Imipu—Ihlabathi Elingenayo
UKUSUSELA ekuqaleni kwembali yoluntu, umntu uye wabhenela kugonyamelo ekuqhubaneni nomntu onguwabo. Ukubulala kwaqala ukubonakala kwintsapho yokuqala xa uKayin wabulala umntakwabo uAbheli. Kwaye ukubulala kuye kwaqhubeka ukususela ngoko—phakathi kweentsapho, phakathi kwezizwe naphakathi kweentlanga. Njengokuba izixhobo ziya ziba namandla, namaxhoba ayanda. Amatye namagqudu ashenxel’ imikhonto neentolo, nto ezo ezathatyathelw’ indawo yimipu neebhombu. Ukutshatyalaliswa kwabantu abangamakhulu kwaba ngamawaka; namhlanje amawaka aye aba zizigidi. Yaye oku akwenzeki kuphela emfazweni kodwa nasebudeni bexesha loxolo. Oku akwenziwa kuphela ngamajoni kodwa kwanangabemi. Akwenziwa kuphela ngabantu abakhulu kodwa kwanangabantwana. Ngaba ukwanda kogonyamelo kuya kuze kuphele? Ukuba oko kuxhomekeke ebantwini, amathemba abonakala emfiliba.—2 Timoti 3:1-5, 13.
UKristu Yesu wakuxela kwangaphambili ukuba oku kuya kuba ngamaxesha xa iintlanga ziya kuvukelana kwiimfazwe ezoyikekayo, zisuba ubomi bezigidi zabantu. Iindyikitya zokufa neenyikima zomhlaba zaziya kubangela umonakalo omkhulu kwiindawo ezininzi. Umntu uya kube ewonakalisa umhlaba kangangokuba amandla awo okulondoloza ubomi aya kusongelwa—izazinzulu ezininzi ngoku zivakalisa olo loyiko. Kodwa ukuthanda imali komntu kumbangela ukuba athabath’ unyawo kwiphulo lakhe lokuwonakalisa, yaye oku kuya kuphela xa uYehova uThixo engenelela ngokwakhe ‘ukuze onakalise abo bawonakalisayo umhlaba.’—ISityhilelo 11:18.
Abaninzi bayazihleka izilumkiso ezinjengezi yaye ngaloo ndlela bezalisekisa enye inxalenye yomqondiso owaxelwa kwangaphambili wemihla yokugqibela: “Nikwazi nje oku kuqala, ukuba kuya kuza ngemihla yokugqibela abagxeki, behamba ngokwezabo iinkanuko, besithi, Liphi na kaloku idinga lokufika kwakhe? Kuba kuseloko oobawo balalayo ukufa, izinto zonke zahlala zihleli zinjengokwasekuqaleni kwendalo.”—2 Petros 3:3, 4.
Kodwa kukho ithemba kweli lifu limnyama lithe zinzi phezu koluntu. UYesu wakuxela kwangaphambili ukuba ngexesha lobukho bakhe, kuya kubakho ‘emhlabeni ukuxinezeleka kweentlanga, zithingaza; lugquma ulwandle namaza; abantu besifa kukoyika nakukulindela izinto ezilizelayo elimiweyo.’ Kodwa kwakhona wathi kuya kuba lixesha lokuba “niziphakamise iintloko zenu, ngenxa yokuba iyasondela inkululeko yenu.”—Luka 21:25-28.
Iintlanga zixinezelekile, yaye izihlwele ziyaxokozela, yaye abantu ngabanye bayoyika ngenxa yezinto eziwuzelayo umhlaba, kodwa lixesha lenkululeko yabo balindele ukufika koBukumkani bukaThixo noLawulo lweWaka Leminyaka lukaKristu Yesu. Elo iya kuba lixesha lokuzaliseka kwedinga likaYehova uThixo ‘lamazulu amatsha nomhlaba omtsha apho kumi khona ubulungisa.’—2 Petros 3:13.
Yaye akusayi kubakho mipu! Ayisayi kufuneka ngenxa yemfazwe. “Ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.”—INdumiso 46:9.
Ayikho imipu eya kufuneka ukuze umntu azikhusele ngayo. “Baya kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo; kuba umlomo kaYehova wemikhosi uthethile.”—Mika 4:4.
Ngabalungileyo kuphela, ingenguye namnye kwababi, oya kuba lapho. “Ngokuba abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.” (IMizekeliso 2:21, 22) Baya kwandula ke ‘abalulamileyo balidle ilifa ilizwe, baziyolise ngobuninzi boxolo.’—INdumiso 37:11.
Emehlweni kaThixo ugonyamelo luyawonakalisa umhlaba. Ngomhla kaNowa “ihlabathi lalonakele emehlweni kaThixo; ihlabathi lalizele lugonyamelo.” (Genesis 6:11-13) Ngenxa yoko, uYehova waliphelisa elo hlabathi ngoNogumbe wehlabathi lonke. UYesu wakufanisa ukuphela kweli hlabathi likhoyo linogonyamelo ekufikeni kwakhe nokuphela kwelo lamandulo: “Kuba njengokuba babesithi, ngemihla ebingaphambi konogumbe, badle, basele, bazeke, bendise, kwada kwayimini awangena ngayo emkhombeni uNowa, bengaqondanga, wada wafika unogumbe, wabakhukulisa bonke: koba njalo nokufika koNyana woMntu.”—Mateyu 24:38, 39.
Kwihlabathi likaThixo elitsha nabani na ophilayo uya kuzalisekisa uMarko 12:31 othi: “Uze umthande ummelwane wakho njengoko uzithanda ngako.” Yaye uIsaya 11:9 uthi: “Ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.” Yaye kwakhona okuya kuzalisekiswa kwelo hlabathi litsha lobulungisa iya kuba ziimeko ezizukileyo ezichazwe kwiSityhilelo 21:1, 4 ngokuthi: “Ndabona izulu elitsha, nomhlaba omtsha; kuba elokuqala izulu nowokuqala umhlaba udlule, nolwandle alusekho. Azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.” Ngokuqinisekileyo, akusayi kubakho butho labantu linenkitha yemipu!
Akukho nanye kwezi nguqulelo zimangalisayo zizisa iintsikelelo kuluntu eziya kubangelwa ngabantu abanemvukelo bedubula ngemipu iqela eliphikisayo. Kunoko, ziya kuziswa nguYehova uThixo ngoBukumkani bakhe phantsi koKristu Yesu. Kungoko uIsaya 9:6, 7 esithi: “Ngokuba sizalelwe umntwana, sinikwe unyana; ukuthethela kusesixhantini sakhe; igama lakhe kuthiwa nguMmangaliso, nguMcebisi, nguThixo oligorha, nguSonini-nanini, nguMthetheli woxolo, ukuba kwande ukuthethela oko, kubekho uxolo olungenakuphela etroneni kaDavide, nasebukumkanini bakhe, ukuba bumiswe buxhaswe ngokusesikweni nangobulungisa, kususela koko kude kuse ephakadeni. Ikhwele likaYehova wemikhosi liya kukwenza oko.”