Abantwana Abangenamakhaya Kutheni Kunzima Kangaka Nje Ukubanceda?

NGO-OKTOBHA 14, 1987, uJessica McClure oselula weyela kwiqula lamanzi angasetyenziswayo eliziimitha ezi-6,7 eUnited States. Kangangeeyure ezingama-58 ezithuthumbisayo, abahlanguli batsala nzima bethubeleza phakathi kwamatye aqinileyo bezama ukufikelela kwintwazana ene-18 leenyanga ubudala. Esi siganeko sapapashwa kwimihlathi ephambili yamaphephandaba saza saba ngundaba-mlonyeni kweso sizwe siphela, ibe ingxelo kamabonwakude yabagcina abaphulaphuli bayo bexhalabile de waba uJessica ukhutshwe ephilile kuloo mngxuma umnyama.

Kodwa uJessica wayenekhaya. Noko ke, okumangalisayo kukuba, abantu ababonakalisi kwaumdla ofanayo kwingxaki yabanye abantwana abangenamakhaya. Ngaba kungenxa yokuba imeko yabo inokuthanani nobuhlwempu? Ehlahlela imeko yabo basweleyo, umbhali weWorld Health, iphephancwadi leNtlangano Yempilo Yehlabathi, wavakalisa oku: “Abahlwempuzekileyo abasezixekweni abangobemi bokwenene bamazwe abo, kuba abanamalungelo kwezobupolitika, kwezentlalo okanye kwezoqoqosho. Abahlwempuzekileyo baluphala ngokukhawuleza ibe bafa besebancinane.” Ngaloo ndlela, kufuneka kwenziwe iinguqulelo ezinkulu kwindlela oorhulumente nabantu ababajonga ngayo abahlwempuzekileyo ngaphambi kokuba uqoqosho lwelizwe lube lunokunikela ukutya okwaneleyo, impahla nezindlu kubo.

Indlela Abanye Abanokuncedwa Ngayo

Iingcamango ezavakaliswa kwiSibhengezo seZizwe Ezimanyeneyo Ngamalungelo Omntwana ngokwenene zilungile, kodwa kutheni zibonakala zingenakufikeleleka nje? (Bona ibhokisi.) Ngokuqhelekileyo, abantu bayabathanda abantwana ibe bafuna okona kubalungeleyo. Ngaphandle koko, abantwana babalulekile ukwenzela ikamva elilungileyo lesizwe. KwiLatin America Daily Post, uJames Grant, weUNICEF uthi: “Ngapha koko, ngabantwana abafanele ekugqibeleni bakhokele amazwe abo bewakhupha kwimeko ephantsi yezoqoqosho.” Ngokutsho kwale ngxelo, lo kaGrant uhlabela mgama esithi, “iindleko zokunyanyekelwa kwempilo nemfundo esisiseko zinokukhokelela kulwando olubalulekileyo lwemveliso nokukhula kwezoqoqosho.” Amazwe afana neBrazil awuphaphele kabukhali umbono ongemhle odluliselwa yimeko yabantwana abahlala ezitratweni nogonyamelo olunxulumene noko. Ngethamsanqa, eBrazil kwenziwa imigudu ethile ukucombulula le ngxaki ngoncedo lwesisa, lwamakhaya okunyamekela abantwana, lwamakhaya eenkedama nemizi yokulungisa izimo zabantwana abaziinjubaqa.

Bambi oorhulumente bayakubona ukuxabiseka kokuxhasa imizamo yeentsapho ezihlwempuzekileyo neyoluntu yokufuna izindlu kunokuba basuke nje bakhe izindlu. Ngale ndlela, abahlwempuzekileyo bona ngokwabo baba ngumthombo weenguqulelo.

Ngaloo ndlela, ngaphandle kokufumana uncedo kumaziko awahlukahlukeneyo, iintsapho ezihlwempuzekileyo zimele zikuvume ukwenza indima yazo. Intsapho iba negalelo elingakumbi kwezoqoqosho nakwezentlalo xa imanyana ize icombulule iingxaki zayo. Ukuba kuyimfuneko, onke amalungu afanelekileyo anokufak’ isandla kuqingqo-mali lwentsapho.

