“Iindaba Ezilungileyo” Afuna Ukuba
Xa uYesu wayesemhlabeni abafundi bakhe beza kuye baza babuza oku: “Uya kuba yini na umqondiso wokufika kwakho, nowokupheliswa kwephakade eli?” Waphendula esithi kwakuya kubakho iimfazwe ezaziya kuhlanganisa iintlanga ezininzi, iindlala, iindyikitya zokufa, iinyikima zomhlaba, ukwanda kokuchas’ umthetho, abafundisi bonqulo ababuxoki abalahlekisa abaninzi, abalandeli bakhe bokwenyaniso bathiywe baze batshutshiswe yaye nokuthanda ubulungisa kwakuya kuphola kubantu abaninzi. Xa ezi zinto zaziya kuqalisa ukwenzeka, kwakuya kubonisa ukuba uKristu ukho ngokungabonakaliyo yaye kubonise nokuba uBukumkani bamazulu busondele. Oku kwakuya kuba ziindaba, iindaba ezilungileyo! Ngoko uYesu wongezelela la mazwi njengenxalenye yomqondiso: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”—Mateyu 24:3-14.
Iziganeko zehlabathi zakutshanje zibi, kodwa oko zikubonisayo, okukoku, ubukho bukaKristu, kuyinto entle. Ngoko ke, uYesu wathi: “Ke kaloku, zakubon’ ukuba ezi zinto ziyaqala ukuhla, sukani nime, niziphakamise iintloko zenu, ngenxa yokuba iyasondela inkululeko yenu.” (Luka 21:28) Ezi zinto zaqalisa ukwenzeka ngaloo nyaka wavakaliswa ngokubanzi, owe-1914! Waphawula ukuphela kwamaXesha Eentlanga nokuqala kwethuba lenguqulelo ukususela kulawulo lwabantu ukusa kulawulo lukaKristu lweminyaka eli-1 000.
Into yokuba kwakuza kubakho ithuba lenguqulelo iboniswa yiNdumiso ye-110, indinyana 1 neyesi-2, neSityhilelo 12:7-12. Apho kuboniswa ukuba uKristu wayeya kuhlala ngasekunene kukaThixo ezulwini de kube lithuba lokuza kwakhe kwesibini. Emva koko imfazwe ezulwini yayiya kuphumela ekuphoselweni kukaSathana emhlabeni, nto leyo eyayiya kuba nguyeha emhlabeni, ibe uKristu wayeya kulawula phakathi kweentshaba zakhe kangangethuba lesizukulwana esinye. Ukuphela ngokupheleleyo kobungendawo kwakuya kwenzeka ‘ngembandezelo enkulu,’ eyayiya kufikelela incopho yayo kwimfazwe yaseArmagedon ize ilandelwe lulawulo lukaKristu loxolo lweminyaka eli-1 000.—Mateyu 24:21, 33, 34; ISityhilelo 16:14-16.
IBhayibhile ithi, “Ke, kwazi oku, ukuba ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, abathandi bemali, abaqhankqalazi, abakratshi, abanyelisi, abangeva bazali, abangabuleliyo, abangengcwele, abangenabubele, abangenatarhu, abatyholi, abangenakuzeyisa, izibhoja, abangenakuthanda kulunga, abancethezi, izityhuthutyhuthu, abathiwe lwale likratshi, abathandi beziyolo kunokuba bathande uThixo; benokumila kokuhlonela uThixo, ukanti bayawakhanyela amandla ako. Kwabo ke khwebuka.” (2 Timoti 3:1-5) Ke, bambi basenokuma ngelithi ezi zinto bezisenzeka ngaphambili kwimbali yabantu.
Noko ke, njengoko ababhali-mbali nabagqabazi besitsho, akuzange kubekho ixesha emhlabeni elifana neli labonwa ukususela ngowe-1914 ukubhekisa phambili. Ooyeha baye banda ngakumbi kunanini na ngaphambili. Ngaphezu koko, ngokubhekisele kwezinye iinkalo ‘zomqondiso’ kaKristu wemihla yokugqibela, kumele kuqwalaselwe ezi zibakala: Ukuvakaliswa kwazwenibanzi kobukho bukaKristu noBukumkani bakhe kuye kwaba yinto enkulu ngendlel’ engenamanduleli embalini. Ukutshutshiswa ngenxa yokushumayela akuzange kufane noku kwenzeka kumaNgqina kaYehova. Amakhulu amaninzi awo abulawelwa kwiikampu zoxinaniso zikaHitler. Ukuza kuthi ga kulo mhla umsebenzi wawo uvaliwe kumazwe amaninzi, yaye kwamanye ayabanjwa, avalelwa ezintolongweni, ayathuthunjiswa aze abulawe. Konke oku kuyinxalenye ‘yomqondiso’ owanikelwa nguYesu.
