Ngaba Ukupheliswa Kongcoliso Kusondele?
ITHEMBA lomhlaba ococekileyo livuyisa ngokwenyaniso. Kodwa ngaba liyinto yokwenene? Kaloku, wambi amazwe azama nzima ukuphucula imeko ngokubhekisele kungcoliso. Ngoku kuye kwanikelwa ingxelo engokuncipha kongcoliso lomoya ngenxa yemilinganiselo engqongqo yokulawula ubungakanani bomsi onelothe ophuma kwimibhobho yeenqwelo-mafutha yokukhupha umoya ongcolileyo. Kweminye imimandla, ungcoliso olubangelwa yimizi-mveliso lubonakala lunciphile nalo. Noko ke, oku, akusoloko kuyinto eyenzeka ngenxa yemilinganiselo engqongqo. Kunoko, maxa wambi kwenzeka kuba kuhlengahlengiswa inkqubo yezorhwebo okubangelwa kukuxinezeleka kwemeko yezoqoqosho yehlabathi.
Umhlaba—Ngaba Wenzelwe Ukuba Uzicoce Ngokwawo?
Ukongezelela, kukho iindlela zokucoca ezisebenzisekayo. Ngokomzekelo, ngokutsho kukaGqr. Aubert weZiko Lezamayeza Elijongene Nezinto Eziphila Kwiilwandlekazi eNice, eFransi, iphytoplankton yenye yezinto zaselwandle eziphambili ekucoceni ungcoliso. Ezi zinto zincinane zikhupha incindi yendalo etshabalalisa iintsholongwane. Ngelishwa, ziyoyisakala. EItali, eVenice nakuLwandle iAdriatic olukufutshane kukho ubulembu. kwiAdriatic ungcoliso luvelisa “ubulembu, obuyinto etyhengetyhenge enukayo, emthubi, emdaka nengwevu, enabela emazantsi kumgama ongangeekhilomitha ezingamakhulu” ehlotyeni. (IThe Globe and Mail, yaseToronto, eKhanada) Omnye uthunywashe ofak’ isandla ngamanzi amdaka avela kumlambo iPo, “onamanzi amdaka avela kubantu abangaphezu kwezigidi ezili-15, inkunkuma evela kwimizi-mveliso emininzi nemikhulu yaseItali . . . nomgquba weehagu ezingaphezu kwezigidi ezihlanu.”
Kuthekani ngongcoliso lomhlaba? Uphengululo olwenziwe yinkampani enkulu yezemichiza idibene neSebe Lamandla LaseUnited States lwatyhila ubukho beentlobo ezininzi zeentsholongwane, umngundo, neamibha emhlabeni, eziye zafikelela emazantsi omhlaba kwiimitha ezingama-260. uGqr. David Balkwell weYunivesithi yeLizwe laseFlorida uphawula oku: “Ezi zinto zisemazantsi omhlaba zisenokuba ziyawacoca [amanzi okwemvelo asemhlabeni].” Ngokuchasene noko, uGqr. Balkwell unethemba lokuba iingcali kwiiseli zemfuza ziya kuba nako ukukhuthaza izinto eziphilayo ezingaphantsi komhlaba ukuba “ziphelise izinto ezithile ezingcolisayo.”
Noko ke, ngokwenene simele sigqibe kwelokuba imeko ekhoyo ngoku ayisibonakalalisi kakuhle isiphelo esikhawulezileyo sokungcola okukokoqobo komhlaba. Ukanti, sinokuqiniseka ukuba ukuphela kokungcola kusondele. Kutheni?
Ukushenxiswa Kokungcola Okungokokuziphatha
Ukuze umhlaba ube likhaya loluntu elicoceke ngokwenyaniso, abantu abakuwo bamele babe ngabacocekileyo, ngokokuziphatha nangokwasemzimbeni. Abantu bamele boyise ukuzigwagwisa kwabo okwendeleyo baze bavelise iimpawu zokungazingci, bebonakalisa ulwazelelelo kubantu abangoowabo nakwizilwanyana zabo abahlala nazo. Ngaba oku kunokwenziwa?
Kule minyaka ingamashumi idluleyo, amaNgqina kaYehova aye afumanisa ukuba oku kunokwenziwa. Aye alinga ukusebenzisa amandla eBhayibhile axonxa ubuntu, kwaye aye afumanisa ukuba le ncwadi inamandla okuguqula abantu, mandla lawo anemiphumo eyingenelo kwimekobume. Ngokomzekelo, amagosa ebala lezemidlalo ayachwayitiswa lucwangco nokucoceka kwezihlwele eziya kwiindibano ezinkulu zamaNgqina kaYehova. Ngokufuthi kuthiwa ‘ibala lezemidlalo lashiywa licoceke ngaphezu kwendlela elaliyiyo xa kwangena amaNgqina.’
