“Ixesha Lokuphila”

UAnn wayengumncedi weentliziyo ezixhwalekileyo; wayeluncedo kuye nabani na onengxaki. Ekubeni wayekhangeleka elungelelene yaye engenabala, akukho mntu wayesazi ukuba unamanxeba afihlakeleyo eemvakalelo, de ngolunye usuku waqalisa ukukhumbula. UAnn ukhumbula oku: “Ndandisemsebenzini, ndaza ndaqalisa ukuva iintlungu nokuba neemvakalelo ezinzulu zokuba neentloni. Kwakunzima nokuphakama! Kangangeentsuku ndandigula. Ndandula ke ndakhumbula mhla utata womtshato wesibini wayendixhaphaza ngokwesini​—⁠eneneni, wayendidlwengula. Kwaye akazange andihlasele isihlandlo esinye kuphela.”

KUKHO ‘ixesha lokuphila.’ (INtshumayeli 3:⁠3) Yaye kumaxhoba amaninzi awayephethwe kakubi esemancinane​—⁠njengoAnn⁠—​ukubuyisa iinkumbulo ezaphoswa kwelokulibala kuyinxalenye ebalulekileyo kwinkqubo yokuphila.

Noko ke, ubani unokuyilibala njani into emanyumnyezi njengokuhlaselwa ngokwesini? Qwalasela indlela angenakuzinceda ngayo umntwana xa ehlaselwa nguyise okanye omnye umntu okhulileyo nonamandla. Akanakubaleka. Akanakukhala. Yaye akanakuze akuxelele nabani na oku! Kanti, kusenokufuneka aphile naloo mntu umxhaphazayo ntsuku zonke aze enze ngathi akwenzekanga nto. Ukuhanahanisa ngolo hlobo bekunganzima kumntu okhulileyo; phantse kuyinto angenakuyenza tu umntwana. Ngoko usebenzisa intelekelelo emangalisayo abantwana abathiwe jize ngayo yaye uyakususa oku engqondweni! Wenza ngathi akakhange axhatshazwe, uzama ukukulibala okanye afihle iimvakalelo zakhe ngako.

Enyanisweni, ngamathuba athile, sonke siyazicima ezingqondweni zethu izinto esingafuni kuzibona okanye ukuziva. (Thelekisa uYeremiya 5:​21.) Kodwa amaxhoba okuxhatshazwa asebenzisa obu buchule njengendlela yokuphila. Wambi amaxhoba anikela le ngxelo: “Ndandisenza ngathi kwenzeka komnye umntu yaye mna ndingumbukeli nje.” “Ndandisenza ngathi ndilele.” “Engqondweni yam ndandisenza izibalo.”​—⁠Strong at the Broken Places, nguLinda T. Sanford.

Ngoko, akumangalisi ukuba incwadi ethi Surviving Child Sexual Abuse ithi: “Kuthelekelelwa ukuba abantu abanokuba ngama-50 ekhulwini abatyhubela ukuxhatshazwa ngokwesini bengabantwana abakukhumbuli oku.” Noko ke, bambi basenokuyikhumbula into yokuba baxhatshazwa kodwa bazame ukuzilibala iimvakalelo ezinxibelelene nako​—⁠iintlungu, ingqumbo nokuba neentloni.

Ukuzama Ukulibala​—⁠Umzabalazo Oqhubeka Engqondweni

Ngoko, ngaba asilocebo lilelona lihle ukuba ezi zinto zihlale zingcwatyiwe​—⁠ukuba ixhoba lisuke nje lilibale ngazo? Bambi basenokusuka nje bakheth’ ukwenjenjalo. Abanye abanakukwazi ukwenjenjalo. Kunjengokuba uYobhi 9:​27, 28 esithi: “Ukuba ndiyancuma ndize ndizame ukuyilibala intlungu yam, kubuya konke ukubandezeleka kwam kuze kundingcungcuthekise.” (Today’s English Version) Ukuzama ukulibala iinkumbulo ezoyikekayo kungumgudu oqoba ingqondo, umzabalazo omkhulu osenokude ube nemiphumo emibi empilweni.

