurdas, owachitha iminyaka emininzi kwezo ntolongo, ubalisa oku: “Into eyandinceda ndanyamezela kukuba nokholo olunzulu kuYehova nakuBukumkani bakhe, ukuba nesabelo kumsebenzi wobuthixo entolongweni, nokuthandaza rhoqo. Enye into eyandincedayo kukweyiseka ukuba ndenza okumkholisayo uYehova. Kwakhona ndazigcina ndixakekile. Ukudakumba yeyona nto ibuhlungu kwiintolongo zonke. Kungabonakalisa ubuntu bakho kubangele isigulo sengqondo. Ngoko, ndazimisela ukuhlala ndixakeke yimibandela yobuthixo. Ndandiodola nayiphi na incwadi ephathelele imbali yehlabathi, ijografi nebhayoloji efumanekayo kwithala lentolongo. Ndandikhangela iinxalenye zazo ezixhasa iimbono zam ngobomi. Ngaloo ndlela ndakwazi ukomeleza ukholo lwam.”

Ngowe-1962, uSerhii Ravliuk wachitha iinyanga ezintathu evalelwe yedwa. Wayengavumelekanga kuthetha naye nabani na, nkqu nabalindi-ntolongo. Ukuze azigcine ephilile engqondweni, waqalisa ukuzikhumbuza zonke izibhalo awayezazi. Wakhumbula iindinyana zeBhayibhile ezingaphezu kwewaka waza wazibhala kumaphetshana ngepensile. Loo pensile wayeyifihla kumgca okrolwe phantsi kumgangatho wentolongo. Kwakhona wakhumbula nemixholo yamanqaku angaphezu kwe-100 amaphephancwadi eMboniselo awawafunda ngaphambili. Wabala imihla yeSikhumbuzo yeminyaka engama-20 elandelayo. Konke oku kwamnceda walondoloza kungekuphela nje imeko yakhe yengqondo kodwa neyokomoya. Kwagcina ukholo lwakhe kuYehova luphilile yaye lomelele.

“Iinkonzo Ezaphunyezwa” Ngabalindi-ntolongo

Phezu kwayo nje inkcaso yabezokhuselo, uncwadi lwethu lwadlula kuyo yonke imiqobo, lufikelela nakubazalwana abasentolongweni. Nabalindi-ntolongo babekuqonda oku yaye babesoloko begqogqa ngokucokisekileyo zonke izisele, bekhangela ngokoqobo zonke iimfanta. Kwakhona, kwilinge labo lokufumana uncwadi, abalindi babesoloko befudusa amabanjwa kwesinye isisele bewasa kwesinye. Xa kusenziwa oko, amabanjwa ayehlolwa ngokucokisekileyo, ibe ukuba kufunyenwe uncwadi, lwaluthinjwa. Abazalwana babekwazi njani ukukhusela uncwadi lungafunyanwa?

Ngokuqhelekileyo, abazalwana babefihla uncwadi lwabo kwimiqamelo, koomandlalo, ezihlangwini naphantsi kwempahla. Kwezinye iinkampu babekhuphela amaphephancwadi eMboniselo kwimibhalo emincinane. Xa amabanjwa ekhutshwa kwesinye isisele esiwa kwesinye, maxa wambi abazalwana babesongela loo maphephancwadi mancinane ngeplastiki bawafihle ngaphantsi kolwimi. Ngaloo ndlela babekwazi ukulondoloza oko kutya kwabo kunqabileyo kokomoya baze baqhubeke besondleka ngokomoya.

UVasyl Bunha wachitha iminyaka emininzi kwiintolongo ngenxa yenyaniso. Ekunye nalowo wayevalelwe naye esiseleni, uPetro Tokar, benza usinga-mphantsi webhokisi yezixhobo zokuchwela. Kuyo, babefihla imibhalo yokoqobo yezo mpapasho zithutyeleziswe zangeniswa entolongweni. Aba bazalwana babengabachweli bentolongo, yaye loo bhokisi yezixhobo babeyinikwa xa bechwela ngaphakathi entolongweni. Xa kuhlolwa loo bhokisi beza kuyithabatha, babewakhupha loo maphephancwadi ukuze akhutshelwe. Emva komsebenzi wosuku, loo maphephancwadi ayebuyiselwa kuloo bhokisi. Umphathi-ntolongo wayeyigcina loo bhokisi ngaphantsi kweelokhari ezintathu emva kweengcango ezimbini ezitshixiweyo, ekubeni isarha, itshizile, nezinye izixhobo zokuchwela zazinokusetyenziswa njengezixhobo zokulwa ngamabanjwa. Ngoko, xa kugqogqwa uncwadi lweBhayibhile, abalindi babengayicingi into yokuhlola loo bhokisi itshixelweyo, kuba yayigcinwa phakathi kwempahla yomphathi-ntolongo.

UMzalwan’ uBunha wafumana enye indawo yokufihla imibhalo yokoqobo yoncwadi. Ekubeni wayenengxaki yamehlo, wayeneqela leendondo zamehlo. Banjwa ngalinye lalivunyelwa ukuba neperi enye kuphela ngexesha. Ezinye iindondo zazigcinwa kwindawo ekhethekileyo, ibe amabanjwa ayezicela xa ezifuna. UMzalwan’ uBunha wazenzela izingxobo ezikhethekileyo iindondo zakhe wafaka kuzo imibhalo emincinane yeempapasho ezikhutshelweyo. Xa abazalwana befuna ukukhuphela amaphephancwadi, uMzalwan’ uBunha wayesuka nje acele abalindi ukuba bamphathele enye iperi yeendondo zamehlo!

Kukho iimeko apho kwakubonakala iziingelosi kuphela ezinokukhusela uncwadi kwizandla zabalindi-ntolongo. UMzalwan’ uBunha ukhumbula xa uCheslav Kazlauskas wazisa izitena zesepha ezingama-20 entolongweni. Isiqingatha sazo sasiphethe iimpapasho zethu. Ehlaba phaya naphaya kwezo zitena zilishumi zaloo sepha, lo mlindi-ntolongo akazange agqabhuze nasinye kwezo zinamaphephancwadi.

Ukuzingisa Kumsebenzi Wokumanyanisa

Ukususela ngowe-1963, abazalwana bekomiti yelizwe babekwazi ukuthumela ingxelo yenkonzo yasentsimini rhoqo eBrooklyn. Kwalungiselelwa nokuba abazalwana bafumane iimpapasho zemibhalo efinyeziweyo. Ngelo xesha, kwakukho iziphaluka ezili-14 kuyo yonke iU.S.S.R., ibe ezi-4 kuzo zaziseUkraine. Njengoko babesanda abantu bakaThixo, kwasekwa izithili ezisixhenxe eUkraine. Kusenzelwa ukhuseleko, sithili ngasinye sasibizwa ngegama lebhinqa. Isithili esikwimpuma Ukraine sasinguAlla; esiseVolyn’, u-Ustina; esaseHalychyna, uLyuba; ibe eTranscarpathia, kwakukho izithili ekuthiwa nguKatya, uKristina, noMasha.

Ngelo xesha, iKGB (iKomiti Yezokhuselo Karhulumente) yaqhubeka namalinge ayo okuphelisa umanyano lwamaNgqina. Intloko yenye iofisi yeKGB yabhalela umphathi wayo oku: “Ngenjongo yokuqinisa iyantlukwano kweli hlelo, sizama ukuyeka ukuba neengcwangu kwiinkokeli zamaYehova, ukuze zingaginywa ncam ngabo zikhonza nabo, yaye sivelise umoya wokungathembani phakathi kwalo. Amagosa eKGB enza amalungiselelo aye aluncedo ekwahluleni eli hlelo langamaqela amabini alwayo. Elinye liqela labalandeli benkokeli yamaYehova uZiatek, ngoku osentolongweni, yaye elinye liqela labo kuthiwa ngabachasi. Oku kuvelisa iimeko ezintle nesiseko seyantlukwano yokungavisisani kwamalungu nokuqhekeka kwale ntlangano.” Yandula ke loo leta yavuma ukuba loo migudu yeKGB ifumana ubunzima. Yaqhubeka yathi: “Indlela ezisabela ngayo iinkokeli zamaYehova kukulwa ngamandla namanyathelo ethu, ngokuzama konke ezinako ukumanyanisa amalungu ale ntlangano.” Ewe, abazalwana baqhubeka nomsebenzi wokumanyanisa, ibe uYehova wayisikelela imigudu yabo.

IKGB yanika abo bazalwana bazahluleyo ileta yobuxoki ngokungathi ivela kuMzalwan’ uKnorr, ixhasa ingcamango yokuseka intlangano yamaNgqina kaYehova eyahlukileyo nezimeleyo. Icaphula isiganeko sokwahlukana kuka-Abraham noLote njengomzekelo ovumela oko kwahlukana kuvela kwijelo lentlangano loo leta yasasazwa kuyo yonke iU.S.S.R.

Abazalwana abathembekileyo bathumela umbhalo waloo leta eBrooklyn, ibe ngowe-1971 bafumana impendulo edandalazisa ukuba loo leta ngusinga leta. Kwileta eyayisiya kubazalwana ababesazahlule kwinxalenye yabantu bakaThixo, uMzalwan’ uKnorr wachaza oku: “Ekuphela kwendlela yokunxibelelana esetyenziswa nguMbutho ngabaveleli abamiselweyo belizwe lenu. Akukho bantu bathile kwilizwe lenu ngaphandle kwabo baveleli bamiselweyo abagunyaziswe naluphi na ukhokelo phakathi kwenu . . . abanquli bokwenyaniso bakaYehova baliqela elimanyeneyo. Ngoko ndinethemba yaye ndithandazela ukuba nonke nibuyele kumanyano lwebandla lamaKristu ngaphantsi kwabaveleli abamiselweyo nokuba sikwazi ukuphinda sibe nesabelo ngokumanyeneyo ekunikeleni ubungqina.”

Loo leta yafeza okuninzi ekumanyaniseni abazalwana. Noko ke, abanye babesazama ukunxibelelana ngokwahlukileyo nekomkhulu, ekubeni babengekalithembi elo jelo lonxibelelwano likhoyo. Ngoko abo bazalwana bazahluleyo bagqiba ekubeni benze uvavanyo oluthile. Bathumela imali eliphepha, iiruble ezilishumi eBrooklyn becela abazalwana ukuba bayahlule phakathi baze loo macala omabini baphinde bawathumele eUkraine: elinye icala layo liye kwabo bazalwana bazahluleyo ngeposi elinye kwelo jelo lisetyenziswa likomkhulu.

Ngokuvisisana noko, elinye icala lathunyelwa ngeposi. Elesibini lathunyelwa ngomthuthi woncwadi lanikwa amalungu ekomiti yelizwe. Bona balinika abazalwana baseTranscarpathia abaneembopheleleko baza bona baya kuhlangana nabo bazalwana bazahluleyo. Noko ke, abanye kwabo bazalwana bazahluleyo ababevakalelwa ngokwenene kukuba amalungu ekomiti yelizwe asebenzisana nabezokhuselo baqhubeka bengawathembi.

Noko ke, inkoliso yabo bazalwana babezahlule yabuyela kwintlangano. Imigudu kaSathana neKGB yokubhangisa intlangano yamaNgqina kaYehova eU.S.S.R. ngokungavisisani yawa phantsi. Abantu bakaYehova banda yaye banamandla, ngenkuthalo baqhubeka nomsebenzi wokumanyanisa nokuhlwayela imbewu yenyaniso kumasimi amatsha.

UVasyl Kalin wathi: “Basebenzisa iindlela ezininzi bezama ukuphelisa umnqweno wethu wokuphila ubomi bobuKristu. Ukanti, saqhubeka sishumayela kwabo sagxothwa nabo kwelo lizwe ababengakholwa. Bagxothelwa izizathu ezahlukeneyo nolwaphulo-mthetho olwahlukeneyo. Abaninzi babonisa umdla kwisigidimi sethu. Kwiimeko ezininzi abo bantu babesiba ngamaNgqina kaYehova ekugqibeleni. Bakwenza oko nakuba babeyazi intshutshiso esihlangabezana nayo yabezokhuselo lukaRhulumente nabalawuli basekuhlaleni.”

Ubomi BamaKristu Phantsi Kokuvalwa Umlomo

Ngoku makhe siqwalasele ngokufutshane indlela owawuyiyo umsebenzi wamaKristu ebudeni bamashumi eminyaka yokuvalwa umlomo. Umsebenzi wamaNgqina kaYehova wavalwa kuyo yonke iUkraine ukususela ngowe-1939. Sekunjalo, ukushumayela nemisebenzi yebandla kwaqhubela phambili, nangona abazalwana kwakufuneka balumke gqitha xa benikela ubungqina kwabanye. Abantu abanomdla babengaxelelwa kwangoko ukuba ngamaNgqina kaYehova lawo abatyeleleyo. Izifundo zeBhayibhile zazisoloko ziqhutywa kusetyenziswa iBhayibhile kuphela. Abantu abaninzi bayifunda ngale ndlela inyaniso.

Iintlanganiso zebandla zaziqhutywa phantsi kweemeko ezifanayo. Kwiindawo ezininzi, amaxesha amaninzi evekini abazalwana babehlanganisana ngokuhlwa okanye ngorhatya. Kwiifestile zabo babefaka iikhethini zelaphu elingqindilili bephepha ukukrotywa baze bafunde ngesibane separafini. Ngokuqhelekileyo, bandla ngalinye lalifumana umbhalo omnye kuphela weMboniselo, eyayibhalwe ngesandla. Kamva, abazalwana baqala ukufumana amaphephancwadi ashicilelwe ngomatshini wokukhuphela. Ngokuqhelekileyo, abazalwana babedla ngokuhlanganisana kabini ngeveki kwimizi yabantu ukuze baqhube iSifundo seMboniselo. IKGB yayingayekeleli kwimizamo yayo yokufuna iindawo adibana kuzo amaNgqina kaYehova ukuze yohlwaye abo bazalwana banembopheleleko.

Abazalwana basebenzisa imitshato nemingcwabo njengamathuba okuhlanganisana baze bakhuthazane ngeentetho ezilungiselelwe kakuhle zeBhayibhile. Emitshatweni, abazalwana noodade abaselula abaninzi babefunda imibongo ephathelele imibandela yeBhayibhile baze benze nemidlalo yeBhayibhile befake isinxibo. Konke oku kwanikela ubungqina obuhle kwabaninzi abangengomaNgqina abakhoyo.

Ebudeni beminyaka yee-1940 neyee-1950, abazalwana abaninzi babanjwa baza bavalelwa ngenxa yokubakho kwezo ntlanganiso. Noko ke, kweyee-1960, loo meko yatshintsha. Xa ifunyenwe loo ntlanganiso, abezokhuselo babebhala uludwe lwabo bonke abakhoyo kuloo ntlanganiso, yena umninindlu wayehlawuliswa isiqingatha somvuzo wakhe wenyanga. Maxa wambi, loo mthetho wawusenziwa ngendlela egabadeleyo. UMykola Kostiuk nomfazi wakhe bakha batyelela unyana wabo. Kungekudala, kwafika amapolisa enza uludwe lwabo “bonke abalapho.” Kamva, unyana kaMzalwan’ uKostiuk wabizwa imali yesohlwayo ngenxa “yentlanganiso engekho mthethweni yamaYehova.” Intsapho yakwaKostiuk yaya kukhalaza ngenxa yoko, ekubeni kungazange kuqhutywe ntlanganiso. Abasemagunyeni basicima eso sohlwayo.

Imibhiyozo YeSikhumbuzo

Kwakungelula ukujamelana nobo bunzima buzingisileyo. Ukanti, abazalwana abazange batyhafe kodwa baqhubeka behlanganisana rhoqo. Ukuqhuba iSikhumbuzo yeyona nto yayinzima. IKGB yayivula amehlo ngokukhethekileyo ngexesha leSikhumbuzo, ekubeni yayisoloko iwazi kakuhle umhla waloo mbhiyozo. Yayinethemba lokuba xa iwabek’ esweni amaNgqina, iya kuyazi loo ndawo yeSikhumbuzo. Ngoko abezokhuselo “babeziqhelanisa” namaNgqina amatsha.

Abazalwana babewazi loo maqhinga, ngoko babelumka ngokukhethekileyo ngomhla weSikhumbuzo. Eso sikhumbuzo babesiqhubela kwiindawo ekunzima ukuzifumana. Abasandul’ ukuba nomdla babengaxelelwa kwangoko umhla nendawo yeSikhumbuzo. Ngokuqhelekileyo, amaNgqina ayesiya kumakhaya abo banomdla ngomhla weSikhumbuzo aze ahambe nabo ukuya kuloo ndawo inentlanganiso.

Abazalwana baseTranscarpathia bakha baqhubela iSikhumbuzo kwigumbi elingaphantsi lendlu yomnye udade. Ekubeni elo gumbi lalizele ngamanzi esikhukula, akukho bani wakha wacinga ukuba abantu banokuhlanganisana kuloo manzi ayemela emadolweni. Abazalwana benza iqonga elivele ngaphezu kwaloo manzi baza benza elo gumbi lalungela iSikhumbuzo. Nangona kwakufuneka bazicuthe ngaphantsi kwaloo silingi imfutshane, akukho bani wabaphazamisayo njengoko babenandipha iSikhumbuzo.

Kwesinye isihlandlo, kwiminyaka yee-1980, amanye amalungu entsapho yamaKristu ashiya ikhaya lawo kwakusasa ukuze aye eSikhumbuzweni. Xa kuza kuhlwa ahlanganisana nabanye abazalwana ehlathini ukuze babhiyozele iSikhumbuzo. Yayisina, ngoko bonke abazalwana noodade benza isangqa ngaphantsi kweeambrela, bepheth’ amakhandlela okukhanyisa. Emva komthandazo wokuvala, wonk’ ubani wemka. Ukufika kwayo ekhaya, loo ntsapho yafumana amasango evuliwe. Kwacaca ukuba amapolisa okanye abezokhuselo ayebafuna. Nangona babediniwe yaye bemanzi, bonke kuloo ntsapho babevuya kuba beye bashiya ikhaya kwakusasa baya eSikhumbuzweni, bephepha abasemagunyeni.

EKiev kwakunzima gqitha ukuba abazalwana bafumane iindawo ezikhuselekileyo zeSikhumbuzo. Komnye unyaka bagqiba ekubeni baqhubele iSikhumbuzo kwisithuthi. Omnye umzalwana wayengumqhubi weebhasi kwenye inkampani yeebhasi, ngoko abazalwana baqesha ibhasi. Loo bhasi yakhwelisa amaNgqina kaYehova kuphela yaza yaphumela ngaphandle kwesixeko yaya kwibala elisehlathini. Ngaphakathi kuloo bhasi, abazalwana noodade babeka itafile encinane eyayinemifuziselo yeSikhumbuzo. Kwakhona beza nokunye ukutya. Ngequbuliso, kwafika amapolisa. Noko ke, ayengenasizathu sakuphazamisa abazalwana, ekubeni baba ngathi bazityela nje isidlo sangokuhlwa kuloo bhasi emva komsebenzi wosuku.

Kwezinye iindawo zaseUkraine, kwakugqogqwa imizi yabazalwana ngomhla weSikhumbuzo. Lalithi xa liza kutshona, ubone ngeenqwelo-mafutha ezintathu okanye ezine zamapolisa zigaleleka kumakhaya ahlala amaNgqina. Loo mapolisa ayehlola enoba abazalwana basekhaya na okanye balungiselela loo mbhiyozo wonqulo. AmaNgqina ayesoloko elulungele olo gqogqo. Ayedla ngokunxiba impahla endala yomsebenzi ngaphezu kwaleyo ayinxibileyo aze azixakekise ngemisebenzi eqhelekileyo yasekhaya. Ngale ndlela ayenikela ingcamango yokuba akayi ndawo yaye akacebi kuya kuwo nawuphi na umbhiyozo wonqulo. Lwaluthi lwakuphela olo gqogqo, bakhulule loo mpahla babe sele belungele ukuya eSikhumbuzweni. Abasemagunyeni babeqiniseka ukuba bawugqibile umsebenzi wabo, bona abazalwana babenandipha iSikhumbuzo ngoxolo.

