Olona Lwelo Luxabisekileyo Ehlabathini
Kwanokuba utofelo-gazi belunokuyekwa njengemveliso eyingozi nengeyomfuneko yorhwebo lokubawa, sekunjalo oko bekungayi kusicacisa isizathu sokuba amaNgqina kaYehova engalwamkeli. Izizathu zawo zahluke mpela kwaye zibaluleke ngakumbi. Ziziphi ezo zizathu?
KULULA gqitha ukulithabatha lula ichaphaza legazi. Liphuma kumkrwelo okanye xa ubani ehlatywe ngunotaka, kuvela nje ichaphaza elincinane elibengezelayo elibomvu krwe, yaye siyalisusa ngamanzi okanye silisule singakhange sicinge nokucinga.
Kodwa ukuba besingazinciphisa de sibe bancinane kangangokuba le ngqukuva ibe nkulu kunathi njengentaba, besiya kufumanisa enzulwini yeli chaphaza libomvu kukho umsebenzi onzima nocwangcisiweyo omele wenziwe. Kwelo chaphaza linye, kunyakazela imikhosi emikhulu yeeseli: iiseli ezibomvu zegazi ezingama-250 000-000, iiseli ezimhlophe zegazi ezingama-400 000 neeplatelets ezili-15 000 000 nazo ezikulo mikhosi. Ziqalisa ukusebenza ekuhambeni kwegazi, mkhosi ngamnye wenza umsebenzi wawo owahlukileyo.
Iiseli ezibomvu zibaleka kuthungelwano oluntsonkothileyo lwenkqubo yemithambo, zithwele ioksijini evela kwimiphunga isiya kuzo zonke iiseli ezisemzimbeni yaye zikhupha ikharbon diokside. Ezi seli zincinane kangangokuba ingqokelela yezingama-500 ibiya kuba ziisentimitha ezili-0,1 kuphela ukuphakama. Ukanti, ingqokelela yazo zonke iiseli ezibomvu ezisemzimbeni wakho ibiya kufikelela kwiikhilomitha ezingama-50 000 ukuphakama! Emva kwentsuku ezimalunga ne-120 zityhutyha umzimba kangangezihlandlo ezili-1 440 ngosuku, iseli ebomvu iyaphumla. Umbindi wayo oneetyuwa ezininzi uyaphinda uhlaziywe, inxalenye eseleyo yeeseli ezibomvu iyonakala. Mzuzwana ngamnye, iiseli ezibomvu ezizizigidi ezithathu ziyashenxiswa, ngoxa inani elikwalinye lezintsha lisakhiwa kumongo. Umzimba wazi njani ukuba iseli ebomvu ifikelele inqanaba elifanelekileyo lokuba iyeke ukusebenza? Izazinzulu zimangalisiwe. Kodwa, ngokutsho kwelinye igcisa ngemichiza, ngaphandle kwenkqubo yokuthatyathelw’ indawo kweeseli ezibomvu ezindala, “igazi lethu beliya kuqina njengesamente kwiiveki ezimbalwa.”
Ngeli thuba, iiseli ezimhlophe ziyazulazula ngocwangco, zifuna yaye zitshabalalisa izinto ezihlaselayo ezingafunekiyo. Iiplatelets ziyahlanganiswa ngokukhawuleza apho kukho inxeba zize ziqalise inkqubo yokuvala neyokuvingca loo ndawo ivulekileyo. Zonke ezi seli zisasazwa kulwelo olucacileyo, olunebala elingqombo olubizwa ngokuba sisiyilelo, sona esenziwe zizithako ezingamakhulu, uninzi lwazo olunendima ebalulekileyo ekuthwaleni uluhlu olude lwemisebenzi yegazi.
Izazinzulu ngamandla azo okucinga azikwazi ukuyiqonda yonke into eyenziwa ligazi, kungasathethwa ngokuvelisa into efana nalo. Ngaba olu lwelo luntsonkothe ngokumangalisayo, belunokuba ngumsebenzi woMyili Omkhulu? Ibe ngaba akukho ngqiqweni ukuba lo Mdali unamandla angaphezu kwawomntu abe unelungelo lokumisela imithetho ngendlela efanele isetyenziswe ngayo indalo yakhe?