Njengoko ixhoba liya likhula, iingcinezelo zobomi zidla ngokuwenza buthathaka amandla alo okukulibala okwenzeka kwixesha elidluleyo. Ivunjana nje lesiqholo, ubuso obuqhelekileyo, isandi esothusayo, okanye kwanokuxilongwa ngugqirha oqhelekileyo okanye ngowamazinyo kusenokuvuselela iinkumbulo neemvakalelo ezingathandekiyo.a Ngaba lowo ulixhoba akafanele nje enze umgudu ongakumbi wokulibala? Kweli nqanaba into ewanika isiqabu amaxhoba amaninzi kukuzama ukukhumbula! Ibhinqa eligama linguJill lithi: ‘Zakuba iinkumbulo zifika engqondweni, ziphelelwa ngamandla. Ukuzigcina zifihlakele engqondweni kubuhlungu yaye kuyingozi ngakumbi kunokuzikhupha.’

Ukuba Luncedo Kokuvuma Ukuba Kwenzeka

Kutheni kunjalo nje oku? Esinye isizathu sikukuba ukukhumbula kunika ixhoba ithuba lokuba buhlungu. Ukuba buhlungu yindlela yemvelo yokusabela kwinto embi; kuyasinceda sizilibale iziganeko ezinxunguphalisayo size siqhubeke siphila. (INtshumayeli 3:⁠4; 7:​1-⁠3) Noko ke, ixhoba lokuxhatshazwa liye labandezwa ithuba lokubonakalisa ubuhlungu, liye lanyanzelelwa ukuba lingabamkeli ubunyaniso bamava alo oyikisayo, liye lanyanzelelwa ukuba liyicinezele intlungu yalo. Oku kuzama ukulibala kusenokuphumela koko oogqirha bathi kukungalungelelani kwemithambo-luvo emva kwesiganeko esibi​—⁠imeko phantse yokungabi nazimvakalelo ngokupheleleyo.​—⁠Thelekisa INdumiso 143:​3, 4.

Njengoko iinkumbulo ziqalisa ukubuya, phantse ixhoba lisenokukuthelekelela oku kuphathwa kakubi kusenzeka ngokoqobo. Wambi amaxhoba ade abuyele kwimeko yobuntwana okwethutyana. UJill ukhumbula oku: “Xa ndisiba nalo mfanekiso-ngqondweni woko kwenzeka ngaphambili, ndidla ngokukuva oku nasemzimbeni. Maxa wambi iba ziinkumbulo ezingathandekiyo gqitha, ngokokude ndibe noluvo lokuba ndiza kuphambana.” Ngequbuliso ingqumbo yobuntwana ekudala ivalelwe isenokubuya yonke. USheila uthi: “Ukukhumbula kuyandidandathekisa yaye kundibangela ndibe nomsindo.” Kodwa phantsi kwezi meko zingaqhelekanga, kufanelekile ukuba nomsindo. Ubuhlungu, ubonakalisa ingqumbo efanelekileyo nebivalelwe! Unelungelo lokuzithiya izenzo zenkohlakalo owaba lixhoba lazo.​—⁠Roma 12:⁠9.

Elinye ixhoba lokuxhatshazwa lithi: “Xa ndakwazi ukukukhumbula ngokwenene oku, ndafumana isiqabu esikhulu . . . Ubuncinane ngoku ndandikwazi endandijamelene nako. Nangona kwakunzima kum xa ndikhumbula oku, kwabuyisela kum inxalenye ebisoyikeka yobomi bam kuba ndandingayazi yaye iyimfihlelo.”​—⁠The Right to Innocence.

Kwakhona ukukhumbula kusenokulinceda ixhoba ukuba liqonde isizekabani seengxaki zalo. Omnye owaba lixhoba lombulo uthi: “Ndandisoloko ndisazi ukuba ndandinentiyo nomsindo owendeleyo kodwa ndingasazi isizathu soko.” Ukukhumbula kuyabanceda abaninzi baqonde ukuba ababekeki tyala ngoko kwenzekayo, baqonde ukuba benziwa nje amaxhoba.

Kakade ke, asingabo bonke abantu abakukhumbula ngokuphawulekayo okanye ngokucacileyo ukuxhatshazwa njengabanye. Ibe inkoliso yabaluleki iyavuma ukuba akuyomfuneko ukukhumbula zonke iinkcukacha zokuxhatshazwa kukabani ukuze aphile kwimiphumo yako. Ukusuka nje uyamkele into yokuba wakhe waxhatshazwa kunokuba linyathelo elikhulu elisa ekuchacheni.​—⁠Bona ibhokisi ekwiphepha 9.