Ukufihla Uncwadi

Khumbula ukuba ekupheleni kweyee-1940, amaNgqina kaYehova ayegwetywa iminyaka engama-25 entolongweni ngenxa nje yokuba noncwadi emizini yawo. Emva kokufa kukaStalin ngowe-1953, izigwebo zentolongo ngenxa yokuba noncwadi zancitshiswa zaba yiminyaka elishumi. Kamva, isohlwayo sokuba noncwadi lwamaNgqina yaba kukuhlawuliswa imali, luze lona uncwadi luthinjwe yaye lutshatyalaliswe. Ngoko kulo lonke elo xesha lokuvalwa umlomo, abazalwana babeyinonophela gqitha indlela yokugcina uncwadi lukhuselekile.

Abanye babegcina uncwadi kwimizi yezalamane zabo okanye yabamelwane abangengomaNgqina; abanye belungcwaba kwimigqomo yesinyithi naphakathi kweengxowa zeplastiki ezitiyeni. UVasyl Guzo, umdala waseTranscarpathia, ukhumbula ukuba kweyee-1960, wayesebenzisa ihlathi elikwiiNtaba zeCarpathia “njengethala lobuthixo.” Wayefaka uncwadi lwakhe kumakani obisi awase ehlathini awangcwabe zona iziciko zawo zilingane nomgangatho womhlaba.

Omnye umzalwana owachitha iminyaka eli-16 kwiintolongo ngenxa yomsebenzi wobuKristu ubalisa oku: “Uncwadi sasilufihla naphi na apho sinako: kwiinqaba phantsi komhlaba, kwiindonga zezakhiwo, kwiibhokisi ezinomphantsi ophindwe kabini, kwizindlu zezinja ezinemigangatho emibini. Kwakhona uncwadi sasilufihla kwimibhobho yeentonga zomtshayelo nezesingqusho (apho sasidla ngokufihla khona iingxelo zenkonzo yasentsimini). Zazikho nezinye iindawo zokufihla—amaqula, izindlu zangasese, iingcango, uphahla namagoqo eenkuni.”

Oomatshini Bokushicilela Ngaphantsi Komhlaba

Phezu kwako nje ukubekw’ esweni ziintlola zamaKomanisi nabasemagunyeni, ukutya kokomoya kwaqhubeka kulungiselelwa kwabo babelambele yaye benxanelwe ubulungisa. Iintshaba zenyaniso zasilela ukuphelisa uncwadi lwethu eU.S.S.R. yaye kwafuneka zikuvume oko. Ngasekupheleni kowe-1959, iphephandaba labasebenzi beendlela zikaloliwe eSoviet iGudok lathi amaNgqina kaYehova asebenzisa neebhaloni ukungenisa uncwadi lweBhayibhile kwiSoviet Union!

Enyanisweni, uncwadi lwethu aluzange lungene ngebhaloni eUkraine. Lwaluveliswa apho ngaphakathi kwimizi yabantu. Ethubeni, abazalwana bafumanisa ukuba eyona ndawo ifanelekileyo nekhuselekileyo yokushicilela uncwadi yinqaba efihlwe kakuhle ngaphantsi komhlaba. Babezakha ngaphantsi komgangatho nasezindulini.

Ngeyee-1960, enye yezo nqaba yakhiwa empuma Ukraine. Yenzelwa iindawo zokungenisa umoya nombane. Indawo yokungena kuyo yayifihlakele kangangokuba amapolisa akha achitha imini yonke phezu kwayo ehamba exhola umhlaba ngolugxa. Atsho ancama.

Kwesinye isihlandlo, ukushicilelwa koncwadi ngasese kwakujongwe kabukhali ngabezokhuselo. Baberhanela ukuba lushicilelwa endlwini, ngoko babefuna ukubamba abo babandakanyekileyo. Oku kwabafak’ engxakini abazalwana: Babeza kuza njani nephepha kuloo ndlu, ibe beza kulukhupha njani uncwadi apho? Ekugqibeleni, balifumana icebo. Omnye umzalwana wasongela amaphepha kwingubo yosana waza wayiphatha ngathi lusana waya nayo kuloo ndlu. Akufika apho washiya loo maphepha, wasongela iinkupho ezisandul’ ukushicilelwa zaloo maphephancwadi kwakuloo ngubo, waza waphuma nolo “sana” kuloo ndlu. Abasebenzi beKGB babebukela loo mzalwana engena ephuma kodwa bengarhaneli nto.

Abazalwana bommandla waseDonetsk, eCrimea, eMoscow, naseLeningrad (ngoku eyiSt. Petersburg) babefumana uncwadi olushicilelwa kule nqaba. Abanye abazalwana abaselula bakha inqaba efanayo kwidolophu yaseNovovolynsk, kwingingqi yaseVolyn’. Abo bazalwana babezimisele ukuyigcina iyimfihlo loo nqaba kangangokuba kwadlula iminyaka esithoba emva kokuba umsebenzi wethu eUkraine ubhaliswe ngokusemthethweni ngaphambi kokuba bavumele abazalwana bayibone!

Omnye umatshini wokushicilela ofanayo wawusebenza phakathi kwiiNtaba zeCarpathia. Abazalwana balungiselela imibhobho yokutsala amanzi kumlanjana omncinane angene kuloo nqaba, ibe loo manzi ayejika injini encinane, eyayiphehla umbane wokukhanyisa apho, nakuba loo matshini wawujijwa ngesandla. Uncwadi oluninzi lwalushicilelwa kuloo nqaba. IKGB yathi yakuqonda ukuba luninzi uncwadi oluvela kuloo mmandla, yafuna loo ndawo lushicilelwa kuyo. Amapolisa emba intw’ engapheliyo efuna loo nqaba. Ayede azenze ngathi ngabembi bamatye abazula kwezo ntaba.

Bathi abazalwana bakuqonda ukuba abasemagunyeni sele beza kuyifumana loo nqaba, ngokuzithandela uIvan Dziabko wathi kuya kuthiwa nguye umveleli waloo msebenzi, ekubeni wayengatshatanga yaye ukuba uyabanjwa, akukho bantwana babeya kuhluthwa uyise. Ekupheleni kwehlobo lowe-1963, yabhaqwa loo nqaba ibe uMzalwan’ uDziabko wabulawa ngoko nangoko. Abasemagunyeni bavuyiswa gqitha koko baza balungiselela ukhenketho olungahlawulelwayo kubantu abadala nabantwana “kwindawo ebisetyenziswa ngamaNgqina kaYehova ukunxibelelana neMerika ngonomathotholo.” Nakuba eso sityholo sasibubuxoki, eso siganeko sibuhlungu sanikela ubungqina kubo bonke abantu baloo mmandla. Abantu abaninzi baqalisa ukuba nomdla omkhulu kwisigidimi sethu. Sithetha nje, kukho amabandla angaphezu kwama-20 kuloo nxalanye yeeNtaba zeCarpathia.

Ukubaluleka Koqeqesho Lwabazali

Ukongezelela ekuthinjweni koncwadi, izohlwayo zemali, ukuvalelwa entolongweni, ukuthuthunjiswa nokubulawa, amanye amaNgqina afumana amava abuhlungu okohluthwa abantwana bawo. ULydia Perepiolkina, owayehlala empuma Ukraine, wayenabantwana abane. Umyeni wakhe, igosa kwiSebe Lemicimbi Yangaphakathi [MIA], walungiselela ukuqhawula umtshato ngowe-1964 ngenxa yokuba uLydia wayeliNgqina. Inkundla yagqiba ekubeni yohluthe uDade Perepiolkina ilungelo lokugcina abantwana bakhe. Amawele akhe aneminyaka esixhenxe ubudala—inkwenkwe nentombazana—anikwa umyeni wakhe, owemka nawo waya kude kumgama weekhilomitha ezili-1 000 kude entshona Ukraine. Inkundla yakhupha isigwebo sokuba abanye abantwana ababini basiwe kwikhaya leenkedama. Xa uLydia wanikwa ithuba lokuthetha, waxelela loo nkundla oku: “Ndikholelwa ukuba uYehova unamandla okubuyisela abantwana bam kum.”

Emva kwelo tyala uLydia waluqonda ukhokelo nenyameko kaYehova. Ngezizathu ezingaziwayo, abasemagunyeni abazange babase kwikhaya leenkedama abo bantwana babini baseleyo kodwa bavunyelwa ukuba bahlale naye. Ngokulandelelana kuyo yonke loo minyaka isixhenxe kwikhefu lakhe, uLydia wayehamba aye kubona abo bantwana bakhe babini, amawele. Nakuba loo myeni wakhe wangaphambili wayengamvumeli uLydia ukuba ababone, akazange anikezele. Akuba efikile kweso sixeko sihlala abantwana bakhe, wayechitha ubusuku kwisikhululo sikaloliwe aze adibane nabo xa besiya esikolweni. Wasebenzisa loo mathuba axabisekileyo ukuze abaxelele ngoYehova.

Yaqengqelek’ iminyaka, ibe ngokunyaniseka uLydia ‘wahlwayela imbewu ngeenyembezi’ kwiintliziyo zabantwana bakhe. Kamva, wakwazi ‘ukuvuna ngentswahla yovuyo.’ (INdu. 126:5) Athi akuba neminyaka eli-14 ubudala loo mawele, akhetha ukuhlala nonina. ULydia wazibhokoxa ukuze afundise abantwana bakhe inyaniso. Ngoxa ababini kubo bakhetha ikhondo elahlukileyo, uLydia namawele akhe bakhonza uYehova ngokunyaniseka.

Iinguqu Ezibhetele

NgoJuni 1965 iNkundla Ephakamileyo yaseUkraine yagqiba ekubeni uncwadi lwamaNgqina kaYehova luncwadi lonqulo, alukho nxamnye neSoviet. Ngoxa eso sigqibo sasebenza kwityala elinye kuphela lenkundla, saba nempembelelo kwizigqibo zenkundla ezalandelayo kuyo yonke iUkraine. Abasemagunyeni bayeka ukubamba abantu ngenxa yokufunda uncwadi lweBhayibhile, nangona baqhubeka bewavalela amaNgqina ngomsebenzi wawo wokushumayela.

Enye inguqu ephawulekayo yenzeka ngasekupheleni kowe-1965. Urhulumente weU.S.S.R. wakhupha umyalelo okhulula onke amaNgqina awagxothelwa eSiberia ngowe-1951. Ngoku avunyelwa ukuba ahambe ngokukhululekileyo kuyo yonke iSoviet Union, nangona ayengenakwenza bango lokubuyiselwa izindlu, iinkomo, nezinye izinto zawo ezathinjwayo. Ngenxa yokuntsonkotha okuphathelele ukubhaliswa, ngabambalwa kuphela abakwaziyo ukubuyela kwiindawo ababehlala kuzo.

Abaninzi kwabo bazalwana babethunyelwe eSiberia ngowe-1951 baqalisa ukuhlala kwiindawo ezahlukeneyo zeU.S.S.R., njengeKazakhstan, eKyrgyzstan, eGeorgia, naseCiscaucasia. Abanye bahlala kwimpuma nakwintshona Ukraine, basa imbewu yenyaniso kuloo mimandla.

Ukuma Beqinile Phezu Kwazo Nje Iingcinezelo

Ngoxa oku kukhankanywe ngasentla kwazisa iinguqu ezincomekayo, iKGB ayizange iguquke kwisimo sayo sengqondo ngakumaNgqina kaYehova. IKGB yasebenzisa amaqhinga ahlukeneyo kwiinzame zokugrogrisa amaNgqina ukuze alahle ukholo lwawo. Ngokomzekelo, enye into eyayiyenza kukuthabatha umzalwana emsebenzini wakhe imgcine kangangeentsuku ezimbalwa kwiofisi yeKGB okanye ehotele. Ebudeni boko kuthinjwa, kwakubakho iqela lamalungu amathathu okanye amane eKGB aza kumphek’ emophula, amncine, amkhohlise yaye amoyikise. Ayetshintshana xa esenza oko ukuze loo mzalwana angakwazi ukulala. Emva koko, loo mzalwana wayekhululwa, kodwa emva kosuku okanye ezimbini kamva aphinde axhwilwe aze aphathwe ngendlela efanayo. Oku iKGB yayikwenza nakoodade, nakuba kwakungaxhaphakanga.

Abazalwana babesoloko bebizelwa kwiiofisi zeKGB. Bezama ukucinezela abazalwana ukuze balahle ukholo lwabo, abezokhuselo babenethemba lokuzenzela abahlobo abatsha ngaphakathi entlanganweni. Ukongezelela, babecinezela abazalwana ekubaphatheni nangokweemvakalelo xa bengavumi ukulalanisa kukholo lwabo. Ngokomzekelo, uMykhailo Tilniak, owachitha iminyaka emininzi njengomveleli wesiphaluka eTranscarpathia, ukhumbula oku: “Kwenye incoko, amagosa ezokhuselo awayenxibe ezomkhosi aba nobubele gqitha yaye asabela kakuhle. Andimema ukuba ndiye kudla nawo kwivenkile yokutyela ekufuphi. Kodwa ndasuka ndawancumela, ndabeka iiruble ezingama-50 (phantse isiqingatha somvuzo wenyanga) etafileni, ndathi angahamba aye kudla ngaphandle kwam.” UMzalwan’ uTilniak wayeqonda kakuhle ukuba aza kuthabatha imifanekiso yakhe xa esitya yaye esela nabantu abanxibe impahla yomkhosi. Kamva loo mifanekiso yayiza kusetyenziswa “njengobungqina” bokuba uye walalanisa kukholo lwakhe. Oku kwakuya kuhlwayela imbewu yokungathembani kubazalwana.

Kwabaninzi, kwathabatha amashumi eminyaka becinezelwa ukuba balahle ukholo lwabo. UBela Meysar, waseTranscarpathia, ngumzekelo woko. Wabanjwa okokuqala ngowe-1956, engaqondi lo mzalwana uselula ungenamava watyobela uxwebhu oluthile ngokuphathelele umsebenzi wethu, nto leyo eyaphumela ekubeni abanye abazalwana babizwe kwiiofisi zabezokhuselo. Kamva uMzalwan’ uMeysar wayiqonda impazamo yakhe waza wabongoza uYehova ukuba kungabikho namnye ofumana isigwebo kwabo bazalwana. Kwaba njalo kanye ababanjwa, nakuba yena uMzalwan’ uMeysar wagwetywa iminyaka esibhozo entolongweni.

Emva kokubuyela ekhaya walelwa ukuba ayishiye loo dolophana yakhe kangangeminyaka emibini. Rhoqo ngoMvulo kwakufuneka aye kuvela kwiofisi yamapolisa. Kuba wala ukuya kuqeqesho lwasemkhosini ngowe-1968, wagwetywa unyaka entolongweni. Emva kokubanjwa kwakhe wabuyela ekhaya waza waqhubeka ekhonza uYehova ngenzondelelo. Eneminyaka engama-47 ubudala, ngowe-1975 waphinda wagwetywa.

Akugqiba isigwebo seminyaka emihlanu entolongweni, uMzalwan’ uMeysar, wagxothelwa eYakutsk kummandla waseRashiya kangangeminyaka emihlanu. Wasiwa apho ngenqwelo-moya, ekubeni kwakungekho zindlela kuloo ngingqi. Kolo hambo ngomoya, loo majoni aselula ayempheleka ambuza: “Hee mnt’ omkhulu, kutheni usisaphuli-mthetho esiyingozi nje?” Ephendula, uMzalwan’ uMeysar wacacisa indlela aphila ngayo waza wanikela ubungqina obuhle ngokuphathelele injongo kaThixo ngomhlaba.

Emva kokuba uMzalwan’ uMeysar efikile ekuqaleni abasemagunyeni babesoyika eso “saphuli-mthetho siyingozi ngokukhethekileyo” njengoko wachazwa njalo kumaxwebhu akhe. Ngenxa yehambo yobuKristu entle kaMzalwan’ uMeysar, kamva abasemagunyeni apho baxelela elinye igosa lezokhuselo oku: “Ukuba ninezinye izaphuli-mthetho ezingakumbi zolu hlobo, ncedani nizithumele kuthi.”

Ngowe-1985, uMzalwan’ uMeysar wagoduka eneminyaka engama-57 ubudala. Kuloo minyaka ingama-21 esentolongweni, umfazi wakhe othembekileyo, uRegina, wayehlala kwikhaya labo eTranscarpathia. Phezu kwayo nje imigama emide neendleko ezinkulu zoko, wayesoloko esiya kubona umyeni wakhe entolongweni, wahamba isimbuku seekhilomitha ezingaphezu kwe-140 000 ukuze enze oko.

Nkqu nasemva kokuba ekhululwe, uMzalwan’ uMeysar watyelelwa izihlandlo ezininzi ngamapolisa namagosa ezokhuselo kwikhaya lakhe kwidolophana yaseRakoshyno. Loo matyelelo abangela izihlandlo ezihlekisayo. Ekuqaleni kweyee-1990, uTheodore Jaracz weQumrhu Elilawulayo nabazalwana bekomiti yelizwe batyelela kwisixeko saseTranscarpathia eUzhgorod. Xa babebuyela eLvov, bagqiba ekubeni badlule kuMzalwan’ uMeysar. Omnye udade ohlala kufutshane wabona iinqwelo-mafutha ezintathu zisiya kwelo xhobongwana lendlu kaMzalwan’ uMeysar, kwabe sele kuphuma amadoda asithoba. Oko kwamothusa kangangokuba wabaleka waya kwindlu yomnye umzalwana izibilini ziphezulu waxela ukuba iKGB ize kubamba uMzalwan’ uMeysar kwakhona! Hayi indlela awavuya ngayo akufumanisa ukuba kwakungenjalo!

Ukuphucula Neenguqu Zentlangano

Ngowe-1971, uMichael Dasevich wamiselwa njengesicaka selizwe. Ikomiti yelizwe ngelo xesha yayiquka abazalwana abathathu basentshona Ukraine, ababini baseRashiya nomnye waseKazakhstan. Ngamnye kubo wakhonza njengomveleli ohambahambayo. Ukongezelela, ngamnye wayenomsebenzi wengqesho ukuze balungiselele iintsapho zabo. Loo masimi ayephantsi kwabazalwana basentshona Ukraine ayekude gqitha kwiindawo abahlala kuzo. UStepan Kozhemba wayetyelela iTranscarpathia, waza yena uAlexei Davidjuk watyelela iinxalenye eziseleyo zentshona Ukraine ne-Estonia, iLatvia, neLithuania. UMzalwan’ uDasevich wayesiya empuma Ukraine, entshona nakumbindi Rashiya, eCiscaucasia, naseMoldavia. Abazalwana bekomiti yelizwe babesoloko betyelela le mimandla ikhankanywe ngasentla, beqhuba iintlanganiso nabaveleli besithili nabesiphaluka, bekhuthaza amaNgqina ezo ndawo baze baqokelele neengxelo zenkonzo.

Kwakhona aba bazalwana babenxibelelana nabathuthi bezigidimi ababevela kwamanye amazwe njengabakhenkethi, besiza noncwadi neeleta. Ukususela ngasekupheleni kweyee-1960 de kwafika inkululeko yonqulo ngowe-1991, abachasi bethu abazange bakwazi ukuthintela imbalelwano.

