Ngubani Oya Kucoca Lo Mhlaba?
“NDICINGA ukuba ngonyaka wama-2025 kwimizi-mveliso yethu liya kube lingasasetyenziswa igama elithi ‘ungcoliso.’” Olo luqikelelo olwenziwe kutshanje ngomny’ umphathi kwinkampani yemichiza. Ngaba uyakholelwa ukuba iya kuze yenzeke loo nto? Ukuba kunjalo ke, iza kwenziwa njani?
Ikwayile ngenisondini le ibangele ukuba amashishini athengise izinto eziyingozi. Ngokomzekelo, imithetho ekhusela ushishino olufihlakeleyo ivumela iinkampani zezibulali-zinambuzane ukuba zifihle imixube ethile enengeniso ngokubhala kuzo ngaphandle ukuba “icwengile,” binzana elo elithatyathwa ngokulula njengelithetha ukuba “ayinabungozi.” Iphephancwadi iChemical Week linikela ingxelo yokuba, sekunjalo, “ubuncinane imixube engama-394 ecwengileyo iye yasetyenziswa njengezibulali-zinambuzane ezinetyhefu.” Kule mixube, engama-209 zizingcolisi ezinobungozi, engama-21 yaziwa ngokusemthethweni ukuba inokubangela umhlaza, ibe eli-127 kuyo inobungozi kwabo basebenza ngayo!
Liyinyaniso lona elokuba, amanyathelo okhuseleko ngokufuthi abethatyathwa ngurhulumente aye aluncedo. Omnye umbhali uthi, kodwa ezona zinto ziphambili koorhulumente “kukukhula koqoqosho nengeniso yemizi-mveliso.” Ngenxa yaloo nto, behleli nje bajamelene nokhetho—phakathi kweengozi neengenelo. Eyona ngenelo ke kukuba, ‘ungcoliso noko luyawutha.’
Ngoko sinokuzifuna phi izicombululo kule ntsinda-badala? Kaloku elinye iNgqina likaYehova lakha lahlaba lo mbuzo komny’ umninimzi onobuhlobo. Ebonisa ukuzithemba iinkokeli ezingabantu nezazinzulu, lo mntu waphendula wathi: “Baya kuze bayithi qhwii nje yonke loo nto ngeny’ imini.”
Eli Ngqina labuza: “Kodwa ke ngoobani abo? Asingobantu abafana nam nawe? Basenokuba bafundile bona, kodwa ke basikelw’ umda, banobuthathaka babo. Bayazenza iimpazamo.” Ngaphandle kwaloo nto ke, le ngxaki sel’ ithand’ ukuba nobuzaza, kuphinde ke kubekho ukubawa norhwaphilizo olwenziwa luluntu ngokubanzi.
Ngaba nawe ukholelwa ukuba baya kuzithi qhwii nje izinto? Imbali ende yokusilela koluntu ukwenjenjalo ayisiniki themba. Iphephancwadi elithi Outdoor Life lathi: “Izazinzulu nabo zisebenza nabo banobuchule ngokwenene ekufundeni ngeengxaki zongcoliso kunokuba bazicombulule.” Ngaba likho ithemba lokuba abantu banokuyicombulula le ntsinda-badala?
Ngaba Abantu Banokuyenza Ngokwabo Le Nto?
Ukulawula ingxaki yongcoliso olubangelwa yimichiza akuyongxaki nje enokuconjululwa ngamagunya asekuhlaleni. Oku kungenxa yokuba imichiza esetyenziswa kwelinye ilizwe ichaphazela nabantu abakumazwe aselumelwaneni, kwanabantu abasemhlabeni wonke! Ibe abantu boyisiwe kukuba nentsebenziswano ekucombululeni le ngxaki yehlabathi lonke. IBhayibhile iyasichaza isizathu saloo nto xa isithi: ‘Umntu ugunyazela umntu kube kubi kuye.’ (INtshumayeli 8:9) Kutheni uluntu lungakwazi ukuzilawula nje? IBhayibhile yalek’ umsundulo isithi: “Akukhona endodeni ehambayo ukuqinisela ukunyathela kwayo.” (Yeremiya 10:23) Ithetha ntoni loo nto?
Ithetha ukuba uluntu lwalungadalelwanga ukuba luzilawule ngaphandle kolwalathiso lukaThixo. Liyinyaniso elokuba, uluntu luye lwenza izinto ezibonakalayo—luye lwakha iindawo zokuhlala ezisemgangathweni lwenza izixhobo ezibangel’ umdla, lwada lwaya nasenyangeni—sekunjalo alukwazi kuzilawula ngaphandle kolwalathiso lobuthixo. Ifundisa loo nto ke iBhayibhile, ibe nembali iyakungqinela ukuchana kweBhayibhile.
Umhlaba Ocociweyo—Uya Kubakho Njani?