Ukufumana Inkxaso

Ukuba waba lixhoba lokuxhatshazwa ngokwesini ngoxa wawusengumntwana, musa ukulwa nemvakalelo yokubuya kweenkumbulo uwedwa. Kuluncedo ukuthetha ngokupheleleyo nomnye umntu ngeemvakalelo zakho. (Thelekisa uYobhi 10:⁠1; 32:​20.) Bambi abanxunguphele gqitha basenokugqiba kwelokuba bafune uncedo lukagqirha, umluleki, okanye lwengcali kwizigulo zengqondo. Ngokuqinisekileyo, umhlobo onokuthenjwa, iqabane lomtshato, amalungu entsapho, okanye abaveleli abangamaKristu abaya kuphulaphula ngovelwano nangentlonelo banokuba luncedo kakhulu.b UJanet uthi: “Oyena mntu wandincedayo yayingumhlobo wam osenyongweni, uJulie. Uye wandiboleka indlebe yakhe ukuze ndizityand’ igila ngenkumbulo yam. Undinika ithuba lokuva iimvakalelo eziba ngumphumo woko. Ubek’ indlebe yaye ubonakalisa ingqiqo.”

Ukuba nentembelo ngumbandela onzima, yaye usenokuziva ungakufanelekelanga ukufumana uncedo lomnye umntu​—⁠okanye ube neentloni gqitha zokuthetha ngokuxhatshazwa kwakho. Kodwa umhlobo wokwenyaniso “uzalelwe imbandezelo” yaye usenokukwazi kakuhle ukunikela uncedo oluxabisekileyo ukuba umnika ithuba lokwenjenjalo. (IMizekeliso 17:​17) Noko ke, bakhethe abantu ozityand’ igila kubo. Funda ukuzibamba xa utyhila iinzingo zakho. Ukuba umhlobo unovelwano yaye uyaqonda, ngoko usenokuzama ukumchazela inkcazelo engakumbi.

Kwakhona kuluncedo ukuwunyamekela kakuhle umzimba wakho. Phumla ngokwaneleyo. Yenza umthambo ngokusengqiqweni. Yiba nocwangciso olulungeleleneyo lokutya. Ukuba kunokwenzeka, phila ubomi obulula. Zive ukhululekile ukucuntsula kule nto yabantwana. Intlungu isenokuba ngathi ayisoze iphele, kodwa ngokuhamba kwexesha iya kuphela. Khumbula oku: Wahlangabezana nokuxhatshazwa ungumntwana ongenakuzinceda​—⁠waza waphila! Njengomntu okhulileyo, unobuncwane namandla owawungenawo ngelo xesha. (Thelekisa eyoku-1 kwabaseKorinte 13:​11.) Ngoko jamelana neenkumbulo zakho ezingemyoli uze ungazivumeli zikuthuthumbise. Kholosa ngamandla avela kuYehova. Umdumisi wathi: “Enoba ixhwaleke kangakanani na intliziyo yam, iintuthuzelo zakho ziyandiyolisa.”​—⁠INdumiso 94:​19, The New Jerusalem Bible.

Ukuphelisa Imvakalelo Yokuba Netyala Neentloni

Enye into ebalulekileyo ukuze uphile kukuphelisa ukuzibek’ ityala. Elinye ixhoba eligama linguReba lithi: “Nangoku kunzima kum ukucinga ukuba ndandimsulwa. Ndiyazibuza ukuba kwakutheni ukuze ndingamenzi akuyeke oku?”

Phofu ke, khumbula ukuba abantu abaxhaphaza abantwana basebenzisa ezona ndlela zobuqili ukuze banyanzele abantwana: igunya (‘Ndinguyihlo!’), izisongelo (‘Ndakukubulala ukuba ukhe waxela!’), amandla asemzimbeni nobukrwada kwanemvakalelo yokuba netyala (‘Ukuba ukhe wayixela le nto, uTat’ akho uza kuy’ entolongweni.’). Kwelinye icala, bambi bayabacenga abantwana okanye babaphe izipho nezinye izinto ezintle. Bambi benza abantwana bacinge ukuba iintlobano zesini ngumdlalo okanye yindlela umzali abonakalisa ngayo uthando lwakhe. Elinye ixhoba likhumbula oku: “Wathi abantu benza oku xa bethandana.” Umntwana omncinane unokukuxhathisa njani ukurhwetyeshwa okunjalo kweemvakalelo nobuqhetseba? (Thelekisa eyabase-Efese 4:​14.) Ewe, umxhaphazi ngolunya usebenzisa isibakala sokuba abantwana bengenakuzinceda, bechanabekile yaye ‘beziintsana ebubini.’​—⁠1 Korinte 14:⁠20.

