Kuza Kwenzeka Ntoni Emva Kwemihla Yokugqibela?
ABANYE abantu bayoyika bakucinga “ngemihla yokugqibela.” (2 Timoti 3:1) Baba nomfanekiso ngqondweni wamaxesha anzima. Ngoko ke, kutheni kangangeenkulungwane abantu abaninzi bebejonge phambili kule mihla yokugqibela? Kungenxa yokuba imihla yokugqibela ingumqondiso wokuba kuza amaxesha amyoli.
Ngokomzekelo, uMhlekazi Isaac Newton wayeyisekile ukuba ixesha lesiphelo lalitshayelela ixesha elitsha yaye emhlabeni kwakuza kubakho uxolo nonqabiseko ngaphantsi koLawulo Lwewaka Leminyaka loBukumkani bukaThixo. Wathi, isiprofeto esikuMika 4:3 nesikuIsaya 2:4, sasiza kuzaliseka ngelo xesha: “Ziwakhande amakrele azo abe ngamakhuba nemikhonto yazo ibe zizikere zokuthena imithi. Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.”
Xa uYesu wayethetha ngexesha lesiphelo, wabongoza abalandeli bakhe ukuba babe nesimo sengqondo esihle. Emva kokuthetha ngobunzima, ixhala noloyiko olwaluza kugqugqisa ebudeni bembandezelo enkulu, wathi: “Njengoko ezi zinto ziqala ukubakho, yimani nkqo nize niziphakamise iintloko zenu, ngenxa yokuba iyasondela intlangulo yenu.” (Luka 21:28) Yintoni le siza kuhlangulwa kuyo?
Oko UThixo Akuthembisileyo
Imfazwe, izidube-dube, ulwaphulo-mthetho, ugonyamelo nendlala zezinye zezinto ezimbalwa ezingcungcuthekisa abantu namhlanje nezibenza baphile ubomi bentshontsho. Ngaba ukhe walixhoba lezi zinto? Ngoko ke, phawula oko uThixo akuthembisayo:
“Kusele ithutyana, angabikho ongendawo; uya kuyikhangela indawo yakhe, abe engekho. . . . Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:10, 11.
“Abantu bam baya kuhlala kwindawo yokuhlala enoxolo nakwiindawo zokuhlala zentembelo epheleleyo nakwiindawo zokuphumla ezingaphazamisekiyo.”—Isaya 32:18.
“[UYehova] Uphelisa iimfazwe kuse esiphelweni somhlaba. Waphula isaphetha nomkhonto; iinqwelo uzitshisa emlilweni.”—INdumiso 46:9.
“Okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.”—Mika 4:4.
“Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.”—INdumiso 72:16.
“Yena ke ondiphulaphulayo, uya kuhlala ngonqabiseko aze angaphazamiseki ekunkwantyiseni kwentlekele.”—IMizekeliso 1:33.
Enoba ukummandla apho kutyibilikwa ebhotolweni, sonke siyagula size sife. Kwihlabathi elitsha likaThixo ukugula nokufa kuza kusitshulwa neengcambu. Sinokukhangela phambili ekuboneni izihlobo nezalamane ebezifile. Phawula oku kulandelayo:
“Akakho ummi wakhona oya kuthi: ‘Ndiyagula.’”—Isaya 33:24.
“[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.”—ISityhilelo 21:4.
“Olokugqibela utshaba oluya kutshitshiswa kukufa.”—1 Korinte 15:26.
“Liyeza ilixa ekuya kuthi ngalo bonke abo bakumangcwaba enkumbulo balive ilizwi [likaYesu] baze baphume.”—Yohane 5:28, 29.
Umpostile uPetros wakushwankathela kakuhle oku xa wabhala wathi: “Thina ke silindele amazulu amatsha nomhlaba omtsha, ngokwesithembiso sakhe, apho kumi ubulungisa.” (2 Petros 3:13) Ukuze kwesamele ubulungisa ehlabathini, kufuneka kushenxiswe nabani na oza kuphazamisana nabo. Kukwanjalo nangeentlanga ezininzi namhlanje ezingunobangela wembambano nophalazo-gazi ngenxa yokuba zifuna ukulungelwa kwazo. Izikumkani zomhlaba ziya kuthatyathelw’ indawo lulawulo loBukumkani bukaThixo. Ngokuphathelele olo lawulo, nasi isiqinisekiso: “Akayi kuyeka ukuphatha njengenkosana, noxolo aluyi kuphela etroneni kaDavide nasebukumkanini bakhe ukuze bumiselwe ngokuqinileyo nokuze buxhaswe ngokusesikweni nangobulungisa, ukususela ngoku kuse kwixesha elingenammiselo. Yona kanye inzondelelo kaYehova wemikhosi iya kukwenza oku.”—Isaya 9:7.
Usenokuzinandipha ezi ntsikelelo, kuba iBhayibhile isiqinisekisa isithi: ‘[UThixo] uthanda ukuba zonke iintlobo zabantu zisindiswe zize zifikelele elwazini oluchanileyo lwenyaniso.’ (1 Timoti 2:4) Sukuzibekela amangomso izinto. Ngenisa ulwazi oluthetha ubomi obungunaphakade. (Yohane 17:3) Qala ngokuqhagamshelana nabapapashi beli phephancwadi uze uzicelele isifundo seBhayibhile sesisa.
[Imifanekiso ekwiphepha 8, 9]
Unokukhangela phambili ekuphileni ngonaphakade kwiParadesi ezayo eza kube ilaph’ emhlabeni useluxolweni yaye ungabikwa hlaba