UMdali wethu, uYehova uThixo, ebesoloko eluxhalabele uluntu nalo mhlaba, awawulungiselela umntu. Emva kokuba edale uluntu, walunika umyalelo wokuba liwunyamekele umhlaba nezinto eziphilayo ezikuwo. (Genesis 1:27, 28; 2:15) Kamva, emva kokuba isibini sokuqala esingabantu singawuthobelanga umyalelo wakhe, wayalela uhlanga lwakwaSirayeli wamandulo ngokuphathelele ukunyanyekelwa komhlaba, kuquka umyalelo wokuba uyekwe ulifusi kangangonyaka wonke kwiminyaka esixhenxe. Le yayiyindlela yokuwuhlaziya. (Eksodus 23:11; Levitikus 25:4-6) Kodwa aba bantu babawa baza abamthobela uThixo. Babandezeleka bedibene nelizwe labo.
Kakade ke, ngelo xesha lwalungekho ungcoliso olubangelwa yimichiza njengokuba kunjalo namhlanje. Sekunjalo, lonakala ilizwe ngenxa yokuba amaSirayeli akazange awuphumze ngokuvisisana nenjongo kaThixo, ibe loo nto yafak’ enkathazweni abantu abamsulwa. Ngoko uThixo wavumela amaBhabhiloni ukuba awoyise amaSirayeli aze aluse ekuthinjweni eBhabhiloni olo hlanga kangangeminyaka engama-70. Kwakhona esi sohlwayo savumela ukuba umhlaba ukhe uphumle uze uphinde uhlaziyeke.—Levitikus 26:27, 28, 34, 35, 43; 2 Kronike 36:20, 21.
Le mbali isifundisa ukuba uThixo uya kubaphendulisa abantu ngento abayenza emhlabeni. (Roma 15:4) Enyanisweni, uThixo uthembisa ukuba ‘uya kubonakalisa abo bawonakalisayo umhlaba.’ (ISityhilelo 11:18) Licacile elokuba, iBhayibhile iyaluchaza uhlobo lwabantu ababandakanyekileyo koku ‘konakalisa.’ Ezona mpawu zibenza batshatshele, ezichazwe eBhayibhileni kweyesi-2 kuTimoti 3:1-5, ziquka ukuthi phithi thwanga yimali nokuzanelisa de bangakhathaleli noThixo, baze ngaphezulu bangakhathaleli nendalo yakhe, kwakunye nabanye abantu.
Ngoko ezi zibhalo zibini zeBhayibhile—eyesi-2 kuTimoti 3:1-5 neSityhilelo 11:18—zikufikisa kwizigqibo ezibini. Okokuqala, iingqondo ezingcolileyo zibangela umhlaba ongcolileyo. Ibe okwesibini, uThixo uya kungenelela ukuze ahlangule esi sijikelezi-langa nabantu aboyika uThixo xa kucaca ukuba ezi ndidi zimbini zongcoliso ziyagabadela. Uya kungenelela njani ke uThixo?
Esebenzisa umprofeti wakhe uDaniyeli, uThixo waprofeta wathi: ‘Ngemihla yabo kumkani, [ekucaca ukuba wayebhekisela koorhulumente banamhlanje] uThixo wamazulu uya kumisa ubukumkani . . . obuya kuzicola buzigqibe zonke ezo zikumkani, bona bume ngonaphakade.’ (Daniyeli 2:44) Obo Bukumkani ngurhulumente wokwenene wehlabathi. UYesu Kristu wafundisa abalandeli bakhe ukuba bathandazele loo rhulumente xa wathi: “Ngoko ke, nina nimele nithandaze ngale ndlela: ‘Bawo wethu osemazulwini, . . . mabufike ubukumkani bakho. Makwenzeke ukuthanda kwakho nasemhlabeni, njengasezulwini.’”—Mateyu 6:9, 10.
Phantsi kokuvelelwa ngothando buBukumkani bukaThixo, abemi bomhlaba baya kunandipha ilungelo elingenakuthelekiswa nanto lokwenza sonke esi sijikelezi-langa sibe yiparadesi. Umoya uya kube ucocekile unuka kamnandi, imijelo yamanzi iya kube icocekile, ibe umhlaba uya kuvelisa izinto ezicocekileyo. (INdumiso 72:16; Isaya 35:1-10; Luka 23:43) Emva koko, iBhayibhile inikela esi sithembiso: “Izinto ebezikho ngaphambili [izigulo ezikhoyo namhlanje, ukubandezeleka, ungcoliso nezinye iingxaki] azisayi kukhunjulwa‚ kwaye azisayi kuthi qatha entliziyweni.”—Isaya 65:17.
[Umfanekiso okwiphepha 30]
Umhlaba ococekileyo—ngaba uya kuphila ukuze uwubone?