Ilungu labasebenzi kwibala lezemidlalo eliseLisbon, ePortugal, lathi komnye wamaNgqina kaYehova: “Xa abantu bendibuza ngoko ndikucingayo ngani, andinakuthetha ubuxoki. Ndiyabaxelela ukuba amaNgqina kaYehova anesimilo kakhulu, acocekile ibe anolungelelwano. . . . Ukuba ningcolise into enye, nicoca ezingama-99!”
Ukubambelela kwamaNgqina ekucocekeni okungokomzimba kunxulunyaniswa nemigaqo yawo ephakamileyo yokuziphatha. Yiphi imigaqo? Leyo yandlalwe eBhayibhileni, eliLizwi likaThixo elibhaliweyo. Ngokubhekisele kwabo bawexukayo iBhayibhile ithi iindlela zikaThixo ‘ziziphakamele ezabo, neengcinga zakhe ziziphakamele iingcinga zabo.’ (Isaya 55:7-9) Ukanti, sinokuzifunda iindlela zikaThixo kuba uThixo ngokwakhe wenza ukuba imithetho yakhe ifumaneke kwabo banqwenela ukuphila ngayo. Le mfundo ingokobuthixo ibalulekile ukulungiselela ikamva lethu.
Namhlanje izigidi zamaNgqina zizama ngamandla ukuphila ngokwemilinganiselo ecocekileyo yokuziphatha, ibe angenelwa kakhulu. Noko ke, kwabaninzi, oku kuye kwathetha iinguqulelo ezinkulu kwimikhwa nendlela zabo zobomi.
Iziyobisi, Ukulwa Noloyiso
Phawula imeko kaMarie, elinye kumalungu entsapho ali-13 ahlala kummandla wesixeko saseNgilani ozele lulwaphulo-mthetho ngokugqithiseleyo.
“Intsapho yakowethu yayisaziwa kakuhle ngokuba namandla kwayo, ibe kanye njengabo bonke, ndandisaziwa ngentlondi. Xa ndandineminyaka eli-15 ubudala, ndaphum’ isisu. Kwiminyaka emibini kamva, ndazala umntwana wam oyintombi, ibe kwafuneka ukuba ndimnyamekele ndindedwa. Inkwenkwe endandithandana nayo yayiselugcinweni kwisikolo [esiqeqeshayo]. Yaqhwesha, ibe ndamitha kwakhona. Ndazama zonke iindlela zokukhupha esi sisu ibe ekugqibeleni ndaphumelela, kodwa ndaphantse ndaphulukana nobomi bam.
“Inkwenkwe endandithandana nayo yaqalisa ukutshaya umya ibe yaba nogonyamelo olugqithiseleyo ngakum, nakubeni ndandimithi kwakhona. Nam ndabandakanyeka ekutshayeni nasekuthengiseni olu khula. Ngoku ndandihlala endlwini eyayizele ngoonongogo. Ndandidla ngokubagcinela abantwana babo.
“Xa ndathi ndaba nomdla kwenye inkwenkwe, inkwenkwe endandithandana nayo kuqala yaluphelisa olo lwalamano ngokuyihlaba amanxeba asibhozo. Ngenxa yoko yabanjwa kwakhona. Emva kokuba ikhululwe entolongweni satshata saza sobabini sangena saphelela kwiziyobisi.”
Emva kokunxibelelana namaNgqina kaYehova nokufundisisa iBhayibhile kunye nawo, lo mntu usemtsha waqalisa ukuya kwiintlanganiso zamaKristu ibe ngokuthe ngcembe kwabakho iinguqulelo. UMarie uyacacisa:
“Ndaqalisa ukuqonda ukuba ukutshaya nokusebenzisa iziyobisi kwakungafanelekanga. Emva kokuba ndimxelele umyeni wam ukuba ndandikuyeka konke oku, wayedla ngokundivuthela ebusweni ngomsi womya, ezama ukundihenda ukuba ndibuyele kwiziyobisi. Ndaphinda ndamitha. Kungekudala emva koko, umyeni wam waqalisa ukungalali ekhaya ubusuku bonke.