Ngowe-1972 iQumrhu Elilawulayo lanikela ulwalathiso lokwenza uncomelo olubhaliweyo ngokuphathelele ukumiselwa kwabazalwana njengabadala. Abanye abazalwana babemadolw’ anzima ukwenza oko, besoyika ukuba olo ludwe loncomelo lunokuwela ezandleni zamapolisa. Ngaphambi koko, akuzange kubekho ludwe lunjalo kulo naliphi ibandla. Abazalwana babedla ngokungazi namagama eentsapho zabanye abazalwana bebandla labo. Ekuqaleni, baba mbalwa abanconyelwayo ukukhonza njengabadala kuba abaninzi abazange bafune ukuba amagama abo afakwe kulo naluphi na uludwe. Kodwa emva kokuba loo malungiselelo enziwe ngaphandle kwemiphumo eyingozi, abanye bajika iingcinga, banconyelwa, baza ngokuthembeka bathabatha loo mbopheleleko yokuba ngabadala emabandleni.

Ukukhuselwa NguYehova Xa Kugqogqwa

Ngenye intsasa, amapolisa eza kugqogqa kwindlu kaVasyl noNadiya Bunha. UDade Bunha wayesekhaya nonyana wabo ominyaka mine elele xa kwathi ngequbuliso kwankqonkqozwa ngamandla. Eqonda ukuba ngamapolisa, uDade Bunha wakhawuleza waphosa iingxelo zenkonzo yasentsimini namanye amaphepha angomsebenzi wokunikela ubungqina esitovini. Emva koko waya kuwavulela. Loo mapolisa ambonzeleka esitovini, aza ngononophelo akhupha ezo ngxelo zitshileyo, azibeka kwiphepha-ndaba phezu kwetafile. Amagama ayesabonakala kumaphepha atshileyo. Xa agqibayo ukugqogqa kuloo ndlu, onke loo mapolisa noDade Bunha baya kugqogqa eshedini. Ngelo xesha, unyana wabo omncinane wavuka, wabona loo maphepha aphezu kwetafile wabona ukuba makawalahle. Wathabatha zonke ezo ngxelo zitshileyo waziphosa kumgqomo wenkunkuma. Emva koko waphinda waya kulala kwibhedi yakhe. Xa ebuya loo mapolisa, othuka kukufumanisa ezo ziqwenga “zamaphepha anobungqina” zitshatyalaliswe zaphela!

Ngowe-1969 indlu kaBunha yaphinda yagqogqwa. Kwesi isihlandlo uMzalwan’ uBunha wayekho, ibe amapolisa afumana ingxelo yenkonzo yasentsimini yebandla. Noko ke, ngokungabi nankathalo ayishiya phezu kwetafile, nto leyo eyanika uMzalwan’ uBunha ithuba lokuyitshabalalisa. Ngenxa yokwenza oko, wagwetywa iintsuku ezili-15 entolongweni. Emva koko, abezokhuselo banyanzelisa uMzalwan’ uBunha ukuba afuduke; ngoko kangangethuba elithile wahlala waza washumayela eGeorgia naseDagestan. Kamva, wabuyela eUkraine waza wahlala ethembekile de kwasekufeni kwakhe ngowe-1999.

“Amatyelelo Obuvangeli Basemazweni” Alungiselelwa Ngabezokhuselo

Ngeyee-1960 neyee-1970, abazalwana abaninzi abakhutheleyo banyanzelwa ngabezokhuselo ukuba bangcuchalaze. Kwakutheni ukuze kube njalo? Abasemagunyeni babengafuni kuthumela iingxelo ezingentle eKiev ngokuphathelele imiphumo yomsebenzi onxamnye nonqulo kwizithili zabo. Kuhlolisiso abalwenzayo, abasemagunyeni baqonda ukuba inani lamaNgqina kaYehova lalisanda nyaka ngamnye. Noko ke, kwiingxelo eziya eKiev, babefuna ukubonisa ukuba amaNgqina ayengandi. Ngenxa yoko, abasemagunyeni banyanzela abazalwana ukuba bawushiye loo mmandla ukuze banikele ingxelo yokuba inani lamaNgqina alandi kummandla wabo.

Oku kufudukela kwamaNgqina kwezinye iindawo kwenza yanda imbewu yenyaniso. Ngokuqhelekileyo, lawo yayiba ngamaNgqina akhokelayo kulo msebenzi. Enyanisweni, abo bazalwana noodade banenzondelelo “bakhuthazwa” ngabasemagunyeni ukuba baye apho, “kukho intswelo engakumbi khona” njengoko sisitsho ngoku. Bakhonza kwezo ndawo, ibe ethubeni kwasekwa amabandla amatsha.

Ngokomzekelo, uIvan Malitskyi owayevela kufuphi naseTernopol’ kwathiwa makashiye ikhaya lakhe. Waya eCrimea kumazantsi eUkraine, apho kwakuhlala abazalwana abambalwa. Ngowe-1969 kwakukho ibandla elinye eCrimea, kodwa ngoku kukho angaphezu kwama-60! UIvan Malitskyi usakhonza njengomdala kwelinye lawo.

Unyaka Wokugqibela Wokuvalwa Umlomo

Ngowe-1982, emva kotshintsho kulawulo lwezobupolitika eU.S.S.R., kwavela enye intshutshiso eyathabatha iminyaka emibini eUkraine. Kucaca ukuba loo ntshutshiso yayingabangelwa ziinkokeli zeU.S.S.R. Kunoko, iinkokeli ezintsha zeSoviet zanyanzelisa iinguqu nokusekwa ngokutsha kwamazwana. Ukubonisa inzondelelo nokuzimisela kwabo kwezo nguqu, abasemagunyeni kwezinye iindawo zaseUkraine babamba bavalela amaNgqina ambalwa aphambili. Nakuba loo ntshutshiso ingazange ichaphazele abazalwana abaninzi, amanye amaNgqina abandezeleka ngokweemvakalelo nokwenzakala emzimbeni.

Ngowe-1983, uIvan Migali waseTranscarpathia wagwetywa iminyaka emine entolongweni. Abasemagunyeni eSoviet bathimba zonke izinto zaloo mdala uneminyaka engama-58 ubudala. Xa babegqogqa indlu kaMzalwan’ uMigali, abezokhuselo bafumana amaphephancwadi ethu angama-70. Le ndoda ithobekileyo nethanda uxolo yayisaziwa kakuhle kwindawo ehlala kuyo njengomshumayeli weBhayibhile. Ezo zibakala zibini—ukufunyanwa kwakhe enoncwadi nokushumayela—zasetyenziswa njengesizathu sokubanjwa kwakhe.

Luthotho lwamatyala awaqhubeka empuma Ukraine ebudeni bowe-1983 nowe-1984. AmaNgqina amaninzi ayevalelwa ukusuka kwiminyaka emine ukusa kwemihlanu. Abazalwana abaninzi kwafuneka bathothoze, kungekhona kwiSiberia ebandayo okanye eKazakhstan, kodwa eUkraine. Abanye babetshutshiswa nasentolongweni betyholwa ngokwaphula imithetho yentolongo. Injongo yayikukufumana izizathu zokwandisa izigwebo zabo.

Iqela labaphathi bentolongo lathumela abazalwana kwizibhedlele zaseSoviet zabagula ngengqondo, benethemba lokuba amaNgqina aza kugula ngengqondo aze ayeke ukukhonza uThixo. Kodwa umoya kaYehova wabomeleza abazalwana, ibe bahlala benyanisekile kuYehova nentlangano yakhe.

Uloyiso Lobuthixo

Kwisiqingatha sesibini seminyaka yee-1980, kwabakho ukuyekelela okuthile ekuchasweni konqulo olunyulu. Kwabakho ulwando lwabavakalisi kumabandla alapho, baza abazalwana bafumana uncwadi olungakumbi. Emva kokutyelela izalamane kwamanye amazwe, wambi amaNgqina eza namaphephancwadi neencwadi. Kubazalwana ngokukhethekileyo abo babekwiinkampu zentolongo yaseSoviet, yayisisihlandlo sokuqala ukuba babambe impapasho yeBhayibhile yokoqobo ngezandla zabo. Ukanti, abanye babengacingi ukuba baya kuphila de babone imini apho umbhalo weMboniselo ugqobhoza ungene kwelo.

Emva kweminyaka emininzi besilwa namaNgqina kaYehova, ekugqibeleni abasemagunyeni baqala ukuthamba. Ngoku abazalwana bamenywa ukuba baye kudibana nabameli boluntu kwiiofisi zemicimbi yonqulo zalapho. Abanye kwabasemagunyeni babezimisele ukudibana namaNgqina kaYehova avela kwikomkhulu lehlabathi eBrooklyn. Ngokuqondakalayo, ekuqaleni abazalwana babekrokrela ukuba ngumgibe lowo. Kodwa kwacaca ukuba amaxesha ayaguquka kubantu bakaYehova. Ngowe-1987 abasemagunyeni baqalisa ukukhulula loo maNgqina ayevalelwe. Kamva, iqela labazalwana lazama ukuya kwindibano yesithili yowe-1988 ePoland eselumelwaneni. Kuloo maxwebhu abo, kwabhalwa ukuba batyelela izihlobo nezalamane. Okwabamangalisayo kukuba, bavunyelwa ngabasemagunyeni ukuya kumazwe angaphandle! Ngesisa abazalwana basePoland babelana ngoncwadi lwabo neendwendwe ezivela eUkraine. Xa begoduka, abazalwana baseUkraine bahlolwa kwimida, kodwa ubukhulu becala amagosa ahlola izinto ezingenayo akazange aluthimbe uncwadi lweBhayibhile. Ngoko, abazalwana bakwazi ukuza neeBhayibhile nezinye iimpapasho kwelo lizwe.

Abo bazalwana babuk’ iindwendwe basePoland bamema abangakumbi baseUkraine ukuba babatyelele kunyaka olandelayo. Ngoko ngowe-1989, ngobulumko amawaka aya kwiindibano zezizwe ngezizwe zeentsuku ezintathu ePoland aza eza noncwadi olungakumbi xa ebuyela eUkraine. Ngokwesivumelwano neOfisi Yemicimbi Yonqulo, kwakuloo nyaka, amaNgqina kaYehova avunyelwa ukufumana uncwadi lonqulo oluvela ngaphandle ngeposi, kodwa imibhalo emibini kuphela yempapasho nganye kwipasile yeposi enye. Abazalwana baseJamani baqalisa ukuthumela iipasile zeencwadi namaphephancwadi rhoqo. Endaweni yokukhuphela imibhalo yamaphephancwadi ngokufihlakeleyo kwiinqaba okanye ezinzulwini zobusuku kwimigangatho yezindlu zabo, abazalwana ngoku babefumana iimpapasho ngokusemthethweni kwiiposi zalapho. Kwaba ngathi liphupha oko! Indlela ababevakalelwa ngayo abo banexesha elide yayifana naleyo yamaYuda emva kokubuyela eYerusalem evela ekuthinjweni esithi: “Saba njengabo babephupha.” (INdu. 126:1) Kodwa eso yayisisiqalo nje “sephupha” elihle.

Iindibano EWarsaw

Ngowe-1989, abazalwana baseBrooklyn bancomela ukuba ikomiti yelizwe iqalise ukuthethathethana nabasemagunyeni ukuze kubhaliswe ngokusemthethweni ubulungiseleli bethu basesidlangalaleni. Ngaphezu koko, uMilton Henschel noTheodore Jaracz baseBheteli eBrooklyn batyelela abazalwana baseUkraine. Kunyaka olandelayo, abasemagunyeni bavumela ngokusemthethweni amawaka amaNgqina kaYehova ukuba aye kwindibano yesithili ePoland. Xa bebhalisa amaxwebhu olo hambo lwabo, abazalwana bavakalisa—ngeqhayiya nemincili—ukuba bafuna ukuya ePoland, kungekhona ukutyelela abahlobo nezalamane zabo, kodwa baya kwindibano yamaNgqina kaYehova!

Loo ndibano yaseWarsaw yayikhetheke gqitha kwezo ndwendwe zaseUkraine. Zehl’ iinyembezi zovuyo: ngenxa yovuyo lokudibana namanye amaKristu, uvuyo lokufumana imibhalo yabo ngemibala emine yeempapasho zolwimi lwabo, novuyo lokufuman’ inkululeko yokuhlanganisana kunye. Abazalwana basePoland babonisa ububele bothando kubo, babalungiselela ngazo zonke iintswelo zazo.

Abaninzi ababesakuba ngamabanjwa okholo kunye badibana okokuqala kule ndibano yaseWarsaw. Baba ngaphezu kwekhulu ababephuma kwinkampu “ekhethekileyo” yaseMordvia—apho kwavalelwa khona amakhulu amaNgqina—abadibana apho. Abaninzi babesuka beme bajongane zehle iinyembezi zovuyo. Elinye iNgqina laseMoldavia elachitha iminyaka emihlanu kwisisele esinye noBela Meysar alizange limazi. Kwakutheni? Lakhwaza lathi: “Ndikwazi xa unxibe impahla yentolongo, kodwa ngoku unxibe isuti neqhina!”

Inkululeko Yonqulo Ekugqibeleni!

Ekupheleni kowe-1990, amaziko omthetho aqalisa ukukhulula amanye amaNgqina kaYehova ewabuyisela amalungelo neemfanelo zawo. Kwangaxeshanye, ikomiti yelizwe yaseka iqela elimela amaNgqina kaYehova kwiintlanganiso zawo nabasemagunyeni karhulumente. UWilli Pohl wesebe laseJamani wongamela elo qela.

Iintlanganiso ezinde nabasemagunyeni kaRhulumente eMoscow naseKiev zanika amaNgqina loo nkululeko yawo ekwakukudala eyilindele. Intlangano yonqulo yamaNgqina kaYehova yabhaliswa ngokusemthethweni eUkraine ngoFebruwari 28, 1991, ubhaliso lokuqala olunjalo kummandla weU.S.S.R. Kwinyanga enye kamva, ngoMatshi 27, 1991, le ntlangano yabhaliswa kwiRussian Federation. Ngoko, emva kweminyaka engaphezu kwama-50 evalwe umlomo yaye etshutshiswa, ekugqibeleni amaNgqina kaYehova afumana inkululeko yonqulo. Kungekudala emva koko, ngasekupheleni kowe-1991, iSoviet Union yaphela, ibe iUkraine yabhengeza inkululeko yayo.

Umhlaba Olungileyo Uvelisa Intabalala

Ngowe-1939 kuloo ndawo iyiUkraine ngoku, kwakukho abavakalisi boBukumkani bukaThixo abamalunga ne-1 000, abahlwayela imbewu yenyaniso kumhlaba ochumileyo—iintliziyo zabantu. Kwiminyaka engama-52 yokuvalwa umlomo, abazalwana beva iintlungu zeMfazwe Yehlabathi II, ukugxothelwa eSiberia, ukungonjwa kanobom, ukungcungcuthekiswa nokubulawa. Sekunjalo, kulo lonke elo xesha “umhlaba olungileyo” wavelisa ngaphezu kwezihlandlo ezingama-25. (Mat. 13:23) Ngowe-1991 kwakukho abavakalisi abangama-25 448 kumabandla angama-258 eUkraine yaye kwakukho abavakalisi abaphantse babe ngama-20 000 kwamanye amazwe eU.S.S.R. abo inkoliso yabo yafunda inyaniso kubazalwana baseUkraine.

Loo mhlaba wawufuna “ukuchunyiswa” ngeempapasho zeBhayibhile. Ngoko, emva kokubhaliswa ngokusemthethweni komsebenzi wethu, kwenziwa amalungiselelo okuthumela uncwadi oluvela eSelters, eJamani. Uncwadi lokuqala ukuthunyelwa lwafika ngo-Aprili 17, 1991.

Abazalwana balungiselela indawana yokothula uncwadi eLvov apho lwaluthuthwa ngeelori, oololiwe nangeenqwelo-moya ludluliselwe kumabandla akwelo laseUkraine, elaseRashiya, eKazakhstan, nakwamanye amazwe elo lalisakuba yiSoviet Union. Oku kwabangela ulwando olungakumbi lokomoya. Ekuqaleni kowe-1991, eKharkov, isixeko esinabemi abazizigidi ezibini, kwakukho ibandla elinye kuphela. Ngasekupheleni kwaloo nyaka, elo bandla linye labavakalisi abangama-670 laba ngamabandla asibhozo ahlukeneyo. Sithethanje, kukho amabandla angaphezu kwama-40 kweso sixeko!

Nangona iU.S.S.R. yaphelayo ngowe-1991, ikomiti yelizwe yanyamekela onke loo mazwe ali-15 azimeleyo ayekade ekwiSoviet Union de kwangowe-1993. Kuloo nyaka kwintlanganiso ekwakukho kuyo abazalwana beQumrhu Elilawulayo, kwenziwa isigqibo sokuba kusekwe iikomiti ezimbini—enye ibe yeyaseUkraine enye ibe yeyaseRashiya naloo amazwe ali-13 ayesakuba kwiSoviet Union. Ukongezelela kuMichael Dasevich, uAlexei Davidjuk, uStepan Kozhemba, noAnanii Hrohul, kongezwa abanye abazalwana abathathu kwikomiti yelizwe laseUkraine: uStepan Hlinskyi, uStepan Mykevych, noRoman Yurkevych.

Kwaye kwakho imfuneko yokuseka iqela labaguquleli eliza kunyamekela intswelo eyandayo yoncwadi ngolwimi lwesiUkraine. Njengoko sibonile ngaphambili, abazalwana baseKhanada uEmil Zarysky noMaurice Saranchuk, kunye nabafazi babo, babesenza loo msebenzi. Elo qela lincinane labasebenzi abazimiseleyo laguqulela iimpapasho ezininzi. Noko ke, ukususela kowe-1991, iqela elandisiweyo labaguquleli besiUkraine laqalisa ukusebenza eJamani. Ngowe-1998 lafudukela ePoland, apho laqhubeka khona nomsebenzi walo ngaphambi kokufuduka okokugqibela liye eUkraine.

Iindibano Zesithili

Emva kwentlanganiso nabazalwana basekuhlaleni eLvov ngowe-1990, uMzalwan’ uJaracz waqwalasela ibala lemidlalo leso sixeko wathi: “Sinokusebenzisa eli ukuqhuba indibano yesithili kulo nyaka uzayo.” Abazalwana bamncumela, bezibuza ukuba kunokwenzeka njani oko, ekubeni intlangano yethu yayingekabhaliswa ngokusemthethweni nabazalwana bengazange khe balungiselele indibano ngaphambili. Noko ke, kwakuloo nyaka ulandelayo intlangano yabhaliswa ngokusemthethweni. NgoAgasti 1991, babemalunga nama-17 531 abantu ababekho kwindibano yesithili kwelo bala lemidlalo, yaye kwabhaptizwa abazalwana noodade abali-1 316! Abazalwana basePoland bamenywa eUkraine ukuze bancedise ekulungiseleleni loo ndibano.

Kuloo Agasti kwacetywa ukuqhuba enye indibano eOdessa. Kodwa ngenxa yokungazinzi kwemeko yezobupolitika eRashiya ekuqaleni kwaloo veki yendibano, abasemagunyeni apho baxelela abazalwana ukuba abanakukwazi ukuqhuba indibano eOdessa. Abazalwana baqhubeka becela imvume kwabasemagunyeni eso sixeko baza batyhalela phambili namalungiselelo okugqibela, bethembele ngokupheleleyo kuYehova. Ekugqibeleni, abazalwana abanembopheleleko kwathiwa mabaye kuvela kwabasemagunyeni ngoLwesine ukuze kufikelelwe esigqibeni. Ngaloo mva kwemini, abazalwana bafumana imvume yokuqhubeka naloo ndibano.

Hayi indlela ekwamangalisa nekwaba kuhle ngayo ukubona amaNgqina angama-12 115 ehlanganisene kwaza kwabhaptizwa abantu abali-1 943 kuloo mpela-veki! Kwiintsuku ezimbini emva kwaloo ndibano, abazalwana baphinda baya kwabasemagunyeni, bebabulela ngokusivumela siqhube loo ndibano. Banika usihlalo wesixeko umbhalo wencwadi ethi Oyena Mntu Ubalaseleyo Wakha Waphila. Wathi: “Bendingekho kuloo ndibano, kodwa ndazi yonk’ into ebiqhubeka apho. Andizange ndiyibone into elunge ngakumbi kunaleyo. Ndiyanithembisa ukuba nanini na nifuna imvume yokuqhuba iintlanganiso zenu, ndiya kusoloko ndikulungele ukuninika.” Ukususela ngoko, abazalwana baqhuba iindibano zesithili kwisixeko esihle saseOdessa.

