Izibhedlele—Xa Ungumguli

“Xa ndalaliswa esibhedlele okwesihlandlo sokuqala, ngequbuliso ndavakalelwa ngokungathi ndiphulukene nobomi bam, ngokungathi ndingomnye nje umntu oza kubalelwa kwabafileyo.”​—⁠UMarie G.

“Ndikhumbula isihlando sokuqala ndityelela njengomguli. Ndaziva ndibuthathaka gqitha yaye ndingakhuselekanga.”​—⁠UPaula L.

NGABA wakhe wangumguli osesibhedlele waza wavakalelwa ngenye yeendlela ezikhankanywe ngasentla? Enoba kukhe kwanjalo okanye akuzange, umele uqonde ukuba inkoliso yabantu ayizidubi nokuziduba icinga ngokuba ngumguli. Kanti, oko ngenye imini kusenokwenzeka kuwe. Ngokomzekelo, ngowe-1987, iingxelo zibonisa ukuba, umntu omnye kubemi abasixhenxe baseUnited States wayelaliswe esibhedlele. Izibalo ezinjalo ziyahlukahluka ehlabathini. Kanti, njengomntu onobulumko, ngawaphi amalungiselelo ofanele uwenze ukulungiselela olo suku?

UGqr. Sidney Wolfe, intsumpa yeQela Eliphanda Ngempilo Yabemi Bonke uthi: “Eyona ndlela ibalulekileyo nekuphela kwayo yokukhusela impilo yakho kukuqinisekisa enoba kuyimfuneko kusini na ukulaliswa esibhedlele.” Kungakhathaliseki ukuba uhlala phi na, ukuba uyagula, unelungelo kwanembopheleleko yokwaziswa izibakala ezingengxaki yempilo yakho. Ngokufuthi ugqirha wakho usenokukwazi ukukunika izicombululo ezanelisayo.

Kodwa ukuba unokuthandabuza okuthile, kunconyelwa ukuba ufumane izimvo zomntu wesibini. Kwamanye amazwe, iinkampani zeinshorensi zide zifune izimvo zomntu wesibini ngaphambi kokuba zibe ziya kuhlawulela iintlobo ezithile zotyando olukhulu. Yaye akunto ingaqhelekanga ukufuna izimvo zomntu wesithathu ukucombulula amasolotya angokuxilongwa nonyango. Ingongoma eyintloko yile: Enoba ufumene uluvo lomntu omnye okanye ababini okanye abangakumbi, umguli onobulumko uthabatha ixesha ukuze afumanise imfuneko nobulumko bokusebenzisa unyango olucetyisiweyo.

Ukulaliswa Esibhedlele Kwimeko Yongxamiseko

Kambe ke, kwimeko yongxamiseko, kusenokungabikho thuba lakufumana amacebiso awahlukahlukeneyo ezonyango. Umguli usenokuba akakho zingqondweni, akakwazi kuthetha okanye ukubhala xa esiziswa esibhedlele. Maxa wambi oogqirha bafanele bathabathe amanyathelo akhawulezileyo, kwanangaphambi kokuba kudityanwe nezalamane ukuze zivakalise oko kuyiminqweno okanye ukhetho lomguli. Iimeko ezinjalo zigxininisa indlela ekubaluleke ngayo ukucinga nokuzilungiselela kusengaphambili.a

Kumguli olelinye lamaNgqina kaYehova, oku kuthetha ukuphatha ngamaxesha onke iMedical Directive/Release Document ezaliswe ngokufanelekileyo neyelo xesha. Kweli qweqwe umguli uvakalisa iminqweno yakhe ngendlela amakanyanyekelwe ngayo yaye unikela inkcazelo ebalulekileyo ukuze abo basebenza ngezamayeza bakwazi ukuqhagamshelana nezalamane okanye abanye abayaziyo iminqweno yakhe. Ngoxa lingenakugubungela zonke iimeko ezinokwenzeka, eli qweqwe libalulekileyo ligunyaziswe ngokusemthethweni ukuba likuthethele xa wena ungakwazi kuthetha.

Kwimeko yongxamiseko, kwakhona kuluncedo ukuba umhlobo osondeleyo okanye isalamane esiqheleneyo noko ukukhethayo ngokwezamayeza noko ukholelwa kuko sinokuza esibhedlele ukuze sikuzimase. Enoba oko kunokwenzeka ngokukhawuleza, okanye akunjalo, iMedical Directive/Release Document efanelekele elo xesha kunokwenzeka ukuba ngenye imini iya kuba ngundoqo ekukuncedeni ukuze kukhuselwe amalungelo akho.

