Indlela Oogqirha Abahlangabezana Ngayo NoGawulayo
INGOZI yokufumana uGawulayo ngegazi iye yabangela oogqirha botyando abathile ukuba basebenzise oko iThe New York Times ikubiza ngokuthi “sisikrweqe sokutyanda esitsha sesizukulwana sikaGawulayo.” Kugqirha wotyando isikrweqe siquka “izihlangu zerabha, ifaskoti ende engangeni manzi, iigloves ezine, izikhuseli-ngalo ezingangeni manzi neendondo zamehlo. ITimes ithi, yaye ukwenzela iimeko ezichaphazela ukusetyenziswa kakhulu kwegazi, “umnqwazi onesigqubuthelo sobuso esikhuselayo” uyafuneka.
Ngokuphawulekayo, ngasekupheleni kowe-1990, amaZiko kaRhulumente Okuthintela Izifo athi kwiingxelo ezifunyenweyo ezili-153 000 ezingoGawulayo, abaqukiweyo abangama-637 yayingoogqirha, abangama-42 yayingoogqirha botyando, abali-156 yayingoogqirha bamazinyo nezazi ngezococeko, yaye abali-1 199 yayingabongikazi.
UGawulayo waziwa okokuqala ngowe-1981. Kangangethuba elithile wayefumaneka ngokukodwa kumafanasini angamadoda namakhoboka eziyobisi athi asulelwe ngeenaliti ezingcolileyo. Kodwa ukusasazeka kwawo phakathi kwamabhinqa kuye kwakhawuleza. IWorld Health, iphephancwadi leWHO ([World Health Organization] Intlangano Yehlabathi Yezempilo), lanikela le ngxelo kwinkupho yalo kaNovemba noDisemba 1990: “Inani lamabhinqa [ehlabathini jikelele] alindeleke ukuguliswa nguGawulayo kwiminyaka emibini elandelayo liya kuba ngaphaya kwesimbuku esandayo sazo zonke iingxelo zikaGawulayo ezixelwe kwiWHO ebudeni beminyaka yokuqala elishumi yalo bhubhani.”
EUnited States, Amaziko kaRhulumente Okuthintela Izifo anikela ingxelo yokuba ngasekupheleni kowe-1990, kwakukho abantu abali-15 696 abaneminyaka engaphezu kwama-50 ubudala abaye baqalisa ukuvelisa iimpawu zikaGawulayo. Elo linani eliphakamileyo xa lithelekiswa neengxelo ezingama-2 686 zikaGawulayo kubantwana abaneminyaka engaphantsi kweminyaka eli-13 ubudala, kuye kwanikelwa ingqalelo engakumbi kwiqela lamaxhoba kaGawulayo.
Abantu abadala bamfumana njani uGawulayo? Inkoliso yabo imfumana ngobufanasini. Noko ke, ngokutsho kweThe New York Times, “malunga ne-17 ekhulwini lamaxhoba ayifumene intsholongwane ngotofelo-gazi olosulelayo.” Oko kuphantse kulingane nenani leengxelo zikaGawulayo eziphakathi kwabantu abadala ngenxa yokuba betofele igazi xa kuthelekiswa nenani leengxelo zikaGawulayo phakathi kwabantwana abangaphantsi kweminyaka eli-13 ubudala!