Indibano Yezizwe Ngezizwe Ebalaseleyo

Esinye isiganeko esibalulekileyo yiNdibano Yezizwe Ngezizwe ‘Yemfundiso Yobuthixo’ eyaqhutyelwa eKiev ngoAgasti 1993. Inabantu abangama-64 714 ababekho yaba yeyona ndibano inkulu yakha yaqhutywa eUkraine kuquka amawaka eendwendwe ezivela kumazwe angaphezu kwama-30 ahlukeneyo. Ucwangciso lwesiNgesi lwaluguqulelwa ngaxeshanye kwiilwimi ezili-16.

Hayi indlela ekwaba yimincili ngayo ukubona abazalwana noodade bezalise amacandelo amahlanu elo bala besima ukuze baphendule besithi ewe kwimibuzo emibini yobhaptizo! Kwiiyure ezimbini ezinesiqingatha ezilandelayo, ngabantu abangama-7 402 ababhaptizwa kumaqula amathandathu, elona nani lakha lalikhulu labantu ababhaptizwayo kuyo nayiphi na indibano enye kwimbali yanamhlanje yabantu bakaThixo! Eso siganeko siyimbali siya kuhlala sikhunjulwa yaye sihlonelwa ngamaNgqina kaYehova.

Abazalwana bakwazi njani ukulungiselela loo ngxikela yendibano ekubeni kwakukho amabandla ali-11 kuphela kweso sixeko? Njengakwiminyaka engaphambili, abazalwana basePoland beza kuncedisa kwiSebe Lamagumbi. Bekunye nabazalwana balapho, baqhagamshelana neehotele nezindlu zokulala ezininzi kangangoko kunokwenzeka, baqesha nkqu namaphenyane.

Eyona nto yaba nzima kukufumana imvume yokuqesha ibala lemidlalo. Ukongezelela kwiziganeko zemidlalo, elo bala lalisetyenziswa njengemarike ephambili yoshishino ngeempela-veki, ibe akukho mntu wakha wafumana imvume yokuvala imarike. Noko ke, loo mvume yafumaneka.

Abasemagunyeni beso sixeko baseka nekomiti ekhethekileyo yokuncedisa abazalwana kumalungiselelo aloo msebenzi. Loo komiti yayiquka abaphathi beenkonzo zesixeko ezahlukeneyo, njengamapolisa, ezothutho, nokhenketho. Kwenziwa ilungiselelo elikhethekileyo lokuthutha iindwendwe zaloo ndibano apho kweso sixeko. Abazalwana baqala bahlawulela izithuthi zikawonke-wonke ukuze abo bafake iibheji zendibano bangahlawuliswa xa bekhwela kodwa babenokukwenza oko endibanweni. Ngoko, abazalwana babekwazi ukukhwela ngokukhawuleza kwizikhululo zikaloliwe, kwizithuthi nasezibhasini xa besiya naxa bebuya kwiBala Lemidlalo iRepublican (ngoku eyiOlimpiki), elinye lawona makhulu eMpuma Yurophu. Kulungiselelwa abo beze endibanweni, kwavulwa imizi engakumbi ebhaka izonka kufuphi nelo bala ukuze abazalwana bakwazi ukufumana ukutya ngokukhawuleza kusuku olulandelayo.

Umphathi wamapolisa wamangaliswa gqitha lucwangco lwaloo ndibano kangangokuba wathi: “Yonk’ into eniyenzayo, nendlela eniziphethe kakuhle ngayo, indichukumise gqitha nangaphezu kokushumayela kwenu. Abantu basenokukulibala oko bakuvileyo, kodwa abanakuze bakulibale oko bakubonileyo.”

Iqela lamabhinqa awayesebenza kwisikhululo sikaloliwe esikufuphi leza kwiofisi yolawulo lwendibano labulela abo beze endibanweni ngenxa yokuziphatha kakuhle kwabo. Loo mabhinqa athi: “Siye sasebenza apha kwiziganeko ezininzi zemidlalo nezobupolitika, kodwa besiqala ukubona iindwendwe ezizole nezonwabe ngale ndlela de zibe nomdla kuthi. Zonke bezisibulisa. Kwezinye iziganeko asiqhelanga kubuliswa.”

Amabandla aseKiev axakeka gqitha emva kwaloo ndibano, ekubeni kwafika iidilesi ezimalunga nama-2 500 zabanomdla abafuna ukufunda okungakumbi. Ngoku kukho amabandla angaphezu kwama-50 amaNgqina anenzondelelo eKiev!

Elinye iqela labazalwana elalisiya kuloo ndibano laphangwa yonk’ impahla yalo. Sekunjalo, bezimisele ukondliwa ngokomoya, bagqiba ekubeni baqhubeke nolo hambo lwabo luya eKiev, bafika endibanweni benaloo mpahla isemzimbeni kuphela. Noko ke, iqela labazalwana belo lalisakuba yiCzechoslovakia lalize nempahla eninzi lilungiselela nabani na osenokuba uswele. Xa kwachazwa kwiofisi yolawulo lwendibano oko, abo bazalwana baphangiweyo bakhawuleza balungiselelwa ngaloo mpahla ifunekayo.

Ukuncedwa Ekwenzeni Inkqubela

Loo mizekelo yothando lokungazingci yayingeyonto ingaqhelekanga. Ngowe-1991 iQumrhu Elilawulayo lacela iqela lamasebe akwiNtshona Yurophu ukuba alungiselele ukutya neempahla abazalwana bawo baseMpuma Yurophu. AmaNgqina alivuyela elo thuba lokunceda, ibe umnqweno wawo wokwabelana nabanye waba ngaphaya kwako konke oko kwakulindelwe. Abaninzi banikela ngokutya nempahla ekhe yanxitywa, ngoxa abanye bathenga iimpahla ezintsha. Iiofisi zamasebe eNtshona Yurophu zaqokelela iibhokisi zamakhadibhodi, iisutikheyisi neebhegi zezo mpahla. Kwathunyelwa iitoni zokutya neempahla zivela eDenmark, eItali, eJamani, eNetherlands, eOstriya, eSweden, naseSwitzerland zisiya eLvov ngeelori ezilandelelanayo. Ngokufuthi abazalwana babede banikele ngeelori zabo ukuze zisetyenziswe kuloo msebenzi woBukumkani eMpuma Yurophu. Emideni abasemagunyeni babeluncedo gqitha ekulungiseni amaxwebhu afunekayo ukuze kuhanjiswe yonke loo mpahla ngaphandle kwamagingxigingxi.

Abazalwana ababesisa ezo mpahla bachukunyiswa gqitha yindlela abamkelwa ngayo. Eliny’ iqela laseNetherlands elaliqhuba ezo lori zisiya eLvov lanikela ingxelo ngohambo lwalo. Labhala oku: “Umkhosi wabazalwana abali-140 wawusele ulapho uze kothula ezo lori. Ngaphambi kokuqalisa loo msebenzi, aba bazalwana bathobekileyo babonisa intembelo yabo kuYehova, ngokuthandaza kunye. Ukugqitywa kwalo msebenzi, baphinda bahlanganisana ukuze bathandaze bebulela uYehova. Emva kokunandipha ububele babazalwana balapho, abasipha intabalala yoko kuncinane banako, sakhatshwa ukuya kwindlela enkulu, apho bathandaza ecaleni kwendlela ngaphambi kokuba sihambe.

“Ebudeni bolo hambo lude lugodukayo, kuninzi esasicinga ngako ngasemva—ububele babazalwana baseJamani nasePoland, nobo babazalwana baseLvov; ukholo olomeleleyo nesimo sengqondo sabo ngomthandazo; ukubuk’ iindwendwe kwabo xa belungiselela iindawo zokulala nokutya ngoxa beswele bona ngokwabo; ukubonisa kwabo ubunye nokusondelelana; nombulelo wabo. Sasicinga nangabazalwana bethu ekhaya abo bathi ngesisa banikela ngezinto ezininzi kangako.”

Omnye umqhubi waseDenmark, wathi: “Safumanisa ukuba sibuyela emva nokuninzi ngaphezu koko besiye nako. Uthando nomoya wokuzincama owaboniswa ngabazalwana bethu baseUkraine walomeleza gqitha ukholo lwethu.”

Izinto ezininzi kwezo kwakunikelwe ngazo zadluliselwa eMoldavia, kumazwe eBaltic, eKazakhstan, eRashiya, nakwezinye iindawo ezazinentswelo enkulu. Ezinye zathunyelwa ngecontainer eSiberia naseKhabarovsk, kwiikhilomitha ezingaphezu kwama-7 000 ukuya empuma. Iileta zombulelo onzulu ezazivela kwabo babefumene olo ncedo zazichukumisa gqitha, zikhuthaza yaye zimanyanisa. Ngaloo ndlela, bonke abo babebandakanyekile babona ubunyani bamazwi kaYesu athi: “Kunoyolo ngakumbi ukupha kunokwamkela.”—IZe. 20:35.

Kamva ngowe-1998, kwehla intlekele eTranscarpathia. Ngokwemithombo esemthethweni, yaba zizindlu ezingama-6 754 ezafunyanwa zizikhukula, ibe ezingama-895 zatshatyalaliswa zaphela ludaka. Phakathi kwezo zindlu zazitshabalele kwakukho ezingama-37 zamaNgqina. Kwangoko, isebe laseLvov lathumela ilori enokutya, amanzi, isepha, iibhedi neengubo kuloo mmandla. Kamva, abazalwana baseKhanada naseJamani bathumel’ impahla yokunxiba nezixhobo zendlu. AmaNgqina aseCzech Republic, eHungary, ePoland, naseSlovakia alungiselela ukutya athumela nempahla yokwakha ezinye izindlu endaweni yezo zazitshabalele. Abazalwana abaninzi balapho bancedisa nakuloo msebenzi wokwakha. AmaNgqina eza nokutya, iimpahla zokunxiba, neenkuni zokubasa engenzeli nje kuphela abo bangamaNgqina kodwa nabanye abantu. Acoca iiyadi namabala aza anceda ekulungiseni izindlu zabo bangengomaNgqina.

Ukunikela Uncedo Lokomoya

Noko ke, uncedo lwezinto eziphathekayo asikokuphela koncedo olwanikelwayo. Emva kweminyaka engaphezu kwama-50 yokuvalwa umlomo, amaNgqina aseUkraine ayengaqhelananga nokulungelelanisa umsebenzi ngaphantsi kwenkululeko. Ngoko, ngowe-1992 kwathunyelwa abazalwana besebe laseJamani ukuze bancedise ekulungelelaniseni umsebenzi eUkraine. Oku kwabek’ iziseko zomsebenzi waseBheteli wexesha elizayo. Kamva, iJamani, iKhanada neUnited States zathumela abanye abazalwana baya kuncedisa ekuveleleni umsebenzi wokwenza abafundi.

Kwakukho nentswelo enkulu yabazalwana abanamava entsimini. Ekuqaleni, kwafika abaninzi abaphumelela kwiSikolo Sokuqeqesha Abalungiseleli bevela ePoland baya kunyamekela amabandla baza kamva banyamekela iziphaluka nezithili kulo lonke elo lizwe. Ukongezelela koko, kwafika izibini zaseKhanada naseUnited States ibe ngoku zikhonza kumsebenzi wesiphaluka. Kwakhona, abanye abazalwana baseCzech Republic, eHungary, eItali, naseSlovakia basebenza njengabaveleli beziphaluka. La malungiselelo aye anceda amabandla amaninzi alapho asebenzisa aza enza uhlengahlengiso kwimilinganiselo yeZibhalo ephathelele iinkalo ezininzi zobulungiseleli.

Ukuba Nombulelo Ngoncwadi LweBhayibhile

Isiqingatha sesibini seyee-1990 sabalasela ngamaphulo akhethekileyo okuhambisa uncwadi. Emva kwephulo lokuhambisa iKingdom News No. 35 ngowe-1997, phantse zibe li-10 000 iileta ezafunyanwa kubantu abanomdla abanye becela incwadana enemifanekiso ethi Yintoni UThixo Ayifunayo Kuthi? okanye becela kuyiwe kubo ngokobuqu.

Uncwadi lwethu luxatyiswa ngokubanzi kulo lonke elo. Xa babetyelele kwesinye sezibhedlele zokubelekisa, abazalwana bacelwa ukuba bazise imibhalo eli-12 yencwadi ethi Imfihlelo Yolonwabo Lwentsapho kweso sibhedlele veki nganye. Kwakubangelwa yintoni oko? Abasebenzi balapho babefuna ukukhupha loo ncwadi kunye nesiqinisekiso sokuzalwa kwisibini ngasinye esifumana usana olutsha!

Kule minyaka imbalwa idluleyo, abaninzi baye baqhelana namaphephancwadi ethu ibe bayawaxabisa. Ngokomzekelo, ngoxa ayeshumayela kweny’ ipaki, amaNgqina ahambisa umbhalo wephephancwadi uVukani! kwelinye inene. Loo ndoda yawabulela yaza yabuza: “Yimalini?”

Abo bazalwana bacacisa: “Umsebenzi wethu uxhaswa ngeminikelo yokuzithandela.” Loo ndoda yanikela ngemali eliphepha ihryvnia—ngoko yayilingana nee-R5,25—yahlala phantsi kwisitulo esilapho epakini, yaqalisa ukulifunda. Ngelo xesha, abazalwana babenikela ubungqina kwabanye kuloo paki. Kwimizuzu nje eli-15, loo ndoda yaya kwabo bazalwana yanikela ngenye ihryvnia ngenxa yelo phephancwadi yayilifumene. Yaphinda yaya kuhlala phantsi yaqhubeka ifunda ngoxa abo bazalwana beqhubeka beshumayela. Emva kwexesha elithile, loo ndoda yaphinda yaya kwabo bazalwana yabanika enye ihryvnia. Yabaxelela ukuba elo phephancwadi ilifumanise linika umdla gqitha yaye ifuna ukulifunda rhoqo.

Imfundo Efanelekileyo Izisa Ulwando Olukhawulezayo

Emva kokuba umsebenzi wethu ugqalwa ngokusemthethweni, kwatyhalelwa phambili. Noko ke, oko akuzange kwenzeke nje ngaphandle kwamagingxigingxi. Ekuqaleni, kwabanye kwaba nzima ukuqhela ubulungiseleli bendlu ngendlu, kuba kangangexesha elingaphezu kwesiqingatha senkulungwane, bonke ubungqina babunikelwa ngendlela engacwangciswanga. Kodwa ngoncedo lomoya kaYehova, abazalwana noodade bade baqhelana ngempumelelo noko kwakuyindlela entsha yokunikela ubungqina ngoko.

Kwakhona bakwazi nokuqhuba zontlanu iintlanganiso zeveki kwibandla ngalinye. Oku kwafeza indima ebalulekileyo ekumanyaniseni abavakalisi nasekubakhuthazeni ukuba balungele umsebenzi ongakumbi. Abazalwana bafunda ngokukhawuleza baza benza inkqubela kwiinkalo ezininzi zobulungiseleli babo. Ezo zikolo zitsha zanika amaNgqina aseUkraine imfundo elungileyo. Ngokomzekelo, ngowe-1991 kwasekwa iSikolo Sobulungiseleli Sobuthixo kuwo onke amabandla ukuze amaNgqina aqeqeshelwe umsebenzi wokushumayela. Ukususela ngowe-1992 iSikolo Sobulungiseleli SoBukumkani, sabadala nezicaka zolungiselelo, siye sabanceda gqitha abazalwana kwindlela yokukhokela kubulungiseleli basentsimini, yokufundisa ebandleni nasekwaluseni umhlambi.

Ngowe-1996 kwasekwa iSikolo Senkonzo Yobuvulindlela eUkraine. Kwiminyaka emihlanu yokuqala, bangaphezu kwama-7 400 oovulindlela abathe ngxi abaya kuloo mfundiso yeeveki ezimbini. Bangenelwa njani? Omnye uvulindlela wabhala wathi: “Ndavuyiswa gqitha kukuba ludongwe olusezandleni zikaYehova nokubunjwa ngesi sikolo.” Omnye uvulindlela wathi: “Emva kwesikolo soovulindlela, ndaqalisa ‘ukukhanya.’” Enye iklasi yesikolo soovulindlela yabhala oku: “Esi sikolo singqineke siyintsikelelo yokwenene kuthi sonke abebekuso. Siye sasishukumisela ukuba sibe nomdla wokwenene ebantwini.” Esi sikolo siye sanegalelo elikhulu kwincopho yoovulindlela abangama-57 iinyanga zilandelelana.

Ekubeni imeko yezoqoqosho inzima, abaninzi bazibuza indlela oovulindlela abakwazi ngayo ukulungiselela iimfuno zabo. Omnye uvulindlela okhonza njengesicaka solungiselelo unabantwana abathathu afanele abanyamekele. Uthi: “Sinomfazi wam sizicebela kakuhle iimfuno zethu, size sinyamekele kuphela ezo zibaluleke kakhulu kubomi bethu. Siphila ubomi obulula, sithembele kuYehova. Ngenxa yokuba nesimo sengqondo esifanelekileyo, nathi sikhe simangaliswe yindlela okukuncinane ngayo oko sikufunayo ukuze siphile.”

ISikolo Sokuqeqesha Abalungiseleli saqaliswa ngowe-1999. Phantse babe likhulu abazalwana abaya kweso sikolo kunyaka wokuqala. Kwabaninzi kwaba lucelomngeni ukuya kwezo zifundo zeenyanga ezimbini kwezo meko zinzima zoqoqosho. Noko ke, kuyacaca ukuba uYehova uye wabaxhasa abo bazalwana.

Omnye umzalwana owafumana isimemo sokuya kwiSikolo Sokuqeqesha Abalungiseleli wayekhonza njengovulindlela othe ngxi kwintsimi ekude. Ekunye nalowo babengoovulindlela kunye babeka imali eyaneleyo ukuze bazithengele ukutya namalahle kubusika obuzayo. Xa wafumana isimemo sokuya kweso sikolo, kwafuneka bakhethe phakathi kokuthenga amalahle okanye itikiti likaloliwe ukuze aye kweso sikolo. Bawuxubusha loo mbandela baza bagqiba ekubeni makaye kweso sikolo. Kungekudala emva kokuba benze eso sigqibo, udade wabo owayehlala kude naye wamthumelela imali ethile njengesipho. Yayikwanele ukuya kweso sikolo. Ukuphela kweso sikolo, loo mzalwana wabelwa ukukhonza njengovulindlela okhethekileyo.

Ezo nkqubo zemfundo ziye zaxhobisa abantu bakaYehova ukuba babe nenxaxheba ngokuphumelela ngakumbi kwinkonzo yasentsimini nakumsebenzi webandla. Abavakalisi bafunda indlela yokushumayela ngokuphumelela ngakumbi; abadala nezicaka zolungiselelo baye bafundiswa indlela abanokuba ngumthombo wokhuthazo olukhulu ngayo kumabandla abo. Ngenxa yoko, ‘amabandla aqhubeka eqiniswa elukholweni yaye anda ngenani.’—IZe. 16:5.

Ulwando Olukhawulezayo Luzisa Iinguqu

Ebudeni beminyaka ukususela ekubhalisweni ngokusemthethweni kwamaNgqina kaYehova eUkraine inani lawo liye laphindeka ngaphezu kwezihlandlo ezine. Kwiindawo ezininzi zelo lizwe kuye kwakho ulwando olukhulu ngendlela engaqhelekanga. Kukho nentswelo enkulu yabadala abafanelekayo. Ngokufuthi amabandla ahlulwa ngokukhawuleza xa kuvela umdala wesibini. Amanye amabandla anabavakalisi abafikelela kuma-500. Olo lwando lukhawuleza kangako luye lwafuna iinguqu kwindlela yokulawula.