Kwanokuba umntu akangomlungiseleli wamaNgqina kaYehova obhaptiziweyo yaye akanalo eli qweqwe, usenokuzibhalela amazwi afanayo (ukuba kunokwenzeka achwethezwe). Apha kufanele kuchazwe iminqweno yakhe ngokuphathelele unyango lwezamayeza, avakalise naziphi na iingxaki zempilo anazo, yaye abonise lowo kufanele kuqhagamshelwane naye kwimeko yongxamiseko.

Ukuzalisa Iifomu Nokunye Okubhalwayo

Amalungelo abaguli ahluka ngokubanzi ukutyhubela ihlabathi. (Bona ibhokisi, iphepha 7.) Kumazwe athile la malungelo aye andiswa ngokumangalisayo kwiminyaka yakutshanje; ugqirha akanalungelo lokunikela naluphi na unyango ngaphandle kwemvume yomguli, ngokuqhelekileyo ebhalwe phantsi. Esi sesinye isizathu esibangela ukuba izibhedlele zibe neefomu zazo ekufunwa wena uzityobele. Ukuba oku kunjalo apho uhlala khona, oku kulandelayo kufanele kube luncedo.

Ufanele uzifundisise kakuhle zonke ezi fomu ngaphambi kokuba uzityobele kuba utyobelo lwakho luthetha ukuba uyakuvuma kwaye uyakwamkela nakuphi na okuthethwa kule fomu. Musa ukuvumela nabani na ukuba akwenze utyobele ifomu yokwamkelwa ngokungxama, okanye ifomu yokuvuma unyango, ungakhange uyifundisise kakuhle. Ukuba akuvumelani necandelo elithile kwifomu eqhelekileyo, yihlabe loo ndawo. Enoba uthile akavumelani nawe esithi le yifomu yesibhedlele yaye ayinakuguqulwa, sekunjalo isisivumelwano esingokwasemthethweni, yaye akunakunyanzelelwa ukuba utyobele nantoni na ongavumelaniyo nayo. Nangona ungafuni ukubonakala njengomntu ongekho ngqiqweni, kubalulekile ukuba ungalalanisi kulo mcimbi​—⁠unelungelo lokungalamkeli naliphi na icandelo lale fomu.

Ingakumbi ngokuphathelele ukuvuma ukutyandwa okanye nakuphi na ukusetyenziswa kwegazi, hlolisisa ngenyameko zonke iziqendu. Wambi amaNgqina kaYehova aye othuswa koko akufumene kwiifomu zesibhedlele ekubonakala ngathi zilungiselelwe wona ngokukhethekileyo. Nangona ekuqaleni isithi iya kuhlonelwa iminqweno yomguli mayela negazi, isiqendu samva sasithetha into enjengale, ‘Kwimeko yongxamiseko okanye ukuba ugqirha uvakalelwa kukuba oku kuyimfuneko, unelungelo lokulitofela igazi.’ Ngaphezu koko, ekubeni iLizwi likaThixo liwayalela amaKristu ukuba azinxweme kwigazi, kuyinto efanelekileyo ukubhala uthi “Ninganditofeli Igazi” kuwo onke amaphepha aziswa kuwe. (IZenzo 15:28, 29) Oko kuya kukwenza ukuma kwakho kucace kubo bonke abasebenzi. Isibakala sikukuba, inani elandayo labaguli alilamkeli igazi kuba lifuna ukuphepha ingozi yokwasulelwa sisifo sokudumba kwesibindi, uGawulayo, okanye ezinye izifo eziyingozi.b

Kwamanye amazwe abaguli banamalungelo ambalwa kunalawo akhankanywe ngasentla. Kukho imimandla apho ugqirha engumthetho ngokwakhe, yaye phantse ukuba abaguli bagqalwa njengabo baxhomekeke kuye ngokupheleleyo. Omnye ugqirha osuka kwilizwe lasentshona watyelela ilizwe elithile laseAfrika waza wathi: “Andizange ndaneliseke yindlela oogqirha nabaguli abasebenzisana ngayo . . . Abaguli bona babengathethi kwaphela de kuthethwe nabo. Babengabuzi nto koogqirha babo.” Nangona isiko elinjalo linokwenza izinto zibe nzima ngakumbi ngomguli, sekunjalo umKristu olumkileyo​—⁠uya kuthi ngentlonelo kodwa eqinile⁠—​agxininise kwelokuba afanele ahlonelwe amalungelo akhe okulawula oko kwenziwa emzimbeni wakhe yaye ufanele abe nenxaxheba kwingxubusho echaphazela impilo yakhe.

