Amandla Okuhleba
UKUZIBULALA kwebhinqa eliselula kwabakhwankqisa abemi bedolophu ethile ezolileyo yaseNgilane. Eyona nto yabothusa ngakumbi yaba sisigqibo sesazi ngezomthetho esasisenza uphando ngokufa kwalo: ‘Labulawa yintlebendwane nje engenamsebenzi!’ Kucacile ukuba, igama, udumo yaye ekugqibeleni nobomi beli bhinqa liselula bonakaliswa yintlebendwane nje engenamsebenzi eyathi yaba ngundaba-mlonyeni kuloo dolophu.—IRumor and Gossip—The Social Psychology of Hearsay, nguRalph L. Rosnow noGary Alan Fine.
Nangona kunqabile ukuba imiphumo ibe yebulalayo, phantse libe alithandabuzeki elokuba ukuhleba kunamandla kakhulu. Kwelinye icala, kunokuthiwa yindlela eqhelekileyo yokuphakelana ngenkcazelo ebalulekileyo. Kanti kwakhona, kunokugqalwa njengonobangela wokungazinzi kukarhulumente, ukuwohloka kweentsapho, ukuphelelwa kwabantu yimisebenzi.
Ukuhleba kuye kwabekw’ ityala njengonobangela wokuphuthelwa kwabantu, ukuba nentliziyo ebuhlungu nokuqunjelwa. Ibe alithandabuzeki elokuba nawe kwakhe ngathuba lithile kwakungcungcuthekisa. Enyanisweni, umbhali uWilliam M. Jones ulumkisa ngelithi kwezoshishino, “umele uyamkele into yokuba ebudeni bomsebenzi wakho uthile uza kuzama ukonakalisa udumo lwakho.”
Phantse kuyo yonk’ indawo abantu abafuni nokuva ngokuhleba okwenzakalisayo. KumaIndiya angamaSeminole aseUnited States, “ukudl’ izithende abanye” kubotshwa ngabande linye nokuxoka nobusela. Kwenye ilali yaseNtshona Afrika, ooThoba-sikutyele babezichanaba engozini yokunqunyulwa imilebe okanye, okubi nangakumbi, babezichanaba ekubulaweni! Eneneni, ukutyhubela imbali, kuye kwathatyathwa amanyathelo okuthintela ukuhleba.
Ebudeni benkulungwane ye-15 neye-18, eNgilani, eJamani, yaye kamva, naseUnited States kwakusetyenziswa kakhulu isitulo sokuntywilisela emanzini kuzanywa ukuthibaza amapholopholo ukuba ahlukane nencoko yawo eyenzakalisayo. Umntu ofunyenwe enetyala lokuhleba wayebotshelelwa kwesi situlo aze antywiliselwe emanzini ngokuphindaphindiweyo.
Ngoxa isitulo sokuntywilisela, iintambo nezitokisi zingasasetyenziswa, idabi lokulwa nokuhleba lisaqhubeka nakumaxesha anamhlanje. Ngokomzekelo, ebudeni beminyaka yee-1960 eUnited States kwamiselwa amaziko ekwakusithiwa ngawokulawula amarhe ukuze ajamelane namarhe awayesenokuba yingozi kwimicimbi karhulumente. Kwakukho amaziko afanayo eMntla Ireland naseNgilani. Kude kwaqingqwa nemithetho yokuthintela ukuhleba okunokubangela umonakalo kwezoqoqosho kumaziko athile asebenza ngemali.
Phezu kwayo nje imigudu enjalo, ukuhleba kusekho. Kuyaqhubeka yaye kunwenwa okomlilo wedobo. Ukuza kuthi ga ngoku akukho mthetho okanye nayiphi na indlela yomntu eye yaphumelela ukuphelisa amandla ako awenzakalisayo. Abantu kuzo zonke iindawo bayahleba. Kuyahletywa elumelwaneni, eziofisini, ezivenkileni, emathekweni nasemakhaya. Kuyathandwa ngabantu bazo zonke izithethe, izizwe nempucuko, kwaye kuye kwasulela lonke ibutho labantu. Enye ingcaphephe yathi: “Ukuhleba kuxhaphake gqitha phantse oku komoya lo siwuphefumlayo.” Kwakhona yathi: ‘Kuyinxalenye esisiseko yemveli yabantu.’
Kuyinyaniso ukuba, ukuhleba kudla ngokubhenca icala elibi lemveli yabantu, icala elithanda ukuhlazisa udumo, ukugqwetha inyaniso, nokutshabalalisa ubomi. Kanti, akunyanzelekanga ukuba ukuhleba kube kubi. Kukho inkalo ekhuthazayo ngencoko nje engenamsebenzi. Yaye ukwazi umahluko phakathi kokuhleba okuyingozi nokungeyongozi ngundoqo wokuphepha ukuhlasela abanye—nokuba lixhoba kwakho.
[Umfanekiso okwiphepha 4]
Ukusetyenziswa kwesitulo sokuntywilisela kwakuyenye yeendlela oorhulumente basekuhlaleni ababezama ngazo ukuthintela ukuhleba
[Inkcazelo]
Historical Pictures Service