Ukuya kutsho kweyee-1960, isebe lasePoland longamela umsebenzi waseUkraine, kwaza emva koko, wonganyelwa lisebe laseJamani. NgoSeptemba 1998, iUkraine yaba lisebe elisebenza ngaphantsi kwekomkhulu lehlabathi eBrooklyn. Ngelo xesha kwasekwa iKomiti yeSebe ukuze ilawule imicimbi yentlangano.

Olo lwando lukhawulezayo lwabangela nemfuneko yokuba kwandiswe izakhiwo zesebe. Ekuqaleni kowe-1991, iLvov yayisetyenziswa njengeziko loncwadi lwaloo mazwe ali-15 ayekade ekwiU.S.S.R. Kunyaka olandelayo, kwafika ezinye izibini ezibini zivela kwiofisi yesebe laseJamani. Kungekudala iofisi encinane yaqalisa ukusebenza eLvov. Kunyaka emva koko, kwaye kwathengwa indlu eza kusetyenziswa ngabo babesebenza eofisini ixesha elizeleyo. Ekuqaleni kowe-1995, inani lamatsha-ntliziyo asebenza kwiofisi yaseUkraine landa ngokukhawuleza, nto leyo eyabangela ukuba kuphinde kufudukwe, kwesi isihlandlo kwayiwa kwisakhiwo esineeHolo zoBukumkani ezintandathu ezisetyenziswa ngamabandla ali-17. Lonke elo xesha, abazalwana babezibuza oku: “Siza kuyakha nini yaye phi eyethu iBheteli?”

Ukwakhiwa Kwesebe NeHolo YoBukumkani

Kwasebutsheni bowe-1992, abazalwana baqalisa ukufuna indawo yokwakha izakhiwo zesebe. Kwaqengqeleka iminyaka eliqela njengoko kwakuhlolwa ezo ndawo zazingathi ziyafaneleka. Abazalwana bahlala beyibeka phambi koYehova emithandazweni yabo loo ntswelo, beqinisekile ukuba ngexesha elifanelekileyo iza kufumaneka indawo efanelekileyo.

Ekuqaleni kowe-1998 kwafunyanwa indawo kwihlathi elihle lemithi yompayini, kumgama weekhilomitha ezintlanu kumantla eLvov kwidolophu encinane yaseBriukhovychi. Kukufutshane naloo ndawo apho amabandla amabini ayeqhubela khona iintlanganiso zawo ehlathini ebudeni bokuvalwa umlomo. Omny’ umzalwana waphawula wathi: “Andizange khe ndicinge ukuba kwiminyaka elishumi emva kwaloo ntlanganiso yethu yokugqibela kweli hlathi, ndingaze ndiphinde ndifumane ithuba lokuhlanganisana kwakweli hlathi, kodwa kwiimeko ezahluke ngokupheleleyo—kumhlaba wesebe lethu elitsha!”

Ekupheleni kowe-1998, izicaka zamazwe ngamazwe zokuqala zagaleleka apho. Abazalwana beRegional Engineering Office yaseSelters, eJamani, baqalisa ukuzibhokoxa belungisa iiplani zezo zakhiwo. Ekuqaleni kukaJanuwari 1999, emva kokuba urhulumente evumile, umsebenzi wokwakha waqalisa kuloo ndawo. Aba ngaphezu kwama-250 amatsha-ntliziyo aphuma kubantu bezizwe ezahlukeneyo ezingama-22 abasebenza apho. Kwakhona kuloo msebenzi kwakufika namatsha-ntliziyo asekuhlaleni awayefikelela kuma-250 ngeempela-veki.

Abaninzi balixabisa gqitha ilungelo lokusebenza apho. Onke amabandla aqesha iibhasi ukuze aye kusebenza ngokuzithandela apho eBriukhovychi ngeempela-veki. Ayesoloko ehamba ubusuku bonke ukuze abe kweso sakhiwo kwangexesha ancedise kuloo msebenzi wokwakha. Emva kosuku lomsebenzi onzima, ayechitha obunye ubusuku kuhambo olugodukayo, ediniwe kodwa anelisekile yaye evuya, enqwenela ukuphinda abuye. Elinye iqela labazalwana abangama-20 lahamba ngololiwe iiyure ezingama-34 livela eLuhans’k kummandla osempuma Ukraine ukuze lisebenze iiyure ezisibhozo kweso sakhiwo saseBheteli! Ngenxa yaloo msebenzi weeyure ezisibhozo, mzalwana ngamnye wathabatha ikhefu leentsuku ezimbini kumsebenzi wakhe wempangelo waza wachitha imali engaphezu kwesiqingatha somvuzo wenyanga kumatikiti kaloliwe. Loo moya wokuzincama wabakhuthaza bonke abo babesebenza kweso sakhiwo seBheteli kunye nentsapho yaseBheteli. Oko kwakha kwakhawuleziswa, nto leyo eyenza lanikezelwa elo sebe ngoMeyi 19, 2001. Ngabantu ababevela kumazwe angama-35 ababekho kweso sihlandlo. Kwiintlanganiso ezikhethekileyo kusuku olulandelayo, uTheodore Jaracz wathetha nesihlwele sabantu abangama-30 881 eLvov, yena uGerrit Lösch wathetha nabantu abangama-41 142 eKiev—isimbuku sabantu abangama-72 023.

Kuthekani ngeeHolo zoBukumkani? Ukususela kowe-1939, xa kwatshatyalaliswa iqela leeholo zaseTranscarpathia, akuzange kubekho Holo zoBukumkani zisemthethweni eUkraine de kwaba ngowe-1993. Kuloo nyaka, kwakhiwa isakhiwo esihle esineeHolo zoBukumkani ezine kwiinyanga nje ezisibhozo kwidolophana yaseTranscarpathia iDibrova. Kamsinya emva koko, kwagqitywa ezinye iiholo ezintandathu kweminye imimandla yaseUkraine.

Ngenxa yolwando olukhulu lwabavakalisi, kwabakho intswelo enkulu yeeHolo zoBukumkani. Noko ke, ukuntsonkotha kweenkqubo zomthetho, ukunyuka kwamaxabiso, nalawo ezinto zokwakha kwathetha ukwakhiwa kweeHolo zoBukumkani ezili-110 kuphela kweyee-1990. Kwakusafuneka amakhulukhulu ezingakumbi! Ngoko ngowama-2000, kwasekwa inkqubo entsha yokwakhiwa kweeHolo zoBukumkani, esele inceda ukujamelana nezo ntswelo.

Phambili Nomsebenzi Wokuvuna!

NgoSeptemba 2001, kwakukho amaNgqina kaYehova angama-120 028 kumabandla ali-1 183, awayekhonzwa ngabaveleli besiphaluka abangama-39 eUkraine! Imbewu yenyaniso eyahlwayelwa kangangexesha elide iye yavelis’ isiqhamo esiyintabalala. Kwezinye iintsapho, kukho isizukulwana sesihlanu samaNgqina kaYehova. Oku kubonisa ukuba loo “mhlaba” uchume ngokwenene. “Emva kokuliva ilizwi ngentliziyo entle,” abaninzi ‘baligcina.’ Kangangeminyaka, abazalwana ‘batyala’ imbewu, ngokufuthi ngeenyembezi; abanye ‘bankcenkceshela’ loo mhlaba uchumileyo. UYehova uyayikhulisa, ibe amaNgqina akhe athembekileyo aseUkraine ayaqhubeka ‘ethwala isiqhamo ngonyamezelo.’—Luka 8:15; 1 Kor. 3:6.

Kweminye imimandla umlinganiselo wamaNgqina kubemi ubalasele gqitha. Ngokomzekelo, kwiidolophana ezisibhozo ezithetha isiRomania kummandla waseTranscarpathia, kukho amabandla angama-59 abumba iziphaluka ezithathu.

Imigudu yabachasi bonqulo nabanye yokutshabalalisa amaNgqina kaYehova eUkraine ngokuwagxotha nangentshutshiso eqatha yawa phantsi. Iintliziyo zabantu beli lizwe ziye zangqineka zichumile kwimbewu yenyaniso yeBhayibhile. Namhlanje amaNgqina kaYehova avuna isivuno esiyintabalala.

Umprofeti uAmosi waxela kwangaphambili ngexesha lesivuno apho “aya kuthi umlimi okunene amfikele umvuni.” (Amosi 9:13) Intsikelelo kaYehova yenza loo mhlaba uvelise kangangokuba kuqhutyekwa kuvunwa into engapheliyo de kufike ixesha lokulima elilandelayo. AmaNgqina kaYehova aseUkraine aye abubona ubunyaniso besi siprofeto. Ekhangele phambili kwikamva, aqinisekile ukuba ekubeni enabantu abangaphezu kwesiqingatha sesigidi abebekho kwiSikhumbuzo sowama-2001, kukho ithemba elikhuthazayo lolwando olungakumbi.

Njengoko kubhalwe kuAmosi 9:15 uYehova uthembisa oku: “Ngokuqinisekileyo ndiya kubatyala emhlabeni wabo, yaye abasayi kuncothulwa emhlabeni wabo endibanike wona.” Beqhubeka behlwayela imbewu yenyaniso yaye bevuna intabalala yesivuno, abantu bakaThixo bakhangele phambili ngomdla kwixesha apho uYehova eya kusizalisekisa ngokupheleleyo esi sithembiso. Okwangoku, siphakamisa amehlo ethu size sikhangele amasimi, yaye siyabona ukuba ngokwenene amhlophe ukuze kuvunwe.—Yoh. 4:35.

[Amagama acatshulweyo akwiphepha 140]

“UDanyil ngewaxhonywayo, kodwa ngenxa yokuba wayeselula wagwetywa iinyanga ezine kuphela entolongweni”

[Amagama acatshulweyo akwiphepha 145]

“AmaNgqina ayengafani nabo bonke abanye abantu ababekuloo nkampu yoxinaniso. Ayenobuhlobo, nesimo sengqondo esihle. Indlela aziphethe ngayo yayibonisa ukuba anento ebalulekileyo afuna ukuyithetha kwamanye amabanjwa”

[Amagama acatshulweyo akwiphepha 166]

NgoAprili 8, 1951, ngamaNgqina angaphezu kwama-6 100 awathatyathwa entshona Ukraine athunyelwa eSiberia

[Amagama acatshulweyo akwiphepha 174]

“Ngokufuthi, oodade wethu babesenza umsebenzi wezicaka zebandla, yaye kwezinye iindawo babephumeza iimbopheleleko zezicaka zesiphaluka”

[Amagama acatshulweyo akwiphepha 183]

Kunokuba aye kwiholide yabasandul’ ukutshata, wachitha iminyaka elishumi entolongweni

[Amagama acatshulweyo akwiphepha 184]

“Kwakubuhlungu gqitha ukunikela ngentombazana yam endiyithandayo kumntu endingazange ndimbone”

[Amagama acatshulweyo akwiphepha 193]

Bathi besakuqonda ukuba amaNgqina kaYehova akanakuvalwa umlomo kukugxothwa kwelo, ukuvalelwa, ukuxhatshazwa emzimbeni, nokuthuthunjiswa, abezokhuselo basebenzisa amacebo amatsha

[Amagama acatshulweyo akwiphepha 207]

IKGB yadlulisela kwabo bazalwana bazahluleyo ileta yobuxoki, ngokungathi ivela kuMzalwan’ uKnorr

[Amagama acatshulweyo akwiphepha 212]

IKGB yayisoloko ivula amehlo ngokukhethekileyo ngexesha leSikhumbuzo, ekubeni yayisoloko iwazi kakuhle umhla waloo mbhiyozo

[Amagama acatshulweyo akwiphepha 231]

Yayisisihlandlo sokuqala ukuba babambe impapasho yeBhayibhile yokoqobo ngezandla zabo

[Amagama acatshulweyo akwiphepha 238]

“Yonk’ into eniyenzayo, nendlela eniziphethe kakuhle ngayo, indichukumise gqitha nangaphezu kokushumayela kwenu. Abantu . . . abanakuze bakulibale oko bakubonileyo”

[Amagama acatshulweyo akwiphepha 241]

“Uthando nomoya wokuzincama owaboniswa ngabazalwana bethu baseUkraine walomeleza gqitha ukholo lwethu”

[Amagama acatshulweyo akwiphepha 249]

Ngenxa yaloo msebenzi weeyure ezisibhozo, mzalwana ngamnye wathabatha ikhefu leentsuku ezimbini kumsebenzi wakhe wempangelo waza wachitha imali engaphezu kwesiqingatha somvuzo wenyanga kumatikiti kaloliwe

[Ibhokisi/Imifanekiso ekwiphepha 124]

Ukuguqulelwa KweBhayibhile Ukutyhubela Iinkulungwane

Kangangexesha elide, abantu baseUkraine babesebenzisa inguqulelo yeBhayibhile iOld Church Slavonic eyaguqulelwa kwinkulungwane yesithoba. Ekuhambeni, kwexesha njengoko ulwimi lutshintsha, loo nguqulelo yahlaziywa. Ngasekupheleni kwenkulungwane ye-15, uBhishophu Omkhulu uGennadius wongamela ukuhlaziywa ngokupheleleyo kweBhayibhile yeSlavonic. Le nguqulelo yakhokelela kolunye uhlaziyo olwaphumela ekushicilelweni kokuqala kweBhayibhile yeSlavonic. Le nguqulelo yaziwa ngokuba yiBhayibhile yaseOstrog ibe yashicilelwa eUkraine ngowe-1581. Nanamhlanje, abasemagunyeni bayigqala njengomzekelo obalaseleyo wobuchule bokushicilela. Yasebenza njengesiseko seenguqulelo zeBhayibhile zamva zesiUkraine nesiRashiya.

[Imifanekiso]

UIvan Fedorov washicilela iBhayibhile yaseOstrog eUkraine ngowe-1581

[Ibhokisi/Umfanekiso okwiphepha 141]

Udliwano-ndlebe NoVasyl Kalin

Wazalwa: 1947

Wabhaptizwa: 1965

Ingxelo Ngobomi: Wagxothwa kwilizwe lakhe ngowe-1951-65. Washicilela uncwadi esebenzisa umatshini osebenzisa ilitha xa ukhuphela ukususela kowe-1974 ukusa kowe-1991. Ukususela ngowe-1993 uye wakhonza kwiofisi yesebe laseRashiya.

Utata waphila ngaphantsi koorhulumente abaninzi abahlukeneyo namagunya ahlukeneyo abo rhulumente. Ngokomzekelo, xa intshona Ukraine yayiphantsi kwamaJamani, ambetha utata kuba ayecinga ukuba uliKomanisi. Kwakutheni? Omnye umfundisi waxelela amagosa aseJamani ukuba amaNgqina kaYehova ngamaKomanisi kuba ayengayi ecaweni. Emva koko kwangena ulawulo lweSoviet. Kwakhona, utata nabanye abaninzi bacinezelwa. Wayebizwa ngokuba yintlola yaseMerika. Kwakutheni? Ngenxa yokuba iinkolelo zamaNgqina kaYehova zazahlukile kwiinkolelo zonqulo olwalugqugqisile ngelo xesha. Kungenxa yoko utata nentsapho yakhe baya kulahlwa eSiberia, apho wahlala khona de wafa.

[Ibhokisi/Umfanekiso okwiphepha 147-151]

Udliwano-ndlebe NoIvan Lytvak

Wazalwa: 1922

Wabhaptizwa: 1942

Ingxelo Ngobomi: Wavalelwa entolongweni ngowe-1944-6. Wathothoza kwiinkampu zomsebenzi onzima ukususela kowe-1947 ukusa kowe-1953 lee kumantla eRashiya.

Ngowe-1947, ndabanjwa kuba andizange ndizibandakanye kwezobupolitika. Ndaya kuvalelwa kwintolongo eluqilima yaseLuts’k, eUkraine, apho ndandichopha umqolo uthe nkqo izandla zisemathangeni—ndingenakukwazi ukunaba ngemilenze. Ndahlala ngaloo ndlela iinyanga ezintathu. Ndandincinwa yindoda ethile enedyasi emnyama. Yayifuna ndichaze abazalwana abakhokelayo kuloo msebenzi. Yayisazi ukuba ndiyabazi, kodwa ndala ukuyixelela.

NgoMeyi 5, 1947, inkundla yasemkhosini yandigweba iminyaka elishumi kwiinkampu zentolongo eluqilima ekwanti. Noko ke, ekubeni ndandiselula ngoko, ndafakwa kwabo kwakusithiwa ludidi lokuqala. Bonke abakudidi lokuqala yayingamatyendyana aselula—amaNgqina nangengawo. Saphoswa kwiinqwelo zeenkomo sasiwa eVorkuta, kude lee kumantla eRashiya. Ukusuka apho safakwa enqanaweni, ibe sahamba ngolwandle iintsuku ezine saya kutsho eKara Strait.

Kwakungekho nto ziphilayo apho, ngaphandle nje kwemithi emifutshane yetundra nedwarf Arctic. Ukusuka apho sanyanzelwa ukuba sihambe ngeenyawo iintsuku ezine nobusuku bazo. Phofu ke, sasiselula. Sanikwa izikhoko zesonka esomileyo nenyama yereindeer eyosiwe ngomsi. Sanikwa oko kutya kunye nezitya neengubo ezishushu. Yayisina gqitha. Ezo ngubo sasiziphethe zaba manzi de kwanzima ukuziphatha. Sasibambisana ngayo sibabini size siyikhame ukuze ibe lula kwakhona.

Ekugqibeleni, safika kuloo ndawo sasisiya kuyo. Ndicinga ndandisithi: ‘Kungekudala kuza kubakho uphahla phezu kwentloko yam!’ Kodwa safikela kwindawo eyimpengezi ezele bubulembu. Abalindi bathi: “Ningazilungiselela ukuhlala. Le yindawo yenu.”

Amanye amabanjwa akhala; amanye amqalekisa urhulumente. Andizange ndiqalekise namnye apho. Ndathandaza ndithule ndathi: “Yehova, Thixo wam, uyindawo yam yokusabela negwiba lam. Yiba yindawo yam yokusabela nalapha.”

Loo ndawo yarhangqwa ngentambo ekubeni lwalungekho ucingo. Kwamiswa abalindi. Njengesiqhelo abo balindi babesoloko befunda, besithi ukuba ukhe wathi cakatha malunga neemitha ezimbini, baya kukudubula. Salala kobo bulembu. Imvula yayizenzela nje phezu kwethu. Ndavuk’ ebusuku ndajonga kwabo bantu bali-1 500, ibe ndabona umphunga wokuphefumla kwabo. Ndavuka kusasa, yaye ndandithe gabhu ngecala emanzini. Apho kwakukho ubulembu, kodwa kukho amanzi nakubo. Kwakungekho nto yakutya. Kwathiwa simele senze ibala eliza kuhlala inqwelo-moya eza kusiphathela ukutya. Abalindi bethu babenetrekta ekhethekileyo enamavili amakhulu ukuze ingaxingi. Yayisiza nokutya kwabo, kodwa sasingakhothi naphantsi.

Sachitha iintsuku ezintathu nobusuku bazo silungisa elo bala liza kuhlala inqwelo-moya. Kwafuneka sisuse obo bulembu ukuze loo nqwelo-moya ikwazi ukuhlala. Kwafika icekecekana lenqwelo-moya lizise umgubo wengqolowa. Babedubela loo mgubo kumanzi abilayo, size ke sitye loo nto.

Loo msebenzi wawuqoba gqitha. Sasisenza isiporo sikaloliwe. Sasifana nebhanti elihamba ngomatshini, lithwele amatye amakhulu. Ebusika, kwakuhlala kumnyama lonk’ ixesha yaye kwakubanda gqitha.