Mhlawumbi, inyathelo elilandelayo lisenokuba kukuzikhumbuza indlela owawuchanabeke nowawungenakuzinceda ngayo njengoko wawungumntwana. Usenokuzama ukuchitha ixesha uhleli nabanye abantwana abancinane okanye ubuke imifanekiso yakho yobuntwana. Abahlobo abakuxhasayo bakwanokukunceda ngokusoloko bekukhumbuza ukuba yayingelotyala lakho into yokuba uxhatshazwe.

Sekunjalo, elinye ibhinqa lithi: “Kuthi mandife xa ndikhumbula iimvakalelo utata awayezivuselela kum.” Wambi amaxhoba (angama-58 ekhulwini ngokolunye uhlolisiso) ayakhumbula ukuba ayevuseleleka ebudeni bokuxhatshazwa kwawo. Kuyaqondakala ukuba oku kuwabangela azive eneentloni gqitha. Noko ke, incwadi ethi Surviving Child Sexual Abuse isikhumbuza ukuba “ukuvuseleleka ngokomzimba yindlela nje ezenzekelayo [yokusabela] xa uchukunyisiwe okanye uvuselelwa ngeendlela ezithile” nokuba umntwana “akakwazi ukukulawula oku kuvuseleleka.” Ngenxa yoko nguloo mntu uxhaphaza umntwana kuphela obekek’ ityala ngokuzeleyo ngaloo nto yenzekayo. YAYINGELOTYALA LAKHO!

Kwakhona, ukwazi ukuba uThixo ukugqala ‘njengongenakusoleka nomsulwa’ kulo mbandela kumele kukuthuthuzele. (Filipi 2:​15) Ekuhambeni kwexesha nawuphi na umnqweno wokuzifica kwihambo yokuzonakalisa usenokuphela, yaye usenokufunda ukuwuxabisa umzimba wakho.​—⁠Thelekisa eyabase-Efese 5:⁠29.

Ukuthethathethana Nabazali Bakho

Eli lisenokubonakala ilelona nqanaba linzima kumanqanaba okuchacha. Bambi bayaqhubeka benomsindo, bebila besoma becinga ngeendlela zokuziphindezelela​—⁠okanye benemvakalelo yokuba netyala. Elinye ixhoba lokuxhatshazwa lathi: “Ndidandathekile kuba ndicinga ukuba uYehova ulindele ukuba ndimxolele umntu owayendixhaphaza, ibe andinakumxolela.” Kwelinye icala, usenokuphila neemvakalelo zokumoyika loo mntu wayekuxhaphaza. Okanye usenokuba uyamcaphukela umama wakho ukuba wakubetha ngoyaba ukuxhatshazwa okanye wakhanyela okanye wanomsindo xa ukuxhatshazwa kwakubhencwa. Libuhlungu elinye ibhinqa likhumbula oku: “Umama wandixelela ukuba ndimele ndimnyamezele [utata].”

Kungokwemvelo ukuba ubani abe nomsindo xa eye waxhatshazwa. Sekunjalo, amaqhina entsapho asenokuba ngawomeleleyo, yaye usenokungathandi ukuphelisa uqhagamshelwano nabazali bakho. Usenokude ube ngokulungeleyo ukucinga ngoxolelwaniso. Noko ke, okuninzi kuya kuxhomekeka kwiimeko. Maxa wambi amaxhoba atyekela ekubaxoleleni ngokupheleleyo abazali bawo​—⁠engakubethi ngoyaba ukuxhatshazwa, koko engafuni ukulawulwa yinqala okanye luloyiko. Ekhetha ukukuphepha ukungquzulana ngokweemvakalelo, wambi ayaneliswa ‘kukuthetha neentliziyo zawo’ aze ke akuphose kwelokulibala.​—⁠INdumiso 4:⁠4.

