Ulwando Oluphawulekayo

AMANGQINA KAYEHOVA awazange nakanye abe sisisongelo kubalawuli bezobupolitika bamazwe ahlala kuwo, ibe ngoku oku kuyaqondakala. Xa lalithetha ngenye yeendibano eziqhutywe eSoviet Union kweli hlobo, iphephandaba iKrasnoyarskiy Komsomolets lathi: “Iinkcuba-buchopho zelizwe lethu zide ekugqibeleni zaqonda ukuba abantu bakaYehova abasosisongelo konke konke kumthetho nocwangco loluntu.”

Ngokufanayo, iphephandaba laseSoviet iVostochno-Sibirskaya Pravda lanikela le ngxelo: “Ekubeni intlangano yamaNgqina kaYehova inamathela ngokungqongqo kwimibandela yonqulo, ayinanto yakwenza neengxwabangxwaba zobupolitika kwaye ayiwakhuthazi amalungu ayo ukuba axhase naliphi na iqela lezobupolitika, kodwa ixhasa igunya leBhayibhile noMyili wayo, uYehova uThixo.”

Ulwando Kwiminyaka Yokuqala

Kangangamashumi amaninzi eminyaka amaNgqina kaYehova ebekhuthele eMpuma Yurophu. Kwanangasekupheleni kweminyaka yee-1930, eRomania kwakukho amaNgqina angaphezu kwamawaka amabini, ePoland ayeliwaka, ibe ayengamakhulu eCzechoslovakia naseHungary, yaye ayekwaliqela naseYugoslavia. Nangona kwiSoviet Union enkulu ayeliqaqobana nje elingephi, oku kwaguquka ngesiquphe.

Ingcali ngemicimbi yaseSoviet, uWalter Kolarz, kwincwadi yayo ethi Religion in the Soviet Union yathi amanye amaNgqina angena eRashiya “ngemimandla eyathinjwa yiSoviet Union ngowe-1939 kuse kowe-1940, mimandla leyo eyayinamaqela amancinane awayekhuthele gqitha amaNgqina kaYehova.” Ngaloo ndlela, amaNgqina awayehlala kwimimandla esempuma yasePoland, eyaseCzechoslovakia neyaseRomania ngequbuliso azibona sele engabemi baseSoviet Union!

Enye indlela ephawulekayo amaNgqina kaYehova awangena ngayo eSoviet Union yayiziinkampu zoxinaniso zaseJamani. Oku kwenzeka njani? Kaloku, ebudeni beMfazwe Yehlabathi II, amabanjwa aseRashiya azifumana evalelwe kwezi nkampu kunye namawaka-waka amaNgqina aseJamani. Aba bemi baseJamani babevalelwe kwezi nkampu ngenxa yokuba balondoloza isigqibo sokuba ngoondilele abangamaKristu. (Yohane 17:​16; 18:​36) Babexolele ukuva ubunzima nokufa kunokuba benze okungqubana nemithetho kaThixo ngokuthelela imikhosi kaHitler baze ngaloo ndlela babe netyala lokubulala amaKristu abakhonza nawo kwamanye amazwe okanye elokubulala nabani na ongomnye ngapha koko.​—⁠1 Yohane 3:​10-⁠12.

Ngaloo ndlela, ngokutsho kwalo kaKolarz, “iinkampu zoxinaniso zaseJamani zilelinye lamajelo isigidimi samaNgqina kaYehova esafika ngawo eRashiya, nangona oku kusenokuvakala kungakholeleki. Safika apho namabanjwa aseRashiya awayeseJamani awayengabalibali abantu abanenkalipho nabomeleleyo ‘abangamaNgqina’ nawathi mhlawumbi ngenxa yeso sizathu alufumanisa lunomtsalane unqulo lwabo.” Kwinkampu yamabhinqa yaseRavensbrück yodwa nje, kwakukho iingxelo ezithi amashumi abemi baseRashiya abaselula basamkela isigidimi seBhayibhile esasivakaliswa ngamaNgqina kaYehova.