Indlela Abanye Abaye Baphumelela Ngayo

Bambi abantwana abangenamakhaya baye bakwazi ukuphuncula kwimeko enjalo. Qwalasela umzekelo kaGuillermo. Ngaphambi kokuzalwa kwakhe, intsapho yakowabo yayihlala kwidolophana encinane kodwa ngenxa yeemeko ezimaxongo kwezoqoqosho yafudukela kwisixeko esilikomkhulu. Xa uGuillermo wayeneenyanga ezintathu ubudala, uyise wagetyengwa; kwaza kwiminyaka embalwa kamva, kwafa unina, ebashiya abantwana nomakhulu wabo. Ngaloo ndlela, kwasekukhuleni kwakhe, uGuillermo waba ngumntwana ohlala ezitratweni. Kangangeminyaka emihlanu, mihla le wayegqogqa iivenkile zokutyela nezokusela, ecela ukutya nemali ukuze anyamekele iintswelo zentsapho yakowabo, ehamba ezitratweni kude kube sezinzulwini zobusuku. Abantu abanobubele abathi baqhelana naye ezitratweni bamfundisa iindlela ezisisiseko zokucoceka ngokobuqu nezokuziphatha. Kamva, wacholwa esitratweni ngamagosa eziko laseburhulumenteni aza amsa kwindawo yokukhuselwa kwabantwana, apho wafumana ukutya nemfundo. AmaNgqina kaYehova amnceda ukuba aqonde ukuba uMdali wayenomdla kuye njengomntu, ibe azinyamekela iintswelo zakhe zokomoya. Echukunyiswe kukunyaniseka nabubuhlobo bamaNgqina, uGuillermo wathi kamva: “Ngubani obenokunceda osemtsha okhule ngokupheleleyo ngaphandle kolwalathiso noqeqesho? Kuphela ngabazalwana abanothando abandinika uncedo olunjalo, ukongezelela kuncedo lwemali.” UGuillermo wabhaptizwa eneminyaka eli-18 ubudala. Ngoku ukhonza njengelungu labasebenzi kwiofisi yesebe yeWatch Tower Society kwilizwe lakhe.

Kukwakho noJoão, owathi ngoxa wayeselula wagxothwa yena nabantakwabo kokwabo nguyise owayeyindlamanzi. Kodwa unovenkile othile wamqesha uJoão. Ekhuthele, uJoão wahambela phambili ibe ngokukhawuleza waba nokuthenjwa ngabo wayesebenza nabo nangabanye. Ngoku uyindoda eyonwabileyo kunye nentsapho yakhe. Kwakhona qwalasela uRoberto oneminyaka eli-12 ubudala. Naye wagxothwa yintsapho yakowabo. Wahamba waya kwenza umsebenzi wokucoca izihlangu nokuthengisa iilekese, ibe kamva wasebenza njengompeyinti. Ukuba ngokuvumayo ukufunda nokusebenza kwamnceda uJoão noRoberto ukuba boyise imiqobo emininzi. Bakhumbula izihlandlo zokunxunguphala nokuziva benganqabisekanga njengabantwana abasebatsha abangenamakhaya, kodwa bomelezwa kukufunda kwabo iBhayibhile kunye namaNgqina kaYehova. Le mizekelo imbalwa ibonisa ukuba abantwana ngokuqhelekileyo bayakwazi ukubuyela kwisimo esihle ibe, ngoncedo olufanelekileyo, banako ukuthi kamva boyise iimeko ezimbi, nditsho nokungakhathalelwa.

Ukongezelela, xa abaselula befumana ulwalathiso lwabazali ngokuvisisana neLizwi likaThixo, oko kuphumela ekubeni kubekho iintsapho ezizinzileyo, ibe iingxaki ezifana nokungakhathalelwa nokuphathwa kakubi kwabantwana azinakuvela.

Isizathu Sokuba Imigudu Yabantu Isilele

Sekunjalo, ubukho bezigidi zabantwana abangenamakhaya kwalatha ekusileleni komntu ukucombulula le ngxaki inzulu. Kwiphepha iTime kwaye kwacatshulwa amazwi omalathisi weziko lokunyanyekelwa kwabantwana njengothi: “Umntu ongemanga kakuhle nophazamisekileyo engqondweni, umntu ogulayo​—⁠isizwe esigulayo nesibuthathaka⁠—​asinakuba nguthunywashe wenkqubela-phambili.” Iphephancwadi elikwalinye liyixela kwangaphambili into yokuba ngenxa yoku, elinye ilizwe loMzantsi Merika “laliya kuthwala uxanduva lwezigidi zabantu abakhulu abangondlekanga, abangenabuchule nabangenamfundo ababeya kuba lukhuni kulo naluphi na uhlobo lwenkqubo yezempucuko.”

