Iingcamango Eziqhelekileyo Eziphosakeleyo

Ingcamango ephosakeleyo: Ngokuqhelekileyo abantu abaxhaphaza abantwana ngabantu abangaziwayo, iindwayi ezingemanga kakuhle entloko ezithi zithimbe abantwana yaye zisebenzisa amandla asemzimbeni ukuze zibaxhaphaze.

Kwinkoliso yeemeko—ukususela kuma-85 ukusa kuma-90 ekhulwini ngokolunye uqikelelo—umxhaphazi iba ngumntu umntwana amaziyo namthembileyo. Kunokusebenzisa amandla, ngokufuthi aba baxhaphazi bayamqhatha umntwana ukuze abe nenxaxheba ngokuthe ngcembe kwizenzo zesini, besebenzisa ukulinganiselwa kwamava omntwana namandla okuqiqa. (Thelekisa eyoku-1 kwabaseKorinte 13:11 neMizekeliso 22:15.) Aba baxhaphazi abangomalolo aphazamisekileyo engqondweni. Uninzi lungabantu bonqulo, abahlonelwayo nabathandwayo ekuhlaleni. Ngokutsho kweFederal Bureau of Investigation (iOfisi yeNqila Yezophando) yaseUnited States, “ukucingela ukuba ubani akaqheliseli iintlobano zesini nabantwana kuba nje elungile, esiya ecaweni, ezibhokoxa emsebenzini, ezithanda izilwanyana, njalo njalo, akukho ngqiqweni.” Uphando olwenziwe kutshanje lubonisa ukuba kukwaphosakele nokucingela ukuba bonke abo bangabaxhaphazi ngamadoda okanye ukuba onke amaxhoba ngamabhinqa.

Ingcamango ephosakeleyo: Abantwana bayakuthelekelela okanye bayaxoka xa besithi bayaxhatshazwa ngokwesini.

Kwiimeko eziqhelekileyo abantwana abanawo amava okanye ubukrelekrele kwimibandela yesini ngokokude bayile amabango acacileyo okuxhatshazwa, nangona bambi abantwana abancinane besenokudideka ekuchazeni iinkcukacha. Kwanabona baphandi bathandabuzayo bayavuma ukuba ubukhulu becala amabango okuxhatshazwa ayinyaniso. Khawuqwalasele incwadi ethi Sex Abuse Hysteria—Salem Witch Trials Revisited, exubusha ngamabango obuxoki okuxhatshazwa.a Nale ncwadi iyavuma: “Ukuxhatshazwa kokwenene kwabantwana ngokwesini kwandile yaye ubukhulu becala ukuxhatshazwa ngokwesini ekuthiwa kwenziwe ebantwaneni . . . kusenokwenzeka ukuba kuyinene (mhlawumbi kwabangama-95 ekhulwini okanye nangakumbi).” Abantwana bakufumanisa kunzima gqitha ukuchaza ukuxhatshazwa. Xa bexoka ngokuxhatshazwa, ngokufuthi iba kukukhanyela ukuba kwenzekile nakubeni okunene kwenzekile.

Ingcamango ephosakeleyo: Abantwana bayalukuhla yaye ngokufuthi ngehambo yabo bazibangela ngokwabo ukuba baxhatshazwe.

Le ngcamango yeyona igqwethekileyo, ekubeni, enyanisweni, ibek’ ityala ixhoba ngokuxhatshazwa. Abantwana abazi nto ngokwenene ngezinto ezingokwesini. Abayazi intsingiselo yento enjalo okanye indlela eya kubaguqula ngayo. Ngoko ke abakwazi ukuyivumela ngendlela enentsingiselo. Ngumxhaphazi, ibe ngumxhaphazi kuphela, obekek’ ityala ngokuxhatshazwa komntwana.—Thelekisa uLuka 11:11, 12.

Ingcamango ephosakeleyo: Xa abantwana bebhenca into yokuba baxhatshaziwe, abazali bafanele babafundise ukuba bangakhe balinge bathethe ngako nokuba ‘mabakuphose kwelokulibala.’

Ngubani oyena ungenelwayo ukuba umntwana uyaqhubeka engathethi nto ngokuxhatshazwa? Ngaba asinguye lo umxhaphazayo? Enyanisweni, uphengululo lubonise ukuba ukukukhanyela nokucinezela iimvakalelo kusenokuba yeyona ndlela ingaphumeleliyo yokuhlangabezana nenkathazo yokuxhatshazwa. Kwiindlela ezisithoba zokujamelana nako ezasetyenziswa lelinye iqela labo babengamaxhoba ombulo ezahlolisiswa eNgilane, abo babeyikhanyela, beyiphepha okanye beyicinezela le mbambano babandezelwa kukuphazamiseka ngakumbi ngokweemvakalelo baza banodandatheko kubomi bobuntu obukhulu. Ukuba wakhe wahlaselwa ngokoyikisayo, ngaba ubungathanda ukuxelelwa ukuba musa ukuthetha ngoko kuhlaselwa? Kutheni umele uxelele umntwana into enjalo? Ukuvumela umntwana asabele ngendlela eqhelekileyo kwisiganeko esibi ngolo hlobo, njengokuba buhlungu, ukuba nomsindo, ukuba lusizi, kuya kumnika ithuba lokuba ekugqibeleni aqalise ukuchacha.

[Umbhalo osemazantsi]