Sasilala phantsi kwesibhakabhaka, kungekho khusi phezu kwethu. Imvula yayizenzela nje, sasiba manzi, silamba, yaye sigodola; kodwa sasiselula, ngoko ke sasisenamandla. Abalindi bathi singaxhalabi, kungekudala siza kuba nekhusi. Ekugqibeleni, kwafika itrekta yomkhosi izise iiseyile ezazinokwanela abantu abangama-400. Sazolula ezo seyile saza sazimisa, kodwa yayingekabikho indawo yokulala ngaphandle kobo bulembu. Sonke seza nengca kwezo ntente sasihlala kuzo, yabola yaza yaba ngumgquba. Sasilala phezu kwaloo mgquba.

Emva koko kwavela iintwala. Hayi ke ezo ntwala zasityela ukusibona. Zazingapheleli emzimbeni nje, kodwa zazikuyo yonke impahla yethu—ezinkulu nezincinane. Kwakukubi gqitha. Xa uvela emsebenzini, uze ungqengqe phantsi, zazikutyela ukukubona, ibe wawuzonwaya ungayeki. Xa ulele, zazikutya uthi nca. Saxelela umphathi wethu sathi: “Siyaphela ziintwala.” Wathi: “Kungekudala siza kuzigcada ezo ntwala zenu.”

Amagunya entolongo kwafuneka alinde de imozulu ifudumale kuba ngoko ingqele yayisoloko ingama-30 ngokukaCelsius ngaphantsi kweqondo lobushushu. Enyanisweni, yadlula loo ngqele ngandlel’ ithile, yaye beza bephethe ezo zinto sasiza kuma phezu kwazo xa sihlanjwa kubulawa ezo ntwala. Kodwa iqondo lobushushu lalingama-20 ngokukaCelsius ngaphantsi kweqondo lobushushu, ibe loo ntente yethu yayidlakadlaka yonke. Kwathiwa: “Khululani, niza kuhlamba. Khululani. Siza kuhlamba loo mpahla yenu.”

Ngoko kwimozulu engama-20 ngokukaCelsius ngaphantsi kweqondo lobushushu sakhulula sabetha ngeyesele kuloo ntente idlakadlaka. Beza namacangca amaplanga, saza sawandlala. Njengoko ndandihleli kuloo maplanga, ndazijonga emzimbeni. Onjani wona ukuba mbi umbono! Ndajonga komnye osecaleni kwam. Yinto efanayo. Kwakungekho nesinjani isihlunu. Kwakuphele yonk’ into. Sasingamathambo nje nofele. Ndandingakwazi nokukhwela ngemva kwinqwelo-mafutha. Ndandidiniwe. Sekunjalo, ndafakwa kudidi lokuqala—umsebenzi ophilileyo noselula.

Ndandicinga ukuba sele ndiza kufa. Abaninzi bafa—abafana abaselula. Ngoko ndathandaza ngokwenene kuYehova ukuze andincede kuba kwabonakala kungekho ndlela yakuphuma apho. Abanye abangengomaNgqina ngabom bafaka isandla okanye umlenze emkhenkceni baze basinqumle ukuze bayekiswe loo msebenzi. Kwakusoyikeka, umbono ombi gqitha.

Ngeny’ imini ndandimi kufuphi nendawo yabalindi, ndaza ndabona ugqirha emi apho. Ndandihamba naye emva kokubanjwa kwam ibe ndanikela ubungqina ngoBukumkani bukaThixo kuye. Wayelibanjwa, kodwa waxolelwa. Ndaya kuye ndamjonga, yaye ngokwenene wayengathi ukhululekile. Ndambiza ngegama; ndicinga ukuba yayinguSasha. Wandijonga waza wathi: “Ivan, nguwe lowo?” Wathi akutsho ndakhala okomntwana. Wathi: “Yiya kwicandelo lonyango ngokukhawuleza.”

Ndaya kwicandelo lonyango, ibe ndakhutshwa kudidi lokuqala lwabasebenzi. Kodwa ndandisesenkampini. Ekubeni ngoku ndandikudidi lwesithathu, ndathunyelwa kwindawo yabo kufuneka baphumle. Umphathi walapho wathi: “Andikhange ndikubize apha. Uzizele. Yiba nesimilo, wenze umsebenzi wakho.” Ngoko ngokuthe ngcembe, ndaziqhelanisa nokuhlala apho. Kwakungasekho mfuneko yokuba ndenze loo msebenzi uqobayo.

Ndakhululwa ngoAgasti 16, 1953. Bathi: “Ukhululekile ukuba uhambe.” Bathi ndingaya naphi na apho ndifuna ukuya khona. Kuqala ndaya ehlathini ndambulela uYehova kuba eye wandilondoloza. Ndangena kwelo hlathi lincinane, ndaguqa ngamadolo, ndambulela uYehova kuba eye wandigcina ndiphila endigcinela ikamva nomsebenzi wekamva wokuzukisa igama lakhe elingcwele.

[Blurb]

‘Kungekudala kuza kubakho uphahla phezu kwentloko yam!’

[Blurb]

Ndangena kwelo hlathi lincinane, ndaguqa ngamadolo, ndambulela uYehova kuba eye wandigcina ndiphila

[Ibhokisi/Umfanekiso okwiphepha 155, 156]

Udliwano-ndlebe NoVolodymyr Levchuk

Wazalwa: 1930

Wabhaptizwa: 1954

Ingxelo Ngobomi: Wabanjwa wavalelwa ngenxa yezobupolitika ngowe-1946-54. Wadibana namaNgqina kaYehova kwenye yeenkampu zomsebenzi onzima eMordvinia.

Ndandingumnashinali waseUkraine. Ngenxa yoko, ngowe-1946 amaKomanisi andigweb’ iminyaka eli-15 kwinkampu yentolongo. Apho kwakukho amaNgqina kaYehova. Andishumayeza, ibe ndakhawuleza ndayiqonda inyaniso. Sasingenayo iBhayibhile kuba sasikwinkampu yokhuseleko oluluqilima. Ngoko ke, ndandidla ngokukhangela amaphetshana amancinane ndize ndiwagcine. Emva kokuqokelela aliqela, ndenza incwadana encinane yokubhala. Ndacela abazalwana ukuba bandixelele naziphi na izibhalo abazikhumbulayo nalapho zifumaneka khona eBhayibhileni. Emva koko ndazibhala kuloo ncwadi yam. Ndandibuza nabo basandul’ ukufika. Xa kukho nabani na owazi isiprofeto seBhayibhile esithile, naso ndandisibhala. Ndaqokelela imixholo yeBhayibhile eliqela, ndaza ndaqalisa ukuyisebenzisa kumsebenzi wam wokushumayela.

Xa ndandiqala ukushumayela, babebaninzi abanjengam, amatyendyana aselula. Ndandingoyena mncinane—ndineminyaka eli-16 kuphela ubudala. Ndathetha naloo matyendyana ndathi: “Sifane sabandezelekela ilize. Thina nabanye sifane sabeka ubomi bethu emngciphekweni ngento engekhoyo. Akukho bupolitika buya kusisa ndawo. Nifanele nime kwicala loBukumkani bukaThixo.” Ndacaphula ezo ndinyana ndandizikhumbula kwincwadi yam. Ndandikwazi kakuhle ukukhumbula. Ndabeyisela ngokukhawuleza oontanga bam, ibe bazibandakanya nathi, thina maNgqina kaYehova. Baba ngabazalwana.

[Ibhokisi/Umfanekiso okwiphepha 157]

Ùkulinganiselwa Kwezohlwayo ZamaNgqina KaYehova

Ngaphandle Kwelizwe: Abo bagxothiweyo babethunyelwa kwimimandla ekude, ngokuqhelekileyo eSiberia, apho babefanele basebenze baze bahlale khona. Babengafanele bawushiye loo mmandla wabo mtsha. Kwakufuneka baye kubhalisa emapoliseni alapho kanye ngeveki okanye ngenyanga.

Entolongweni: Amabanjwa amathathu ukusa kwalishumi ayevalelwa kwisisele esinye. Ayefumana ukutya kabini okanye kathathu ngemini. Kanye ngemini okanye ngeveki, ayekhululwa ahambahambe kwiyadi yentolongo. Ayengasebenzi.

Kwiinkampu Zentolongo: Inkoliso yazo yayiseSiberia. Amakhulu amabanjwa ayehlala kunye (ngokuqhelekileyo kwisakhiwo esinye kuhlala amabanjwa angama-20-100). Ubuncinane ayesebenza iiyure ezisibhozo ngemini kumabala enkampu okanye kwezinye iindawo. Umsebenzi wawunzima yaye ubandakanya ukwakha imizi-mveliso, isiporo sikaloliwe, okanye ukugawula imithi. Amabanjwa ayephelekwa ngabalindi bentolongo ukuya nokubuya emsebenzini. Ngaphakathi enkampini, amabanjwa ayenokuzula ngokukhululekileyo emva kweeyure zomsebenzi.

[Umfanekiso]

ESiberia, eRashiya: Abantwana bamaNgqina aseUkraine agxothiweyo bacanda iinkuni bezenza ncinane ukuze zibaswe, ngowe-1953

[Ibhokisi/Umfanekiso okwiphepha 161, 162]

Udliwano-ndlebe NoFyodor Kalin

Wazalwa: 1931

Wabhaptizwa: 1950

Ingxelo Ngobomi: Wagxothwa kwilizwe lakhe ngowe-1951-65. Wabanjwa wavalelwa ngowe-1962-5.

Xa ndandisentolongweni ndincinwa, uYehova wakha wandenzela oko kwabonakala kungummangaliso. Umalathisi weKGB (iKomiti Yokhuseleko Lwelizwe) weza nephepha elithile. Lowo undincinayo wayehleli phantsi, ecaleni kwakhe kuhleli umtshutshisi. Lo malathisi weKGB wathi kulowo undincinayo: “Mnike lona! Mnike afunde ukuba abazalwana bakhe baseMerika abalunganga!”

Bandinika elo phepha. Yayisisigqibo sendibano yesithili. Ndasifunda, ndaza ndaphinda ndasifunda okwesibini ngocoselelo. Umtshutshisi waya ephelelwa ngumonde. Wathi: “Mnu. Kalin! Uyasinkqaya esi sigqibo?”

Ndathi: “Kaloku, kuqala ndiye ndasifunda nje ndisileqa. Ngoku ndifuna ukufumana owona mongo waso.” Ngaphakathi ndandizele luvuyo. Ukugqiba kwam ukufunda eso sigqibo, ndasibuyisela ndaza ndathi: “Ndikubulela ngokwenene, kodwa ndibulela uYehova uThixo kuba eye wakushukumisela ukuba wenze oku. Namhlanje ukholo lwam luye lwaqina ngakumbi kuba ndifunde esi sigqibo! Ndiyavumelana nala maNgqina, ibe ndiya kulidumisa igama likaThixo ngaphandle kokuyekelela. Ndiya kuthetha ngaye kubantu enkampini nasentolongweni naphi na apho ndikhoyo. Olu luthumo lwam!

“Nokuba ningandingcungcuthekisa kangakanani na, aniyi kundivala umlomo. Kwesi sigqibo, amaNgqina akakhange athi alungele ukuvukela, kodwa enza isigqibo sokuba enoba kwenzeka ntoni na kuwo, nkqu neyona ntshutshiso iqatha, aya kumkhonza uYehova, esazi ukuba uza kuwanceda ahlale ethembekile! Ndithandaza kuYehova uThixo ukuba andomeleze kweli xesha linzima ukuze ndime ndiqinile elukholweni.

“Kodwa andiyi kugungqiswa! Esi sigqibo sindomeleze ngeyona ndlela. Ukuba nindayamisa ngodonga ukuze nindidubule ngoku, andiyi koyika. UYehova uyasindisa nkqu nangovuko!”

Ndabona ukuba abo bancini badanile. Baqonda ukuba benze impazamo enkulu. Ngeso sigqibo babefuna ukwenza buthathaka ukholo lwam, kodwa salomeleza.

[Ibhokisi/Umfanekiso okwiphepha 167-169]

Udliwano-ndlebe NoMariya Popovych

Wazalwa: 1932

Wabhaptizwa: 1948

Ingxelo Ngobomi: Waba kwiintolongo neenkampu zomsebenzi onzima iminyaka emithandathu. Uye wanceda abantu abangaphezu kweshumi bafunda inyaniso.

Ukubanjwa kwam ngoAprili 27, 1950, ndandineenyanga ezintlanu ndikhulelwe. NgoJulayi 18, ndagwetywa iminyaka elishumi entolongweni. Ndagwetyelwa ukushumayela, ukuxelela abantu inyaniso. Sagwetywa sisixhenxe, abazalwana abane noodade abathathu. Ngamnye wagwetywa iminyaka elishumi. Unyana wam omncinane wazalwa ngoAgasti 13.

Noko ke, xa ndandisentolongweni andizange ndidimazeke. Ndafunda kwiLizwi likaThixo, iBhayibhile, ukuba uba noyolo xa ubandezeleka ngenxa yokuba ngumKristu, kungekhona ngenxa yokuba ngumbulali okanye isela. Ibe ndandivuya. Ndandivuya ngaphakathi. Ndavalelwa ndedwa, ibe ndazulazula kweso sisele ndivuma iingoma.

Elinye ijoni lavula ifestile encinane lathi: “Kwenzeka njani ukuba uthi ukwimeko enje ucule?”

Ndathi: “Ndonwabile kuba andenzanga nto imbi kuye nabani na.” Lasuka layivala loo festile. Loo majoni akazange andibethe.

Athi: “Lulahle ukholo lwakho. Khangela imeko okuyo ngoku.” Ayethetha ngokuba ndiza kuzalela entolongweni. Kodwa ndandivuya kuba ndandigwetywe ngenxa yokuba nokholo kwiLizwi likaThixo. Kwandenza ndaziva ndanelisekile. Ndandisazi ukuba andisosaphuli-mthetho. Ndandisazi ukuba ndinyamezela ngenxa yokuba nokholo kuYehova. Oko kwandigcina ndivuya lonke ixesha. Yayinjalo loo meko.

Kamva, ngoxa ndandisebenza kuloo nkampu, izandla zam zahlaselwa yiqabaka. Ndasiwa esibhedlele. Ugqirha walapho wakholiswa ndim. Wathi: “Impilo yakho ayikho ntle. Kutheni ungezi kusebenzela mna nje?”

Kakade, umphathi waloo nkampu wayengakuthandi oko. Wathi: “Kutheni ufuna eli bhinqa lize kusebenzela wena? Khangela omnye umntu kwelinye iqela.”

Wathi: “Andifuni omnye umntu—ndifuna abantu abalungileyo, abanyanisekileyo kwisibhedlele sam. Yaye uza kusebenza kwesi sibhedlele. Ndiyazi ukuba akukho nto aya kuyiba yaye akayi kusebenzisa ziyobisi.”

Babesithembile. Babebahlonela ngokukhethekileyo abantu abanokholo. Babona uhlobo lwabantu esingabo. Kwasinceda oko.

Ekugqibeleni, loo gqirha wamphek’ emophula loo mphathi. Loo mphathi wayefuna ukundigcina kuba ndandisebenza kakuhle ekugawuleni imithi. Naphi na apho babesebenza khona abantu bakaYehova, sasisoloko sinyanisekile, singabasebenzi abanesazela.

Phawula: Unyana kaMariya wazalelwa kwintolongo yaseVinnitsa, eUkraine. Kwiminyaka emibini elandelayo, wagcinwa kwindawo yeenkedama entolongweni. Emva koko, izalamane zaluthabatha olo sana zalusa kuyise, owayesele egxothelwe eSiberia. Xa wayephuma entolongweni uDade Popovych, unyana wakhe wayeneminyaka emithandathu ubudala.

[Blurb]

“Ndonwabile kuba andenzanga nto imbi kuye nabani na”

[Ibhokisi/Umfanekiso okwiphepha 175]

Udliwano-ndlebe NoMariya Fedun

Wazalwa: 1939

Wabhaptizwa: 1958

Ingxelo Ngobomi: Wagxothwa kwilizwe lakhe ngowe-1951-65.

Emva kokuba singenile kuloo loliwe, emva kokuba sonke sizolile saza saqalisa olo hambo lwethu, yintoni enye esasinokuyenza apho? Sasizazi iingoma, ngoko saqalisa ukucula. Sacula zonke iingoma esizaziyo, iingoma ezikwincwadi yamaculo.

Ekuqaleni sasisiva loo ngoma ikwikhareji lethu kuphela, kodwa xa uloliwe wethu wemayo ukuze kudlule abanye oololiwe, saqonda ukuba kukho abanye oololiwe abathwele abazalwana bethu. Iingoma ezazivunywa kwabo loliwe zazifikelela nakuthi. Kukho abo babevela eMoldavia; nabaseRomania ababevela eBukovina. Babebaninzi abo loliwe. Abo loliwe babedla ngokudlula kwiindawo ezahlukahlukeneyo. Saqonda ukuba bonke abo yayingabazalwana bethu.

Zininzi iingoma esasizikhumbula. Iingoma ezininzi zaqanjwa kuloo makhareji kaloliwe. Zasikhuthaza satsho sanesimo sengqondo esifanelekileyo. Ngokwenene ezo ngoma zalathisela ingqalelo yethu kuYehova.

[Ibhokisi/Umfanekiso okwiphepha 177]

Udliwano-ndlebe NoLydia Stashchyshyn

Wazalwa: 1960

Wabhaptizwa: 1979

Ingxelo Ngobomi: Yintombi kaMariya Pylypiv, lowo unodliwano-ndlebe olukwiphepha 208-9.

Xa ndandisengumntwana, uTat’ omkhulu wayengumdala; wayesalathisa ibandla. Ndikhumbula oko wayesoloko ekwenza: Wayevuka kusasa, ahlambe aze athandaze. Emva koko wayevula iBhayibhile, size sonke sihlale ukuze sifunde itekisi yosuku nesahluko esipheleleyo. UTat’ omkhulu wayesoloko esithi mandithabathe amaxwebhu abalulekileyo—esongelwe okanye efakwe ebhegini—ndiwase komnye umdala, owayehlala ekupheleni kwesixeko. Ukuze ndiye kufika kwakhe, kwakufuneka ndinyuke induli. Ndandingayithandi loo nduli. Yayineqhina, kunzima ukunyuka kuyo. Ndandidla ngokuthi: “Tat’ omkhulu, andiyi! Ndicela ukungayi.”

UTat’ omkhulu wayedla ngokuphendula athi: “Hayi, ufanele uye. Thabatha amaxwebhu uye.”

Ndandidla ngokuzixelela ukuba, ‘Andiyi! Andiyi!’ Ndandisandula ke ndithi, ‘Hayi, mandiye mhlawumbi kukho into ebalulekileyo exhomekeke koko.’ Ndandisoloko ndicinga oko engqondweni. Enyanisweni ndandingafuni kuya, kodwa ndandisiya. Ndandisazi ukuba akukho bani ungomnye onokwenza oko. Ndandisiya rhoqo. Yayingumsebenzi wam, imbopheleleko yam.

[Ibhokisi/Umfanekiso okwiphepha 178, 179]

Udliwano-ndlebe NoPavlo Rurak

Wazalwa: 1928

Wabhaptizwa: 1945

Ingxelo Ngobomi: Wachitha iminyaka eli-15 kwiintolongo nakwiinkampu zentolongo. Ngoku ukhonza njengomveleli owongamelayo eArtemovsk, kwimpuma Ukraine.

Ngowe-1952, ndandikwinkampu yomkhosi engqongqo yaseKaraganda, eU.S.S.R. Sasilishumi abakuloo nkampu. Elo xesha lalingathi alipheli kangangokuba kwakunzima kuthi. Nangona sasinovuyo nethemba, sasingenako ukutya kokomoya. Sasidibana emva komsebenzi size sincokole, sizikhumbuza zonke ezo zinto sasizifunde ngaphambili ‘ngekhoboka elithembekileyo neliyingqondi.’—Mat. 24:45-47.