AmaNgqina kaYehova ebesoloko ecinga njalo. Ayijonga iBhayibhile njengencwadi evela kuMdali wethu enokhokelo lwakhe ngendlela yokuphila obona bomi bulungileyo; yincwadi enokuthile ekuthethayo ngalo mcimbi wegazi. ILevitikus 17:14 ithi: “Umphefumlo wenyama yonke ligazi layo”—kambe ke, kungekhona ngokoqobo, ekubeni iBhayibhile ikwathi into ephilayo ngokwayo ingumphefumlo. Kunoko, ubomi bayo yonke imiphefumlo buxhomekeke ngokungamandla yaye buzinyaswa ligazi, gazi elo ngokufanelekileyo ligqalwa njengolwelo olungcwele olumela ubomi.
Kwabathile, kunzima ukuba bakuqonde oku. Siphila kwihlabathi elingakunanzanga okungcwele. Kwanobomi ngokwabo abufane buxatyiswe ngendlela ebebufanele buxatyiswe ngayo. Ngoko, alimangalisi elokuba, igazi lithengwa lize lithengiswe njengayo nayiphi na impahla yorhwebo. Kodwa abo bahlonela oko kukukuthanda koMdali abaliphathi ngaloo ndlela. Umyalelo othi ‘ungalityi igazi’ wawuvela kuThixo usiya kuNowa nakwinzala yakhe—uluntu lonke. (Genesis 9:4) Kwiinkulungwane ezisibhozo kamva wawubeka loo myalelo kuMthetho wakhe owawusiya kumaSirayeli. Kwiinkulungwane ezilishumi elinesihlanu kamva wawuqinisekisa kwakhona kwibandla lamaKristu esithi: ‘Nizikhwebule kwigazi.’—IZenzo 15:20.
AmaNgqina kaYehova anamathela ngokuyintloko kuloo mthetho ngenxa yokuba afuna ukuthobela uMdali wawo. Ngokufa okulidini koNyana wakhe amthandayo, uMdali sele elulungiselele uluntu ngegazi elisindisa ubomi. Linokubandisa ubomi kungekuphela nje ngeenyanga okanye iminyaka embalwa kodwa ngonaphakade.—Yohane 3:16; Efese 1:7.
Ngaphezu koko, ukuzikhwebula kutofelo-gazi kuye kwawakhusela amaNgqina kwiingozi ezininzi. Abantu abaninzi ngakumbi nangakumbi ngaphandle kwamaNgqina kaYehova bayakwala ukutofelwa igazi namhlanje. Ngokuthe ngcembe abezamayeza bayasabela koku yaye bayakunciphisa ukusebenzisa kwabo igazi. Kunjengokuba iSurgery Annual ikubeka ngale ndlela oku: “Ngokucacileyo, olona tofelo-gazi lukhuselekileyo lolo lunganikelwayo.” Ulindixesha iPathologist wathi amaNgqina kaYehova aye azingisa kangangethuba elide esithi utofelo-gazi asilonyango lucebisekayo. Walek’ umsundulo usenjenje: “Kukho ubungqina obuphawulekayo obuxhasa oko akuthethayo, phezu kwako nje ukuchasa kwabo basebenza kwiindawo ekugcinwa kuzo igazi.”
Ngubani obuya kukholosa ngaye? Ngaba nguLowo ulumkileyo ongumyili wegazi? Okanye ngaba ngabantu abakwenze ukuthengiswa kwegazi kwaba lushishino olukhulu?
[Imifanekiso ekwiphepha 15]
Imithambo yomntu yenkqubo yokuhamba kwegazi, inemithanjana emincinane (umfanekiso ophakathi) kangangokuba iiseli zegazi ziyanyanzeleka ukuba zihambe ngayo zikrozile