Mlawule Umabonwakude Ngaphambi Kokuba Akulawule
UMABONWAKUDE unamandla angummangaliso. Xa umzi-mveliso kamabonwakude waseMerika wawuphembelela amazwe asakhasayo ekubeni athenge umabonwakude, wabonisa indlela ekuyingenelo ngayo ukuba nomabonwakude. Onke amazwe ayeya kuguqukela ekubeni ngamagumbi okufundela, kwaneyona mimandla ikwanti yayilungiselelwe iinkqubo zemfundo ngemixholo ebaluleke kangako njengobugcisa kwezolimo, ekukhuselweni komhlaba nocwangciso-ntsapho. Abantwana bebengafunda inzululwazi ngezinto zemvelo ezingaphiliyo nolwazi ngemichiza baze bangenelwe ekuzuzeni ulwazi ngendlela abanye abantu abaphila ngayo nabo bazise ngeyabo.
Kambe ke, loo mibono yaphelela emoyeni ngendlela engathethekiyo emva kobukho bokwenene bukamabonwakude ongumrhwebi—kodwa kungekhona ngokupheleleyo. KwanoNewton Minow, usihlalo weZiko Lonxibelelwano Lwamazwe AseMerika owambiza umabonwakude ngokuthi “lilizwe elikhulu elingumqwebedu,” kwintetho yakhe ngonyaka okwamnye wowe-1961 wathi umabonwakude uye waphumeza okukhulu nezinto ezonwabisayo ezibangela uvuyo nto leyo emzisela udumo.
Ngokuqinisekileyo oko kusenjalo nanamhlanje. Iindaba ezivela kumabonwakude zisigcina sinolwazi ngeziganeko zehlabathi. Iinkqubo ezingezinto zendalo zikamabonwakude zisinika umbono othile wezinto ebesingenakuze sizibone: ubuchule obukhethekileyo bohlobo oluthile lwenkonjane eboniswa indanda, ibonakala ngokunga iyadada emoyeni; okanye umngqungqo ongaqhelekanga weentyatyambo ngoxa kuthatyathwa umfanekiso ogubungela ixesha elithile, ziphuma emhlabeni zinebala eliqaqambileyo. Kwandula ke kubekho iziganeko ezizezempucuko, ezinjengomngqungqo weballet, umculo wesimfoni nomdlalo womculo. Kukwakho nemidlalo, imifanekiso eshukumayo nezinye iinkqubo—zimbi zinzulu yaye zivul’ ingqondo, ezinye zezokusihlaziya nje okuhle.
Kukho iinkqubo ezingemfundo ezilungiselelwe abantwana. IZiko Lesizwe Lezigulo Zengqondo linikela ingxelo yokuba kanye njengokuba abantwana benokufunda ukukhohlakala kugonyamelo olubonakala kumabonwakude, bakwanokufunda ukungazingci, ukuba nobuhlobo nokuzeyisa kwimizekelo emihle abayibona kumabonwakude. Iinkqubo ezingendlela onokusabela ngayo kwiimeko zongxamiseko zide zasindisa ubomi babantwana. Ngaloo ndlela, uVance Packard ubhala oku kwiOur Endangered Children: “Abazali abacaphukileyo okanye abacatshukelwayo abafihla oomabonwakude babo ezikhabhathini babonakala bezingena ngeenyawo ezinodaka izinto, ngaphandle kokuba bakwimeko yokungakwazi ukulawula abantwana babo.”
Ukukwazi Ukuzilawula
Ngokucacileyo, enoba sithetha ngabantu abakhulileyo okanye abantwana, ekuphela kwento eyintloko kukuzilawula. Ngaba siyamlawula umabonwakude, okanye ngaba umabonwakude uyasilawula? Njengokuba uMnu. Packard ecebisa, kwabanye ekuphela kwendlela yokulawula umabonwakude kukumsusa emehlweni. Kodwa abanye abaninzi baye bafumana iindlela zokumlawula umabonwakude ngoxa besasebenzisa izinto eziluncedo ezifumaneka kuye. La alandelayo ngamacebiso athile.
✔ Kangangeveki enye okanye ezimbini, bhala phantsi ngenyameko ixesha intsapho yakho eye yambukela ngalo umabonwakude. Zidibanise ezi yure ekupheleni kwelo xesha uze uzibuze enoba umabonwakude ulifanele na ixesha olithabathayo.
✔ Bukela iinkqubo zikamabonwakude—kungekhona nje umabonwakude. Khangela uludwe lweenkqubo zikamabonwakude ukuze ubone enoba kukho nayiphi na into ekuyingenelo ukuyibukela.