Ndagqiba ekubeni ndibhalele udade wethu ndimchazele ngemeko esikuyo kuloo nkampu ndichaze nokuba asinako ukutya kokomoya. Ekubeni amabanjwa ayengavunyelwa ukuba athumele iileta ezinjalo, kwakunzima ukuyithumela. Noko ke, ekugqibeleni, udade wethu wayifumana loo leta. Walungiselela ipasile, wafaka isonka ngaphakathi kunye neTestamente Entsha, waza wazithumela kum ngeposi.

Indlela eyayisetyenziswa yayingqongqo gqitha. Abasemagunyeni babengasoloko bezidlulisela kumabanjwa iipasile. Ngokufuthi, babezivula izinto eziphakathi. Yonk’ into yayihlolisiswa ngenyameko. Ngokomzekelo, iinkonkxa babezihlola ukuze babone enoba akukho nto ifihlwe ngaphantsi okanye emacaleni kusini na. Babede bahlole namaqebengwana esonka omileyo.

Yada yafika imini endabonayo ukuba igama lam likwabo baza kufumana iipasile zabo. Ndavuya gqitha, nangona ndandingayicingi nokuyicinga into yokuba udade wethu undithumele iTestamente Entsha kuloo pasile. Oyena mhloli ungqongqo gqitha nguye owayesemsebenzini; amabanjwa ayembiza ngokuba nguNtlok’ iyatshisa. Xa ndaza kulanda ipasile yam, wandibuza: “Ivela phi le pasile uyilindeleyo?” Ndamxelela idilesi kadade wethu. Wathabatha umgqala omfutshane wavula loo bhokisi.

Akuba eshenxise isivalo, ndabona iTestamente Entsha phakathi kwecala laloo bhokisi nokutya! Ndaba nethuba nje lokuthethela ngaphakathi ndathi: “Yehova, ndiphe yona.”

Okwandimangalisayo kukuba, loo mhloli wathi: “Khawuleza, uthabathe le bhokisi uhambe!” Ndingakukholelwa oko kwenzekayo, ndasongela loo bhokisi ndayithabatha ndayisa apho sihlala khona. Ndayikhupha loo Testamente Intsha ndayiqhusheka kumandlalo wam.

Xa ndaxelela abazalwana ukuba ndifumene iTestamente Entsha, akukho namnye owandikholelwayo. Yayingummangaliso ovela kuYehova! Wayesixhasa ngokomoya kuba kwimeko yethu sasingakwazi ukufumana nantoni na. Sambulela uBawo wethu wasezulwini uYehova, ngenceba nenyameko yakhe. Saqalisa ukufunda nokuzomeleza ngokomoya. Hayi indlela esambulela ngayo uYehova ngenxa yoko!

[Ibhokisi/Umfanekiso okwiphepha 180, 181]

Udliwano-ndlebe NoLydia Bzovi

Wazalwa: 1937

Wabhaptizwa: 1955

Ingxelo Ngobomi: Wagxothwa kwilizwe lakhe ngowe-1949-65.

Njengoko ndandiselula, yayibuhlungu gqitha into yokuba uTata engahlali nathi. Sasimthanda utata, njengokuba kunjalo ngenkoliso yabanye abantwana. Andizange ndikwazi ukuthi ndlela-ntle kuye. Mna noIvan asizange simbone xa ehamba. Sasisemasimini sivuna amazimba.

Ukufika kwethu sivela entsimini, uMama wathi uTata ubanjiwe. Ndaziva ndingento yanto, ndiziva ndenzakele. Kodwa kwakungekho kukhala, nanzondo. Oko yinto eyayifanele ilindelwe. Sasisoloko sikhunjuzwa ngamazwi kaYesu athi: “Ukuba banditshutshisile mna, baya kunitshutshisa nani.” (Yoh. 15:20) Le ndinyana sayifunda kwasebutsheni bethu. Sasiyazi kakuhle njengokuba kwakunjalo ngomthandazo ongumzekelo. Kwakhona sasisazi ukuba ekubeni sasingeyonxalenye yeli hlabathi, ihlabathi alinakusithanda. Oko abasemagunyeni babekwenza, babekwenza ngenxa yokungazi.

Ngoxa sasiphantsi kolawulo lweRomania eMoldavia, uTata wayesazi ukuba ityala lakhe linokuxoxwa enkundleni. Savunyelwa ukuya enkundleni. Olo yaba lusuku oluvuyisayo kuthi.

UTata wanikela ubungqina obumangalisayo. Akukho namnye owayenomdla wokuphulaphula izityholo zomtshutshisi, kodwa bemangalisiwe bonke babephulaphule ubungqina bukaTata. Wathetha kangangeyure enemizuzu engama-40 ethethelela inyaniso. Wanikela ubungqina obucacileyo nobuqondakalayo. Abasebenzi baloo nkundla babentywizisa.

Saba neqhayiya ngenxa yokuba uTata enikele ubungqina enkundleni, ukuze akhusele inyaniso esidlangalaleni. Asizange siphelelwe lithemba nakancinane.

Phawula: Ngowe-1943, amagunya aseJamani abamba aza avalela abazali bakaDade Bzovi aza abagweba iminyaka engama-25 entolongweni ebatyhola ngokusebenzisana nabemi baseSoviet. Kungaphelanga nonyaka, imikhosi yaseSoviet yafika baza bakhululwa. Emva koko, amagunya aseSoviet nawo ambamba uyise. Iyonke iminyaka awayichitha ezintolongweni yaba ngama-20.

[Blurb]

Sasimthanda utata njengokuba kunjalo ngenkoliso yabanye abantwana. Andizange ndikwazi ukuthi ndlela-ntle kuye

[Ibhokisi/Imifanekiso ekwiphepha 186-189]

Udliwano-ndlebe NoTamara Ravliuk

Wazalwa: 1940

Wabhaptizwa: 1958

Ingxelo Ngobomi: Wagxothwa kwilizwe lakhe ngowe-1951. Wanceda abantu abamalunga ne-100 bafunda inyaniso.

Eli libali likaHalyna. Ngowe-1958, xa wayeneentsuku ezili-17 kuphela ubudala, abazali bakhe babanjwa. Yena nonina bathunyelwa kwinkampu yentolongo eSiberia. Lo gama nje unina wayesancancisa, nto leyo awayenza de kwaba yinyanga yesihlanu, uHalyna wayevumelekile ukuhlala nonina. Emva koko, unina kwafuneka aye emsebenzini, lwaza olo sana lwasiwa kwikhaya lokunyamekela iintsana. Intsapho yakuthi yayihlala kwiphondo elikufuphi laseTomsk. Abazalwana babhalela ibandla lethu ileta becela umntu onokukwazi ukuthabatha loo ntombazana incinane kwelo khaya lokunyamekela iintsana, ukuze ayikhulise de kukhululwe abazali bayo. Kakade, xa kwakufundwa loo leta, wonk’ ubani wancwina. Yayimbi yaye ibuhlungu into yokuba usana lube kwimeko enjalo.

Sanikwa ixesha lokuba khe sicinge ngoko. Yadlula iveki yokuqala. Akukho bani wathi uza kuluthabatha. Kwakunzima kuthi sonke. Kwiveki yesibini, umntakwethu wathi kuMama: “Masiluthabathe olu sana.”

UMama wathi: “Utheth’ ukuthini, Vasia? Sele ndikhulile yaye ndiyagula. Nawe uyazi ukuba kuyimbopheleleko enkulu ukunyamekela usana lomnye umntu. Alusosilwanyana. Aluyomaz’ enkomo, lungelilo nethokazi lenkomo. Lusana. Ngaphezu koko lusana lomnye umntu.”

Wathi: “Yiloo nto sifanele siluthabathe, Mama. Alusosilwanyana. Khawufan’ ucinge usana kwiimeko ezinjalo, enkampini! Luseluncinane, alunathemba.” Wandula ke wathi: “Ngaba asimele sicinge ukuba kusenokubakho ixesha apho kuya kuthiwa kuthi: ‘Ndandigula, ndisentolongweni, ndilambile, kodwa anizange nindincede’?”

UMama wathi: “Ewe, oko kusenokwenzeka, kodwa yimbopheleleko enkulu ukuthabatha usana lomnye umntu. Kuthekani ukuba lwehlelwa yinto ethile ngoxa lukuthi?”

Umntakwethu wathi: “Kodwa kuthekani ukuba lwehlelwa yinto ngoku luphaya?” Wandula ke walatha kum wathi: “Ukhona uTamara. Angahamba aye kulanda olo sana. Sonke siza kuncedisana sinyamekele olu sana.”

Ngoko, sacinga, saxubusha saza sagqiba ekubeni ndihambe. Ngoko ndahamba ndaya kwiinkampu zaseMariinski. Ndaya kulanda loo ntombazana incinane. Abazalwana bandinikela uncwadi ndalusa apho. Bandinika nesixhobo sokufota ukuze ndithabathe imifanekiso kanina wosana, ukuze simazi kuba sasingamazi. Andizange ndivunyelwe ukungena neso sixhobo ngaphakathi enkampini, kodwa ndangena nalo uncwadi. Ndathenga imbiza, ndafaka kuyo uncwadi ndaza ndabeka ioli ngaphezulu. Xa ndandingena kuloo masango, umlindi akazange ahlole ukuze abone enoba kwakungekho nto ngaphantsi kwaloo oli. Ngoko ndangena noncwadi apho enkampini.

Ndakwazi ukuqhelana nonina, uLydia Kurdas. Yaye ndachitha nobusuku apho enkampini kuba kwafuneka kulungiswe amaxwebhu okukhulula loo mntwana. Ngoko ndamthabatha uHalyna ndagoduka naye. Yaye ukufika kwethu apho, wayeneenyanga ezintlanu neentsuku ezithile ubudala. Sonke samnyamekela kakuhle, kodwa wagula kakhulu. Oogqirha babefika, kodwa babengaboni nto.

Oogqirha babecinga ukuba lusana lwam, ngoko bandipheka bendophula besithi: “Ungumama onjani? Kutheni ungalondli nje?” Sasisoyika ukuchaza ukuba lusana oluvela entolongweni olo, ibe sasingazi ukuba masithini. Ndasuka ndakhala andakhupha nelimdaka. Abo gqirha bandinyemba; bakhalaza kuMama, besithi ndandiselula gqitha ukuba ndibe sele nditshatile, nam ngokwam ndandisafuna ubisi. Ndandineminyaka eli-18 ubudala.

UHalyna wayegula gqitha, yaye kwakunzima ukuphefumla. Ndaya ngaphantsi kwezinyuko ndathandaza ndathi: “Yehova Thixo, Yehova Thixo, ukuba olu sana luza kufa, makufe mna endaweni yalo!”

Olo sana lwaqalisa ukurhoxoza, kanye apho phambi koogqirha. Bathi: “Akho themba—akaz’ ukuphila, akaz’ ukuphila.” Oko bakutsho phambi kwam—phambi komama, bathetha oko. UMama wayekhala. Ndandithandaza. Yaye olo sana lwasinda. Lwahlala nathi de unina wakhululwa. Lwahlala nathi iminyaka esixhenxe, yaye aluzange luphinde lugule kwakhona, nditsho nakanye.

UHalyna ngoku uhlala eKharkov, eUkraine. Ungomnye woodade bethu, uvulindlela othe ngxi.

[Blurb]

“Yehova Thixo, Yehova Thixo, ukuba olu sana luza kufa, makufe mna endaweni yalo!”

[Umfanekiso]

Ekhohlo ukusa ekunene: uTamara Ravliuk (ngaphambili owayenefani enguBuriak), uSerhii Ravliuk, uHalyna Kurdas, uMykhailo Buriak, noMariya Buriak

[Umfanekiso]

Ekhohlo ukusa ekunene: uSerhii noTamara Ravliuk, uMykola noHalyna Kuibida (ngaphambili owayenefani enguKurdas), uOleksii noLydia Kurdas

[Ibhokisi ekwiphepha 192]

Ingxelo Yomveleli Wesiphaluka, Ngowe-1958

“Indlela ekwakunzima ngayo kubazalwana inokubonwa kwisibakala sokuba mzalwana ngamnye ubekw’ esweni ngamalungu anokuba lishumi entlangano yolutsha lwamaKomanisi. Ukongezelela koko kukho abangcatshi abangabamelwane; abazalwana bobuxoki; inkitha yamapolisa; izigwebo zenkundla ezifikelela kwiminyaka engama-25 kwiinkampu okanye kwiintolongo; ukugxothelwa eSiberia; ukusetyenziswa ngenkani; ukugcinwa esiseleni, maxa wambi kwizisele ezimnyama zentolongo—konke oku kunokwenzeka kumntu othetha amazwi ambalwa ngoBukumkani bukaThixo.

“Sekunjalo, abavakalisi aboyiki. Ukumthanda kwabo uYehova uThixo akunakulinganiswa, isimo sengqondo sabo sifana neso seengelosi, yaye abacingi nokucinga ngokunikezela kulo mlo. Bayazi ukuba lo msebenzi ngokaYehova yaye ufanele uqhubeke de kufike isiphelo soloyiso. Abazalwana bayazi ukuba bayigcina kubani ingqibelelo yabo. Kubo kuluvuyo ukubandezeleka ngenxa kaYehova.”

[Ibhokisi/Umfanekiso okwiphepha 199-201]

Udliwano-ndlebe NoSerhii Ravliuk

Wazalwa: 1936

Wabhaptizwa: 1952

Ingxelo Ngobomi: Wachitha iminyaka eli-16 kwiintolongo nakwiinkampu zentolongo. Wanyanzelwa ukuba afuduke izihlandlo ezisixhenxe. Wanceda abantu abamalunga ne-150 bafunda inyaniso. Umfazi wakhe, nguTamara okudliwano-ndlebe olukwiphepha186-9. USerhii ngoku ukhonza njengomdala kwiBandla laseRohan, kufuphi nesixeko saseKharkov.

Ndahlala iminyaka esixhenxe eMordvinia. Nangona leyo yayiyinkampu yokhuseleko oluluqilima, zininzi iimpapasho ezazingena ngoxa ndandilapho. Abanye abalindi babethabatha uncwadi bagoduke nalo, balufunde, baze balunike iintsapho nezalamane zabo.

Maxa wambi umlindi wayesiza kum kwilixa lesibini lomsebenzi. Wayedla ngokuthi: “Akukho nto unayo, Serhii?”

Ndandiphendula ndithi: “Ufuna ntoni?”

“Ndifuna nje into yokufunda.”

“Ngaba kuza kugqogqwa ngomso?”

“Ewe. Ngomso kuza kugqogqwa kwicandelo lesihlanu.”

“Kulungile, kwibhedi ethile ngaphantsi kwetawuli, uya kufumana IMboniselo apho. Ungayithabatha.”

Lwenziwa olo gqogqo, ibe wayithabatha loo Mboniselo. Kodwa abalindi abazange bafumane naluphi na uncwadi kuba sazi kusengaphambili ngolo gqogqo. Ngaloo ndlela, abanye abalindi babesinceda. Babetsalelekile kwinyaniso, kodwa babesoyika ukuphelelwa ngumsebenzi. Ebudeni baloo minyaka mininzi belapho abazalwana, abalindi babona indlela esiphila ngayo. Abantu abakwaziyo ukucinga babenokubona ukuba asenzanga naluphi na ulwaphulo-mthetho. Kuphela nje kwakungekho nto banokuyithetha, kungenjalo babeya kugqalwa njengabo baxhasa amaNgqina kaYehova, ibe babeya kulahlekelwa yimisebenzi yabo. Ngoko umsebenzi wethu bawuxhasa ngandlel’ ithile. Babethabatha uncwadi balufunde. Oko kwanceda kwathomalalisa intshutshiso.

Ngowe-1966 sasingabazalwana abamalunga nama-300 eMordvinia. Abalawuli babewazi umhla esiza kuqhutywa ngawo iSikhumbuzo. Ibe bagqiba ekubeni basithintele kuloo nyaka. Bathi: “Sele niyifunda IMboniselo yenu, kodwa siza kusivala esi Sikhumbuzo. Akukho kwanto niza kuyenza.”

Amalungu amacandelo ahlukahlukeneyo abalindi ayeza kusala kwiiofisi zawo de kuphele yonk’ into. Onke ayemi ngeendawo zawo: abecuphi, abaphathi, igosa eliyintloko laloo nkampu.

Ngoko sonke saphuma saya endleleni, kwibala lokuhlanganisana apho kwakuhlolwa khona abakhoyo yonk’ imihla, kusasa nangokuhlwa. Emva koko, sahlanganisana ngokwamabandla okanye amaqela, sahambahamba kwelo bala. Kwiqela ngalinye, kwakukho umzalwana onikela intetho ngoxa behamba; abanye bephulaphule.

Sasingenayo imifuziselo, ngoko saba nentetho nje kuphela. Ngelo xesha, kwakungekho mthanjiswa kuloo nkampu. Ngentsimbi ye-9:30 ngokuhlwa, kwakusele kugqitywe yonk’ into, onke loo maqela ayesele egqibile ukwenza eso sikhumbuzo ngoxa ehamba endleleni.

Yona ingoma sasifuna ukuyivuma kunye—sonke njengabazalwana. Ngoko sahlanganisana ngakwindlu yokuhlambela, eyayikwimbombo emgama kwisango lokuhlola. Khawufan’ ucinge amadoda angama-300, angama-80 ukusa kwali-100 kuwo ecula ebusuku kumahlathi etaiga! Khawufan’ ucinge intlokoma yaloo ngoma! Ndisakhumbula ukuba sasivuma ingoma 25, eyayinomxholo othi “Ndakufela,” ekwincwadi yamaculo endala. Wonk’ ubani wayeyazi loo ngoma. Maxa wambi nkqu namajoni akwezo nqaba ayekhe akhwaze athi: “Ncedani nivume iNgoma 25!”

Sathi sakuqalisa ukucula ngobo busuku, bonke abasebenzi balapho beza bebaleka bephuma eziofisini besiya kuloo ndlu yokuhlambela ukuze basinqande. Kodwa ukufika kwabo, abazange bakwazi ukusiyekisa oko kucula kuba bonke abazalwana ababengaculi babafaka kwisangqa abo babecula. Ngoko, abalindi bafane bangqunga besijikeleza bexakiwe de sagqiba ukucula. Yathi yakuphela loo ngoma sonke sachithakala. Abalindi babengazi nokuba ngubani na obecula nobengaculi. Babengenakukwazi ukufaka wonk’ umntu kwisisele sokuvalela umntu ngamnye.

[Ibhokisi/Umfanekiso okwiphepha 203, 204]

Udliwano-ndlebe NoVictor Popovych

Wazalwa: 1950

Wabhaptizwa: 1967

Ingxelo Ngobomi: Wazalelwa entolongweni, ngunyana kaMariya Popovych, okudliwano-ndlebe olukwiphepha 167-9. Wabanjwa wavalelwa ngowe-1970, waza wachitha iminyaka emine entolongweni ngenxa yomsebenzi wokushumayela. Kwiintsuku ezintathu zokuxoxwa kwetyala lakhe, ngabantu abangama-35 abanikela ubungqina bokuba uMzalwan’ uPopovych uye washumayela kubo.

Imeko awazifumana ekuyo amaNgqina kaYehova ayimele ijongwe ngokweembono zabantu. Ukutshutshiswa kwabantu bakaThixo akunakuchazwa nje ngokusuka kugxekwe urhulumente. Inkoliso yabasemagunyeni yayisenza nje umsebenzi wayo. Xa kwatshintsha urhulumente, abasemagunyeni batshintsha ukunyaniseka kwabo, kodwa sasala sisenjalo. Saqonda ukuba owona mthombo weenkathazo zethu utyhilwe eBhayibhileni.

