Abantwana Abangenamakhaya Ngaba Sikho Isicombululo?
ABANTU abanenyameko ngokwenene ngabantu abangoowabo abafuni kuncama ngokungathi akukho nto ingakumbi enokwenziwa ngabantwana abangenamakhaya. Bayaqonda ukuba abantwana abahlala ezitratweni bafuna okungakumbi kunophahla nje oluphezu kweentloko zabo. Abantwana bayaphumelela xa benoxolo lwengqondo, umsebenzi onandiphekayo, impilo entle nokuzithemba. Amadoda nabafazi ababacingelayo abanye abantu bazinikela ngokuvumayo ngenxa yezilangazelelo zabangenamakhaya, ibe oko kuyancomeka. Kodwa phezu kwayo nje imigudu yabo, ingxaki yabantwana abahlala ezitratweni iyaqhubeka.
Isizathu sikukuba inkqubo ekhoyo ehambisela phambili iimeko ezithe zavelisa abantwana abangenamakhaya ayinakulungiswa. Injengenqwelo-mafutha eyaphukileyo engenakulungiseka. Ngokwenene, ngaba asimele sikuqonde ukuba amandla omntu okuyila izinto ewodwa awanakuzisa ibutho loluntu elinobulungisa?
Noko ke, okuvuyisayo kukuba, inguqulelo inokwenzeka—kodwa kungekhona ngezandla zomntu. Kuphela nguThixo uSomandla onamandla nonobulumko bokushenxisa ngokupheleleyo oko kubangel’ intlungu phezu komhlaba. ILizwi lakhe, iBhayibhile, lisixelela ngolawulo loBukumkani bakhe basezulwini nendlela oluya kuyizalisekisa ngayo iminqweno yabantu engeemeko ezilungileyo kanye apha emhlabeni.—Daniyeli 2:44.
UThixo Usikhathalele
Ngaba ucinga ukuba kunokwenzeka ukuba uThixo ashenxise inkqubo ekhoyo aze aqalise indlela entsha yobomi? Ukuba kunjalo, khumbula ukuba asikokusindiswa komntu kuphela kodwa, ngaphezu kwako konke, igama likaYehova uThixo libandakanyekile. Ekubeni enguMdali, umzekelo obalaseleyo wolungelelwano nokubamba ixesha, usiqinisekisa ukuba uya kuthabatha isenzo ngexesha lakhe elifanelekileyo nangendlela yakhe efanelekileyo, ibe oku uya kukwenza ngoBukumkani bakhe. Eneneni, obo Bukumkani abuyonto engacacanga okanye emfiliba kodwa bungurhulumente wasezulwini, onako ukulungiselela ukhokelo nolwalathiso olunenkqubela lokuhlangabezana neentswelo zokwenene zoluntu.—Isaya 48:17, 18.
Umntwana ongenakhaya unokuwathabathela entliziyweni amazwi kaDavide akwiNdumiso 27:10: “Ngokuba ubawo noma bandishiyile, wesuka uYehova wandichola.” Kwakhona kuyakhuthaza ukwazi ukuba ukuba kudidi oluphantsi ehlabathini akwenzi nabani na angafaneleki ukuba afunde ngokuthanda kukaThixo. IMizekeliso 22:2 ithi: “Ziyaqubisana izityebi namahlwempu; umenzi wabo bonke nguYehova.” Ewe, abo bahlelelekileyo, xa benyanisekile, banokuqiniseka ukuba uYehova uThixo ukulungele ukubanceda.—INdumiso 10:14, 17.
UYehova unomdla kwimpilontle yethu ibe uyazi ukuba angayanelisa njani iminqweno yethu efanelekileyo. Esebenzisa umprofeti wakhe uIsaya wabuza amaSirayeli esithi: “Ukuzila endikunyulileyo asikoku na? . . . Ukumqhekezela esonkeni sakho olambileyo, ubangenise endlwini abaziintsizana, abatshutshiswayo? Xa uthe wabona ohamba ze, umambese, ungazifihli kwinyama yakho?” (Isaya 58:6, 7) Oku kungumfuziselo wokusesikweni aya kukuzisa uThixo ngorhulumente woBukumkani bakhe. Akukho namnye oya kuthi angakhathalelwa okanye aphathwe ngokungathi akazange abekho. Ngaloo ndlela, INdumiso 145:19 isazisa oku: “Uyayenza into ekholekileyo kwabamoyikayo, akuve ukuzibika kwabo, abasindise.” Uthando ngoThixo nommelwane luya kuba ngamandla ayintloko okumanyanisa intsapho yoluntu. Ngenxa yoko, ingxaki yabantwana abangenamakhaya iya kuconjululwa. Akukho namnye oya kushiywa eyedwa!