Noko ke, usenokuba noluvo lokuba imicimbi inokulungiswa kuphela ngokuthetha ngokuphandle nabazali bakho ngoku kuxhatshazwa​—⁠ubuso ngobuso, ngomnxeba, okanye ngeleta. (Thelekisa uMateyu 18:​15.) Ukuba kunjalo, qiniseka ukuba uphile ngokwaneleyo​—⁠okanye ubuncinane unokuthile oqamele ngako⁠—​ukuze uxhathise isaqhwithi esingokweemvakalelo esisenokugaleleka. Ekubeni kungekho nto ingako iya kufezwa ngokukhonkothana, zama ukuzimela izimvo zakho kodwa uzole. (IMizekeliso 29:​11) Usenokuqalisa ngokuchaza (1) okwenzekayo, (2) indlela okukuchaphazele ngayo, (3) noko ulindele ukuba bakwenze ngoku (njengokucel’ uxolo, ukuhlawula iindleko zikagqirha, okanye ukuguqula ihambo). Ubuncinane, ukuyidandalazisa imicimbi kusenokukunceda ukuphelisa naziphi na iimvakalelo ezikhathazayo zokuba akunamandla. Yaye kusenokukhokelela ekubeni ube nolwalamano olutsha nabazali bakho.

Ngokomzekelo, utata wakho usenokuvuma ukuba wakuxhaphaza, evakalisa ukuzisola ngokunyanisekileyo. Usenokuba wenze nemigudu enyanisekileyo yokuguquka, mhlawumbi ngokufuna unyango lobukhoboka botywala okanye ngokuqhutyelwa isifundo seBhayibhile. Ngokunjalo nomama wakho usenokukucela ukuba umxolele ngokungakukhuseli kwakhe. Maxa wambi nisenokuxolelana ngokupheleleyo. Noko ke, mus’ ukumangaliswa ukuba usenemvakalelo yokungabathembi abazali bakho uze ukhethe ukungakhawulezi ube nolwalamano olusondeleyo nabo. Noko ke, nisenokukwazi ukuqalisa kwakhona ukusebenzisana ngokusengqiqweni njengentsapho.

Kwelinye icala, ukuthetha ngokuphandle kusenokumbangela umntu owakuxhaphazayo akhanyel’ alale ngomqolo akutyabeke ngezithuko encediswa ngamanye amalungu entsapho. Okubi ngakumbi kukuba usenokufumanisa ukuba usesisisongelo kuwe​—⁠okanye kubantwana abancinane! Ukumxolela kusenokungabi yinto efanelekileyo, kusenokuba nzima ukuba nolwalamano olusondeleyo.​—⁠Thelekisa INdumiso 139:⁠21.

Enoba kuyintoni na, kusenokuthabatha ixesha elide ngaphambi kokuba iimvakalelo zakho ezenzakalisiweyo ziphele. Kusenokufuneka uhlale uzikhumbuza ukuba okona kusesikweni kuya kwenziwa nguThixo. (Roma 12:​19) Ukuncokola nomphulaphuli onenyameko okanye nokuphalaza izimvo zakho ngokuzibhala phantsi ngokukwanjalo kunokukunceda uphelise umsindo onawo. Ngoncedo lukaThixo unako ukuwoyisa umsindo onawo. Ngokuhamba kwexesha, iimvakalelo ezenzakalisayo azisayi kuba kuphela kwento ocinga ngayo.​—⁠Thelekisa INdumiso 119:133.

Ukuchacha Ngokomoya

Asinaso isithuba esaneleyo apha ukuze sigwadle zonke iimbambano ezibandakanyekileyo ezingokweemvakalelo, ngokokuziphatha nezingokomoya. Singasuke nje sithi unokwenza lukhulu ukukhawulezisa ukuchacha kwakho ‘ngokuhlaziya ingqiqo yakho’ ngoncedo lweLizwi likaThixo. (Roma 12:⁠2) ‘Yolulela kwizinto eziphambili,’ uzalisa ubomi bakho ngeengcinga nemisebenzi yokomoya.​—⁠Filipi 3:​13; 4:​8, 9.

Ngokomzekelo, abaninzi ababa ngamaxhoba okuxhatshazwa bafumana intuthuzelo enkulu ngokusuka nje bafunde incwadi yeeNdumiso. Phofu ke, iingenelo ezithe chatha zifumaneka ngokusebenzisa ngenkuthalo imigaqo yeBhayibhile. Emva kwethuba elithile ukuphazamiseka komtshato kunokuncipha. (Efese 5:​21-33) Ukuziphatha kakubi kunokuphela. (1 Korinte 6:​9-⁠11) Iimvakalelo ezingemyoli zesini zinokunyangeka. (IMizekeliso 5:​15-20; 1 Korinte 7:​1-5) Kwakhona unokufunda ukuba ngolungeleleneyo kulwalamano lwakho lobuqu uze ukhulise imilinganiselo eqinileyo yokuziphatha.​—⁠Filipi 2:⁠4; 1 Tesalonika 4:⁠11.

