Imbono YeBhayibhile
Kutheni Umele Ufundisise IBhayibhile?
UKUYIFUNDA yonke iBhayibhile akuyondlwan’ iyanetha. Ngaba wakha wakwenza oku kwakanye okanye mhlawumbi amaxesha amaninzi? Ngokufanelekileyo abantu abaninzi baziva benegugu ngokwenjenjalo. Ukufumana ixesha lokufunda iBhayibhile kufanele kudweliswe kanye kufutshane nasekuqaleni—ukuba akukho sekuqaleni—kuludwe lwethu lwezinto eziza kuqala ebomini. Ngasiphi isizathu? Ukuze wazi oko kuqulethwe ngokusisiseko yile ncwadi eyeyona isasazwa ngokubanzi embalini yonke, ekuphela kwencwadi ngokufanelekileyo ezibanga iyephefumlelwe nguThixo.—2 Timoti 3:16.
Noko ke, umntu usenokwenza okungakumbi kunokusuka nje afunde iBhayibhile aze azi umongo wayo. Ngaba kungumnqweno wakho ukukholisa uThixo uze unandiphe zonke iingenelo zeemfundiso zaloo ncwadi ingcwele? Ngoko landela icebiso elanikelwa ngumpostile uPawulos, kumfana onguTimoti esithi: “Nyamekela imfundo, uvuselelo nemfundiso. Zinyamekele ezo zinto, hlala kwezo zinto, ukuze ukuhambela kwakho phambili kubonakale kwinto yonke. Zilumkele wena nemfundiso yakho; hlala uhleli kwezo zinto; kuba ngokwenza oko, wozisindisa wena, ubasindise nabo bakuvayo.”—1 Timoti 4:13, 15, 16.
Ukucamngca okunjalo ngeemfundiso zeBhayibhile nokucinga nzulu ngazo kubandakanya okungaphezulu kunokufunda nje iZibhalo kuphela. Ukufunda iBhayibhile akuqinisekisi ukuba umntu unokuyisebenzisa ngokufanelekileyo inkcazelo ayifumeneyo, kanye njengokuba ukufunda incwadi engengqondo yomntu kungamenzi ubani afanelekele ukuba ngugqirha wotyando lwengqondo. Ngenxa yoko, phulaphula icebiso likaPawulos elibhekele phaya eliya kuTimoti: “Kukhuthalele ukuzimisa phambi koThixo ucikidekile, ungumsébenzi ongenazintloni, ulungisa ukulahlula ilizwi lenyaniso.”—2 Timoti 2:15.
Kuphangalalisa Amandla Okuqonda
Ukufunda ukuphatha iLizwi likaThixo ngobuchule kufuna ufundisiso. Xa umntu efundisisa iBhayibhile ngenyameko, eqwalasela oko ikuthethayo, efumana intsingiselo yako, efunda wonke umongo wezicatshulwa, eqonda imbali yayo, ngoko unokuzuza amandla angakumbi okuqonda. Wandula ke aqale ukungenelwa ngokobuqu kwiLizwi likaThixo.
Makhe sihlole umzekelo obonisa ukuba ngokufunda nje indawana kwiSibhalo, sisenokungayiqondi intsingiselo yoko kuthethwayo ngaphandle kokuba sifunde umongo. KwiZenzo 17:11 sifunda ngabantu baseBhereya isixeko samaGrike, esingekho kude naseTesalonika: “La ke aye enobuntu kunawaseTesalonika, la wona alamkela ilizwi ngentumekelelo yonke, ezincina izibhalo imihla ngemihla, ukuba zingaba zinjalo na ezi zinto.”
Xa sikuthi krwaqu oku sisenokugqiba kwelokuba amaKristu aseBhereya ayekunyamekele ukufunda kunalawo aseTesalonika. Noko ke, phawula ukuba kwindinyana 10 yeZenzo isahluko 17 uPawulos noSilas ekufikeni kwabo eBhereya baya “endlwini yesikhungu yamaYuda” ukuya kushumayela iLizwi likaThixo. Yaye indinyana 12 ithi “kwakholwa into eninzi kuwo [amaYuda].” Loo ndinyana isinceda sifikelele kwisigqibo esahlukileyo. Ingxelo engcwele isixelela ukuba yayingengomaKristu la ayethelekiswa kwezi zixeko zibini, kodwa, kunoko, yayingamaYuda kwezoo ndawo.