Ngaba Ukungafezeki Komntu Kuya Kuyithintela Injongo KaThixo?
Nakanye, utyekelo olubi lomntu aluyi kuvunyelwa ukuba luyithintele injongo kaThixo yokuguqulela umhlaba ekubeni yiparadisi yolonwabo. Abo banelungelo lokuphila kwihlabathi elitsha likaThixo, enoba kungenxa yokusinda kwidabi leArmagedon, njengoko lichazwe eBhayibhileni, okanye kungenxa yokuba bevusiwe kwelabafileyo ukuze baphile kwakhona emhlabeni, baya kukhuthazwa ukuba benze kangangoko benako.—Yohane 5:28, 29; ISityhilelo 16:14, 16.
Akukho namnye osabelayo oya kufumanisa umsebenzi wakhe ulilize. Umsebenzi wakhe uya kuvuzwa ngokufanelekileyo. Khawuphawule, isithembiso sikaThixo esithi: “Abayi kwakha, kuhlale bambi; abayi kutyala, kudle bambi; kuba iya kuba njengemihla yomthi imihla yabantu bam, badle into esetyenzwe zizandla zabo abanyulwa bam. Abayi kuzixhamla ngokulambathayo, bazalele ukhwankqiso; ngokuba bayimbewu ayisikeleleyo uYehova, nabaphume ezibilinini zabo, banabo.” (Isaya 65:22, 23) Ngaba wena nentsapho yakho beningayi kuthanda na ukubona inzaliseko yaloo mazwi? Ibe lolunjani lona uvuyo ukwazi ukuba ngelo xesha akukho ndawo apho uya kufumana khona indlala, ubuhlwempu, ukungaqeshwa, okanye abantwana abangenamakhaya!
Ngokungathandabuzekiyo, abo ngoku beva intlungu yokuswela izinto eziyimfuneko, njengoko kunjalo ngabantwana abangenamakhaya, baya kuzixabisa ngakumbi iintsikelelo zokuba nentsapho eyonwabileyo kunye nekhaya elifudumeleyo. Kunjengokuba sifunda kuIsaya 65:17: “Angakhunjulwa awokuqala, angenyuki athi qatha entliziyweni.” Abantu abaya kuba nelungelo lokuphila ngelo xesha baya kufumanisa ukuba iimeko ezimbi azisekho ngonaphakade ibe abantu bazo zonke izizwe, iilwimi, neentlanga baya kube besebenza kunye kubuzalwana bothando. Amaqela eentsapho aya kusindela kwelo xesha ngokungathandabuzekiyo aya kuqhubeka ezukisa uThixo. INdumiso 37:11 ithi ngaloo Paradisi yasemhlabeni: “Ke bona abalulamileyo baya kulidla ilifa ilizwe, baziyolise ngobuninzi boxolo.”
Unokuzilungiselela Njani Ikamva?
Kwanangoku, kunokwenzeka ukuba ufumane ulwazi olunik’ ubomi nokuhlakulela iimpawu ezinqwenelekayo, ezinjengothando nokulunga. Kunokwenzeka njani oko? UYehova uyayithanda intsapho yoluntu, ibe ngoNyana wakhe, uYesu Kristu, ‘utsalela abantu kuKristu’ ngokubahlanganisa neLizwi Lakhe kunye nabantu Bakhe. (Yohane 6:44) Ukwanentlangano esemhlabeni enocwangciso lokufundisa olunokukunceda ukuba wenze ukuthanda kukaThixo ukuze ube ungakhangela phambili kubomi obonwabileyo nobunentsingiselo ngonaphakade. Ngenxa yoku, iindaba ezilungileyo zoBukumkani bukaThixo ziyashunyayelwa kwabo basweleyo. (Mateyu 24:14) ILizwi likaThixo lithi: “Omdelayo ummelwane wakhe uyona; obabala abaziintsizana, hayi, uyolo lwakhe!” (IMizekeliso 14:21) Kufudumez’ intliziyo ukwazi ukuba kwanabo bahlelelekileyo banako ukuthetha noThixo ukuba intshukumisa yabo iyelungileyo. Umdumisi wabhala oku: “Ke mna ndilusizana, ndilihlwempu; Thixo, khawuleza uze kum. Umncedi wam nomsindisi wam nguwe; Yehova, musa ukulibala.”—INdumiso 70:5.