Ukuthetha Nabasebenzi Bezamayeza

Ugqirha wakho ufanele abe ngoyena mmeli wakho uyintloko nomntu ofumana kuye inkcazelo; ngenxa yoko, okuninzi kusenokuxhomekeka kwinyameko obenayo ekukhetheni ugqirha. Omnye umbhali uthi: “Qonda ukuba oogqirha bayafana nje nabantu bonke. Baneempawu zabo ezintle nezimbi inkoliso yethu enazo. Inkoliso yoogqirha izama ukwenza konke okusemandleni abo ukunceda abaguli ababanyangayo, kodwa bambi bangenwe ngumkhwa wokucinga ukuba banelungelo lokukwenzela izigqibo. Ukuba inkolelo okanye ubuntu bukagqirha buyangqubana nobakho, khangela omnye ugqirha.”

Zama ukuba imibuzo yakho iphendulwe ngokupheleleyo yaye ngokwanelisayo ngaphambi kokuba wamkele naluphi na unyango. (Bona ibhokisi, iphepha 8.) Ukuba kukho okuthile ongakuqondiyo, musa ukuziva uneentloni ukukuthetha oko. Cela ukuba inkcazelo ibe yelula, yaye ingabi yontetho esetyenziswa kwezonyango. Kwakhona bekuya kuba bubuchule ukuba ngesihlandlo esithile ebudeni bencoko yakho nogqirha, uvakalise uxabiso olunyanisekileyo ngokuyiqonda kwakhe imeko yakho esekelwe kwiinkolelo ezingokonqulo.

Zama ukwakha ubuhlobo nabo basebenza esibhedlele nabasebenzisana nawe, njengabongikazi, kuba banokuba nendima enkulu yaye bafanele babe nayo ekukunyamekeleni nakwindlela ochacha ngayo. Xa bekuzisela amayeza okanye inalithi, qinisekisa ukuba oku ngenene kokwakho. Eli likhondo lobulumko, kuba phezu kwako nje ukuba beneenjongo ezintle, bayazenza iimpazamo.

Kunokwenzeka ukuba abasebenzi basesibhedlele babonakale bexakeke gqitha, kodwa khumbula ukuba inkoliso yabo ikhethe olu hlobo lomsebenzi kuba inenyameko ngabantu yaye ifuna ukunceda ngokunyanisekileyo. Unokuba usebenzisana nabo ukuba uzama ukuzivakalisa iimfuno okanye oko kukuxhalabisayo ngendlela ecacileyo. Akukho mongikazi (okanye nabani na ongomnye kubasebenzi) onelungelo lokuthetha nawe ngqwabalala, njengokuthi: “Uya kufa ukuba akulwamkeli olu nyango.” Yixele nayiphi na intetho ekrwada enjalo kubaphathi besibhedlele kuquka nakwizalamane zakho okanye kumlungiseleli wakho; basenokuba bakwimeko entle yokukuthethela.

Kuthekani Ukuba Kuphakama Ingxaki?

Kuye kwakho amaxesha xa, phezu kwako nje ukusebenzisa kwabo zonke ezi ngongoma, abaguli bazifumanise bengquzulana ngokunzulu nabo bakwezamayeza. Nangona oko kunqabile, yintoni ofanele uyenze ukuba ngequbuliso uzifumanisa ukwimeko enjalo?

Okukuqala, musa ukuphakuzela. Ngokuqhelekileyo eli lixesha elinzima kubo bonke ababandakanyekileyo, njengoko iimvakalelo zabo zinyuka. Ngoko ukuhlala kwakho uzolile, usebenzisa ingqiqo, uze ube ngobonakalisa intlonelo kuya kuba luncedo olukhulu. Okwesibini, cinga uze ufune ukuqonda ngayo yonke imithombo ekhoyo yoncedo. Esi sibhedlele sisenokuba nommeli wabaguli osenokubonana naye uze ufune uncedo kuye.