Unokuqiniseka ngoku: Ukuze uchache ufanele uzimisele ngokwenene uze wenze owona mgudu ubalaseleyo! Noko ke, INdumiso 126:⁠5 isiqinisekisa ngelithi: “Abahlwayelayo beneenyembezi baya kuvuna benokumemelela.” Kwakhona, khumbula ukuba uThixo wenyaniso, uYehova, unomdla kwintlalo-ntle yakho. “Usondele . . . kwabantliziyo zaphukileyo, abasindise abamoya utyumkileyo.” (INdumiso 34:​18) Elinye ixhoba lokuxhatshazwa lithi: “Xa ndathi ekugqibeleni ndaqonda ukuba uYehova wayeziqonda zonke iimvakalelo endandinazo yaye wayendikhathalele​—⁠endikhathalele ngokwenene⁠—​ngoko ekugqibeleni ndaziva ndixolile ngaphakathi.”

UThixo wethu onothando, uYehova, unikela okungakumbi kunoxolo lwengqondo. Uthembisa ukuzisa ihlabathi elitsha lobulungisa, aya kuthi kulo atshayele kuthi tu zonke iinkumbulo zeentlungu zobuntwana. (ISityhilelo 21:​3, 4; bona kwanoIsaya 65:​17) Eli themba linokukuzimasa lize likomeleze njengoko uya uchacha ngokupheleleyo.

[Imibhalo esemazantsi]

[Ibhokisi ekwiphepha 9]

Iindlela Zokuchacha

◻ Ukukhumbula nokuvuma ukuba waxhatshazwa

◻ Ukuba buhlungu ngenxa yokuxhatshazwa

◻ Ukuzityand’ igila kumphulaphuli onokukuxhasa

◻ Ukoyisa iimvakalelo zokuba netyala neentloni

◻ Ukuthethathethana nabazali bakho

◻ Ukusebenzisa imigaqo yeBhayibhile ukuze uguqule ihambo embi

◻ Ukuphelisa iimvakalelo ezingalunganga ngesini

◻ Ukuhlakulela imilinganiselo emihle yobuqu neyokuziphatha

◻ Ukuhlakulela ulwalamano lobuqu noThixo namaKristu okhonza kunye nawo

[Ibhokisi ekwiphepha 10]

Ukwahlukana Neemvakalelo Zokwadlulayo

Ngokuqhelekileyo iinkumbulo zibuya emva kweeveki, iinyanga, okanye iminyaka, nkumbulo nganye efikayo iphelekwa ngamanqam okwethutyana. IThe Right to Innocence ithi maxa wambi “usenokuvakalelwa kukuba usabuyela kulaa meko yangaphambili. Akunjalo. Uya ubuyela kwimeko entle. Enyanisweni, ufumene amandla ayimfuneko okujamelana neemvakalelo nezibakala zokwenene ezinzulu nezide zibe buhlungu ngakumbi.” Noko ke, ngesizathu esifanelekileyo, ukuchacha kusenokuba yeyona nto umntu ayixhalabeleyo okwelo thutyana.​—⁠IMizekeliso 18:⁠14.

Wambi amaxhoba akufumanisa kuluncedo ukufunda okanye ukuva amazwi amanye amaxhoba. Ukubuka iifoto zentsapho nezinto eziwakhumbuza ubuntwana bawo, ukutyelela iindawo awakhulela kuzo nokuthetha nabahlobo abanokuwaxhasa namalungu entsapho kukwanokuvuselela iinkumbulo. Enye into eluncedo ngokukhethekileyo kukubhala. Wambi amaxhoba akubhala phantsi kulindixesha konke oko asakukhumbulayo ngesi siganeko sibi. Amanye azityand’ igila ngokubhala ileta eyibhalela umntu owawaxhaphazayo​—⁠kodwa le leta awayithumeli⁠—​nto leyo edla ngokuvuselela iinkumbulo ezingakumbi. Nomthandazo ukwasisixhobo esinamandla sokuchacha. Nawe unokuthandaza njengomdumisi uthi: “Ndicikide, uzazi iingcinga-ngcinga zam; ubone ukuba kukho indlela yobubi na kum, undikhaphele kwindlela engunaphakade.”​—⁠INdumiso 139:​23, 24.

[Umfanekiso okwiphepha 8]

Ukucinga ngezinto ezahlukahlukeneyo ezenzeka kwixa elidluleyo uze uzihlanganise kunokuba lelinye inyathelo elikhokelela ekuphileni