Imbono YeBhayibhile
Buqala Nini Ubomi Bomntu?
USEPTEMBA 21, 1989, wawungumhla ophawulekayo kwiNkundla yesiHlanu yeSithili seliZwana laseTennessee, eUnited States. Ngaloo mhla inkundla yesiphaluka yadlulisela oko kuyimbambano ngoya kuzithabathela iimbumba eziziimveku ezisixhenxe nezazikhenkciwe. Inkundla kwafuneka ukuba yenze isigqibo ngomzali owayeya kuzifumana njengoko babeqhawula umtshato. Noko ke, kwavela enye imbambano ekwafuneka ukuba kuzinziswe yona kuqala: Ngaba iimbumba eziziimveku ezingekazalwa zinokugqalwa njengezinto nje okanye njengabantu?
Unjingalwazi uJerome Lejeune waseParis, indoda ezenzele igama njengesazinzulu kwezemfuza wanikela ubungqina phambi kwenkundla esithi umntu ngamnye unendlela ekhethekileyo aqalisa ngayo ukuba ngumntu, nto leyo eyenzeka ngesihlandlo sokukhawulwa kwakhe waza wathi “akuba nje ekhawulwe, umntu ungumntu.” Ngamany’ amazwi, ekuqaliseni nje kokuyileka kweeseli ezintathu (inqanaba lezygote), iimbumba eziziimveku ezingekazalwa, njengokuba watshoyo kuloo nkundla, ziba “ngabantu abancinane kakhulu”!—Akekeliswe sithi.
Xa wabuzwayo enoba wayeyixhasa kusini na into yokuba iseli ekwinqanaba lezygote inokuphathwa ngendlela yamalungelo omntu omkhulu, uGqr. Lejeune waphendula wathi: “Anditsho ukuba kunjalo kuba andikho kwisikhundla sokwazi oko. Kodwa ndithi, ingumntu, ibe ke ngoko kokuSesikweni okuya kugqiba enoba lo mntu unamalungelo njengabanye. . . . Kodwa mna njengesazinzulu kwezemfuza ukuba beniyakundibuza enoba lo mntu ungumntu kusini na, bendiya kunixelela ukuba ngenxa yokuba eyinto ekhoyo naloo nto ingumntu, ungumntu ke.”
Ngokusekelwe ngokuyintloko kubungqina obungenakuphikiswa bukaGqr. Lejeune, izigqibo ezithathu nezibalaseleyo zenkundla zithi:
□ Ukususela kwixesha lokudibana kwedlozi neqanda, iiseli zembumba eyimveku engekazalwa ziyahlulwahlulwa, zikhetheke zize zizimele ukusa kwelona nqanaba liphakamileyo apho zinokwahluka ngokupheleleyo ezinye kwezinye.”
□ “Iimbumba eziziimveku aziyonto nje.”
□ “Ubomi bomntu buqalisa ekukhawulweni kwakhe.”
Ngaba oku kuyavumelana noko kuthethwa yiBhayibhile mayela nokuqalisa kobomi bomntu?
Ubomi Buqalisa Ekukhawulweni Kwabo
UYehova uThixo ‘ulithende lobomi’ yaye ‘ngaye sinobomi yaye siyashukushukuma kwaye siyaphila.’ (INdumiso 36:9; IZenzo 17:28, NW) UMdali yena uthi buqalisa nini ubomi? Ubomi bomntwana ubugqala njengobuxabisekileyo kwanakumanqanaba okukhula kwakhe kwasekuqaleni emva kokukhawulwa kwakhe. Kwiminyaka engaphezu kwengama-3 000 ngaphambi kwesigqibo esenziwa yinkundla ekhankanywe ngasentla, waphefumlela uDavide, umprofeti wakhe, ukuba abhale athi:
“Wandibiyela esizalweni sikama. Ndiyabulela kuwe ngenxa enokuba ndenziwe ngokoyikekayo, ngokubalulekileyo; zibalulekile izenzo zakho, umphefumlo wam uyazi kakuhle. Ayengagushekile kuwe amathambo am, mna ndenzelwayo entsithelweni [phakathi esibelekweni], ndalukwa ndayimfakamfele [imithambo engabonakaliyo ebuyisa nethumela igazi, etyhubela umzimba wonke okomoluko werhali eziyimibalabala zelaphu] ezinzulwini zomhlaba [ukuchaza okungokombongo iingotsi ezimnyama zesibeleko]. Amehlo akho andibona ndiseyimbumba, zazibhalwe encwadini yakho iimini zonke ziphela.”—INdumiso 139:13-16.