Emva kwemfazwe, amabanjwa awayevela kumazwe aseMpuma Yurophu nawathi aba ngamaNgqina kaYehova abuyela kumazwe awayezalelwe kuwo. Apho afundisa ngenzondelelo ukuba ulawulo loBukumkani bukaThixo kuphela kwethemba loxolo oluhlala luhleli. Ngaloo ndlela, inani lamaNgqina eMpuma Yurophu landa ngokuphawulekayo. NgoAprili 1946, kwakukho angaphezu kwamawaka amane awayeshumayela eSoviet Union, ibe eli nani laphindaphindeka ngokukhawuleza. NgoSeptemba 1946, amaNgqina aseRomania aqhuba indibano yesithili eBucharest ekwakuze kuyo abantu abanokuba li-15 000.

Kungekudala emva koko, kwaqalisa iMfazwe Yomlomo, yaye oku kwaluphelisa ukhenketho nonxibelelwano phakathi kweMpuma Yurophu neNtshona. Ngaphezu koko, abalawuli ababesandul’ ukumiselwa eMpuma Yurophu baqalisa ukuwachasa amaNgqina kaYehova. Okulusizi kukuba bawagqala amaNgqina njengesisongelo, kwaye amaninzi aphoswa ezintolongweni. Phezu kwako nje oku, ngowe-1951, eCzechoslovakia kwakukho amaNgqina akhutheleyo angama-3 705; eHungary, ayengama-2 583; eYugoslavia, engama-617; ibe ePoland ayengaphezu kwe-15 000.

Ulwando Luyaqhubeka Phezu Kwayo Nje Inkcaso

Ngowe-1967, uMaurice Hindus wabhala ngamaNgqina kaYehova kwincwadi yakhe ethi The Kremlin’s Human Dilemma. Oko wakuthethayo kwakusebenza kumaNgqina aseSoviet Union nakwezinye iindawo eziseMpuma Yurophu. “Nangona esebenza ngokufihlakeleyo, ayazingelwa aze agwetyelwe ukusebenza nzima entolongweni. Kodwa akukho kuwanqumamisa. Ecinezelwa kwenye indawo, aqhambuka kwenye . . . Abonakala engenakutshatyalaliswa njengamapolisa aseSoviet.”

Ngentlakohlaza yowe-1951, amaNgqina kaYehova eSoviet Union agqejwa olungophiyo. Angaphezu kwamawaka asixhenxe kwiiriphabliki zaseSoviet eziseYurophu abanjwa aza aya kulahlelwa kwiinkampu zentolongo ezikwiindawo ezikude zelo lizwe, kuquka iSiberia neVorkuta, emagqagaleni akweliya lasentla. Waba yintoni umphumo?

UKolarz uthi, “Oku kwakungesosiphelo ‘samaNgqina’ eRashiya, kodwa yayisisiqalo sexesha elitsha kumsebenzi wawo wokuguqula abantu. Ade azama ukuluvakalisa ukholo lwawo naxa ayemi ezikhululweni endleleni ngoxa ayefuduswa. Ngokuwafudusa kwakhe uRhulumente waseSoviet waba nelona galelo libonakalayo ekusasazeni ukholo lwawo. Ekhutshwe kwiilali zawo ezikwanti ‘amaNgqina’ eziswa kwilizwe eliphangaleleyo, nakuba yayililizwe eloyikekayo leenkampu zoxinaniso nezamakhoboka.”