Ewe, iLizwi likaThixo linokukunika ithemba lokwenene ngekamva. Ukanti, ukusetyenziswa okuqhelekileyo kwegama elithi “ithemba” akusoloko ngalo lonke ixesha kuthetha ukuqiniseka. EBrazil ubani ngokufuthi uva isaci esithi: “A esperança é a última que morre” (esifana nesesiXhosa esithi “Ithemba alibulali”). Ingcamango ikukuba sihlale sinethemba nkqu naxa kungabonakali sizinzi sokuba nalo. Ngokuchasene noko, iZibhalo zinikela izizathu eziqinileyo zokuhlala somelele elukholweni kuThixo nokuthembela kumadinga akhe. KumaRoma 10:11 sifunda oku: “Bonke abakholwayo kuye abayi kudaniswa.” Ithemba elinjalo elisekelwe eBhayibhileni aliyi kukhokelela kukatyo. Kanye njengokuba imimangaliso yomhlaba wethu iyeyokwenene, ingqina ubulumko nothando lukaYehova, ngoko ukuzaliseka kweziprofeto zeBhayibhile kukwenza ukuba ube nembono engqalileyo, ithemba lokwenene ngekamva.—Roma 15:13.
UBukumkani bukaThixo busisicombululo sokwenene kubantwana abangenamakhaya, ewe, kubo bonke abo bathanda okulungileyo. Ukuzuza ulwazi oluchanileyo lweBhayibhile ngoku kuya kukwenza unandiphe ulonwabo nobomi obungunaphakade kwihlabathi elitsha likaThixo. Ukulindela la madinga akungomphumo wengqikelelo. Kunjengokuba IMizekeliso 11:19 isithi: “Ubulungisa obububo busingisa ebomini.”
[Ibhokisi ekwiphepha 11]
Ngaba Sisicombululo Sokwexeshana?
Isandla esoluliweyo somntwana ongenakhaya obonakala elusizana sinokuyichukumisa intliziyo. Kodwa abantu abanenkxalabo badidekile mayela nendlela abanokumnceda ngayo umntwana ongenakhaya. Ukuze baphungule umthwalo wokuziva benetyala, bambi abantu baya kumfumbathisa iinkozwana ezingephi umntwana baze bahambe. Kanti, kunqabile ukuba loo mali yamalizo ichithelwe ekuthengeni ukutya okanye ekufumaneni ikhusi. Kunoko, isenokuphelela ekubeni isetyenziselwe ukuthenga iziyobisi okanye iziselo ezinxilisayo. Ngenxa yoko, bambi abantu abakhulu abanenkxalabo ngabanye abantu banikela ingqalelo nemali yabo kwiinkqubo ezixhaswa ngurhulumente abavakalelwa kukuba ziya kubanceda abantwana abangenamakhaya. Abanye abantu bakholelwa ekubeni indlela engqale ngakumbi kukwalathisela abantwana abangenamakhaya kumaziko afanelekileyo ukuze bafumane uncedo. Ngale ndlela, abemi abanenkxalabo bavakalelwa kukuba bazama ukwenza ibutho labo libe lelinobuntu ngakumbi.
[Umfanekiso okwiphepha 9]
“Abayi kutyala, kudle bambi.”—Isaya 65:22
[Inkcazelo]
FAO photo
[Umfanekiso okwiphepha 10]
“Kuba iya kuba njengemihla yomthi imihla yabantu bam.”—Isaya 65:22