Ukongezelela, ngaba uye wakuphawula oko kwenza amaBhereya abe nobuntu? Azihlola ngenkuthalo iZibhalo. UNjingalwazi uArchibald Thomas Robertson, egqabaza ngaloo mazwi kwiWord Pictures in the New Testament, wabhala oku: “UPawulos wazicacisa ngokweenkcukacha iZibhalo imihla ngemihla njengaseTesalonika, kodwa amaBhereya, kunokuba angayamkeli le ndlela intsha awayezitolika ngayo, azihlola (igama elithi anakrinō lithetha ukuhluza ngokucokisekileyo, wenze uphando oluchanileyo ngenyameko njengakwinkqubo yasemthethweni . . . ) iZibhalo ngokwawo.” Uhlolisiso lwawo lwalungekokukha nje phezulu. Loo maYuda angamaBhereya aphanda ngenyameko ukuqinisekisa ukuba oko uPawulos noSilas babekufundisa ngoYesu uMesiya owayethenjiswe kudala ngokusuka eZibhalweni kwakuyinyaniso.
Ngoko ke, ngokulandela umzekelo wamaBhereya amandulo, kubalulekile ukuba singalifundi nje iLizwi likaThixo kodwa kwakhona silifundisise—“sizihlolisisa ngenyameko iZibhalo”—ukuze sifumane intsingiselo yoko kuthethwayo. Ngale ndlela sinokuba noxabiso olunzulu ngeBhayibhile, size nathi, njengoTimoti, sibe ngabantu abakwaziyo ‘ukuzisindisa thina kunye nabo basivayo.’ Ngoba? Kuba, ukongezelela ekufundeni kwethu iZibhalo, siye sazifundisisa ukuze sithobele oko sikufundileyo.—IMizekeliso 3:1-6.
Umthombo Wemilinganiselo Yokwenyaniso Nesiprofeto
Makhe siqwalasele ezinye izizathu ezibini zokufundisisa iBhayibhile. IBhayibhile ayinakuthelekiswa nayo nayiphi na incwadi ekunikeleni imilinganiselo yehambo yokuziphatha. Kwiminyaka emininzi eyadlulayo, umcebisi wezemfundo ongumMerika wathi: “Ndikholelwa kwelokuba ulwazi ngeBhayibhile ngaphandle kwemfundo yakwaNokholeji luxabiseke ngakumbi kunemfundo yakwaNokholeji ngaphandle kweBhayibhile.” Ukuze ulwazi lweBhayibhile lube bubutyebi bakho, intshukumisa yokufundisisa kwakho iZibhalo imele ibe kukusebenzisa imithetho neemfundiso zayo kubomi bemihla ngemihla ukuze ikwenze umntu olunge ngakumbi, ‘lowo ulungisayo ukulahlula ilizwi lenyaniso.’—2 Timoti 2:15; IMizekeliso 2:1-22.
Ukongezelela, kumaphepha ayo kukho iziprofeto zikaThixo eziphefumlelweyo ezisele zizalisekisiwe kwimbali nezinye ezizaliseka kwinkulungwane yethu. Ufundisiso lweziprofeto zeBhayibhile lunceda umntu ukuba aqonde intsingiselo yeemeko zehlabathi eziqhubekayo—iimfazwe, iindlala, ukuqhekeka kweentsapho, ubundlobongela—nendlela yokuphepha ukubanjiswa ngamaxhala ngenxa yazo. (Luka 21:10, 11, 25-28) Ngaloo ndlela, sikhanyiselwe ngeempendulo zikaThixo kwiingxaki zanamhlanje, iimpendulo ezityhila apho simi khona kumsinga wexesha nendlela esinokulicebela ngokunempumelelo ngayo ikamva. Ezo mpendulo ziza kuthi ngejelo lodidi ‘lomkhonzi othanjisiweyo othembekileyo noqondayo,’ elisebenzisa iWatchtower Society njengomthombo wokusasaza.—Mateyu 24:45-47; 2 Petros 1:19.
INdumiso 119:105 ithi: “Lisisibane seenyawo zam ilizwi lakho, likukukhanya emendweni wam.” Ngoko ke, abantu abawafundisisa ngokuthe rhoqo amazwi obulumko afumaneka eBhayibhileni nabawasebenzisayo baya kuba phakathi kwabo baya kukuqonda ukuthanda nenjongo kaThixo, yaye ngenxa yoko, babe nomendo okhanyisiweyo okhokela ubomi babo bemihla ngemihla kwiingxaki zanamhlanje zokuziphatha.