Ezintolongweni Nangaphandle

Kanye njengoko amaKristu enkulungwane yokuqala ayeshumayela engayeki naxa ayetshutshiswa, namaNgqina kaYehova eSoviet Union enza okufanayo. (IZenzo 5:​42) UHelene Celmina, ummi waseLatvia owayevalelwe entolongweni ngezityholo zamatyala ekwakusithiwa uwenzile, uthi kwicandelo lenkampu yentolongo yasePotma apho wayevalelwe khona ukususela ngowe-1962 ukusa kowe-1966, kwakukho amabanjwa anokuba ngama-350. Wathi: “Malunga nesiqingatha sawo, yayingamaNgqina kaYehova.” Kwincwadi yakhe ethi Women in Soviet Prisons, lo kaCelmina wabhala ngezinto awazibonayo kuloo nkampu:

“Uncwadi lufika rhoqo luvela eBrooklyn, lukwimeko entle yaye luzizixa ezininzi lungena ngamajelo angekho mthethweni nalungelelaniswe kakuhle . . . Akukho namnye wayenokuyiqonda indlela uncwadi olwalelweyo olunokunyebelezela ngayo lungene kulo mmandla obiyelwe ngocingo oluhlabayo nekungafane kungene bantu kuwo​—⁠nokwenza kungene uncwadi oluvela eUnited States! AmaNgqina kaYehova amaninzi agwetyelwa ukusebenza nzima kangangeminyaka elishumi ngenxa nje yokugcina iinkupho ezimbalwa zephephancwadi iMboniselo emagumbini awo. Ekubeni abantu bebanjwa ngenxa yokuba benale mibhalo, siyaqondakala isizathu sokuba abasemagunyeni baxhalabe baze banxube ngokubakho kolu ncwadi apha enkampini.”

Ngoncedo lukaYehova, akukho nto yayinokuthintela ukusasazwa koku kudla kokomoya! Lo kaCelmina wathi: “Akukho bani uyaziyo indlela [IMboniselo] engena ngayo enkampini. Kumelwe kukhunjulwe ukuba ngemva kokuwiswa kwesigwebo, onke amabanjwa akhululwa yonke into eyimpahla aze aphendla-phendlwe ngokucokisekileyo. Ekufikeni kwawo enkampini banjwa ngalinye liphendlwa ngokucokisekileyo kwakhona, ngenyameko enkulu. Iisutkheyisi ziyagubhululwa kuqwalaselwa nezinemiphantsi ngamibini. Akukho lundwendwe luvunyelwayo ukungena enkampini ngaphandle kwesizathu esifanelekileyo. Xa amabanjwa ephumela ngaphandle kwengingqi yenkampu esiya kusebenza emasimini, angqongwa ngabalindi abaxhobileyo yaye akukho mntu uvunyelwayo ukuba asondele kumabanjwa. Xa ebuyela enkampini ngokuhlwa ibanjwa ngalinye liphendlwa ngokucokisekileyo. Kodwa phezu kwalo nje eli liso libukhali, uncwadi lwaseBrooklyn luyafikelela kubafundi balo.”

Kwangaxeshanye, amaKristu omeleleyo awayengaphandle kweenkampu zentolongo zaseSoviet enza umgudu wokuqhubeka nomsebenzi wokushumayela nokufundisa ekuhleni. Oku kwabonakala ngeempapasho neefilimu ezaziveliswa kumgudu wokuphazamisa ubulungiseleli bawo. Ngokomzekelo, ngowe-1978 kwapapashwa incwadi ethi The Truths About Jehovah’s Witnesses, ngenjongo “yokuhambisela phambili imfundo yokungakholelwa kuThixo phakathi kwabalandeli beli hlelo lonqulo,” njengoko isitsho ingcaciso yentshayelelo yayo.

Phakathi kwezinye izinto, umbhali wayo, uV. V. Konik, wabonisa ukuba amaNgqina kaYehova aqhuba iintetho zesidlangalala rhoqo kwimingcwabo nemitshato yawo. Wabhala oku, “Ngokomzekelo, ngoAgasti 1973, kwilali yaseKrasnaya Polyana, kwingingqi yaseKrasnodarskiy, kwakutshata amalungu amabini ale ntlangano, yaye kwakuze abantu abamalunga nama-500. Abashumayeli abathandathu banikela iintetho kuloo mtshato, yaye iintetho zabo zazisasazwa ngezandisi-lizwi ezibini. Kwandula ke kwenziwa umdlalo owawubonisa indlela amaNgqina kaYehova ancokola ngayo nabantu bezinye iinkonzo nabo bangakholelwayo kuThixo.”