AmaNgqina kaYehova ayaqiniseka ukuba aqhagamshelana nabadala bebandla labo. La madoda angabacebisi abanobulumko nabanamava akwanokunceda ukuba ufumane enye indawo eza kusebenzisana nawe kakuhle ukuba imeko imbi gqitha kangangokuba kufuneke ukuba uye kwesinye isibhedlele.c Kwakhona amaKristu okwenyaniso awalibali ukukholosa ngamandla kaYehova uThixo. Kwiimeko ezinzima ngokufuthi akufane kufumaneke isicombululo esinye nesipheleleyo, yaye ngokwamandla ethu obuqu, sisenokungazi ukuba sibhenele kubani na. Abaninzi baye bafumanisa ukuba xa kwenziwe konke okusemandleni omntu, ukuguqukela kuThixo ngomthandazo kuye kwaphumela kungekuphela nje ekufumaneni intuthuzelo kodwa kwakhona kwizicombululo ezingalindelekanga.​—⁠1 Korinte 10:13; Filipi 4:​6, 7.

Sinethemba lokuba, akusayi kufumana naziphi na kwezi ngxaki, kodwa kuhle ukuceba kusengaphambili. Kwakhona khumbula ukuba kulindelwe okuthile kuwe ngoxa uhlala esibhedlele. Isibhedlele siyindawo entle yokubonakalisa iimpawu zobuKristu ezinjengomonde, ukuba nombulelo ngobubele obubonakalisiweyo, yaye ingakumbi umbulelo kwabo bakuncedayo. Ileta nje emfutshane oya kuyithumela kamva kubasebenzi basesibhedlele, okanye ukubapha isipho nje esincinane esibonakalisa uxabiso, kuba nemiphumo ehlala ihleli. Ukuhlala kwakho esibhedlele kunokukuvulela ithuba lokunikela ubungqina ngehambo yakho engumzekelo, ngaloo ndlela ufak’ isandla kwigama elihle amaKristu analo njengabaguli.​—⁠1 Petros 2:⁠12.

[Imibhalo esemazantsi]

[Ibhokisi ekwiphepha 5]

Ukuba Kunokwenzeka Ukuba Ube Ngumguli Olele Esibhedlele

Nalu Uludwe Lwezinto Ofanele Uziqwalasele:

□ 1. Phatha iMedical Directive/Release Document efanele elo xesha okanye iphepha elinamazwi avakalisa iminqweno yakho nelityobelweyo.

□ 2. Yiba nenyameko ekukhetheni ugqirha.

□ 3. Qinisekisa enoba kuyimfuneko kusini na ukulaliswa esibhedlele.

□ 4. Zifunde uze uzizalise ngenyameko iifomu zolwamkelo. Ukuba ungomnye wamaNgqina kaYehova, kwangoko zazise ukuba ungomnye wawo.

□ 5. Phatha izinto ezimbalwa kangangoko kunokwenzeka, ezinjengegawuni, izinto zokuhlamba nento yokufunda.

□ 6. Zishiye ekhaya naziphi na izinto zamatye anqabileyo, inkoliso yezinto zombane, nemali eninzi.

[Ibhokisi ekwiphepha 7]

Uxwebhu Lwamalungelo Omguli

Xa umguli engena esibhedlele, akamele oyikiswe yinkqubo yalapho aze acinge ukuba akabalulekanga. Unamalungelo inkoliso yezibhedlele nabasebenzi bazo abakuvuyelayo ukuwahlonela. Amalungelo alandelayo aye ahlanganiswa yaye asekelwe kuludwe lwamalungelo alishumi akwincwadi ethi How to Stay Out Of the Hospital, nguLila L. Anastas, R.N.d

Umguli unelungelo:

1. Lokunyanyekelwa ngolwazelelelo nangentlonelo ngabasebenzi abanobuchule.

2. Lokufumana kugqirha wakhe inkcazelo epheleleyo nesexesheni ngokuphathelele ukuxilongwa kwakhe, unyango nengxaki enokubangelwa sisifo anaso ngamazwi anokuwaqonda umguli.

3. Lokufumana kugqirha wakhe inkcazelo efunekayo yokuba akuvume ekwazi oko kuza kuqhubeka kuye ngaphambi kokuba kuqaliswe nantoni na kuquka nokuba lunyango. Apho kukho khona ezinye iindlela zonyango eziluncedo, umguli unelungelo lokufumana inkcazelo enjalo.

4. Lokungalwamkeli unyango kangangoko umthetho ukuvumela oko.

5. Lokuba kugqalwe inkqubo yakhe engokonyango njengomcimbi wobuqu.

6. Lokulindela ukuba zonke izinto ezithethiweyo neengxelo zakhe eziphathelele ukunyanyekelwa kwakhe ziya kugcinwa ziyimfihlo.