Ngenxa yoku, ngaba ucinga ukuba imiphumo yokungondleki, yokuxhatshazwa ngokwesini, neyogonyamelo inokuconjululwa kuphela ngemizamo yabantu? Ngaba uvakalelwa kukuba nayiphi na inkqubo eyenziwe ngabantu inako ukubuyisela abantwana abasezitratweni ngemva kokuba baye batsala nzima bezabalazela iindlela zokuphila ezitratweni phakathi kwabantu abakhohlakeleyo, nabangenaluvelwano? Ngaba unokuba nombono wenkqubo yokufundisa abazali ukuba baphumeze imbopheleleko yabo ngakubantwana babo. Kulusizi ukuthi, imigudu yabantu, kungakhathaliseki ukunyaniseka kwabo, ayinakuyicombulula ngokupheleleyo ingxaki yabantwana abangenamakhaya.

Kutheni kunjalo nje? Uthile okanye nto ithile ithintela le ngxaki ekubeni ingaconjululwa. Okubangel’ umdla kukuba, uYesu wafanisa umntu, awambiza ngokuthi ‘ngumphathi wehlabathi.’ (Yohane 14:​30) Lo mntu nguSathana uMtyholi. (Bona iphepha 12.) Impembelelo yakhe echuliweyo kuluntu isisithintelo esiphambili ekucombululeni ezi ngxaki nasekufumaneni ulonwabo lokwenyaniso. (2 Korinte 4:⁠4) Ngoko ke, kunyanzelekile ukuba ezo zidalwa zingabonakaliyo zishenxiswe ukuze iimeko zobulungisa zabo bonke abantwana abangenamakhaya nabanye abahlwempuzekileyo zibe nokulungiswa. Ngoko ke, ngaba sinokuba nombono wehlabathi elingenabantwana bahlala ezitratweni nelingenankxwaleko? Ngaba likho ithemba lokwenene, nelihlala lihleli ngabantwana abangenamakhaya?

[Amagama acatshulweyo akwiphepha 6]

‘Ngubani obengathanda ukunceda osemtsha oye wakhula ngaphandle kolwalathiso noqeqesho?’

[Ibhokisi ekwiphepha 7]

ISibhengezo SeZizwe Ezimanyeneyo Samalungelo Omntwana:

◼ Ilungelo lokuba negama nobuzwe.

◼ Ilungelo lokuthandwa, nokuqondwa nelokuba nonqabiseko lwezinto eziphathekayo.

◼ Ilungelo lokondleka ngokwaneleyo, lokunikwa ikhusi, nonyango lwezamayeza.

◼ Ilungelo lokunyanyekelwa ngendlela ekhethekileyo ukuba unesiphene, enoba singokwasemzimbeni, singokwasengqondweni, okanye singokwasentlalweni.

◼ Ilungelo lokuba phakathi kwabo bangabokuqala ukufumana inkuselo nesiqabu kuzo zonke iimeko.

◼ Ilungelo lokukhuselwa kuzo zonke iintlobo zokungakhathalelwa, inkohlakalo nokuxhatshazwa.

◼ Ilungelo lokufumana amathuba awaneleyo okudlala nokuzihlaziya namathuba alinganayo emfundo engahlawulelwayo neyesinyanzelo, neya kwenza umntwana akhulise iimpawu zakhe zobuqu nokuze abe lilungu eliluncedo ebuthweni.

◼ Ilungelo lokukhulisa ubuntu obupheleleyo kwiimeko ezikhululekileyo nezinesidima.

◼ Ilungelo lokukhuliswa ngomoya wokuqondwa, wokunyanyezelwa, wobuhlobo phakathi kwabantu, woxolo nowobuzalwana bazwenibanzi.

◼ Ilungelo lokunandipha la malungelo kungakhathaliseki ubuhlanga, ibala, isini, unqulo, upolitiko nezinye iingcamango, imvelaphi yobuzwe okanye yezentlalo, ingxaki yentlalo, nezinto eziphathekayo, ukuzalwa, okanye ezinye iimeko.

Olu shwankathelo lusekelwe kwiEveryman’s United Nations

[Inkcazelo Ngomfanekiso okwiphepha 5]

Reuters/Bettmann Newsphotos