✔ Gcina uze ubekel’ ecaleni amaxesha okulungiselela incoko nawokuba intsapho ibe kunye.
✔ Zimbi iingcali zilumkisa ngelithi abantwana okanye abaselula abakwishumi elivisayo mabangabi nomabonwakude kumagumbi abo okulala. Abazali basenokukufumanisa kunzima ngakumbi ukubek’ iliso koko kubukelwa ngumntwana.
✔ IVCR (ivideocassette erekhodayo), ukuba ungakwazi ukuba nayo, isenokuba luncedo. Ngokuqesha iiteyiphu zevideo ezifanelekileyo okanye ngokuteyipa iinkqubo eziyingenelo nangokuzibukela xa ithuba livuma, unokusebenzisa iVCR ukulawula oko kuqhubeka kumabonwakude wakho—naxa umabonwakude wakho evuliwe. Noko ke, nasi isilumkiso. Xa ingalawulwa, iVCR isenokwandisa nje ixesha elichithwa kubukelwe umabonwakude okanye isenokuvulela ithuba lokubuke-lwa kweeteyiphu zevideo ezibonisa ukuziphatha okubi.
Ngubani Okufundisayo?
Umntu phantse abe ufunda ngalo lonke ixesha. Iingqondo zethu zisoloko zingenisa inkcazelo ethile, zithumela ebuchotsheni bethu iinkcazelo ezininzi ezincinane ezili-100 000 000 mzuzwana ngamnye. Ukusa kumlinganiselo othile sinokukuphembelela oko ngokugqiba ngoko siya kuzondla ngako iingqondo zethu. Njengokuba ibali likamabonwakude libonisa ngokucacileyo, ingqondo nomoya womntu zisenokungcoliswa koko sikubukelayo ngokulula njengokuba umzimba usenokungcoliswa koko sikutyayo okanye sikuselayo.
Siya kufunda njani ngehlabathi elisingqongileyo? Yiyiphi imithombo yenkcazelo esiya kuyikhetha? Ngubani okanye yintoni eya kusifundisa? Amazwi kaYesu Kristu anikela imbono enzulu ngokuphathelele oku: “Akukho mfundi mkhulu kunomfundisi wakhe; ke wonke olungiswe kwaphela, uya kuba njengomfundisi wakhe.” (Luka 6:40) Ukuba sichitha ixesha elininzi gqitha sinomabonwakude njengosifundisayo sisenokuqalisa ukumxelisa—sisebenzisa imilinganiselo ayibonisayo. Kunjengokuba IMizekeliso 13:20 ikubeka oku ngale ndlela: “Ohamba nezilumko uba sisilumko naye; ke olikholwane lesidenge uya konakaliswa.”
Kwanaxa umabonwakude engazisi abadlali abazizidenge okanye abaziphethe kakubi emakhayeni ethu, kusekho okuthile okubalulekileyo angenako. Kuncinane gqitha koko kubonakala kumabonwakude okuqalisa kwaukuqalisa ukuchaza intswelo eqhelekileyo kuye wonke umntu: intswelo yokomoya. Umabonwakude usenokuba ngolunge gqitha ekuboniseni ingxaki embi nelusizi elikuyo eli hlabathi, kodwa wenza ntoni ekusixeleleni isizathu sokuba umntu ebonakala engenakuzilawula? Usenokuba ngofanelekileyo ekusiboniseni ubuhle bendalo, kodwa wenza ntoni ekusisondezeni kuMdali wethu? Usenokusisa kwiimbombo ezine zomhlaba, kodwa ngaba unokusixelela enoba umntu uya kuze ahlale apho eseluxolweni?
Akukho “mthombo weendaba ophambili unokuba ngopheleleyo ehlabathini” ngaphandle kokuphendula imibuzo engokomoya ebaluleke kangako. Oku koko ngokuyintloko kwenza ukuba iBhayibhile ixabiseke kangaka. “Ingumthombo weendaba ophambili ehlabathini” ngokwembono yoMdali wethu. Yenzelwa ukusinceda siqonde injongo yethu ebomini nokusinika ithemba eliqinileyo ngekamva. Iimpendulo ezanelisayo kwimibuzo ekhathaza ngeyona ndlela sele zifumaneka. Zilinde apho ukuba zifundwe kumaphepha eBhayibhile anomtsalane ongapheliyo.
Kodwa ukuba asimlawuli umabonwakude, siya kulifumana phi ixesha?