Ukususela kwixesha lokukhawulwa, umntu ukhula ngendlela apha echane ngokungathi uthobela imiyalelo eyandlalwe encwadini, umqulu omkhulu wencwadi. UGqr. Lejeune uthi, “Ubungakanani benkcazelo yeeseli ezikwinqanaba lezygote bebuya kuthi ukuba bebungachazwa buze bugcinwe kwikhompyutha buxelele ikhompyutha ichaze oko kuya kwenzeka ngokulandelayo, ubuninzi bale nkcazelo bukhulu ngokokude kungabikho mntu unokubulinganisa.”
Ubomi Bongekazalwa Buxabisekile
Ngaloo ndlela, imveku engekazalwa ekhula ngaphakathi esibelekweni ayiyiyo konke konke imbumba nje yesicwili. Ixabiseke kakhulu, ibe ke ngenxa yesi sizathu, uThixo uye wathi umntu uya kuphendula ngokwenzakalisa imveku engekazalwa. Umthetho wakhe kwiEksodus 21:22, 23 ulumkisa uthi: “Xa athe amadoda abambana ngezihlwitha, agila umfazi emithi, waphuma isisu, akwenzakala nto noko: makahlawuliswe ngenene umfo lowo, njengoko iya kubeka phezu kwakhe indoda yaloo mfazi, arhole ngokwelizwi labahluli. Ukuba uthe wenzakala, uze urhole umphefumlo ngomphefumlo.”
Ezinye iiBhayibhile ziguqulela ezi ndinyana zingasentla ngendlela ebonisa ukuba oko kwenzeka emfazini kuqwalaselwa kakhulu ngumthetho. Noko ke, umbhalo wantlandlolo wesiHebhere walathisela ingqalelo kwingozi ekhokelela ekufeni komama okanye umntwana.a Ngenxa yoko, ukuqhomfa okwenziwa ngabom ngenxa nje yokuba kuphetshwa ukuzalwa komntwana ongafunwayo kukubulala ngabom umntu.
Bambi abantu banokuma ngelithi imbumba eyimveku engekazalwa ayingomntu uphilayo kuba ayinakuzixhasa yakuphuma esizalweni. Yingqiqo ef’ amanqe leyo. Akukho mntu unokuyithandabuza into yokuba usana olusandul’ ukuzalwa—olunemizuzwana nje ubudala—lungumntu. Kanti, ukuba usana olo belunokubekwa phandle luze, beluya kuphila ixesha elingakanani olo sana? Luyinto nje engenakuzinceda, njengembumba eyimveku engekazalwa, alunawo amandla okuzixhasa. Usana olusandul’ ukuzalwa lufuna ikhusi, ukufudumala nokutya—inkxaso, uncedo olunokunikelwa kuphela ngumntu omkhulu, njengonina walo.
Ngoko ke, isigqibo esingokwasemthethweni esikhankanywe ngasentla siyavumelana nembono yeBhayibhile yokuba ubomi bomntu buqalisa ekukhawulweni kwakhe. Ubomi bongekazalwa asinto nje engaxabisekanga enokutshatyalaliswa ngabom njengesiphazamiso apha esingafunekiyo. Ubomi bomntu bungcwele kungekhona nje emva kokuba ephumile esibelekweni kodwa kwanaxa esengaphakathi esibelekweni.
[Umbhalo osemazantsi]
a Isibizo esithi “ukubulala ngengozi” (ʼa·sohnʹ ngesiHebhere) asidibananga nebinzana elithi ‘umfazi omithiyo’; ngaloo ndlela, ingozi ebulalayo ayipheleliselwanga kwibhinqa kodwa ngokufanelekileyo ibiya kuquka ‘nomntwana walo’ osesibelekweni.
[Inkcazelo Ngomfanekiso okwiphepha 14]
Windsor Castle, Royal Library. © 1970 Her Majesty The Queen