Ewe, phezu kwako nje ukuvalwa komsebenzi wawo, amaNgqina kaYehova kulo lonke elaseMpuma Yurophu aqhubeka ezishumayela ngenzondelelo iindaba ezilungileyo zoBukumkani bukaThixo ethobela umyalelo obuprofeti kaKristu. (Mateyu 24:​14) Ekugqibeleni, ngoMeyi nangoJuni 1989, amaNgqina kaYehova amkelwa ngokusemthethweni ePoland naseHungary, ngoAprili 1990 eRomania, ngoMatshi 1991 eSoviet Union, naseBulgaria ngoJulayi 1991. Kwaye umsebenzi wawo uqhutywa ngaphandle kokuphazanyiswa eCzechoslovakia.

Abantu Abonwabileyo Abeze Ezindibanweni

Ekubeni sele uzivile ke ezi ziganeko zexa elidluleyo, mhlawumbi unokusiqonda kakuhle isizathu sokuba amashumi amawaka abantu ababeye kwiindibano zaseMpuma Yurophu babevuya​—⁠bentywizisa, besangana, beqhwaba izandla, bewangawangisa izandla kuloo mabala.

Indibano eyayiseBudapest, eyayisePrague neyayiseZagreb zatyunjwa ukuba zibe “ziindibano zezizwe ngezizwe,” yaye kwenziwa amalungiselelo akhethekileyo okuhlalisa amashumi amawaka eendwendwe ezazivela kwamanye amazwe. KwiSoviet Union, iindibano zaziqhutyelwa kwizixeko ezisixhenxe yaye kwakuze abantu abangama-74 252; ePoland kwakuze abantu abali-131 554 kwiindibano zayo ezili-12; yaye babengama-34 808 abantu ababeze kwiindibano ezisi-8 ezaziqhutywa eRomania. Nangona amaNgqina engazange akwazi ukuba nendibano eBulgaria, malunga namakhulu amathathu avela apho awela umda esinge eTesalonika, eGrisi, apho anandipha ucwangciso ngolwimi lwawo.

Kula maNgqina aseMpuma Yurophu ukulungiselela nokwamkela iindwendwe ezingamawaka amaninzi kwakungeyonto ilula. Khawukucinge ngolu hlobo oku: ESoviet Union, kwakungazange ngaphambili kubekho iindibano ezinjalo! Yaye ukwamkela iindwendwe ezingamashumi amawaka, ezathi zamkelwa ngamaNgqina aseBudapest nawasePrague, kwakungumsebenzi omkhulu ngokwenene. Ngaphezu koko, khawuthelekelele nje ukuba nendibano eZagreb apho kwakukho isisongelo semfazwe yamakhaya nesandi sokuqhushumba esasivakala mgama!

Ngokuqinisekileyo, uya kukuvuyela ukufunda le ngxelo ilandelayo ngokuphathelele ezi ndibano.

[Iimaphu ezikwiphepha 19]

(Ukuba ufuna inkcazelo ehlahlelwe kakuhle, yiya kwimpapasho)

IINDAWO EZINTATHU EZAZINEENDIBANO ZEZIZWE NGEZIZWE NEENDAWO EZISIXHENXE EKWAQHUTYELWA KUZO IINDIBANO ESOVIET UNION

ISOVIET UNION

ITALLINN

IKIEV

ILVOV

ICHERNOVTSY

IODESSA

IPOLAND

IJAMANI

ICZECHOSLOVAKIA

IPRAGUE

IOSTRIYA

IHUNGARY

IBUDAPEST

IROMANIA

IYUGOSLAVIA

IZAGREB

IBULGARIA

IALBANIA

I-ITALI

IGRISI

ITURKEY

[Imaphu]

ISOVIET UNION

IALMA-ATA

IUSOLYE-SIBIRSKOYE