Njengoko kwaxelwa kwangaphambili kwiSityhilelo 11:18, ‘iintlanga ziye zaqumbela’ amaNgqina kaYehova athembekileyo, ibe oku kubonisa ukuba “ingqumbo” kaYehova iya kubonakaliswa nxamnye nezo ntlanga. Kwaesi sibhalo sithi uThixo uya ‘kubonakalisa abo bonakalisa umhlaba.’ Akuzange ngaphambili kwimbali yabantu kubekho ixesha laxa amandla omhlaba okuzimasa ubomi aye asongelwa. Noko ke, ngoku kwahlukile! Izazinzulu ezininzi ziye zalumkisa ngokuthi ukuba umntu uyaqhubeka esonakalisa umhlaba, akuyi kwenzeka ukuba umiwe. Kodwa uYehova ‘wawubumba ukuba umiwe,’ ibe uya kubashenxisa abonakalisi bomhlaba ngaphambi kokuba bawonakalise ngokupheleleyo.—Isaya 45:18.
Iintsikelelo zasemhlabeni phantsi kobukumkani
Into yokuba abantu baza kuphila emhlabeni njengabalawulwa boBukumkani bukaThixo isenokubonakala imangalisa kwabaninzi abakholelwa eBhayibhileni abacinga ukuba bonke abasindiswayo basezulwini. IBhayibhile ibonisa ukuba linani elilinganiselweyo kuphela eliya ezulwini, ibe ibonisa ukuba abo baya kuphila ngonaphakade emhlabeni baya kuba sisihlwele esikhulu esilinani elingenamlinganiselo. (ISityhilelo 14:1-5; 7:9; INdumiso 37:11, 29) Into yokuba uBukumkani bukaThixo obuphantsi koKristu buya kuzalisa umhlaba buze buwulawule iboniswa sisiprofeto esikwincwadi yeBhayibhile kaDaniyeli.
UBukumkani bukaKristu apho bumelwa lilitye elithwetyulwa kulongamo lukaYehova olunjengentaba. Libetha lize litshabalalise umfanekiso oqingqiweyo omela iintlanga ezinamandla zomhlaba, yaye “ilitye elo, libethileyo emfanekisweni, laba yintaba enkulu, lazalisa ihlabathi lonke.” Esi siprofeto sihlabela mgama sisithi: “Ngemihla yabo kumkani, uThixo wamazulu uya kumisa ubukumkani obungayi konakala naphakade. Obo bukumkani abuyi kusala nabantu bambi; buya kuzicola buzigqibe zonke ezo zikumkani, bona bume ngonaphakade.”—Daniyeli 2:34, 35, 44.
AmaNgqina kaYehova anqwenela ukukwazisa ngobu Bukumkani nethemba elixhaswa ziZibhalo elingobomi obungunaphakade kumhlaba ocociweyo nowenziwe mhle. Amakhulu amawaka ngoku aphilayo nezigidi ezininzi ngakumbi ngoku ezisemangcwabeni ziya kuba nethuba lokuhlala apha ngonaphakade. Kuya kwandula ke, phantsi kolawulo lukaKristu Yesu lweminyaka eli-1 000, injongo yangaphambili kaYehova yokudala umhlaba nokubeka isibini sokuqala esingabantu kuwo izaliseke. Le paradisi yasemhlabeni ayinakuze ikruqule. Kanye njengokuba uAdam wayabelwe umsebenzi kuMyezo wase-Eden, ngokunjalo uluntu luya kuba nemisebenzi ecel’ umngeni yokunyamekela umhlaba nezityalo nezilwanyana ezikuwo. “Baya kunandipha umsebenzi wezandla zabo.”—Genesis 2:15; Isaya 65:22, Revised Standard Version.
Kunokuchazwa izibhalo ezininzi ukubonisa iimeko eziya kubakho xa umthandazo esawufundiswa nguYesu uphenduliwe: “Mabufike ubukumkani bakho. Makwenziwe ukuthanda kwakho nasemhlabeni, njengokuba kusenziwa emazulwini.” (Mateyu 6:10) Noko ke, kwanga esi sibhalo singakwanelisa: “Ndeva izwi elikhulu liphuma emazulwini, lisithi: Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile. Waza lowo uhleli phezu kwetrone wathi, Uyabona, izinto zonke ndizenza ntsha. Athi kum, Bhala; ngokuba lawo ngamazwi ayinyaniso, athembekileyo.”—ISityhilelo 21:3-5.
[Amagama acatshulweyo akwiphepha 15]
“Amaxesha anomngcipheko” KODWA “Iyasondela inkululeko yenu” READ: KODWA uBukumkani bukaThixo busondele