Ukulawula Indlela Owubukela Ngayo

“UKUBA uvuliwe umabonwakude, sibukela nokuba yintoni eboniswayo, enye emva kwenye, asiwucimi de siye kulala,” utsho njalo uClaudine. Abanye bathi: “Andikwazi ukususa amehlo am kuye, de ndiye kulala.” Abanye bathi “Andiyithandi indlela endiwubukela ngayo umabonwakude, kodwa andikwazi ukuwuyeka.” Ngaba ubukela umabonwakude ngokugqithiseleyo? Ngaba uyixhalabele indlela ayichaphazela ngayo intsapho yakho? Nanga amanye amacebiso anokukunceda ulawule indlela obukela ngayo umabonwakude.

1. FUMANISA IXESHA OLICHITHA UBUKELE. IMizekeliso 14:15 ithi: “Onobuqili uyawaqwalasela amanyathelo akhe.” Kububulumko ukuqwalasela ixesha olichitha ubukele umabonwakude uze ukhangele ukuba akunakwenziwa uhlengahlengiso oluthile kusini na. Gcina ingxelo yeveki okanye bhala phantsi ixesha olichithe ubukele umabonwakude. Usenokuthanda ukubhala iinkqubo ozibukeleyo, oko ukufunde kuzo nendlela oye wakuvuyela ngayo ukubukela ezo nkqubo. Eyona nto uyifunayo kukubala ixesha ujonge umabonwakude. Usenokubamb’ ongezantsi ngoko uya kukufumanisa. Xa usazi ixesha olichitha ujonge umabonwakude ebomini bakho usenokufuna ukwenza iinguqu.

2. NCIPHISA IXESHA OLICHITHA UBUKELE. Khawuzame ukuwuyeka umabonwakude usuku lube lunye, iveki okanye inyanga yonke. Okunye onokukwenza kukubeka imiqathango ngexesha olichitha ubukele suku ngalunye. Ukuba unciphisa elo xesha ngemizuzu engama-30 ngosuku, uya kuba ufumene iiyure ezili-15 ngenyanga. Sebenzisa elo xesha ekwenzeni into eyinzuzo, njengokwenza izinto zobuthixo, ukufunda incwadi okanye uchithe ixesha nabahlobo okanye nentsapho yakho. Uhlolisiso lubonisa ukuba abantu ababukela umabonwakude ngamaxesha athile bawunandipha kakhulu kunabantu abawubukela ngokugqithiseleyo.

Enye indlela yokunciphisa ixesha olichitha ubukele umabonwakude kukuba ungabikho kwigumbi lokulala. Abantwana abanomabonwakude kumagumbi abo okulala bachitha malunga neyure enesiqingatha engakumbi bebukele kunabantwana abangenawo. Ukongezelela, xa umabonwakude ekwigumbi lomntwana, abazali abazazi izinto ezibukelwa nguloo mntwana. Abazali nabantu abatshatileyo nabo baya kufumanisa ukuba banexesha elongezelelekileyo abanokulichitha kunye ukuba akakho umabonwakude kwigumbi labo lokulala. Abanye bakhetha ukungabi naye umabonwakude emakhayeni abo.

3. ZIKHETHE IINKQUBO OZIBUKELAYO. Zikho iinkqubo ezifanelekileyo ubani anokuzibukela. Kunokubhadula kuzo zonke izitishi zikamabonwakude okanye ukubukela nokuba yintoni ekhoyo, jonga oko kuza kuboniswa emaphepheni kusengaphambili uze ukhethe oko ufuna ukukubukela. Bukela kuphela xa kudlala loo nkqubo uyifunayo emva koko wucime. Mhlawumbi onokukwenza kukurekhoda loo nkqubo uyifunayo, uze uyibukele ngelinye ixesha. Oko kuya kukwenza ukwazi ukubukela ngexesha elikufaneleyo uze ukwazi ukuzidlulisa ngokukhawuleza iintengiso.

4. KHETHA KAKUHLE. IBhayibhile yaprofeta ukuba kwixesha esiphila kulo abantu “baya kuba ngabazithandayo, abathandi bemali, abazidlayo, abanekratshi, abanyelisi, abangathobeli bazali, abangenambulelo, abanganyanisekanga, abangenawo umsa wemvelo, abangayifuni kwaphela imvisiswano, abanyelisi, abangenakuzeyisa, iindlobongela, abangathandi kulunga, abangcatshi, abaneentloko ezilukhuni, abakhukhumele likratshi, abathandi beziyolo kunokuba bathande uThixo.” Kusenokwenzeka uyazi ukuba abadlali abaphambili kumabonwakude banjalo. IBhayibhile ibongoza isithi, “zikhwebule kwabanjalo.” (2 Timoti 3:1-5) Isilumkisa ngolu hlobo iBhayibhile: “Ningalahlekiswa. Unxulumano olubi lonakalisa imikhwa elungileyo.”—1 Korinte 15:33.

Ukukhetha kakuhle oko sikubukelayo kuquka ukuzeyisa. Ngaba wakha wabukela ifilimu okanye umdlalo othile weqonga imizuzu embalwa nakuba usazi ukuba kuyinto engafanelekanga ukuba uyibukele, kodwa wabukela yonke loo filimu kuba ufuna ukwazi ukuba kuza kwenzeka ntoni? Baninzi abakhe bakwenza oko? Noko ke, ukuba unawo amandla okucima umabonwakude, unokwenza okungaphezu kunoko, unokufumanisa ukuba akukukhathalele kangako oko kuboniswayo.

Kude kudala ngaphambi kokuba kwenziwe oomabonwakude, umdumisi wabhala wathi: “Andiyi kubeka nantoni na yobutshijolo phambi kwamehlo am.” (INdumiso 101:3) Lusukelo oluhle olo esinokuzibekela lona xa sifuna ukukhetha oko siza kukubukela. Abanye abanjengoClaudine, baye bagqiba ekubeni bangabi nawo umabonwakude. Uthi: “Ndandingayazi indlela umabonwakude oye wandenza ndabuthuntu ngayo. Xa ngoku ndifumana ithuba lokubukela umabonwakude, ziyandothusa izinto endandizijonga njengeziqhelekileyo. Ndandicinga ukuba ndizikhetha kakuhle iinkqubo endizibukelayo, kodwa ndabona ukuba kwakungenjalo. Xa ndibukela izinto ezifanelekileyo, zindonwabisa kakhulu.”

[Umfanekiso okwiphepha 8]

Bhala phantsi ixesha olichitha ubukele umabonwakude

[Umfanekiso okwiphepha 8]

Xa uyeka ukubukela umabonwakude yenza izinto eziyinzuzo ngelo xesha

[Umfanekiso okwiphepha 9]

Ungaphozisi maseko ekucimeni umabonwakude!