Asizange sizijonge njengamaxhoba amsulwa engcinezelo yabantu. Into eyasinceda sanyamezela kukuyiqonda kakuhle imbambano eyaphakanyiswa kumyezo wase-Eden—imbambano yelungelo likaThixo lokulawula. Leyo yimbambano engazange izinziswe. Sasisazi ukuba sifumene ithuba lokumela ulawulo lukaYehova. Samela imbambano ephathelele kungekhona nje kuphela izilangazelelo zabantu kodwa kwanezo zoMongami wendalo iphela. Sasiyiqonda kakuhle eyona mibandela ibandakanyekileyo. Oku kwasomeleza kwaza kwasinceda sagcina ingqibelelo yethu nkqu naphantsi kwezona meko zinzima gqitha. Sakhangela ngaphaya kweembono zomntu.

[Blurb]

Ukutshutshiswa kwabantu bakaThixo akunakuchazwa nje ngokusuka kugxekwe urhulumente

[Ibhokisi/Umfanekiso okwiphepha 208, 209]

Udliwano-ndlebe NoMariya Pylypiv

Wazalwa: 1934

Wabhaptizwa: 1952

Ingxelo Ngobomi: Ngowe-1951 waya eSiberia etyelela udade wabo owagxothelwa apho. UMariya wafunda inyaniso eSiberia yaye kamva watshata nomzalwana owayegxothelwe apho.

Kwathi ukufa kukaTata, agaleleka amapolisa ekhaya. Kwafika amapolisa amaninzi. Ayephuma kwiBhunga Ledolophana nakwiBhunga Lesithili. Asilumkisa esithi ze kungaculwa yaye kungabikho mithandazo. Saphendula sathi akukho mthetho unxamnye nomthandazo. Abuza ixesha owawuza kuba ngalo loo mngcwabo. Sawaxelela, aza emka.

Abazalwana bafika kwangethuba. Kwakungavumelekanga ukuhlanganisana kunye, kodwa abantu babenokuya emngcwabeni. Saqalisa kwangethuba kuba sasisazi ukuba amapolisa aza kufika. Kanye njengoko omnye umzalwana wayeqalisa ukuthandaza, kwafika ilori izele ngamapolisa. Loo mzalwana wagqiba ukuthandaza, emva koko saya emangcwabeni.

Asilandela aza asivumela sangena emangcwabeni. Wathi loo mzalwana akwenza omnye umthandazo, amapolisa azama ukumbamba. Kodwa thina njengoodade sasigqibe ekubeni asiyi kuwavumela loo mapolisa. Kwakukho amapolisa amaninzi, ngoko samrhangqa loo mzalwana. Kweso siphithiphithi savela apho, omnye kwabo dade wakhuphela loo mzalwana ngaphandle kuloo mangcwaba, wamthubelezisa phakathi kwezindlu waya kungena kuloo dolophana. Kwangoko, kwafika omnye umntu omaziyo ngenqwelo-mafutha yakhe, wakhwelisa loo mzalwana waza waphel’ emehlweni. Amapolisa amkhangela kuyo yonk’ indawo kodwa atsho ancama. Emva koko emka.

Oodade babesoloko bebakhusela abazalwana. Ngokuqhelekileyo oku kwenziwa kubo, kodwa leyo yindlela ekwakufanele kwenziwe ngayo ngoko. Oodade kwakufuneka bakhusele abazalwana. Zininzi iimeko ekwakusenzeka kuzo oko.

[Blurb]

Leyo yindlela ekwakufanele kwenziwe ngayo ngoko. Oodade kwakufuneka bakhusele abazalwana

[Ibhokisi/Umfanekiso okwiphepha 220, 221]

Udliwano-ndlebe NoPetro Vlasiuk

Wazalwa: 1924

Wabhaptizwa: 1945

Ingxelo Ngobomi: Wagxothwa kwilizwe lakhe ngowe-1951-65. Kungekudala emva kokuba uMzalwan’ uVlasiuk egxothiwe, unyana wakhe wagula waza wafa. Kunyaka olandelayo, emva kokubeleka omnye unyana, umfazi wakhe waba neengxaki ezithile zokuzala waza wafa. UMzalwan’ uVlasiuk wasala nolo sana luncinane. Ngowe-1953 waphinda watshata, waza loo mfazi wakhe mtsha wancedisa ekunyamekeleni loo mntwana.

Ndandiphakathi kwabo baseUkraine bagxothelwa eSiberia ngowe-1951. Uyazi ukuba kwakungekho kwanto siyoyikayo. UYehova wafaka umoya kubazalwana kangangokuba babenokholo, ukholo olwalubonakala nakwindlela ababethetha ngayo. Akukho mntu wayenokuvuma ukuya kolo hambo luya kweso sabelo sokushumayela. Kuyabonakala ukuba uYehova uThixo wavumela urhulumente ukuba asithuthe asise kuso. Kamva abasemagunyeni bathi: “Senze eyona mpazamo inkulu.”

Abazalwana babuza: “Nitsho njani?”

“Ngokuba siye sanizisa apha, kuba ngoku niguqula abantu nalapha!”

Abazalwana bathi: “Niseza kwenza enye impazamo.”

Impazamo yabo yesibini enkulu yaba kukuba emva kokuba besikhulule, emva kokusixolela, abazange basivumele ukuba sibuyele emakhaya. Bathi: “Ningahamba niye naphi na kodwa ningagoduki.” Emva koko, baqonda ukuba leyo yenye impazamo. Ngenxa yaloo mthetho, iindaba ezilungileyo zasasazeka kuyo yonke iRashiya.

[Ibhokisi/Umfanekiso okwiphepha 227]

Udliwano-ndlebe NoAnna Vovchuk

Wazalwa: 1940

Wabhaptizwa: 1959

Ingxelo Ngobomi: Wagxothwa kwilizwe lakhe ngowe-1951-65. Wayeneminyaka elishumi ukuthunyelwa kwakhe eSiberia. Ukususela ngowe-1957ukusa kowe-1980, washicilela ngokufihlakeleyo, uncwadi lweBhayibhile.

Amalungu eKGB ayesoloko ezama ukuba sichaze abazalwana. Ayesibonisa imifanekiso yabo. Ndandiphendula ndithi: “Kuni, andazi kwanto. Akukho mntu ndimaziyo kuni.” Leyo yindlela esasihlala siphendula ngayo. Kamva, kungekudala emva kokuba nditshatile, xa ndandihamba esixekweni ndadibana nomphathi weKGB walapho eAngarsk. Wayesoloko endibiza aye kundincina ibe wayendazi kakuhle.

Wathi kum: “Ngokuphathelele uStepan Vovchuk, wandixelela ukuba awuyazi le ndoda. Ke ngoku kwenzeka njani ukuba ube utshate naye?”

Ndamphendula: “Ngaba asinguwe kanene owandibonisa yena ngemifanekiso yakho?”

Waqhwab’ izandla wathi: “Madoda! Iphinde yaba yimpazamo yethu!”

Ibe sahleka kunye. Eso yaba sisihlandlo esimnandi nesonwabisayo ebomini bam.

[Ibhokisi/Umfanekiso okwiphepha 229, 230]

Udliwano-ndlebe NoSofiya Vovchuk

Wazalwa: 1944

Wabhaptizwa: 1964

Ingxelo Ngobomi: Wagxothwa kwilizwe lakhe ngowe-1951-65. Wayeneminyaka esixhenxe xa wayethunyelwa eSiberia nonina, udade wabo nomntakwabo.

Xa babesisa eSiberia, basixelela ukuba siya kuba lapho ngonaphakade. Asizange sicinge ukuba singaze sifumane inkululeko. Xa sifunda kwiMboniselo ngeendibano eziqhubeka kwamanye amazwe, sasithandaza kuYehova sicela asiphe nokuba lithuba nje elinye ebomini bethu khe siye kwindibano efana nezo banazo kwamanye amazwe. Ngokuqinisekileyo, uYehova wasisikelela. Ngowe-1989 sakwazi ukuya kwindibano yezizwe ngezizwe yamaNgqina kaYehova ePoland. Alunakuchazwa ngamazwi uchulumanco, uvuyo, lokuba lapho.

Abazalwana basePoland basamkela ngezandla ezishushu. Saba lapho iintsuku ezine. Sasiye endibanweni! Kwaba luvuyo olungathethekiyo ukufunda okungakumbi ngoYehova nokufumana imiyalelo yeLizwi likaThixo. Sasonwabe gqitha. Sabelana naye wonk’ ubani ngamava ethu. Nakuba kwakukho abantu beentlanga ezininzi, babengabazalwana bethu! Njengoko sasizula kwelo bala, kwakugquba umoya omhle woxolo. Emva kwako konke oko—ukuvalwa umlomo ixesha elide kangako—kwaba ngathi sele sikwihlabathi elitsha. Asizange sive nasiphi na isiqalekiso, yonk’ into yayicocekile intle. Sasichitha ixesha kunye emva kocwangciso. Asizange simke kwangoko, sanxulumana nabazalwana, sithetha kunye. Kwakukho nabatolikayo xa singalwazi ulwimi. Naxa singalwazi ulwimi, sasisangana. Sasivuya gqitha.

[Ibhokisi/Umfanekiso okwiphepha 243, 244]

Udliwano-ndlebe NoRoman Yurkevych

Wazalwa: 1956

Wabhaptizwa: 1973

Ingxelo Ngobomi: Wachitha iminyaka emithandathu kwiinkampu zentolongo ngenxa yobundilele. Uye wakhonza kwiKomiti yeSebe laseUkraine ukususela ngowe-1993.

Inyaniso ishukumisela umntu ukuba ancede aze axhase abanye. Oku sakuva ngokukhethekileyo ngowe-1998 xa kwafika isikhukula esikhulu eTranscarpathia, aza amakhulu, ewe, amakhulu abantu aphulukana nezindlu zawo nazo zonke izinto awayenazo ngobusuku obunye.

Kwiintsuku nje ezimbini, kwafika iqela labazalwana apho, kwasekwa iikomiti zoncedo. Zagqiba ngoncedo olufunekayo kwintsapho nganye, nakwidolophana nganye. Iidolophana ezimbini iVary neVyshkove zantlithwa kanobom koko. Kwiintsuku nje ezimbini okanye ezintathu, kwenziwa amalungiselelo ngokuphathelele iintsapho eziza kuncedwa, uhlobo loncedo nomntu oza kunceda. Bandula ke abazalwana bethu bafika ngeelori baqalisa ukugutyula loo mfumba yodaka.

Beza neenkuni ezomileyo, nto leyo eyamangalisa wonk’ ubani kulo mmandla. Abo bangengomaNgqina bamangaliswa. Omnye udade waseVyshkove wayekuloo ndawo ineqela labazalwana ababegutyula udaka. Omnye umbhaleli wamaphepha-ndaba waya kuye wambuza oku: “Ngaba uyabazi ukuba ngoobani aba bantu?”

Waphendula wathi: “Andibazi kakuhle kuba sithetha iilwimi ezahlukeneyo—isiRomania, isiHungary, isiUkraine, nesiRashiya. Kodwa ndazi nto inye; aba ngabazalwana noodade wethu, yaye bayandinceda.”

Kwiintsuku nje ezimbini okanye ezintathu abazalwana bathumela uncedo baza banyamekela ezo ntsapho, ezazifuduselwe kweminye imimandla. Noko ke, emva kwesiqingatha sonyaka, ngokoqobo zonke izindlu zamaNgqina zazisele ziphinde zakhiwa, ibe amaNgqina aba ngabantu bokuqala kuloo mmandla ukubuyela kuloo makhaya awo matsha.

[Isicangca esikwiphepha 254]

(Yiya kwimpapasho)

Oovulindlela Abathe Ngxi EUkraine (1990-2001)

10,000

8,000

6,000

4,000

2,000

0

1990 1992 1993 1994 1995 1996 1997 1998 1999 2001

[Isicangca esikwiphepha 254]

(Yiya kwimpapasho)

AmaNgqina KaYehova EUkrainea (1939-2001)

120,000

100,000

80,000

60,000

40,000

20,000

0

1939 1946 1974 1986 1990 1992 1994 1996 1998 2001

[Umbhalo osemazantsi]

[Iimaphu ezikwiphepha 123]

(Ukuba ufuna inkcazelo ehlahlelwe kakuhle, yiya kwimpapasho)

UKRAINE

VOLYN’

HALCHYNA

Lvov

TRANSCARPATHIA

BUKOVINA

KIEV

Kharkov

Dnepropetrovsk

Luhans’k

Zaporozh’ye

Donetsk

Odessa

CRIMEA

BLACK SEA

TURKEY

BULGARIA

ROMANIA

MOLDOVA

POLAND

BELARUS

RUSSIA

[Umfanekiso ozalise iphepha, kwiphepha 118]

[Umfanekiso okwiphepha 127]

UVojtech Chehy

[Umfanekiso okwiphepha 129]

Indibano yesithili yokuqala kwidolophu yaseBorislav, eHalychyna, ngoAgasti 1932

[Umfanekiso okwiphepha 130]

Indibano yaseSolotvyno, eTranscarpathia, ngowe-1932

[Umfanekiso okwiphepha 132]

Kangangeminyaka engama-40 uEmil noMariya Zarysky basiphumeza ngokuthembeka isabelo sabo njengabaguquleli

[Umfanekiso okwiphepha 133]

Indawo yokothula uncwadi yokuqala eUkraine yayikule ndlu eUzhgorod ukususela ngowe-1927-31

[Umfanekiso okwiphepha 134]

Iqela lilungele ukuya kubulungiseleli ngebhasi kummandla waseRakhiv okwiiNtaba zaseCarpathia, ngowe-1935: (1) uVojtech Chehy

[Umfanekiso okwiphepha 135]

Icwecwe legramafoni lokuqala lesiUkraine elalisithi, “Unqulo NoBuKristu”

[Umfanekiso okwiphepha 136]

IBandla laseKosmach ngowe-1938: (1) uMykola Volochii wathengisa elinye lamahashe akhe amabini ukuze athenge igramafoni

[Umfanekiso okwiphepha 137]

ULudwik Kinicki, ukhunjulwa kakuhle ngabaninzi njengomlungiseleli onenzondelelo, wafa ethembekile kuYehova kwinkampu yoxinaniso yamaNazi

[Imifanekiso ekwiphepha 142]

UIllia Hovuchak (ngasentla ekhohlo), uboniswe ehamba no-Onufrii Rylchuk besiya kushumayela ezintabeni ibe (ngasekunene) unomfazi wakhe, uParaska wabulawa ngamaGestapo emva kokuba enikelwe ngumfundisi wamaKatolika

[Umfanekiso okwiphepha 146]

UAnastasiya Kazak (1) ekunye namanye amaNgqina bevela kwinkampu yoxinaniso yaseStutthof

[Imifanekiso ekwiphepha 153]

UIvan Maksymiuk (uboniswe ngasentla nomfazi wakhe, uYevdokiya) nonyana wakhe uMykhailo (ngasekunene) bala ukulalanisa kwingqibelelo yabo

[Umfanekiso okwiphepha 158]

Iimpapasho zeBhayibhile zokuqala zesiUkraine

[Umfanekiso okwiphepha 170]

Kubudala beminyaka engama-20, uHryhorii Melnyk wayethwala imbopheleleko yokunyamekela abaninawa bakhe ababini nodade wabo

[Umfanekiso okwiphepha 176]

UMariya Tomilko wanyamezela iminyaka eli-15 entolongweni kodwa uye wahlala ethembekile

[Umfanekiso okwiphepha 182]

UNutsu Bokoch xa wabonana ngokufutshane nentombi yakhe entolongweni, ngowe-1960

[Imifanekiso ekwiphepha 185]

ULydia no-Oleksii Kurdas (ngasentla), babanjwa baza bavalelwa kwiinkampu ezahlukeneyo xa intombazana yabo uHalyna, yayineentsuku ezili-17 ubudala; uHalyna Kurdas, eneminyaka emithathu ubudala (ngasekunene): Lo mfanekiso wathatyathwa ngowe-1961 ngoxa abazali bakhe babesesentolongweni

[Umfanekiso okwiphepha 191]

Kubusuku obungaphambi kosuku lomtshato wabo, uHanna Shyshko noYurii Kopos babanjwa baza bagwetywa iminyaka elishumi kwinkampu yentolongo. Batshata kwiminyaka elishumi kamva

[Umfanekiso okwiphepha 191]

UYurii Kopos wachitha phantse isahlulo sesithathu senkulungwane kwiintolongo neenkampu zomsebenzi zeSoviet

[Umfanekiso okwiphepha 194]

UPavlo Ziatek wazibhokoxa ubomi bakhe bonke kwinkonzo kaYehova

[Umfanekiso okwiphepha 196]

Ileta yomhla kaMeyi 18, 1962, evela kuNathan H. Knorr isiya kubazalwana abaseU.S.S.R.

[Umfanekiso okwiphepha 214]

Uncwadi lwaseUkraine nezinye iindawo zeSoviet Union lwalushicilelwa kwiinqaba ezifana nale yasempuma Ukraine

[Umfanekiso okwiphepha 216]

Phezulu: Induli enamahlathi phakathi kwiiNtaba zeCarpathia apho uIvan Dziabko wayesebenzisa khona inqaba efihlakeleyo

[Umfanekiso okwiphepha 216]

Ngasentla: UMykhailo Dioloh uhleli kufuphi naloo ndawo yayikade iyeyokungena kwinqaba apho wayedla ngokudlulisela khona iphepha kuIvan Dziabko

[Umfanekiso okwiphepha 216]

Ngasekunene: UIvan Dziabko

[Umfanekiso okwiphepha 223]

UBela Meysar wachitha iminyaka engama-21 entolongweni, ngelo xesha umfazi wakhe othembekileyo, uRegina, wayehamba isimbuku seekhilomitha ezingaphezu kwama-140 000 esiya kumtyelela ngokufuthi

[Umfanekiso okwiphepha 224]

UMichael Dasevich wamiselwa njengesicaka selizwe ngowe-1971

[Umfanekiso okwiphepha 233]

Ukubhaliswa ngokusemthethweni kwamaNgqina kaYehova eUkraine, ngoFebruwari 28, 1991, kwaba kokokuqala kuloo mmandla weU.S.S.R.

[Imifanekiso ekwiphepha 237]

Kwindibano yezizwe ngezizwe yowe-1993 eKiev, kwabhaptizwa abangama-7 402, elona nani lakha lalikhulu labantu ababhaptizwayo kuyo nayiphi na indibano kwimbali yalo mhla wethu yabantu bakaThixo

[Umfanekiso okwiphepha 246]

Iklasi yokuqala ukuphumelela kwiSikolo Sokuqeqesha Abalungiseleli eLvov, ekuqaleni kowe-1999

[Umfanekiso okwiphepha 251]

Phezulu: Isakhiwo seHolo yoBukumkani apho intsapho yaseBheteli yayisebenzela khona ukususela ngowe-1995 ukusa kowama-2001

[Umfanekiso okwiphepha 251]

Embindini: Indlu eyayisetyenziswa yintsapho yaseBheteli ngowe-1994-5

[Umfanekiso okwiphepha 251]

Emazantsi: IHolo yoBukumkani kwidolophu yaseNadvirna—eyokuqala ukwakhiwa ngaphantsi kwenkqubo entsha yokwakhiwa kweeHolo zoBukumkani eUkraine

[Umfanekiso okwiphepha 252, 253]

(1-3) Isebe elisandul’ ukunikezelwa laseUkraine

[Umfanekiso okwiphepha 252]

(4) IKomiti yeSebe, ukusuka ekhohlo ukusa ekunene: (abahleli phantsi) uStepan Hlinskyi, uStepan Mykevych; (abemileyo) uAndrii Semkovych, uRoman Yurkevych, uJohn Didur, noJürgen Keck

[Umfanekiso okwiphepha 253]

(5) UTheodore Jaracz ethetha xa kwakunikezelwa isebe laseUkraine, ngoMeyi 19, 2001