“Kwiinyanga ezisibhozo kamva wathabatha konke okwakhe endlwini waza wandishiya. Ndathandaza kuYehova ukuba andincede ndinyamezele, ibe wenjenjalo. Kwandula ke, emva kweenyanga ezintathu, umyeni wam wabuya. Ndathandaza ndicela amandla okwenza oko kwakuchanile. Kwakhona ndazama ukwenza umtshato wam ube ngophumelelayo, kodwa kwiinyanga nje ezintandathu ndandisonga imithungo eli-14 eyayikwiliso lam, eyayibangelwe lugonyamelo lomyeni wam; into awayesayithanda kakhulu yayiziziyobisi. Indlu yethu yaba liziko eliphambili leziyobisi kuwo wonke loo mmandla. Yayizala ‘ngabahlobo’ bakhe, inkoliso yabo yayiphambili kwiziyobisi.
“Ngoncedo lukaYehova, ndaba nenkalipho ndaza ndathetha naloo madoda. Ndawacela ngobuchule ukuba aphume phandle ukuba afuna ukuqhubeka etshaya iziyobisi zawo. Xa umyeni wam wakuvayo oko, waba nomsindo, wandibizela kwigumbi lokuphekela, waza waqalisa ukundibetha edibanisa intloko yam nodonga. Ndazama ukumxelela ukuba ndandixhalabele abantwana ibe ndandifuna ukuba bakhulele kwimeko ecocekileyo nenik’ impilo. Umyeni wam wakhuphela umsindo wakhe kubahlobo bakhe. Ndalinda, ndithandaza. Wabuyela egumbini lokuphekela kwakhona, ibe ndandicinga ukuba wayeza kundibulala.
“Noko ke, ukususela ngoko ukusa phambili izinto zaya zilunga. Kamva safuduka. Xa abo bakhotyokiswe ziziyobisi besiza kusityelela, abazange bathuke okanye bancokole ngobomi bokuziphatha okubi njengangaphambili. Kwakubonakala ukuba babesihlonipha.”
Ukuziphatha kukaMarie ngendlela ecocekileyo nobomi bakhe obungenakungcola kwachukumis’ intliziyo yomyeni wakhe, ibe naye ekugqibeleni wafundisisa iBhayibhile namaNgqina kaYehova. UMarie nomyeni wakhe ngoku bangamaNgqina abhaptiziweyo ibe baxakekile benceda abanye ukuba bacoce ubomi babo ngoncedo lolwazi lweBhayibhile. UMarie uthi:
“Xa ndisiva umnyeni wam ethandaza, okanye xa ndimva evakalisa uthando lwakhe ngoYehova, hayi indlela endivuya ngayo! Inguquko kwimbonakalo yakhe imangalisa ababesakuba ngabahlobo bakhe. Ngoku intsapho yethu imanyene ngokwenyaniso. Andizange ndikhe ndizive ndonwabe kangaka, ibe andizange ndiyeke ukumbulela uYehova ngokusikhupha kule nkqubo yezinto ingcolileyo.”
Impumelelo enjalo ekulweni ukungcola okungokokuziphatha ityhila amandla eLizwi likaThixo. Ngaphezu koko, yalatha kwithemba lokupheliswa okusondelayo kwazo zonke iintlobo zongcoliso. Ithini iBhayibhile ngako oku?
Umhlaba Ococekileyo—Uyinto Eqinisekileyo
Ukufundisisa ngenyameko iBhayibhile kutyhila ukuba siphila ‘kwimihla yokugqibela’ yale nkqubo ikhoyo yezinto. (2 Timoti 3:1-5) Imeko yomhlaba ibobunye nje ubungqina obubonisa oku. Kuthetha ntoni oku ngokuphathelele ithemba lethu lomhlaba ococekileyo?
Kuthetha ukuba kungekudala uThixo uza kungenelela kwimicimbi yabantu. Kungekudala uza kwenza isenzo esinamandla ekushenxiseni lonke ungcoliso olungokokuziphatha nolungokwembonakalo yomhlaba wethu. Kwincwadi yeSityhilelo uthembisa ‘ukonakalisa abo bawonakalisayo umhlaba.’—ISityhilelo 11:18.
Ngokwenene, nguThixo kuphela onamandla okuzisa umhlaba ococekileyo, ongenalungcoliso. Kuyachwayitisa ukwazi ukuba unenjongo yokwenza kanye oko. Xa ekwenza, kwikamva elingekude, kuya kuba njengoko yena ngokwakhe esithi: “Uyabona, izinto zonke ndizenza ntsha.” (ISityhilelo 21:5) Uyakwandula ke, ekugqibeleni, umhlaba wethu ube likhaya elifanelekele abantu abacocekileyo, abathe tye, abaya kunandipha izinto zalo eziyintabalala ngonaphakade.