7. Lokulindela ukuba, kangangoko isibhedlele sikwazi, simele sisabele ngokusengqiqweni kwisicelo somguli sokwenzelwa okuthile okanye sokudluliselwa kwesinye isibhedlele xa oko kuvumelekile ngokwezonyango.

8. Lokufumana inkcazelo enokuthanani nokunyanyekelwa kwakhe engentsebenziswano phakathi kwesibhedlele eso nezinye iindawo ezinyamekela impilo kunye namaziko ezemfundo.

9. Lokuxelelwa enoba isibhedlele siceba ukwenza kuye ulingelo oluchaphazela ukunyanyekelwa okanye unyango lwakhe.

10. Lokulindela ukuba unokunyanyekelwa kangangexesha elithile elisengqiqweni aze axelelwe kusengaphambili ngoogqirha abafumanekayo nendawo abafumaneka kuyo.

[Umbhalo osemazantsi]

[Ibhokisi ekwiphepha 8]

Ukukhuselwa Nokuba Nenxaxheba Komguli

“Kanye njengokuba kungekho mntu omangalelwayo ofanele aye enkundleni engenagqwetha, ngoko akukho mguli ufanele angene kwisibhedlele esikwizixeko ezikhulu engahambi nelungu lentsapho okanye umhlobo osondeleyo olungele ukulondoloza amalungelo omguli nokumthethela xa kukho imfuneko yoko.”​—⁠UJune Bingham, kwiThe Washington Post, ka-Agasti 12, 1990.

“Ukutyhubela iinkulungwane uluvo lokuba umguli abe nenxaxheba ekwenzeni izigqibo kwimibandela yezonyango baye abacinga kwaukucinga ngalo oogqirha. Yaye abaguli baye bafunda ngamava abuhlungu okuba ngokubuza imibuzo emininzi egocagocayo basenokwenza ukuba sibacaphukele, ekubeni sisoloko singayithandi imibuzo enjalo.

“Kanti, uluvo lokuba siyakwazi oko kuzizilangazelelo zabaguli bethu yaye ngenxa yoko sinokwenza oko bakufunayo ngaphandle kokubuza, kububuxoki obuphindaphindeneyo kangangokuba umntu unokusuka nje amangaliswe yindlela oluye lwathethelelwa ngayo olu luvo. . . .

“Sinokungavumelani nabaguli, side sixambulisane nabo, side sibakhohlise, kodwa sifanele sikwenze konke oku sinomoya wokubanyamekela. Ekugqibeleni simele sikuhlonele oko kufunwa ngumguli kuthi noko angakufuniyo.”​—⁠UGqr. Jay Katz, ugqirha wezigulo zengqondo, unjingalwazi kwiYunivesithi yaseYale, kwiThe Medical Post, yaseKhanada.

“Abaguli abazontsana yaye oogqirha abangobazali. . . . Enyanisweni, ibonakala ingaqhelekanga into yokuba kufuneke ukhumbuze abo bakwizifundo zobugqirha, ndawonye noogqirha, ukuba abaguli basenokungavumelani noko kulindelwe ngoogqirha . . . bafuna ukuthenjwa yaye nabo bazithembe, bafuna ukuvunyelwa ukuba bazimele yaye abafuni ukuba inkululeko yabo ixhatshazwe, bafuna kuthethwe nabo yaye bafuna ukuphulaphulwa, bafuna ukuphathwa njengabantu abalingana nathi yaye abafuni kulawulwa, bafuna ukuba indlela yabo yokuphila ixatyiswe, yaye bafuna ukuvunyelwa ukuba babuphile ubomi babo ngeendlela ezifunwa ngabo.”​—⁠IThe Silent World of Doctor and Patient, nguGqr. Jay Katz.

“Umsebenzi uqala xa sihlangana nomguli. Ukuqhagamshelana nabaguli abanokuba zizigidi ezine yonke imihla kunika oogqirha baseMerika ithuba lokubonakalisa kungekuphela nje ubuchule bethu, kodwa kwakhona uvelwano lwethu olunzulu, inyameko yethu nokuzinikela kwethu kumguli ngamnye esisebenzisana naye.” ​—⁠UJames E. Davis, UGqirha, umongameli woMbutho Wezamayeza waseMerika.